Ko e Tohi Mai he Kau Fakatufono
Tau Matakainaga Fakamoli Fakahele ha Iehova:
Ko e fiafia ha ia ke tohi atu ki a mutolu e tau matakainaga fakahele! Ne tatai e logonaaga ha mautolu mo e aposetolo ko Ioane, ne pehē kua “fakaalofa fakamoli” a ia ke he tau matakainaga talitonu haana mo e olioli ki a lautolu ha kua “eke e mahani he kupu moli.” (2 Ioa. 1, 4) Oi, ko e monuina lahi e kupu mooli ki a tautolu oti! Kua tokanoa he kupu mooli a tautolu mai i Papelonia Lahi mo e tau taofiaga mo e tau aga tuai i ai ne nakai fakalilifu e Atua. He omaoma ke he kupu mooli kua lagomatai a tautolu ke eke mo tau tagata fakaalofa, totonu mo e fakaalofa noa. Ti kua hafagi he kupu mooli ki a tautolu e puhala ke moua e tuaga meā ki mua he Atua pihia foki e amaamanakiaga he moui tukulagi.
Kua loto fakaaue mooli foki a tautolu ma e agaaga ha Iehova, ne takitaki mo e fakamalolō a tautolu he tau aho takitaha! Kua mauokafua a mautolu nukua olioli e mutolu e kumikumi ke he tau vala kehekehe he foakiaga fakaalofa nei mai ia Iehova he tau Fonoaga he Faahimotu “Takitaki he Agaaga he Atua” ne mole laia. He au atu e kelea he tau tuaga he lalolagi nei, kua aoga lahi ke falanaki a tautolu ke he agaaga malolō lahi ha Iehova ke takitaki a tautolu he tau aho uka i mua.
Kua logona mooli e mautolu kua hokotia ke he tau loto ha mutolu he magaaho ne totou e tau tala fakalagalaga he Yearbook ke he tau matakainaga ha tautolu ne fakauka lahi mahaki ke he tau matematekelea ha ko e tua ha lautolu. Ti kua ofoofogia ke manamanatu ko e tokologa he tau matakainaga tua fakamooli nei ne nakaila leva e papatiso po ke nakaila papatiso he magaaho ne tutupu e tau mena uka. Kua ofania e tautolu a lautolu ha ko e fakamooli ha lautolu mo e mauokafua ke he tututonu! Mooli, kua fakamalolō he fakafifitakiaga mitaki lahi mahaki ha lautolu a tautolu ke eketaha ke fakamooli tumau ke he Kautu pete ne tau matematekelea ka hohoko ki a tautolu.—1 Tesa. 1:6-8.
Iloa e mautolu ma tau matakainaga fakahele, kua loga e tau lekua fakatupe mo e falu mena ni kua fahia ki ai a mutolu ke pipi fakalataha e tau magafaoa ha mutolu ke he fakaalofa. Ma e falu ia mutolu, ko e paleko ke lalago foki e gahua fakamatala he Kautu mo e fakatumau mo e fakamooli ke he tau matagahua aoga he fakapotopotoaga. Ko e kakano haia, he mole e tau liogi loga, ne taute e mautolu e falu hikiaga ma e tau feleveiaaga he fakapotopotoaga ne kamata ia Ianuari 1, 2009. Amanaki a mautolu to fakaaoga fakamitaki e mutolu e tau fakaholoaga nei ke fakaaoga fakalahi taha magaaho ma e fakaakoaga fakatagata haau mo e magafaoa.
He tau toloaga mo e tau fonoaga loga he tau nei, ne fiafia mooli ke kitia kua tokologa lahi e tau tagata ne latatonu ke papatiso. Ia lautolu ia ko e falu fuata ikiiki. Kua nava atu ki a mutolu e tau matua he feaki e tau tama ha mutolu ke loto fakaaue ke he kupu mooli mo e fakamalolō ki a lautolu ke taute e tukuleleaga ke fekafekau ki a Iehova he ikiiki agaia. Ko e tau fakahele ikiiki kua fehagai mo e tau paleko loga he aoga ka kua latatonu ke papatiso kua kitia mitaki ke he fakamahaniaga ne moua e lautolu he kaina.—Sala. 128:1-6.
Nakai nimo foki e nava ke he tupu he gahua fakaako Tohi Tapu—ti ko e tau misionare mo e tau paionia pauaki gahua malolō ne lahi e vala ke he mena nei. Ko mautolu oti he Kau Fakatufono kua loto fakaaue lahi ke he vala aoga ne taute he tau matakainaga ha tautolu he lalolagi katoa he pehē ki a lautolu ne loto fakamooli “Ati hau ā,” he uiina a lautolu oti ne fia inu ke “uta noa . . . e vai he moui.” (Fakakite. 22:17) Kua fakafeleveia mafanatia e tautolu ke he ha tautolu a fakapotopotoaga he tau matakainaga he lalolagi katoa e 289,678 ne fakamailoga e tukuleleaga ha lautolu ke he papatiso he vai he tau kua mole!
Kua mitaki ke fakamanatu tumau ki a tautolu ni e tau kupu he aposetolo ko Ioane, ne tohi: “Ha ne mole atu foki e lalolagi katoa mo e hana tau manako lahi; ka ko e tagata kua eke e finagalo he Atua to tumau a ia tukulagi.” (1 Ioa. 2:17) Ti manamanatu la kua tata lahi atu a tautolu ke he magaaho ka “mole atu” e lalolagi nei! Ko e pulotu ha ia mogoia ke fakamatapatu e tau momoui ha tautolu ke taute e finagalo he Atua mo e “kia mataala.” (Mata. 24:42) To nakai tokihala ai ka taute pihia e tautolu, ti helehele e tautolu e tau fua mitaki he fakaalofa totonu ha Iehova.—Isaia 63:7.
Amanaki a mautolu ko e tau tala fakalagalaga mai he tau motu loga i loto he Yearbook nei ka fakamalolō a mutolu oti ke tuku fakamua e tau mena he Kautu he tau momoui ha mutolu. Manako a mautolu ke fakamafana ki a mutolu, kua tokaloto mo e liogi tumau a mautolu ma mutolu ti ofania lahi e mautolu a mutolu. Kia liligi e Iehova ki luga ha mutolu e tau monuina loga ue atu haana.
Ha mutolu a tau matakainaga,
Kau Fakatufono he Tau Fakamoli a Iehova