Fakaako e Kupu Mooli

Kamata ia Sepetema, ko e Tohi Fakaaoga he Feleveiaaga he Moui mo e Fekafekauaga to putoia ai e fakafeleveiaaga fakataitai foou ne mataulu “Fakaako e Kupu Mooli.” Ko e foliaga ha tautolu ke fakatutala ke he kupu mooli he Tohi Tapu, he fakaaoga e hūhū mo e kupu tohi.

Ka kitia e tautolu e fiafia, maeke a tautolu ke fakalagalaga e makai ke liu aahi atu foki he toka e tohi po ke fakakite e vitiō mai he jw.org. Lata ia tautolu ke liliu atu he tau aho gahoa ke matutaki mai he fakatutalaaga fakamua. Ko e tau fakafeleveiaaga foou mo e tau kotofaaga he tagata fakaako to fakavē ke he fakakatoatoaaga he veveheaga ne moua he tohi What Can the Bible Teach Us? (nakaila moua faka-Niue). He puha he matahiku he veveheaga to moua e tautolu falu kupu tohi foki ke lagomatai a tautolu ke taute e tau liliu aahi atu po ke taute e fakaakoaga he fakaaoga hokoia ni e Tohi Tapu.

Taha ni e puhala ne takitaki atu ke he moui. (Mat 7:13, 14) He tutala a tautolu ke he tau tagata ne kehekehe e tau lotu mo e tupumaiaga, lata ia tautolu ke fakakite e tau kupu mooli he Tohi Tapu ne kua futiaki ki a lautolu takitokotaha. (1Ti 2:4) He mahani lahi a tautolu ke he tau mataulu kehekehe he Tohi Tapu ti holo ki mua e lotomatala ha tautolu he “fakatokatoka fakahako e kupu moli,” to tupu lahi e fiafia ha tautolu mo e to kautū he fakaako e kupu mooli ke he falu.​—2Ti 2:15.