Ko e Heigoa ne Omoi a Tautolu ke Fakamatala?
1. Matutaki fēfē e fakaalofa mo e gahua fakamatala ha tautolu?
1 Ko e fakamatala e tala mitaki he Kautu he Atua ko e gahua kua mua atu e aoga kua maeke ia tautolu ke taute he vahā nei. Ka e mooli, he taha e gahua nei kua maeke ia tautolu ke fakatātā e omaoma ha tautolu ke he ua e poakiaga ne mua, ko e fakaalofa ki a Iehova mo e fakaalofa ke he katofia ha tautolu. (Mare. 12:29-31) Ko e fakaalofa e malolō ne omoomoi a tautolu ke eke mo tau tagata kua makutu he fakamatala.—1 Ioa. 5:3.
2. Fakakite fēfē he fakamatala ha tautolu e fakaalofa ma Iehova?
2 Fakaalofa ke he Atua: Ko e fakaalofa ha tautolu ma e Kapitiga fakahelehele ko Iehova ka omoomoi a tautolu ke vagahau hake ke lalago a ia. Kua kavi ke he 6,000 tau ne kua ekefakakelea e Satani a ia. (2 Kori. 4:3, 4) Ko e mena ia, ne talitonu ai e tau tagata ko e mena fakakikiveka he Atua e tau tagata agahala ke he afi, ko ia ko e Atua Tolu Taha fakagalogalo, ti nakai fiafia a ia ke he tau tagata. Tokologa ne kua talahau kua nakai fai Atua. Kua manako mooli a tautolu ke iloa he tau tagata e tala mooli hagaao ke he ha tautolu a Matua he lagi! Ko e tau laliaga fakamakamaka ha tautolu ke eke mo tau fakamoli he Atua kua fakafiafia lahi a ia ka e fakaita a Satani.—Fakatai 27:11; Hepe. 13:15, 16.
3. Puhala fe ne fakakite he fekafekauaga ha tautolu e fakaalofa ke he katofia?
3 Fakaalofa ke he Katofia: He tau magaaho takitaha ne fakamatala a tautolu ke he taha tagata, kua fakakite e tautolu e fakaalofa ki a ia. Kua lata lahi e tau tagata ke logona e tala mitaki he tau magahala uka nei. Tokologa ne tuga e tau Nineva he vahā ha Iona ne “nakai iloa e lautolu po ko fe e lima matau ha lautolu, po ko fe e lima hema ha lautolu.” (Iona 4:11) Fakaako he fekafekauaga ha tautolu e tau tagata ke he puhala ke fiafia mo e ke kautū e tau momoui. (Isaia 48:17-19) Moua foki e lautolu e amaamanakiaga. (Roma 15:4) Ka fanogonogo a lautolu mo e taute e tau mena ne fakaako e lautolu, to “fakamomoui” a lautolu.—Roma 10:13, 14.
4. Ko e heigoa ka nakai nimo e Iehova?
4 Ko e tau tama mitaki ne nakai fakakite ni e fakaalofa ke he tau matua ha lautolu he tau magaaho ne fakatoka pauaki. Kua eketaha a lautolu ke fakaalofa he tau magaaho oti. Pihia foki, ko e fakaalofa lahi ma e Atua mo e katofia ka omoi a tautolu ke mataala ke he tau tuaga ke fakamatala he tau magaaho oti, nakai ni he tau magaaho fakatoka pauaki ke fakamatala. To nakai okioki a tautolu he fakamatala. (Gahua 5:42) Ko e fakaalofa pihia to nakai nimo e Iehova.—Hepe. 6:10.