Ko e Tohi Mai he Kau Fakatufono
“KIA ha ha ia mutolu e fakaalofa noa mo e monuina mai he Atua ha tautolu a Matua, katoa mo e Iki ko Iesu Keriso.” Ko e fakafeleveia nei ne fakaaoga e Paulo he tau tohi loga haana ke he tau fakapotopotoaga. Kua fakamaama fakamitaki e manako ha mautolu ma mutolu oti.—Efeso 1:2.
Kua loto fakaaue lahi a mautolu ke he fakaalofa noa mai ia Iehova puhala he poa lukutoto ha Keriso Iesu! Ti kakano he lukutoto, ne moua e tautolu e tuaga talia ki mua he Atua. Kua nakai fakaai a tautolu ke moua e mena nei ha ko e tau laliaga ni ha tautolu, pete kua lahi e makutu ha tautolu he fakaako e Tohi Tapu, fakamatala e tala mitaki, po ke taute falu a gahua mitaki. Ko e fakamagaloaga he tau hala mo e moui tukulagi kua foaki mai ki a tautolu, nakai ko e totogi ma e tau laliaga ha tautolu, ka e ko e tau mena fakaalofa ne fakaata e fakaalofa noa ha Iehova puhala ia Iesu Keriso.—Roma 11:6.
Ne tohia e Paulo ke he tau katofia talitonu: “Kua ole atu a mautolu kia mutolu aua neke talia teao e mutolu e fakaalofa noa he Atua. (Ha kua pehe mai a ia, Ko e vaha ke talia ai ne fanogonogo ai au kia koe, ko e aho foki ke fakamomoui ai ne lagomatai ai au kia koe; kitiala, ko e ainei e vaha ke talia mitaki mai ai; kitiala, ko e aho nai ke fakamomoui ai.)” Kua ha ha ai e “vaha ke talia” ne fakamua ke he moumouaga ha Ierusalema he senetenari fakamua. Ko e tau tagata loto fakamooli ne fakaalofa ki a Iehova kua fakamomoui fakaagaaga. Ne takitaki fakahaga atu e mena nei ke he fakamouiaga fakatino ma e tau tagata tua fakamooli ne fehola mai Ierusalema ato moumou ai he tau 70 V.N.—2 Kori. 6:1, 2.
He vahā nei, foki, kua nonofo a tautolu he “vaha ke talia ai” mo e ‘aho ke fakamomoui ai.’ Ko lautolu ne talia e Iehova mo tau fekafekau haana ti kua fakamomoui fakaagaaga kua amaamanaki ke he fakamouiaga fakatino puhala he “aho lahi a Iehova” hane tata lahi mai.—Sefa. 1:14.
Ha ko e hoko mai he aho a Iehova ne tuku ki a tautolu e matagahua aoga lahi. Kua lata ia tautolu ke hataki e tau tagata hagaao ki ai mo e ke lagomatai a lautolu ne loto fakamooli ke aoga mai he fakaalofa noa ha Iehova ke moua foki e lautolu e fakamouiaga. Ne loto fakaaue lahi a Paulo ke he matagahua nei. Ne tohia e ia: “Oi fakaalofa foki kia au, kaeke ke nakai fakamatala e au e vagahau mitaki.” Ne fakakite foki e ia e logonaaga haana ke he tau kupu nei: “Ko e tau iloilo katoa mo e tau goagoa; ko e mena ia kua amaamanaki ai au, kia fakamatala atu au e tala mitaki kia mutolu foki ha i Roma.”—1 Kori. 9:16; Roma 1:14, 15.
To tali a tautolu ki a Iehova kaeke fakaheu e tautolu e gahua aoga lahi he hataki e tau tagata. Kua iloa e tautolu e mena ne talahau e Iehova ke he perofeta ko Esekielu: “Ko e tama he tagata na e, kua eke e au a koe mo tagata toko ke he magafaoa a Isaraela; ko e mena ia kia fanogonogo mai a koe ke he kupu mai he gutu haku, mo e fakamafana e koe a lautolu ia au. Ka pehe atu kia ia ne mahani kelea, To mate ni a koe; ka e nakai fakamafana e koe a ia, mo e nakai vagahau atu a koe kia ia ke mafanatia a ia, ke liu mai a ia he hana puhala kelea, kia moui ai a ia; to mate e tagata mahani kelea na he hana mahani hepehepe, ka ko e toto hana to taui atu ai e au kia koe.”—Eseki. 3:17, 18.
Ko e tau aho fakahiku nei kua uka ke fehagai ki ai. Kua nakai mukamuka ke fakalagotatai e tau lekua fakamagafaoa, gahua fakalalolagi, gahua he fakapotopotoaga, mo e gahua fakamatala. Lafi ki ai, kua tokologa ia mutolu ne fehagai mo e gagao, fakaagitau, kua momotua, mo e totokoaga foki. Laulahi ia mutolu kua “pehia he tau kavega.” Ti manako a mautolu ke fakakite atu e ofania fakamatakainaga ha mautolu ki a mutolu, ke felauaki mo e mena ne talahau e Iesu: “Kia o mai a mutolu kia au, ko mutolu oti ne matematekelea mo e pehia he tau kavega; ko au foki ke okioki ai a mutolu.” (Mata. 11:28) Manako a mautolu ke nava mafanatia atu ki a mutolu oti ne foaki e laliaga ke fakatumau ke fekafekau tua fakamooli ki a Iehova pete ko e tau paleko lalahi mo e ikiiki.
Ko e fua he gahua fakamatala mo e fakaakoaga makutu ha mutolu mo e kakano he fakamonuina ha Iehova, ati 4,762 e evalesi ne papatiso he tau fahitapu takitaha. He tau he fekafekauaga kua mole, kua 1,375 e fakapotopotoaga foou ne fakatū. Kua amaamanaki mo e liogi a mautolu ko e tohi foou Ko e Heigoa ne Fakaako Moli he Tohi Tapu?, ne moua ke molea 120 e vagahau, to lagomatai e tau miliona ke aoga mai he fakaalofa noa mo e monuina mai ia Iehova he “aho nai ke fakamomoui ai.”
Kia mauokafua kua fakaalofa e Kau Fakatufono ki a mutolu ti kua liogi a mautolu ma mutolu. Ti fakaaue foki a mautolu ma e tau liogi ha mutolu ma mautolu.
Tau matakainaga ha mutolu,
Kau Fakatufono he Tau Fakamoli a Iehova