Puha Hūhū

◼ Ko e heigoa kua lata he tau fanau ke fakaako ke hohoko atu ke he katoatoaaga fakaagaaga?

Gahua lahi e tau matua Kerisiano ke feaki hake e tau fanau ha lautolu “ke he tau kupu akonaki mo e tau kupu fakamafana he Iki [Iehova].” (Efeso 6:4) Ma e fakatai, ne mailoga he tau matua kua aoga ai ke fakatutala e lauga he aho mo e tau fanau ha lautolu he tau magaaho pogipogi takitaha. Magahala he tapuakiaga fakamagafaoa mo e falu magaaho foki, liga maeke e tau magafaoa ke kitekite mo e fakatutala auloa e taha vitiō, fakatutala e taha vala tala pauaki mai he tohi Young People Ask, liu taute taha tala mai he Tohi Tapu, po ke taute e tau fakamahaniaga. Pete ia, ke maeke e tau fanau ke “hohoko atu . . . ke he katoatoaga,” kua lata ia lautolu ke fakaako foki e tau kupu mooli hokulo he Tohi Tapu.​—Hepe. 6:1.

Manamanatu ke he mena kua fakaako atu e tautolu ki a lautolu ne feleveia he fonua. He ahiahi fakamua po ke liu aahi atu, fa mahani a tautolu ke kamata e fakaako Tohi Tapu ka fakaaoga e tohi Ko e Heigoa ne Fakaako Mooli he Tohi Tapu? Ka oti e tohi ia, fakaaoga e tautolu e tohi Tapuaki ke he Atua Moli Tokotaha. Ko e ha? Ko e tohi Fakaako Tohi Tapu ne kua foaki ke he tagata fakaako e iloilo mukamuka ke he tau Tohiaga Tapu. Ko e tohi Tapuaki ke he Atua kua fakaako a lautolu ke fakagahua e tau matapatu fakaakoaga he Tohi Tapu he tau momoui ha lautolu. Ko e fakaakoaga he tau tohi ua ia ne lagomatai e tau matakainaga foou ke “fai vaka” ke he Keriso mo e “fakatumau ke he tua.” (Kolo. 2:6, 7) To aoga foki nakai e tau fanau ha tautolu mai he vala tala nei? Kua lata foki ia lautolu ke fakaako hagaao ke he lukutoto, ko e Kautu, mo e tuaga he tau tagata mamate. Lata foki ke iloa he tau fanau e kakano ne kua fakaatā he Atua e matematekelea mo e puhala ke mailoga e tau aho fakamui he fakatokaaga nei. Lata foki ia lautolu ke mauokafua ko e tau Fakamoli a Iehova ne moua e kupu mooli. Ko e tau fuata kua lata ke maama e tau matapatu fakaakoaga he Tohi Tapu mo e puhala ke “mahani he ako mua ai ke mailoga.” (Hepe. 5:14) Mooli ai, kua lata e tau matua ke manamanatu ke he tau tau he moui mo e maamaaga he tau fanau ha lautolu. Pete ia, tokologa e tau fanau ne kua maeke ke fakaako e kupu mooli hokulo he Tohi Tapu pete ni ko e tau tama ikiiki a lautolu.​—Luka 2:42, 46, 47.