Ko e Tohi Mai he Kau Fakatufono
Ke he Tau Fekafekau Fakahelehele:
Ko e fiafia hā ia ha mautolu ke tohi atu ki a mutolu he kamataaga he tau fai kakano uho nei! Ka fakahikuhiku e tau 2014 to katoatoa ai e taha e teau tau he pule e patuiki fakahelehele ha tautolu ko Iesu Keriso he vahaloto he haana tau fī.—Sala. 110:1, 2.
He kamataaga he tau he fekafekauaga nei, ke he fono lagataha he tau he Watch Tower Bible and Tract Society of Pennsylvania, ko e New World Bible Translation Committee ne fakatoka mai e lautolu e fufuta foou he Tohi Tapu palagi ne kua to lahi e mitaki he fakaliliu ke moua he tau tagata. Ne fakaaoga e Iehova haana a tau fanau fakaagaaga ke taute e tohi fakamua ko e New World Translation. (Roma 8:15, 16) Ko e mena ia kua uho pauaki e tohi nei, talia pihia nakai e koe?
Ke he loga e tau tau, kua eke he Komiti Tohia Tohi he Kau Fakatufono e fakaliliuaga he Tohi Tapu mo mena mua ki a lautolu. He vahā nei, ko e New World Translation kua moua katoatoa ai po ke fai vala ke he 121 e vagahau. Kua fakamafana atu ki a mutolu ke fakakite ki a Iehova e loto fakaaue hokulo ke he Tohi Tapu kua ha ha ia koe. Totou ki ai mo e manamanatu fakahokulo ke he tau aho oti. Ka pihia, to fakatata a koe ki a ia ne Tohia, ko Iehova ko e Atua.—Iako. 4:8.
Kua omoomoi ki a tautolu ka logona e tau matematekelea ne kua fakafehagai mo e tau matakainaga fakahelehele ha tautolu. Ti maama ai, ko e falu magaaho kua uka lahi a lautolu ke fiafia fakalataha mo e tau matakainaga. Ke fakatai ki ai, taha e magafaoa i Asia ne kua matematekelea lahi e tau momoui ha kua moua fakaofo e matua fifine he gagao parelusi ke he tino katoa. Ne fakagogoa e tau pulotu he faahi gahua fakamalolō tino ha kua nakai maeke ia lautolu ke tului e gagao haana. Momoko hā ia! Ko e taane haana he magaaho nei ne leveki a ia he tau magaaho oti. Ko e tama taane mo e fanau fifine tokoua ne fakakite e fakafifitakiaga mitaki he tau Kerisiano ha kua leveki mo e lagomatai ke he tau mamatua. Ko e magafaoa nei fakalataha mo mutolu oti kua kautū mai he tau matematekelea oti kua moua e fiafia ha ko e fakauka ke he tau kamatamata he tua. (Iako. 1:2-4) Mauokafua a lautolu kua fakauku fakalataha mo e tau mamoe kehe ha ko Iehova, kua moua e tautolu e fiafia he fakauka ke he tau matematekelea, ha ko e mena to fakamonuina a tautolu ke moua e mena fakaalofa ko e moui tukulagi!—Iako. 1:12.
He tau kua mole, ko e 19,241,252 ne fakalataha ke he Fakamanatuaga. Ko e mafanatia hā ia ke kitia e tokologa kua fakalilifu a Iehova mo Iesu Keriso ha kua fakalataha ke he feleveiaaga uho nei he tau tagata he Atua! Magahala he Fakamanatuaga, ko e kalaga fakaleo lahi he fakahekeaga ne hoko ke he Atua ha ko e tau miliona kua paionia fakakū ia Mati mo Aperila. Kua omoomoi hā e mena ia! Ne fiafia nakai a koe ke iloa ko lautolu ne paionia fakakū he magahala ne hau ai e leveki takaiaga kua maeke ke nonofo auloa ke he feleveiaaga katoa mo e tau paionia mau, pete ni kua nakai hau a ia he mahina a Mati po ko Aperila? Ko lautolu ne iloilo fakaagaaga kua maama e uho ke gahuahua mau ke he fekafekauaga mo e i loto he fakapotopotoaga. Lagomatai he gahuahua mau a tautolu ke tūmauokafua mo e nakai maueue, ti taofi ai e tau laliaga he Tiapolo ke moumou mo e fakahehē e tua ha tautolu.—1 Kori. 15:58.
Ko e fakalagalaga mitaki hā ia ke mailoga, mai he tau he fekafekauaga kua mole, 277,344 ne fakamailoga e tukuleleaga ha lautolu ke he papatisoaga ti ko e magaaho nei kua huhū atu ke he puhala ke he moui fakalataha mo e tau matakainaga he lalolagi katoa! (Mata. 7:13, 14) Ko e tau matakainaga foou nei kua lata ke moua e lautolu e lagomataiaga ke “fakatumau ke he tua.” (Kolo. 2:7) Fakatumau ke fakamalolō e taha mo e taha ke fakauka ke he fakaotiaga. (Mata. 24:13) “Kia fakamafana a lautolu kua manava tote, kia lagomatai kia lautolu kua lolelole, kia fakauka ke he tau tagata oti kana.” (1 Tesa. 5:14) Fakahiku ai, “kia liogi nakai noa” a tautolu takitokotaha mo e pehē: “Kia hoko mai hau a kautu.”—1 Tesa. 5:17; Mata. 6:10.
Fakamolemole kia moua e fiafia ke he Yearbook nei mo e mailoga ha ha ia mautolu e fakaalofa ma mutolu takitokotaha ne fakaalofa ki a Iehova!
Ha mutolu a tau matakainaga,
Kau Fakatufono he Tau Fakamoli a Iehova