Fakaalofa mo e Fakaaue ki a Iehova kua Takitaki ke he Papatiso

1-2. He fakakite ia Gahua 8:27-31, 35-38, ko e heigoa ne omoomoi e eunuka Aitiope ke papatiso?

MANAKO nakai a koe ke papatiso ke eke mo tutaki he Keriso? Ko e fakaalofa mo e loto fakaaue kua omoomoi e tokologa ke taute e fifiliaga ia. Manamanatu ke he fakataiaga he fekafekau pule he patuiki fifine i Aitiope.

² Ne taute agataha he tagata Aitiope e mena ne fakaako e ia mai he Tohi Tapu. (Totou Gahua 8:27-31, 35-38.) Ko e heigoa ne omoomoi a ia? Loto fakaaue mooli a ia ke he Kupu he Atua; ti totou e ia falu kupu he tohi ha Isaia he heke he kariota. Magaaho ne tutala a Filipo ke he tagata nei, ne loto fakaaue lahi a ia ke he mena ne taute e Iesu ma haana. Ka ko e ha ne fina atu e fekafekau pule ki Ierusalema? Ha kua feaki tuai e ia e fakaalofa ki a Iehova. Iloa fēfē e tautolu? Fitā a ia he tapuaki ki a Iehova i Ierusalema. Kua hiki he tagata nei e lotu haana tali mai he fanau a ia mo e fakalataha ke he motu ne tukulele ke he Atua mooli. Ko e fakaalofa ki a Iehova anei foki ne omoomoi a ia ke taute taha lakaaga aoga lahi, ke papatiso ti eke mo tutaki ha Keriso.​—Mata. 28:19.

3. Liga ko e heigoa ne taofi e tagata ke papatiso? (Kikite puha “Ko e Heigoa he Loto Haau?”)

³ Ko e fakaalofa ki a Iehova ka omoomoi a koe ke papatiso. Ka e maeke foki e fakaalofa ke taofi a koe he taute e mena ia. Fēfē? Mailoga la falu fakataiaga. Liga fakaalofa lahi a koe ke he magafaoa mo e tau kapitiga nakai tua haau, ti liga tupetupe a koe ka papatiso neke vihiatia e lautolu a koe. (Mata. 10:37) Po ke liga fiafia a koe ke he tau aga ne iloa e koe kua vihiatia he Atua, ti liga uka ke vevehe kehe mai he tau aga ia. (Sala. 97:10) Po ke liga tupu hake a koe he fakamanatu e tau aga fakamotu kua matutaki mo e lotu fakavai. Liga fiafia a koe ke he tau manatu mitaki ne matutaki mo e tau fakamanatuaga ia. Ti ko e fua, liga to uka lahi a koe ke oti e fakamanatu he tau aga fakamotu ne nakai fakafiafia a Iehova. (1 Kori. 10:20, 21) Ko e hūhū kua fehagai mo koe, “Ko e heigoa po ko hai ne lahi e fakaalofa haaku ki ai?”

KO E FAKAALOFA NE MUA ATU E AOGA

4. Ko e heigoa e kakano ne mua ue atu ka takitaki a koe ke he papatiso?

⁴ Loga e tau mena uho kua fakaalofa mo e loto fakaaue a koe ki ai. Tuga anei, ato fakaako mo e Tau Fakamoli a Iehova kua liga hokulo e loto fakaaue haau ke he Tohi Tapu. Ti liga feaki e koe e fakaalofa ki a Iesu. Ha kua iloa e koe mogonei e Tau Fakamoli a Iehova, liga fiafia a koe ke fakalataha mo lautolu. Ka ko e fiafia ke he tau mena mitaki ia to nakai ni fakalagalaga a koe ke manako ke tukulele a koe ki a Iehova ti papatiso. Ko e kakano ne mua ue atu ka takitaki a koe ke papatiso ko e fakaalofa ki a Iehova ko e Atua. Ka lahi atu e fakaalofa haau ki a Iehova ke he tau mena oti kana, to nakai fakaatā e koe ha mena taha po ke ha tagata ke taofi a koe he fekafekau ki a Iehova. Onoono a koe ke he fakaalofa ki a Iehova ko e puhala ke he papatisoaga mo e puipuiaga ke lagomatai a koe ke nofo mau he puhala ke fekafekau ke he Atua.

5. Ko e heigoa e tau hūhū ka manamanatu a tautolu ki ai?

⁵ Pehē a Iesu kua lata a tautolu ke fakaalofa ki a Iehova mo e ha tautolu a tau loto, agaaga, manatu, mo e malolō katoa. (Mare. 12:30) Fakaako fēfē a koe ke fakaalofa mo e fakalilifu fakalahi ki a Iehova? He manamanatu ke he fakaalofa ha Iehova ki a tautolu kua omoomoi a tautolu ke liu fakaalofa atu ki a ia. (1 Ioa. 4:19) Ko e heigoa falu logonaaga mo e tau gahua ka tupu mai he feaki e koe e fakaalofa aoga lahi ia?b

6. Ia Roma 1:20, ko e heigoa e taha puhala ka fakaako e koe hagaao ki a Iehova?

⁶ Fakaako ki a Iehova puhala he tufugatia haana. (Totou Roma 1:20; Fakakite. 4:11) Manamanatu fakahokulo ke he pulotu ne kitia ke he puhala ne talaga e tau akau mo e tau manu. Fakaako fakatekiteki ke he puhala ofoofogia ne tufuga e tino haau. (Sala. 139:14) Ti manamanatu ke he malolō he laā ne tufuga e Iehova, he mailoga ko e taha ni a ia he tau piliona fetū.c (Isaia 40:26) He manamanatu pihia a koe, to hokulo e fakalilifu haau ki a Iehova. Ka e he iloa kua pulotu mo e malolō lahi a Iehova ko e tama vala ni a ia he fakavēaga he fakafetuiaga haau mo Ia. Ke feaki e fakaalofa malolō ki a Iehova, lata a koe ke lahi atu e mena ke iloa hagaao ki a Ia.

7. Ke hokulo e fakaalofa ki a Iehova, ko e heigoa kua lata a koe ke talitonu ki ai?

⁷ Lata a koe ke talitonu kua fakaalofa mooli a Iehova ki a koe. Uka kia a koe ke talitonu ko e Tufuga he lagi mo e lalolagi kua iloa a koe ti leveki e ia a koe? Ka pihia, manatu ko Iehova kua “nakai ni mamao a ia mo tautolu takitokotaha.” (Gahua 17:26-28) “Ha kua kumi e Iehova ke he tau loto oti,” ti mavehe a ia ki a koe tuga ne tala age e Tavita ki a Solomona, “kaeke ke kumi e koe a ia, ti moua e koe a ia.” (1 Nofo. 28:9) Ti ko e kakano kua fakaako e koe e Tohi Tapu mogonei ha kua pehē a Iehova, “Kua futia e au a koe ki a au.” (Iere. 31:3) He lahi e loto fakaaue haau ke he tau mena oti ne taute e Iehova ma haau, to hokulo lahi e fakaalofa haau ki a ia.

8. Tali atu fēfē a koe ke he fakaalofa ha Iehova?

⁸ Taha puhala ke tali atu ke he fakaalofa ha Iehova ko e tutala ki a ia he liogi. To tupu e fakaalofa haau ke he Atua he tala age e koe ki a ia e tau tupetupe haau mo e fakaaue a koe ki a ia ma e tau mena oti ne taute e ia ma haau. Ti ko e pipiaga he vahāloto haau mo Iehova to fakamalolō he kitia e koe e puhala ne tali e ia e tau liogi haau. (Sala. 116:1) To talitonu a koe kua maama e ia a koe. Ka e ke tata lahi ki a Iehova, lata a koe ke maama e puhala manamanatu haana. Ti lata a koe ke iloa e mena ne manako a ia ke taute e koe. Ko e puhala ni ke moua e koe e iloilo ia he fakaako e Kupu haana ko e Tohi Tapu.

9. Fakakite fēfē e koe kua loto fakaaue a koe ke he Tohi Tapu?

⁹ Fakaako ke loto fakaaue ke he Kupu he Atua, ko e Tohi Tapu. Ko e Tohi Tapu hokoia kua ha ha i ai e tala mooli hagaao ki a Iehova mo e finagalo haana ma haau. Fakakite e koe kua loto fakaaue a koe ke he Tohi Tapu he totou ai he tau aho takitaha, he tauteute ma e tau magaaho fakaako fakatagata haau he Tohi Tapu, mo e fakagahua e tau mena kua fakaako e koe. (Sala. 119:97, 99; Ioane 17:17) Fai fakaholoaga totou Tohi Tapu nakai a koe? Muitua nakai a koe ke he fakaholoaga ia he eketaha a koe ke totou e Tohi Tapu he tau aho takitaha?

10. Ko e heigoa e taha he tau vala uho he Tohi Tapu?

¹⁰ Taha he tau vala uho he Tohi Tapu ko e tau tala ne kitia he tau tagata hagaao ki a Iesu. Ko e fakamauaga hako ni anei ne fakamaama e tau mena ne taute e Iesu ma haau. He fakaako a koe ke he mena ne talahau mo e taute e Iesu, to liga fakalagalaga a koe ke moua e fakafetuiaga mo ia.

11. Fakaako fēfē a koe ke fakaalofa ki a Iehova?

¹¹ Fakaako ke fakaalofa ki a Iesu mo e to tupu e fakaalofa haau ki a Iehova. Ko e ha? Ha kua fifitaki katoatoa e Iesu e tau mahani he Matua haana. (Ioane 14:9) Ti ka lahi e fakaako haau hagaao ki a Iesu, to lahi e maama mo e loto fakaaue haau ki a Iehova. Manamanatu ke he fakaalofa hofihofi noa ne fakakite e Iesu ki a lautolu kua onoono hifo e tau tagata ki ai, ko lautolu ne nonofogati, gagao, mo e lolelole. Manamanatu foki ke he fakatonuaga aoga ne foaki e ia ki a koe mo e puhala kua fakaholo ki mua e moui haau he fanogonogo a koe ki a ia.​—Mata. 5:1-11; 7:24-27.

12. He fakaako a koe hagaao ki a Iesu, liga ko e heigoa ka fakalagalaga a koe ke taute?

¹² Ko e fakaalofa hofihofi haau ki a Iesu kua liga malolō lahi he manamanatu fakahokulo a koe ke he poa ne taute e ia ke maeke e tau agahala ha tautolu ke fakamagalo. (Mata. 20:28) Ka maama e koe kua makai a Iesu ke mate ma haau, to liga fakalagalaga a koe ke fakatokihala mo e kumi e fakamagaloaga ha Iehova. (Gahua 3:19, 20; 1 Ioa. 1:9) He iloa e koe ke fakaalofa ki a Iesu mo Iehova, to futia mooli a koe ke he falu kua logona pihia foki.

13. Ko e heigoa kua foaki e Iehova ma haau?

¹³ Fakaako ke fakaalofa ke he magafaoa ha Iehova. Ko e haau a magafaoa nakai tua mo e tau kapitiga fakamua ne liga nakai maama e kakano kua manako a koe ke tukulele a koe ki a Iehova. Liga totoko foki e lautolu a koe. To lagomatai e Iehova a koe he foaki e magafaoa fakaagaaga. Ka pipiki fakatata a koe ke he magafaoa fakaagaaga ia, to moua e koe e fakaalofa mo e lalagoaga kua lata mo koe. (Mare. 10:29, 30; Hepe. 10:24, 25) To fai magaaho ti liga fakalataha e tau tagata he magafaoa haau mo koe he fekafekau ki a Iehova mo e moui fakatatau ke he tau mahani Haana.​—1 Pete. 2:12.

14. Ia 1 Ioane 5:3, ko e heigoa kua moua e koe hagaao ke he tau mahani ha Iehova?

¹⁴ Fakaako ke loto fakaaue mo e fakagahua e tau mahani ha Iehova. Ato iloa a Iehova, liga fifili ni e koe e tau mahani haau, ka ko e mogonei kua kitia e koe kua mitaki lahi e tau mahani ha Iehova. (Sala. 1:1-3; totou 1 Ioane 5:3.) Manamanatu ke he fakatonuaga he Tohi Tapu ma e tau taane, tau hoana, tau matua, mo e tau fanau. (Efeso 5:22–6:4) He fakagahua e koe e fakatonuaga ia, kua kitia nakai e koe e holo ki mua he moui magafaoa haau? He omaoma a koe ke he tau takitakiaga ha Iehova hagaao ke he fifili fakamitaki he tau kapitiga haau, kua holo ki mua nakai e tau aga fakatagata haau? Kua lahi nakai e fiafia haau? (Fakatai 13:20; 1 Kori. 15:33) Liga ko e tali ke he tau hūhū ia ko e ē.

15. Ko e heigoa ke taute e koe ka lata a koe ke moua e lagomatai ke fakagahua e tau matapatu fakaakoaga he Tohi Tapu?

¹⁵ Falu magaaho liga uka a koe ke iloa e puhala ke fakagahua e tau matapatu fakaakoaga he Tohi Tapu kua fakaako e koe. Kakano haia kua fakaaoga e Iehova e fakatokatokaaga haana ke foaki ki a koe e tau tohi ne fakavē ke he Tohi Tapu ke lagomatai a koe ke iloa e mena hako mai he mena hepe. (Hepe. 5:13, 14) Ka totou mo e fakaako e koe e vala tala nei, to kitia e koe e aoga lahi mo e talahau fakahako ti liga futia a koe ke he fakatokatokaaga ha Iehova.

16. Fakatokatoka fēfē e Iehova e tau tagata haana?

¹⁶ Fakaako ke fakaalofa mo e lalago e fakatokatokaaga ha Iehova. Kua fakatokatoka e Iehova e tau tagata haana ki loto he tau fakapotopotoaga; ti ko e Tama haana ko Iesu e ulu he tau fakapotopotoaga oti ia. (Efeso 1:22; 5:23) Kotofa e Iesu e matakau tote he tau matakainaga taane fakauku ke takitaki e fakatokatoka he gahua ne manako a ia ke taute he vahā nei. Hagaao a Iesu ke he matakau nei he tau matakainaga taane ko e “fekafekau fakamoli mo e loto matala,” ti uta fakahokulo e lautolu e matagahua ha lautolu ke fagai mo e puipui fakaagaaga a koe. (Mata. 24:45-47) Taha he tau puhala kua lagomatai he fekafekau fakamoli ke leveki a koe he kotofa e tau motua kua latatonu ke puipui a koe. (Isaia 32:1, 2; Hepe. 13:17; 1 Pete. 5:2, 3) Kua makai e tau motua ke taute e tau mena oti ke lata mo koe, ke fakamafana a koe, mo e lagomatai a koe ke fakatata lahi ki a Iehova. Ka ko e taha he tau mena ne mua atu e aoga kua taute e lautolu ma haau ko e lagomatai a koe ke fakaako e falu hagaao ki a Iehova.​—Efeso 4:11-13.

17. Ia Roma 10:10, 13, 14, ko e ha kua tutala a tautolu ke he falu hagaao ki a Iehova?

¹⁷ Lagomatai e falu ke fakaako ke fakaalofa ki a Iehova. Tala age a Iesu ke he tau tutaki haana ke fakaako e falu hagaao ki a Iehova. (Mata. 28:19, 20) Maeke ke omaoma ke he poakiaga ia he iloa e tautolu kua lata ke taute pihia. Ka e he tupu e fakaalofa haau ki a Iehova, to logona hifo a koe tuga e aposetolo ko Peteru mo e aposetolo ko Ioane ne pehē: “Nakai maeke ke fakamamate a maua ke he tau mena ne kitia e maua, mo e fanogonogo a maua ki ai.” (Gahua 4:20) To fiafia lahi a tautolu ka lagomatai e taha tagata ke fakaalofa ki a Iehova. Manamanatu la ke he fiafia lahi he evagelia ko Filipo he lagomatai e ia e tagata Aitiope ke fakaako e kupu mooli i loto he Tohi Tapu ti papatiso! Ka fifitaki e koe a Filipo mo e omaoma ke he poakiaga ha Iesu ke fakamatala, kua fakakite e koe to manako a koe ke eke mo taha he Tau Fakamoli a Iehova. (Totou Roma 10:10, 13, 14.) He magaaho ia, liga to hūhū a koe tuga e tagata Aitiope: “Ke lekua he ha ke nakai papatiso ai au?”​—Gahua 8:36.

18. Ko e heigoa ka fakatutala a tautolu ki ai he vala tala ka mui mai?

¹⁸ To taute e koe e lakaaga ne mua atu he moui haau ka fifili a koe ke papatiso. Ha ko e lakaaga uho lahi mahaki anei, lata a koe ke manamanatu fakahokulo ke he mena kua putoia ai. Ko e heigoa e mena kua lata a koe ke iloa hagaao ke he papatiso? Ko e heigoa kua lata a koe ke taute fakamua mo e ka mole e papatiso? Ko e tau hūhū ia ka tali he vala tala ka mui mai.