Fakaaoga e Tau Magaaho Haau ke Folafola e Fekau he Kautu!

1. Ko e heigoa e fakaakoaga ka ako e tautolu mai he fifitakiaga ha Tavita?

¹ Ko e Patuiki ko Tavita ko e tagata ne nakai fakaatā e tau tuaga haana ke taofi a ia. Ma e fakatai, ne manako a Tavita ke talaga e fale ma Iehova. He mogo ne taofi a ia ke taute e mena ia, ne hiki e Tavita e tau foliaga haana ti lagomatai ke tauteute ai ke lata mo Solomona ke talaga e faituga. (1 Patu. 8:17-19; 1 Nofo. 29:3-9) He nakai manamanatu ke he mena kua nakai maeke a ia ke taute, ne hagaaki a Tavita ke he mena kua maeke a ia ke taute. Maeke fēfē a tautolu ke muitua e fifitakiaga ha Tavita he kumi puhala ke folafola e fekau he Kautu?

2. Ko e heigoa e kumikumiaga fakatagata ka taute e tautolu?

² Taute e Mena kua Maeke ia Koe: Tokologa ne fakamukamuka e tau momoui ha lautolu ke eke mo tau paionia fakakū po ke paionia tumau. (Mata. 6:22) Maeke nakai a koe ke fakalataha mo lautolu? He kumikumi e tau tuaga haau puhala he liogi, to kitia e koe ‘kua hafagi e gutuhala kua lahi mo e aoga lahi’ ki a koe. Ka pihia, fakaaoga e magaaho ia!​—1 Kori. 16:8, 9.

3. Ko e heigoa e tau magaaho ke fakamatala ka fakaaoga e tautolu pete ne nakai fakaatā he tau tuaga a tautolu ke paionia?

³ Ka e kua ka taofi he tau tuaga haau a koe ke paionia? Ua tiaki noa foki falu magaaho kua fakaatā ki a koe. Ma e fakatai, ka matutaki a koe mo e tau tagata ne nakai tua he gahuaaga haau, he ha he fakaaoga e magaaho kua lata ke fakamatala ki a lautolu? Po ke ka fehagai a koe mo e tau lekua malolō tino, maeke nakai a koe ke fakaaoga e tau magaaho ke fakamatala ki a lautolu ne foaki e levekiaga malolō tino ki a koe? Manatu na fai levekiaga ma lautolu kua fakakaupā e gahua ke hokotaki 15 e minuti ke he gahua ha lautolu he fonua ha ko e tau tau momoui po ke hagahaga kelea e tuaga malolō tino. Ka tohi hifo e hokotaki gahua he fonua haau he mahina, kia tuku foki e tulā ne fakaaoga he fakamatala nakai mautali ti pihia mo e tau tohi foaki, putoia e tau tuleke mo e tau uiina Fakamanatuaga mo e fonoaga. Liga ofo a koe he mafiti e lafilafi hake he tau tulā ia mai he tau magaaho ikiiki!

4. Ko e heigoa e fifiliaga haau?

⁴ Ko e heigoa ni e tau tuaga fakatagata ha tautolu, kia fakaaoga e tautolu e tau magaaho oti ke folafola e tala mitaki. To moua e tautolu e fiafia he iloa kua taute e tautolu e tau mena oti kana kua maeke ia tautolu ma e Kautu.​—Mare. 14:8; Luka 21:2-4.