Taha e Senetenari he Fakapuloa e Kautu!
1. Ko e heigoa ne fakamafana e tau tagata ha Iehova ke taute he teitei taha e senetenari kua mole?
1 “Kitiala, kua pule e Patuiki! Ko mutolu haana tau hukui kua kitia. Ko e mena ia kia fakapuloa, fakapuloa, fakapuloa, e Patuiki mo e haana kautu.” Mo e tau kupu omoomoi ia ne talahau he Matakainaga Rutherford he teitei taha e senetenari kua mole, kua fakamafana ke he tau tagata ha Iehova ke fakailoa e fekau he Kautu ke he tau kalakala oti. Ti kua taute pihia e tautolu! Tuga e tau Kerisiano fakamua atu, kua fakamatala e tautolu e tala mitaki he Kautu “ke he tau tagata oti ke he lalolagi.” (Kolo. 1:23) He onoono ki tua ke he senetenari kua mole, ko e heigoa ha tautolu kua taute ke fakapuloa e Kautu he Atua? Maeke fēfē a tautolu ke matutaki ke fakapuloa ai he hohoko a tautolu ke he 100 e tau he fakatū e Kautu?
2. Puhala fe kua omoi he tau tohi ha tautolu e Kautu he Atua?
2 Onoono ki Tua: Ke he tau hogofulu tau, ne omoi he tau tohi ha tautolu e Kautu he Atua. Tali mai he 1939 ko e matapatu mekasini ha tautolu ne mataulu: Ko e Kolo Toko Fakapuloaaga he Kautu a Iehova. Kua fakatutala tumau e mekasini nei ke he Kautu mo e mena ka taute ai. Ko e mekasini Awake! kua fakamaama foki ko e Kautu he Atua ni e amaamanakiaga ma e tau tagata. Ko e felauaki tonu ha ia ha ko e tau mekasini ua nei kua mua atu e loga e vagahau kua fakaliliu ai mo e tufa ke he lalolagi katoa mogonei!—Fakakite. 14:6.
3. Ko e heigoa falu puhala ne fakaaoga e tautolu ke fakapuloa e Kautu?
3 Kehekehe e tau puhala kua fakaaoga he tau tagata ha Iehova ke fakapuloa e Kautu. He vahā fakamua, ne fakaaoga e tautolu e tau motokā fakataogo leo, tau fakapuloaaga he letiō, mo e tau lapakofe fakatagi. Ko e tau puhala ia kua lagomatai a tautolu ke folafola e tala mitaki ke he tokologa e tagata he taha e magaaho, he nakaila tokologa ia e tagata fakapuloa he Kautu. (Sala. 19:4) He tau tau foou nei, ne tuku e tautolu e tau vala tala ke he jw.org, ti kua fakapuloa e Kautu ke he totou miliona—putoia a lautolu ne nonofo he tau motu ne fakakaupā e gahua ha tautolu.
4. Ko e heigoa e tau puhala pauaki ne kua fakaaoga e tautolu?
4 Fakaaoga foki he tau tagata ha Iehova e tau puhala pauaki ke folafola e fekau he Kautu. Ma e fakatai, kamata mai he lotoga he tau atu tau 1990, ne eketaha a tautolu ke fakalaulahi e gahua ha tautolu he taha fale ke he taha fale he fakamatala he tau paaka, tau paakaaga peleōafi, mo e tau pisinisi. Nakaila leva ia, ne fakatokatoka e tautolu ke he tau matakavi pauaki he taone ke fakamatala ke he toloaga tagata he tau taone lalahi he lalolagi katoa. Lafi ki ai, loga e fakapotopotoaga ne fakamatala ke he toloaga he tau matakavi ha lautolu he fakaaoga e tau peleō fata tohi mo e tau laulau ne fakatutū he tau matakavi ne tokologa e tagata ne o fano ai. Ka e mooli, ko e matapatu puhala he fakamatala ha tautolu he Kautu ko e mai agaia ni he taha fale ke he taha fale.—Gahua 20:20.
5. Ko e heigoa e tau magaaho ka hafagi mai he tau foou he fekafekauaga ma e tokologa ia tautolu?
5 Onoono ki Mua: Ka kamata e tau foou he fekafekauaga ia Sepetema, to tokologa ka kamata ke paionia tumau. Maeke nakai ia koe ke fakalataha atu mo lautolu? Ka nakai pihia, maeke nakai ia koe ke paionia fakakū he falu magaaho? He maeke a koe ke paionia po ke nakai, to fakamonuina mooli e Iehova a koe ma e ha foakiaga ka taute e koe ke fakalataha katoa ke he fakapuloaaga he Kautu.—Mala. 3:10.
6. Ko e ha a Oketopa 2014 ko e mahina pauaki?
6 He mahina ha Oketopa 2014, ko e katoa a ia he 100 e tau he fakatū e Kautu. Felauaki ai, ko e fufuta ma e fonua he Ko e Kolo Toko he mahina ia to hagaaki ke he Kautu he Atua. He ha nakai eketaha ke tufa e fufuta nei ke he tokologa e tau tagata? He onoono atu a tautolu ke he anoiha, kia igatia a tautolu mo e matutaki ke “fakamatala e tala mitaki ke he tau mena he kautu he Atua” ke he tau tagata oti ka fanogonogo.—Gahua 8:12.