Ko e Tohi Mai he Kau Fakatufono
Tau Matakainaga Fakahele he Tau Fakamoli a Iehova:
Kua fiafia lahi a mautolu ke tohi atu ki a mutolu ko e tau fekafekau fakahele fakamooli a Iehova, kua molea mogonei fitu e miliona. Ka feleveia a koe mo e matakainaga talitonu mai he taha faahi he lalolagi, kua logona hifo mafiti e koe e pipiaga uho he fakaalofa hofihofi ki a ia. (Ioane 13:34, 35) Nakai noa ka totou a koe ke he Yearbook nei, ko e tau tala omoomoi hagaao ke he tua mo e fakamooli he tau matakainaga taane mo e tau matakainaga fifine he tau motu kehekehe, to fakatupu foki a koe ke logona hifo e pipiaga mafanatia ia.
Ko e tau hokotaki mai he lalolagi katoa kua fakakite e tokologa ia mutolu hane uta fakahokulo e fakaholoaga ha mutolu a Tapuakiaga he Magafaoa. Ko mutolu ne fai fanau ikiiki kua makaukau lahi ke fakaaoga e tau puhala kehekehe ke moua mo e fakatumau e mataala he tau fanau ha mutolu. (Efeso 6:4) Kua fakatata lahi e tau hoa mau ha ko e fefakamafanaaki fakaagaaga mai he fakaholoaga nei. (Efeso 5:28-33) Mooli kua aoga e tau tagata takitaha mo e tau magafaoa mai he fakatokaaga nei he fakaako fakalahi ke he Kupu he Atua.—Iosua 1:8, 9.
Kua fakaalofa hofihofi a mautolu ki a mutolu oti ne kua loga e tau mena ne galo ha ko e tau matematekelea tutupu pauaki ne hoko laia. Fakaaoga e mautolu e magaaho nei ke fakaaue ke he tokologa ne nakai fakauaua he fakalataha ke he tau gahua lagomatai he tau mogo matematekelea lahi pihia. (Gahua 11:28-30; Kala. 6:9, 10) Lafi ki ai, he tau fakapotopotoaga takitaha, ha ha ai falu ha mutolu kua manamanatu ke he tau levekiaga fakatino he tau matakainaga ha tautolu ti lagomatai fakailoilo atu ai. Tuga a Toreta i tuai, kua loga ha mutolu a “tau gahua mitaki mo e tau mena fakaalofa.” (Gahua 9:36) Kia mafanatia ai kua mailoga e Iehova e tau mena nei mo e to taui atu e ia ki a koe ke he mena kua lata ai.—Mata. 6:3, 4.
He falu motu, ko e haau a tonuhia kua ekefakakelea e lautolu ne fakaohooho e tau matafakatufono ke maeke he “fakatufono ke fakamamahi.” (Sala. 94:20) He mailoga na talahau tuai e Iesu e favale pihia, kua fakauka fakamalolō a mutolu ki ai mo e onoono ki a Iehova ko e ha mutolu a huaga. (Ioane 15:19, 20) Kia mauokafua na totoku tumau e mautolu a mutolu ma tau fakahele he tau liogi ha mautolu he matutaki a mutolu ke “tali atu . . . kia lautolu oti kua hūhu mai kia mutolu ke he kakano he amaamanaki ha ha ia mutolu.”—1 Pete. 3:13-15.
Kua nava mafanatia atu a mautolu ke he totou miliona ia mutolu kua fakatumau e meā he tau mahani ke he loga e tau tau pete e peehiaga tumau mai ha Satani he matahavala mo e tau lagatau fakataki ke fakaholofa aki. He magaaho ne kua tokolalo lahi e tuaga he tau mahani mitaki he lalolagi, “kia fakamalolo a mutolu ke he Iki ke he malolo he hana mana.” (Efeso 6:10) Kua “tapulu a mutolu ke he tau tapulu tau katoa he Atua,” ti mauokafua a mutolu he totoko ke he “tau lagatau he tiapolo.” (Efeso 6:11, 12) Kia iloa kua fakaaoga e Iehova e fakafifitakiaga haau ke foaki e tali leo lahi ki a ia ne fakafiu mai, ko Satani!—Fakatai 27:11.
Kua fiafia a mautolu ke iloa he tau 2011, ne 19,374,737 ne o atu ke he Fakamanatuaga he mate he Iki ha tautolu. Ko e numera lahi ia ha lautolu ne o atu kua fua mai he talia ha mutolu ke he ole atu ma e tau paionia fakakū ia Aperila he tau kua mole. Totou miliona e tagata ne nonofo he lalolagi ne logona e leo tatai ia ne taogo he fakaheke ki a Iehova mai he haana a Tau Fakamooli mauokafua! (Roma 10:18) Kaeke ko koe taha he 2,657,377 ne fekafekau ko e tau paionia fakakū he mahina ia po ke eketaha ke fakalahi e gahua haau he falu puhala, kua fiafia lahi a mautolu oti ha ko e aga fakamakai mo e fakamakutu ha mutolu ma e gahua.—Sala. 110:3; Kolo. 3:23.
He tau kua mole, ne 263,131 ia lautolu ne foou kua fakamailoga e fakatapuaga ki a Iehova. Fakaaue a mautolu ki a Iehova ma e mena nei, ti fakaaue a mautolu ki a mutolu oti he kaufakalataha mo mautolu ke ta atu e uiina ke he falu: “Ati hau ā; kia pehe atu foki a ia kua fanogonogo, Ati hau ā; ko ia foki kua fia inu kia hau a ia, katoa foki mo ia kua manako ki ai, kia uta noa e ia e vai he moui.” (Fakakite. 22:17) Mua atu ai he oti e fakatutala ke he tau vala he Kautu he Atua ne fitā he fakatū he tau fonoaga faahimotu ha tautolu he 2011, kua talahau e mautolu mo e fai logonaaga, “Kia hoko mai e Kautu he Atua!” Omoomoi he fakamafanaaga ha Iesu “to fina atu vave au,” kua loto katoa a tautolu he lafi e tau fakahekeaga ke he tali he aposetolo ko Ioane: “Amene. Haia ni, ko e Iki na e ma Iesu, kia haele mai a koe.”—Fakakite. 22:20.
He fakatumau a koe ke mataala ke he tau mena tutupu ofoofogia, fakamolemole kia mauokafua kua fakaalofa mooli a mautolu ki a mutolu takitokotaha ko e tau matakainaga taane mo e tau matakainaga fifine fakahele, kua fakakite mooli ha mutolu a fakaalofa ki a Iehova he “mahani mo e fakamoli.”—1 Ioa. 3:18.
Ha mutolu a tau matakainaga,
Kau Fakatufono he Tau Fakamoli a Iehova