“Fiafia Au Mogonei ke he Gahua Fakamatala!”

GALO E FIAFIA HAAKU

Momoko ai he fuata mui au, lolelole e fakafetuiaga mafanatia haaku mo Iehova. Tuga kua nakai fakakaupā e atāina he tau kapitiga aoga haaku, ti loto au ke moua e atāina pihia foki. Logona hifo e au kua mamafa e tau matafakatufono he tau matua mo e tau tuaga he Kerisiano, ti manatu au kua uka e tapuaki ki a Iehova. Talitonu mooli au kua ha ha i ai a Iehova, ka e logona hifo e au e gatigati fakaagaaga.

Pete he nakai oti katoatoa e gahua fakamatala haaku, ka e nakai lahi foki e gahua haaku ki a Iehova. Ka fano au ke fakamatala, nakai mautauteute au ti taufetului au ke kamata po ke matutaki ke tutala. Ti ko e mena ia, kua nakai fai fua mo e fiafia e gahua fakamatala haaku ne lafi foki ke he tau manatu kelea haaku. Hūhū hifo au ki a au, ‘Maeke fēfē ha tagata ke fakamatala ke he taha faahi tapu ke he taha faahi tapu, ke he taha mahina ke he taha mahina?’

He mogo ne 17 e tau haaku he moui, loto lahi au ke taute e mena ne pule he loto. Ti peke e au e kato haaku, toka e kaina mo e fano ki Ausetalia. Momoko lahi e tau matua haaku he fano kehe au. Tupetupe a laua, ka e manatu a laua to fakatumau au ke he fakaholoaga fakaagaaga haaku.

I Ausetalia, tote hifo fakahaga e malolō fakaagaaga haaku. Nakai fano tumau au ke he tau feleveiaaga. Hihiga au ke kapitiga mo lautolu ne fuata kua tuga au ne fiafia ke ō he feleveiaaga he taha pō, ka e ō he taha pō ke inu mo e koli pō. He liu manatu ai, mailoga e au ko e taha hui haaku ke he kupu mooli, ko e taha hui ke he lalolagi, ka e nakai logona hifo mooli e au ko e tu au ke he faahi fe.

KO E FAKAAKOAGA NE NAKAI AMANAKI KI AI KA E AOGA LAHI

Kavi ke he ua e tau he mole, ko e matakainaga fifine ne feleveia kū e au ne nakai mailoga kua taute e ia au ke manamanatu ke he puhala kua moui ai au. Nofo au he fale mo e tau matakainaga fifine tokolima ne nonofo takitokotaha, ti uiina e mautolu e leveki takaiaga mo e hoana haana ko Tamara ke nonofo mo mautolu ke taha e faahi tapu. Ka lavelave e taane haana he taute e tau mena ke lata mo e fakapotopotoaga, fai magaaho a mautolu mo Tamara he taute mena mo e fekī auloa. Fiafia lahi au ke he mena ia. Loto manamanatu a ia ti mukamuka ke tutala ki ai. Ofoofogia e mena ia ki a au ha kua fai tagata ne malolō fakaagaaga kua maeke ke moua e fiafia lahi.

Lahi e hakahakau ha Tamara. Kua pikitia e fiafia haana ke he kupu mooli mo e gahua fakamatala. Fiafia a ia he foaki katoatoa ki a Iehova, ka e nakai fiafia au he tote e mena ne foaki ki a Iehova. Ko e aga mitaki mo e fiafia mooli haana ne fakalagalaga lahi e moui haaku. Ko e fakafifitakiaga haana ne futia au ke he matapatu kupu mooli he Tohi Tapu: Manako a Iehova ke fekafekau ki a Ia mo e ‘fiafia mo e kalaga fiafia.’​—Sala. 100:2.

LIU AU FIAFIA KE HE GAHUA HE FONUA

Manako au ke he fiafia ne moua e Tamara, ka ke moua e fiafia ia, lata au ke taute e tau hikihiki lalahi. Fai magaaho, ka e fakahiku ai ti kamata au ke taute e tau lakaaga ikiiki. Kamata au ke tauteute ma e gahua fakamatala ti paionia fakakū he falu magaaho. Lagomatai he mena nei au ke fakatote hifo e hopoate ka e mauokafua lahi. He lahi e fakaaoga e au e Tohi Tapu he gahua fakamatala, logona hifo e au e fiafia mooli. Nakai leva ti paionia fakakū au he tau mahina takitaha.

Kamata au ke futia ke he tau kapitiga he tau tau momoui kehekehe kua holo ki mua fakaagaaga mo e fiafia e fekafekauaga ha lautolu ki a Iehova. Lagomatai he fakafifitakiaga mitaki ha lautolu au ke liu kitekite ke he tau mena ne mua e aoga ki a au mo e ke feaki e fakaholoaga fakaagaaga mitaki. Fiafia lahi mogoia au ke he gahua fakamatala, ti fakahiku kamata ke eke mo paionia tumau. Ko e magaaho fakamua laia he loga e tau tau ne logona hifo e au e mauokafua mo e fiafia i loto he fakapotopotoaga.

MOUA E AU E HOA KE GAHUA TOKOUA TUMAU

Taha e tau he mole, feleveia au mo Alex ko e tagata totonu mooli ne fakaalofa ki a Iehova mo e fiafia ke he gahua fakamatala. Ko e fekafekau lagomatai a ia ne paiona ke ono e tau. Fai magaaho foki a Alex ne gahua he matakavi ne manako lagomatai i Malawi. Lafi a ia i ai mo e tau misionare ne mitaki e tau fakafifitakiaga mo e fakamafana a ia ke tuku fakamua tumau e tau mena he Kautu.

He 2003, ne mau au mo Alex ti matutaki e gahua fakamatala tumau ha maua. Loga e fakaakoaga aoga ne iloa e maua ti fakamonuina e Iehova a maua ke he tau puhala loga.

FAKAMONUINA ATU FOKI E IEHOVA A MAUA

He 2009, uiina a maua ke fekafekau ko e tau misionare i Timor-Leste, ko e motu tote i Indonesia. Tupu hake ia maua e tau logonaaga ofo, fiafia, mo e hopoate he taha e mogo. Lima e mahina he mole, hohoko atu a maua ke he taone lahi ko Dili.

Lahi mahaki e hiki ke he tau momoui ha maua. Lata a maua ke hikihiki ke he tuaga foou he aga fakamotu, vagahau, tau mena kai, mo e tau nonofoaga. He gahua fakamatala, fa feleveia a maua mo e tau lauiaaga he mativa, nakai mitaki e tau fakaakoaga, mo e pule kelea. Kitia e maua e tau tagata tokologa ne lekua fakatino mo e manamanatuaga ha ko e felakutaki mo e favale.a

Ofoofogia e gahua fakamatala! Ma e fakatai, feleveia au he taha mogo mo Maria ko e tama fifine 13 e tau he moui ne momoko.b Fai tau he mate e matua fifine haana ti lavea a ia ke kitia e matua taane haana. Tuga e tau fanau tokologa he atu ha Maria, nakai fai takitakiaga e moui haana. Manatu e au he taha magaaho he tagi a Maria he liligi mai e loto haana ki a au. Ka e nakai iloa e au e mena ne talahau e ia he nakaila maama e au e vagahau haana. Liogi au ki a Iehova he ole ki a Ia ke lagomatai au ke fakamafana a ia, ti kamata au ke totou e tau kupu Tohi Tapu atihake ki a ia. Fai tau gahoa he mole, kitia e au e kupu mooli ne hiki e aga, foliga, mo e moui ha Maria. Papatiso a ia, ti ko e mogonei kua taute ni e ia e tau fakaako Tohi Tapu haana. Mogonei, moua e Maria e magafaoa fakaagaaga lahi ti logona hifo e ia e fakaalofa.

Fakamonuina e Iehova e gahua i Timor-Leste. Pete kua laulahi he tau tagata fakailoa ne papatiso he hogofulu e tau kua mole, tokologa ne fekafekau ko e tau paionia, tau fekafekau lagomatai, po ke tau motua. Falu ne gahua he ofisa fakaliliu mo e lagomatai ke taute e tau mena kai fakaagaaga ke he tau vagahau ha lautolu. Fiafia lahi au ke logona a lautolu kua lologo he tau feleveiaaga, kitia e mamali ha lautolu, mo e mailoga e tupu fakaagaaga ha lautolu.

NAKAI FAI MOUI FOKI NE MUA ATU E FIAFIA

Kehe mamao e kotofaaga ha maua i Timor-Leste ke he moui i Ausetalia, ka e nakai fai moui foki ne mua atu e fiafia ki a au. Falu mogo, puke e pasi tote he tau tagata mo e tau ika tavaki mo e tau lakau kai mai he makete. He falu aho, taute e maua e fakaako Tohi Tapu he tama fale ne vela mo e aafu kua kiva e foloa mo e tafepoi fano e tau moa. Ka e pete e tau paleko, fa manatu hifo au, ‘Ko e mitaki ha ia!’

He liu au manatu, fakaaue au ke he tau matua haaku ha kua eketaha a laua ke fakaako e tau puhala ha Iehova ki a au mo e lagomatai au pete he uka e vahā fuata mui haaku. Mooli e Tau Fakatai 22:6 ke he tuaga haaku. Matalahi a Mami mo Tete ki a Alex mo au; ti fiafia ke kitia a maua kua fakaaoga e Iehova. Tali mai he 2016, kua fekafekau a maua he gahua takaiaga he tau matakavi he la ofisa ha Australasia.

Uka ke talitonu kua logona hifo e au he taha mogo ko e gahua fakamatala ko e matagahua. Fiafia au mogonei ke he gahua fakamatala! Mailoga e au, pete ne tau mena ne tutupu he moui, ko e fiafia mooli kua moua mai he fekafekau loto katoa ke he Atua. Mooli, ko e 18 e tau kua mole he fekafekau au mo Alex ki a Iehova ko e tau tau ne fiafia lahi mahaki he moui haaku. Maama moolioli e au mogonei e mena ne talahau he salamo ko Tavita ki a Iehova: “Kia fiafia a lautolu oti kua tua kia koe; kia kalaga fiafia tukulagi a lautolu . . . kia fiafia foki kia koe a lautolu kua fakaalofa ke he hāu a higoa.”​—Sala. 5:11.