Ko e Tohi Mai he Kau Fakatufono
Ke he Tau Matakainaga Tane mo e Fifine Fakahelehele:
‘KIA ha ha ia mutolu e fakaalofa totonu mo e mafola mai he Atua ko e Matua ha tautolu mo e Iki ko Iesu Keriso.’ (1 Kori. 1:3) Kua manako moli ha a tautolu ke he magaaho ka tuku age he tau mena momoui oti e fakahekeaga ki a Iehova ne kua lata ke moua e ia! (Sala. 150:6) He talifaki a tautolu ke he aho mua ue atu ia, hane matutaki a tautolu ke tukuogo e tala mitaki he Kautu he Atua mo e taute tutaki.
Ko e fekafekauaga fakaevagelia e lotouho he gahua ha Iehova he lalolagi. (Mare. 13:10) Ha kua mailoga lahi e tautolu e fiafia ha Iehova ke he gahua nei, kua taute ai e tautolu mo e liogi, he mailoga kua igatia e tagata mo e magaaho ke aoga mai he lukutoto. (Fakakite. 14:6, 7, 14, 15) Moli, kua fehagai a tautolu mo e tau paleko, ka e ko e fakaaue ha ia ha tautolu ke ‘moua e malolo mai luga’ ke taute aki e fekafekauaga nei!—Luka 24:49.
Kua fiafia lahi ke liu onoono ke he tau he fekafekauaga kua mole mo e manamanatu ke he tau mena ne taute e Iehova he puhala mai he hana tau fekafekau fakamoli. Ha kua fakamalolo he agaga tapu, ko e tau tagata he Atua kua fakakite e fakaalofa tuga he Keriso, kua kautu mai he fevihiatiaaki he lalolagi katoa. Kua kitia moli e fakaalofa pihia he tau fonoaga ha tautolu. Mai ia Iuni ki a Tesemo 2003, ko e tau hukui mai he molea e taha e teau he tau motu ne o atu ke he 32 e fonoaga he lalolagi katoa ne fakahoko ai ke he ono e matakavi he lalolagi. Ko e tau misionare, tau fekafekau he lalolagi katoa, mo e tau tagata he Peteli ne fekafekau ke he tau motu kehe ne huhu tala ki ai he tau fonoaga he fahimotu mo e tau fonoaga he lalolagi katoa.
Ke he tau fonoaga nei, ne moua e tautolu e tau tohi “See the Good Land” mo e Learn From the Great Teacher. Lafi ki ai, ne fakailoa tuai ko e lagaki kua hikihiki he tohi Pioneer Service School kua setulu ke kamata he matahiku he tau he fekafekauaga 2004. To taute fakahaga ai, ko e tau paionia kua leva ne kua fita e o atu he aoga to fakalataha ai ke he tau vahega he tau paionia fou.
Ko e lagomataiaga faka-Atua mo e loto fakamokoi he tagata ati maeke ai ke talaga foki e loga atu he tau Fale he Kautu, mua atu ke he tau motu ne gahoa e tau koloa. Ha kua tupu e manako he lalolagi katoa ke he tau mena kai fakaagaga, hane taute e tau matagahua ke fakalaulahi e tau la matapatu he tau motu loga. Ko e porosua Ke Fiafia e Moui Tukulagi ke he Lalolagi! kua moua mogonei ke he 299 e vagahau, mo e 139 e miliona lagaki ne lolomi; ko e Iloilo ne Takitaki Atu ke he Moui Tukulagi kua molea e 93 e miliona lagaki ke he 161 e vagahau; mo e molea e 200 e miliona lagaki he porosua Ko e Heigoa e Manako he Atua ma Tautolu? ne kua lolomi ke he 267 e vagahau.
Kua fakafeleveia mafanatia atu a mautolu ke he toko 258,845 ne fakamailoga ha lautolu a tukuleleaga ke he papatisoaga ke he vai he tau he fekafekauaga kua mole! Pete he lagomatai a mutolu ke he Kautu he Atua to eke a mutolu mo lotouho pauaki he vihiatia lahi ha Satani, eke foki he mena ia a mutolu mo tau tagata pauaki he fakamonuinaaga mo e puipuiaga fakaagaga ha Iehova he tafepoi a mutolu ke he poitufi ne kua fakatoka mai i mua ha mutolu. (Hepe. 12:1, 2; Fakakite. 12:17) E, kia mafanatia “ko e hāu a leoleo nakai matamohe a [I]a.”—Sala. 121:3.
Ko e lauga he tau ma e 2004, “Kia mataala a mutolu . . . Kia nonofo tauteute ai a mutolu,” kua felauaki tonu mo e magaaho. (Mata. 24:42, 44) Ko e tau Kerisiano kua fakamaama he Kupu he Atua ko e tau tagata kehe he fakatokaaga nei hane mole atu. (1 Pete. 2:11; 4:7) Ko e mena ia, kua lata ia tautolu ke nonofo mataala, ke fakamukamuka ha tautolu a tau momoui, mo e ke kumikumi fakamakutu ke he ha tautolu a tau loto. Kua manako e “tarako lahi” ke fai ola ki a tautolu, ke uta a tautolu ke he hana fakatokaaga.—Fakakite. 12:9.
Ko e mena kua aoga lahi ke fakatumau a tautolu ke mataala ko e totou he Tohi Tapu he tau aho oti. To maeke ai ke lagomatai a tautolu ke ‘taute e E ha tautolu ko e E’ ke felauaki mo e ha tautolu a tukuleleaga mo e ke “taofi mau e tautolu e tua fakamua ha tautolu ato hoko ke he fakahikuaga.” (Iako. 5:12; Hepe. 3:14) Ko e totou he Tohi Tapu he tau aho oti kua lagomatai ki a tautolu ke manatu kua tu kehe mai e lalolagi he tau tutuaga nakai hikihikifano he Atua. (Mala. 3:6; 2 Timo. 3:1, 13) Ko e iloilo ke he Tohi Tapu ka lagomatai a tautolu ke tiaki e “tau tala tuai kua fafati mo e pulotu” mo e ke tumau e tua fakamoli ki a Iehova.—2 Pete. 1:16; 3:11.
Tau mamatua, he feaki ha mutolu a tau fanau ke he tau kupu akonaki mo e tau kupu fakamafana ha Iehova, kua lagomatai nakai a lautolu ke fakatoka e tau foliaga fakaagaga mo e “kia mataala”? (Efeso 6:4) Kua fakaako nakai ki a lautolu ke onoono ke he vaha anoiha ha lautolu tuga ne onoono he tagata mua ue atu ne nofo he lalolagi? Ne liga maeke ia Iesu ke eke mo tagata kamuta, tagata talaga mena fou, po ke ekekafo mua ue atu, ka e nakai pihia ne tutuli e ia e fekafekauaga mau. Kia omoomoi he fakafifitakiaga hana a mutolu ke lagomatai e tau fanau ha mutolu ke tuku fakamua e tau gahua he Kautu ke he tau momoui ha lautolu.
Ko e vahega fekafekau fakamoli, ne hukui he Kau Fakatufono, kua pukeina ke he loto fakaaue lahi ke he “moto tagata tokologa,” he lagomatai e mutolu ke fakamoli ha mautolu a kotofaaga ke ‘fakamatala e tala mitaki he kautu ke eke mo fakamoli ke he lalolagi katoa.’ (Fakakite. 7:9; Mata. 24:14, 45) Ko mutolu ko e tau fakahelehele kia mafanatia kua manatu e Iehova a mutolu he “gahua fakamalolo he fakaalofa kua fakakite mai ai e mutolu ke he hana higoa, kua fekafekau tuai a mutolu ke he tau tagata tapu mo e fekafekau agaia ki ai.” (Hepe. 6:10) He totou e koe e tau tala tutupu fiafia mo e mailoga e tau fua he tau laliaga kaufakalataha ha mutolu he 2004 Yearbook, iloa ko koe taha kua fai vala aoga lahi he fakamatala nei ke he lalolagi katoa.
Kia fehagai mo e fakamalolo a koe ke he vaha anoiha he fakatumau ke ‘onoono fakatonutonu ke he palepale,’ kia nakai fakaata ha tagata po ke ha temoni ke fofo mai ai ia koe. (Hepe. 11:26; Kolo. 2:18) E, falanaki ki a Iehova, mauokafua to lagomatai e ia a lautolu oti kana ne fakaalofa ki a ia ke moua e moui katoatoa.—Ioane 6:48-54.
Kia mafanatia ha ko e ha mautolu a olioli he fekafekau fakalataha mo mutolu ke fakaheke e lilifu ha Iehova.
Ha mutolu a tau matakainaga,
Kau Fakatufono he Tau Fakamoli a Iehova