VALA TALA FAKAAKO 8
Kumi Fakamakutu e Mafola he Totoko e Mahekeheke
“Kia kumi fakamakutu e tautolu e tau mena ke tupu ai e mafola, mo e tau mena ke fefakamafanaaki ai.”—ROMA 14:19.
LOLOGO 39 Ko e Mafola he Tau Tagata he Atua
FAKAMAAMAAGA KŪa
1. Maeke fēfē e mahekeheke ke lauia e magafaoa ha Iosefa?
KUA ofania e Iakopo e tau tama taane oti haana, ka e mua atu e fakahelehele e ia a Iosefa ne 17 e tau he moui. Tali atu fēfē e tau lafu ha Iosefa? Mahekeheke a lautolu ki a ia, ti takitaki he mahekeheke a lautolu ke vihiatia lahi mahaki. Nakai fai mena ne taute e Iosefa ke vihiatia he tau lafu haana a ia. Ka e fakafua e lautolu a Iosefa ke he fakatupaaga, ti pikopiko ke he matua taane he pehē kua kelipopo he manu vale e tama fakahele haana. Fakatupu he mahekeheke a lautolu ke fakatauhele e mafola he magafaoa mo e fakamamahi e loto he matua taane ha lautolu.—Kene. 37:3, 4, 27-34.
2. Ia Kalatia 5:19-21, ko e ha ne hagahaga kelea lahi e mahekeheke?
2 He tau Tohiaga Tapu, kua tohi e mahekehekeb mo e “tau gahua he tino” ke mate ai ti taofi e tagata ke nakai moua e Kautu he Atua. (Totou Kalatia 5:19-21.) Ko e mahekeheke ko e vaka ne fakatupu e tau fua kona tuga e feitaaki, taufetoko, mo e vale.
3. Ko e heigoa ka fakatutala a tautolu he vala tala nei?
3 Ko e fakataiaga he tau lafu ha Iosefa ne fakakite e puhala kua moumou he mahekeheke e tau fakafetuiaga mo e fakatauhele e mafola he magafaoa. Pete he nakai taute e tautolu e tau mena ne taute he tau lafu ha Iosefa, ka e moua e tautolu oti e loto nakai mitaki katoatoa mo e fakavaia. (Iere. 17:9) Ko e mena ia ati taufetului a tautolu he falu magaaho ke he tau logonaaga mahekeheke. Kia fakatutala la tautolu mogonei ke he falu fakataiaga hataki he Tohi Tapu kua lagomatai a tautolu ke kumikumi e tau kakano kua maeke e tau logonaaga mahekeheke ke vakavaka he tau loto ha tautolu. To fakatutala mogoia a tautolu ke he falu puhala aoga ke totoko e mahekeheke ka e fakaholo ki mua e mafola.
KO E HEIGOA KA FAKATUPU E MAHEKEHEKE?
4. Ko e ha ne mahekeheke e tau Filisitia ki a Isaako?
4 Monuina fakatino. Ko Isaako ko e tagata mautū, ti mahekeheke e tau Filisitia ke he tau monuina ha Isaako. (Kene. 26:12-14) Ne ponoti foki e lautolu e tau vai keli ne falanaki a Isaako ke fakainu aki e tau fuifui manu haana. (Kene. 26:15, 16, 27) Tuga e tau Filisitia, falu tagata he vahā nei kua mahekeheke ki a lautolu ne loga atu e tau koloa ia lautolu. Nakai ni manako a lautolu ke he tau mena he falu ka e nakai fia loto foki a lautolu ke moua he falu e tau koloa ia.
5. Ko e ha ne mahekeheke e tau takitaki lotu ki a Iesu?
5 Loto fakaaue mai e falu. Ko e tau takitaki lotu Iutaia ne mahekeheke ki a Iesu ha kua lahi e loto fakaaue he tau tagata tokologa ki a ia. (Mata. 7:28, 29) Ko Iesu ko e hukui he Atua ti fakaako e ia e kupu mooli. Pete ia, fakaholofa he tau takitaki lotu nei e tau pikopiko kelea mo e fakavai ke moumou aki e higoa mitaki ha Iesu. (Mare. 15:10; Ioane 11:47, 48; 12:12, 13, 19) Ko e heigoa e hatakiaga ne fakaako e tautolu mai he tala nei? Lata a tautolu ke totoko e tau aga ke mahekeheke ki a lautolu ne mafana e fakapotopotoaga ki ai ha ko e tau mahani mitaki ha lautolu. Ti lata a tautolu ke lali ke fifitaki e tau puhala totonu ha lautolu.—1 Kori. 11:1; 3 Ioa. 11.
6. Fakakite fēfē e Tioterefe e mahekeheke?
6 Tau kotofaaga he fakapotopotoaga. He senetenari fakamua, ne mahekeheke a Tioterefe ki a lautolu ne takitaki i loto he fakapotopotoaga Kerisiano. Manako a ia ke “fia mua” ke he tau matakainaga he fakapotopotoaga, ti fakaholofa e ia e tau tala kelea ne nakai fakalilifu e aposetolo ko Ioane mo e falu matakainaga taane. (3 Ioa. 9, 10) Pete to nakai taute e tautolu e mena ne taute e Tioterefe, maeke agaia a tautolu ke mahekeheke ke he matakainaga Kerisiano kua moua e kotofaaga ne amanaki a tautolu ke moua, mua atu ka logona hifo e tautolu kua lotomatala foki a tautolu ke taute e kotofaaga ia.
Ko e tau loto ha tautolu kua tuga e kelekele, mo e tau mahani mitaki ha tautolu kua tuga e tau fiti fulufuluola. Ka ko e mahekeheke ne tuga e pupu kona. Fakaapitia he mahekeheke e tupuaga he tau mahani mitaki tuga e fakaalofa, fakaalofa hofihofi noa, mo e totonu (Kikite paratafa 7)
7. Maeke fēfē a tautolu ke lauia he mahekeheke?
7 Ko e mahekeheke kua tuga e pupu kona. Ka vakavaka e tega he mahekeheke he tau loto ha tautolu, to uka ke moumou. Fakalagalaga he mahekeheke e tau logonaaga kelea tuga e ita tafuā, fakatokoluga, mo e lotokai. Maeke e mahekeheke ke taofi e tupuaga he tau mahani mitaki tuga e fakaalofa, fakaalofa hofihofi noa, mo e totonu. Ka kitia agataha e tautolu e mahekeheke kua kamata ke tuputupu, lata a tautolu ke huo kehe ai he tau loto ha tautolu. Totoko fēfē e tautolu e mahekeheke?
FEAKI E FAKATOKOLALO MO E MAHANI FAKALATALATA
Totoko fēfē e tautolu e mahekeheke ne tuga e pupu? He lagomatai he agaaga tapu he Atua, maeke ke huo kehe e mahekeheke mo e hukui aki e fakatokolalo mo e mahani fakalatalata (Kikite paratafa 8-9)
8. Ko e heigoa e tau mahani ka lagomatai a tautolu ke totoko e mahekeheke?
8 Maeke a tautolu ke totoko e mahekeheke he feaki e fakatokolalo mo e mahani fakalatalata. Ka puke e tau loto ha tautolu he tau mahani mitaki nei, to nakai mahekeheke a tautolu. Lagomatai he fakatokolalo a tautolu ke nakai manamanatu lahi hagaao ki a tautolu ni. Ko e tagata fakatokolalo kua nakai logona hifo kua mahomo atu a ia ke he tau tagata oti. (Kala. 6:3, 4) Ko e tagata mahani fakalatalata kua fiafia ke he mena ne moua e ia ti nakai fakatatai a ia ke he falu. (1 Timo. 6:7, 8) Ka kitia he tagata fakatokolalo mo e mahani fakalatalata e taha ne moua e mena mitaki, ti fiafia a ia ma e tagata ia.
9. Ia Kalatia 5:16 mo e Filipi 2:3, 4, ko e heigoa ka lagomatai he agaaga tapu a tautolu ke taute?
9 Lata a tautolu ke moua e lagomatai he agaaga tapu he Atua ka manako a tautolu ke kalo kehe he aga mahekeheke, ka e feaki e fakatokolalo mo e mahani fakalatalata. (Totou Kalatia 5:16; Filipi 2:3, 4.) Lagomatai he agaaga tapu ha Iehova a tautolu ke kumikumi hifo ke he tau fatuakiloto ha tautolu. Ha ko e lagomatai he Atua, to hukui e tautolu e tau manatu mo e tau logonaaga fakamamahi aki e tau manatu mo e tau logonaaga atihake. (Sala. 26:2; 51:10) Manamanatu ke he tau fakataiaga ki a Mose mo Paulo, ko e tau tagata ne kautū he totoko e aga mahekeheke.
Ko e fuata Isaraela ne poi atu ki a Mose mo Iosua ke tala age kua tokoua e tagata taane he kemuaga ne mahani tuga e tau perofeta. Pehē a Iosua ki a Mose ke taofi a laua, ka e nakai talia e Mose. Pehē age a ia ki a Iosua kua fiafia a ia ha kua foaki e Iehova Haana a agaaga ke he tau tagata tokoua nā (Kikite paratafa 10)
10. Ko e heigoa e tuaga ka maeke ke kamatamata a Mose? (Kikite fakatino he kili.)
10 Lahi e pule ne ha ha ia Mose ke he tau tagata he Atua, ka e nakai mahekeheke a ia he taofi e falu he moua e kotofaaga. Ma e fakatai, taha magaaho ne uta e Iehova falu agaaga tapu haana mai ia Mose ti tuku age ke he falu he tau patu i Isaraela ne tutū tata ke he fale uta fano he tutuutaaga. Nakai leva he mole, logona e Mose tokoua e patu ne nakai o atu ke he fale uta fano he tutuutaaga ne moua foki e agaaga tapu ti kua kamata ke mahani tuga e tau perofeta. Fēfē e tali haana he tala age a Iosua ki a ia ke taofi e tau patu tokoua nā? Nakai mahekeheke a Mose ke he puhala ne leveki e Iehova e tau tagata taane tokoua nei. Ka e fakatokolalo a ia he fiafia fakalataha ke he kotofaaga ha laua. (Nume. 11:24-29) Ko e heigoa kua fakaako e tautolu mai ia Mose?
Fifitaki fēfē he tau motua Kerisiano e aga fakatokolalo ha Mose? (Kikite paratafa 11-12)c
11. Fifitaki fēfē he tau motua a Mose?
11 Kaeke ko e motua a koe, kua ole nakai ki a koe ke fakaako taha tagata ke taute e matagahua he fakapotopotoaga ne fiafia lahi a koe ki ai? Ma e fakatai, liga fiafia a koe ke he kotofaaga he taute e Fakaakoaga Kolo Toko he tau faahi tapu takitaha. Ka fakatokolalo a koe tuga a Mose, to nakai logona hifo e koe e fakateaga ka ole ki a koe ke fakaako taha matakainaga taane ke taute e matagahua nei he tau magaaho i mua. Ka e to fiafia a koe ke lagomatai e matakainaga taane haau.
12. Fakakite fēfē he tau Kerisiano tokologa he vahā nei e mahani fakalatalata mo e fakatokolalo?
12 Manamanatu foki ke he taha tuaga ne fehagai e tau matakainaga taane momotua. Ke he loga e tau tau, kua eke a lautolu mo tau leveki he kau he tau motua. Ka ko e magaaho ne tū e 80 he tau tau he moui, ne fiafia a lautolu ke toka e kotofaaga ha lautolu. Ko e tau leveki takaiaga ne tū e 70 e tau tau he moui, ne fakatokolalo a lautolu ke toka e kotofaaga ia ti talia ke liu moua e taha kotofaaga kehe foki. He tau tau kua mole laia, tokologa e matakainaga he magafaoa Peteli he lalolagi katoa ne kamata e tau kotofaaga foou he gahua he fonua. Ko e tau matakainaga fakamooli nei kua nakai ita ki a lautolu kua leveki e tau kotofaaga ia mogonei ne taute e lautolu he taha magaaho.
13. Ko e ha kua liga kamatamata a Paulo ke mahekeheke ke he tau aposetolo 12?
13 Ko e aposetolo ko Paulo e taha fakataiaga mitaki he taha tagata kua feaki e mahani fakalatalata mo e fakatokolalo. Nakai fakaatā e Paulo e mahekeheke ke tupu. Gahua malolō a ia he fekafekauaga, ka e talahau fakatokolalo e ia: “Ha ko au, ko e muikau au he tau aposetolo; kua nakai aoga au ke talahaua ko e aposetolo.” (1 Kori. 15:9, 10) Ko e tau aposetolo 12 ne mumuitua ki a Iesu he fekafekauaga haana he lalolagi, ka e nakai eke a Paulo mo Kerisiano ato mole e mate mo e liu tu mai ha Iesu. Pete he kotofa a Paulo he magaaho fakamui ke eke mo “aposetolo ke he tau tagata kehe,” ne nakai moua e ia e kotofaaga pauaki ke eke mo taha he tau aposetolo 12. (Roma 11:13; Gahua 1:21-26) He nakai mahekeheke ke he tau tagata taane 12 ia mo e fakafetuiaga tata ha lautolu mo Iesu, fakatumau a Paulo ke mahani fakalatalata ke he mena kua moua e ia.
14. Ko e heigoa ka taute e tautolu ka mahani fakalatalata mo e fakatokolalo a tautolu?
14 Ka mahani fakalatalata mo e fakatokolalo a tautolu, to tuga a Paulo a tautolu he fakakite e fakalilifu ke he pule ne foaki e Iehova ke he falu. (Gahua 21:20-26) Kua fakatoka e ia ma e tau patu ke takitaki e fakapotopotoaga Kerisiano. Pete kua nakai mitaki katoatoa a lautolu, onoono a Iehova ki a lautolu ko e “tau mena fakaalofa ke he tau tagata.” (Efeso 4:8, 11) Ka fakalilifu e tautolu e tau tagata taane nei ne kotofa mo e mumui fakatokolalo ke he takitakiaga ha lautolu, kua pipiki fakatata a tautolu ki a Iehova ti moua e mafola mo e tau matakainaga Kerisiano ha tautolu.
‘KUMI FAKAMAKUTU E TAU MENA KE TUPU E MAFOLA’
15. Ko e heigoa kua lata ke taute e tautolu?
15 Nakai tupuolaola e mafola ka fakaatā e mahekeheke ke tupu lahi. Lata a tautolu ke huo kehe e mahekeheke mai he tau loto ha tautolu mo e kalo kehe he fakatupu e tau logonaaga mahekeheke ke he falu. Latatonu a tautolu ke taute e tau lakaaga aoga nei ka manako a tautolu ke omaoma ke he tau poakiaga ha Iehova ke “kumi fakamakutu e tautolu e tau mena ke tupu ai e mafola, mo e tau mena ke fefakamafanaaki ai.” (Roma 14:19) Ko e heigoa kua lata pauaki a tautolu ke taute ke lagomatai e falu ke totoko e mahekeheke, ti fakaholo ki mua fēfē e tautolu e mafola?
16. Lagomatai fēfē e tautolu e falu ke totoko e mahekeheke?
16 Ko e aga mo e tau gahua ha tautolu ka omoomoi lahi e falu. Manako e lalolagi “ke hula” a tautolu ke he tau koloa kua moua e tautolu. (1 Ioa. 2:16) Ka e fakaholo ki mua he aga ia e mahekeheke. Maeke a tautolu ke kalo kehe he feaki e mahekeheke ke he falu ka fifili a tautolu ke nakai tutala tumau hagaao ke he tau mena ne moua po ke amanaki a tautolu ke fakatau. Taha puhala foki ka kalo kehe a tautolu he fakaholo ki mua e mahekeheke ko e onoonoaga lagotatai ha tautolu ke he tau kotofaaga ne moua i loto he fakapotopotoaga. Ka tutala tumau a tautolu ke he tau kotofaaga ne moua e tautolu, hafagi e tautolu e puhala ke tupu e mahekeheke. Kehe mamao ai, ka fakakite e tautolu e fiafia mooli ha tautolu ke he falu mo e talahau e tau mena mitaki ne taute e lautolu, kua lagomatai e tautolu a lautolu ke logona e mahani fakalatalata ti fakaholo ki mua e tautolu e kaufakalataha mo e mafola he fakapotopotoaga.
17. Ko e heigoa kua maeke e tau lafu ha Iosefa ke taute, ti ko e ha?
17 Maeke a tautolu ke kautū he totoko ke he mahekeheke! Liu manamanatu ke he fakataiaga he tau lafu ha Iosefa. He mole e tau tau ne ekefakakelea e lautolu a Iosefa, feleveia a lautolu mo ia i Aikupito. Ato fakakite e Iosefa a ia ke he tau lafu haana, kamatamata e ia a lautolu ke iloa kua hiki nakai a lautolu. Fakatokatoka e ia e tau mena kai ti lahi atu e mena kai ne age ke he tehina tote haana ko Peniamina ke he mena ne age ke he falu lafu. (Kene. 43:33, 34) Nakai fakakite he ha mena kua mahekeheke e tau lafu haana ki a Peniamina. Ka e fakakite e lautolu e manamanatuaga mooli ke he tehina mo e matua taane ha lautolu ko Iakopo. (Kene. 44:30-34) Ha kua nakai liu e tau lafu ha Iosefa ke mahekeheke, ka kua maeke a lautolu ke lagomatai ke liuaki mai e mafola he magafaoa. (Kene. 45:4, 15) Pihia foki, ka huo kehe e tautolu ha logonaaga mahekeheke, to lagomatai a tautolu ke tumau e mafola he ha tautolu a magafaoa mo e fakapotopotoaga.
18. Ia Iakopo 3:17, 18, ko e heigoa ka tupu kaeke ke lagomatai a tautolu ke feaki e takatakaiaga mafola?
18 Manako a Iehova ki a tautolu ke totoko e mahekeheke mo e kumi fakamakutu e mafola. Latatonu a tautolu ke gahua fakamalolō ke taute e tau mena ua ia. He fakatutala he vala tala nei, fa mahani a tautolu ke mahekeheke. (Iako. 4:5) Ti viko takai a tautolu he lalolagi ne fakaholo ki mua e mahekeheke. Ka feaki e tautolu e fakatokolalo, mahani fakalatalata, mo e loto fakaaue to nakai mahekeheke a tautolu. Ka e to lagomatai a tautolu ke feaki e takatakaiaga mafola ka tupu ai e fua he tututonu.—Totou Iakopo 3:17, 18.
LOLOGO 53 Gahua Fakalataha
a Ko e fakatokatokaaga ha Iehova kua mafola. Ka e maeke e mafola nei ke fakatauhele ka fakaatā e tautolu e tau logonaaga mahekeheke ke tupu. He vala tala nei, to kumikumi a tautolu ke he tupumaiaga he mahekeheke. To fakatutala foki a tautolu ke he puhala ke totoko e aga hagahaga kelea nei mo e puhala ke fakaholo ki mua e mafola.
b FAKAMAAMA E TALAHAUAGA: Tuga he fakamaama he Tohi Tapu, maeke e mahekeheke ke fakatupu e tagata ke manako ke he tau mena he falu mo e nakai manako foki ke moua he falu e tau koloa ia.
c FAKAMAAMA E FAKATINO: He fono he kau he tau motua, kua ole ke he matakainaga taane motua ne taute e Fakaakoaga Kolo Toko he fakapotopotoaga ke fakaako e motua fuata ke taute e kotofaaga nei. Pete he fiafia e matakainaga taane motua ke he kotofaaga haana, lalago katoatoa e ia e fifiliaga he tau motua he foaki ke he matakainaga taane fuata e tau lagomataiaga kua aoga mo e nava fakamooli.