Ko e Tohi Mai he Kau Fakatufono
Tau Matakainaga Fakahelehele he Tau Fakamoli a Iehova:
Ko e tau magaaho fiafia ofoofogia mooli anei! Ti ko e fiafia ha ia ha mautolu! Kua olioli mooli a mautolu ke fakatau gahua mo mutolu ma tau matakainaga fakahelehele katoa—ke he “loto fakalataha,” tuga ne fa mahani—ke taute e gahua fakamatala kua mua atu e lahi hagaao ke he ha tautolu a Matua he lagi, ko Iehova.—Sefa. 3:9; Ioane 14:12.
Ko e olioli ha tautolu he fekafekau ki a Iehova kua nakai kakano to atā mai he tau mena vihi lahi mahaki. He fekafekauaga he tau kua mole, falu ia mutolu ne matematekelea he tau tutuaga uka ha ko e tau mafuike, tau vai ne puke lahi, tau afā, mo e falu matematekelea pauaki ne fakahagahaga kelea aki e moui. (Mata. 24:7) Tokologa ne taufetului he tau aho takitaha ha kua lauia he tau gagao mo e fuakau. Igatia a tautolu mo e totoko e holo ki mua he “tau mena matematekelea.” (Mata. 24:8) He falu motu, putoia a Armenia, Eritrea, mo Korea Toga, tokologa e tau matakainaga ha tautolu ne tuku he tau fale puipui ha ko e tua ha lautolu.—Mata. 24:9.
Ko e heigoa ne lagomatai a tautolu ke tumau e onoonoaga mitaki pete e tau mena uka nei? Ko e lauga he tau ma e 2010 ne fakamanatu ki a tautolu e taha puhala uho: ‘Kua fakamanavalahi e fakaalofa ke he tau mena oti. Nakai tuai oti e fakaalofa.’ (1 Kori. 13:7, 8) E, ko e fakaalofa ha tautolu ke he taha mo e taha—pihia foki e fakaalofa ha tautolu ma Iehova—kua fakamalolō a tautolu ke kautū mo e fakamanavalahi.
Tokologa ne pehē ko e tau Kerisiano, kua ofogia he laulahi mo e holo tatai he gahua fakamatala ha tautolu. Pete he liga nakai talia e lautolu e tau taofiaga mo e tau fakaakoaga ha tautolu, ka kua omoi foki falu ke talahau, “Kua taute e mutolu e gahua kua lata ke taute e mautolu!” Ko e heigoa taha mena pauaki ati maeke ai he Tau Fakamoli a Iehova ke matutaki ke fakamatala he taha aho mo e taha aho? Liu foki talahau e tali, ko e fakaalofa. Ke tuga e Matua ha tautolu he lagi, nakai manako a tautolu ke malaia, po ke mate taha. (2 Pete. 3:9) Ko e manako ha tautolu ke hohoko oti kana ke he tokihala, tuga kua fakakite mai he tapunu foou ko e 7,508,050 tagata fakailoa ne fakamau hifo he tau kua mole he fekafekauaga. Fai fakatokatokaaga lotu foki nakai ne tokologa lahi pihia e tagata fakamatala ne malolō he taute e matagahua nei mai he loto fakaalofa mo e atāina ke foaki noa e lagomatai fakaagaaga ke he falu?
Ko e mena kua fakamalolō ki a mautolu ke kitia kua fakatumau ke fakamooli e perofetaaga ne fakamau e Isaia: “To hoko ni ke he tau aho a mui, to fakamau ai e mouga ha i ai e fale a Iehova ke he tapunu mouga ha atu mouga, to fakatokoluga ai foki ki luga he tau matiketike, ti tafe atu ki ai e tau motu oti kana.” (Isaia 2:2-4) Putoia ke he moto tagata ne tafe atu ke he fale ha Iehova ko e 294,368 a lautolu ne papatiso he tau kua mole he fekafekauaga. Kua talia fiafia e tautolu e tau fakahelehele uho nei ke fakalataha mo tautolu. Kia fakaohooho he ha tautolu a fakaalofa faka-Kerisiano a tautolu ke fakatumau ke lagomatai a lautolu ke totoko e tau paleko he fī ha tautolu ko Satani ko e Tiapolo.—1 Pete. 5:8, 9.
Ko e tapunu foou ko e 18,706,895 ne fakalataha ke he Fakamanatuaga he Aho Ua, ia Mati 30, 2010, ne fakakite kua maeke agaia e tau miliona ke fakalataha mo tautolu ke he tapuakiaga ha tautolu ki a Iehova. Ko e fiafia mooli ha ia ha tautolu ha kua nakaila fakaoti e Iehova e fakatokaaga kelea nei! Ka e he magaaho nei, to lagomatai he fakaalofa ha tautolu a tautolu ke fakatumau ke fakauka.—2 Tesa. 3:5.
Ko e tau Fonoaga Faahimotu “Remain Close to Jehovah!” ko e laulahi ne fakahoko ke he lalolagi katoa he 2010, ne fakamalolō e fakafetuiaga ha tautolu mo e ha tautolu a Matua he lagi, ko Iehova. Ko e mooli ha ia he tau kupu he salamo: “Uhoaki e motu kua eke a Iehova mo Atua ha lautolu.” (Sala. 144:15) Pete ni ko e heigoa kua fakatoka mai he vahā i mua, kua mauokafua a tautolu kaeke ke kau a Iehova mo tautolu, kua nakai fai mena a tautolu ke matakutaku ki ai. (Sala. 23:4) To nakai leva, to puhala mai e Iehova he haana Tama ke “moumou e ia e tau gahua he tiapolo.” (1 Ioa. 3:8) Ko e mooli, to talifaki a tautolu ke he aho ia ke hoko mai! Ka e he magaaho nei, kua lahi e gahua ha tautolu ke fakafita ki ai.—1 Kori. 15:58.
Kia mafanatia to “nakai noa” a mautolu mo e tokutoku a mutolu he tau liogi ha mautolu. (Roma 1:9) “Kia fakatumau e mutolu a mutolu ke he fakaalofa he Atua, ti fakatalitali ke he fakaalofa he Iki ha tautolu ko Iesu Keriso, kia hoko atu ke he moui tukulagi.”—Iuta 21.
Fakaalofa atu a mautolu ki a mutolu oti!
Ha mutolu a tau matakainaga,
Kau Fakatufono he Tau Fakamoli a Iehova