Fakaaoga e Faahi Kupega Hila ha Tautolu ke Fakaako e Tau Fanau ha Mutolu
1. Ko e heigoa e foliaga he vala he ha tautolu a faahi Kupega Hila ne fakamataulu “Children”?
1 Kua talaga ha tautolu a faahi Kupega Hila, jw.org, ke lata mo e tau tagata kehekehe. Ko e vala he faahi Kupega Hila ne fakamataulu “Children” (Onoono ki lalo he Bible Teachings > Children) ke lagomatai e tau fanau ikiiki mo e tau matua ha lautolu ke fetataaki mo e fakatata ki a Iehova. (Teu. 6:6, 7) Fakaaoga fēfē e koe e vala nei ke fakaako e tau fanau haau?
2. Fifili fēfē e koe e tau vala tala kua latatonu mo e tau tau moui he tau fanau haau ke fakaako ki ai?
2 Kia Hikihiki: Ko e mena kehekehe e tau tama takitaha. (1 Kori. 13:11) Fifili fēfē mogoia e koe e tau vala tala kua felauaki tonu mo e tau tau moui he tau fanau haau ke fakaako ki ai? Hūhū hifo ki a koe: ‘Ko e heigoa ka fiafia e tama haaku ki ai? To lahi fēfē e mena ka maama e lautolu? Fiha e leva ka maeke ia lautolu ke hagaaki ki ai?’ Ma e tau fanau ne tolu e tau ki lalo, liga fakatutala a koe ke he tau tala he “My Bible Lessons.” Fiafia e falu magafaoa ke he tau tala Tohi Tapu he vala “Teach Your Children.” Fakatutala foki ke he tau vala ka mui mai.
3. Fakaaoga fakamitaki fēfē he tau matua e tau tala mo e tau gahua i lalo he “Family Worship Projects”?
3 Tau Matagahua he Tapuakiaga he Magafaoa: Ko e tau matagahua nei ko e tau puhala ke lagomatai e tau ulu magafaoa ke fakaako mo e tau fanau ha lautolu. Ke iloa e puhala ke fakaaoga aki e tau tala mo e tau gahua, kiliki e puha ne tu ai “Download” ti totou e “Parents’ Guide” ma e tau matagahua takitaha. Fakaaoga e tau fakatino, tuga e tau fakatino ke valivali, ke fakaako e tau fanau ne ikiiki hifo. Lagomatai e tau fanau lalahi ke taute e tau fakaakoaga. Ko e tau mena oti he tau matagahua takitaha kua hagaao ke he taha e tala po ke fakaakoaga Tohi Tapu, ti maeke e tau fanau oti ke fakalataha ke he taha e matagahua he tapuakiaga he magafaoa.
4. Ko e heigoa ka moua i loto he vala “Become Jehovah’s Friend”?
4 Eke mo Kapitiga ha Iehova: Ko e tau vitiō, tau lologo, mo e tau gahua he vala nei he ha tautolu a faahi Kupega Hila to lagomatai e tau matua ke fakaako e Kupu he Atua ke he tau tama ikiiki ha lautolu. (Teu. 31:12) Igatia e tau vitiō kukū mo e fakaakoaga aoga i ai. Ko e tau gahua tuga e pelē kumikumi kua peehi e aoga he tau fakaakoaga ia. Ha kua fa fiafia e tau fanau ke lologo—ti lagomatai he lologo e tau fanau ke manatu e tau mena ha lautolu ne fakaako—kua tuku tumau ai e tau lologo he Kautu mo e tau lologo ne fati pauaki ma e tau fanau.
5. Ko e ha kua lata e tau matua ke ole ki a Iehova ke lagomatai a lautolu ke fakaako e tau fanau ha lautolu ke he kupu mooli?
5 Tau mamatua, manako a Iehova ke kautū a mutolu ko e tau matua fifine mo e tau matua taane. Ti ole ki a ia ke lagomatai a mutolu ke fakaako e tau fanau ha mutolu ke he kupu mooli. (Fakafili 13:8) Mo e lagomataiaga ha Iehova, to maeke a koe ke fakaako e tau fanau haau ke “maeke ke fakailoilo a koe ke moua ai e moui ke he tua ha ha ia Keriso Iesu.”—2 Timo. 3:15; Fakatai 4:1-4.