Aoga Katoatoa Mai he Tau Foakiaga a Iehova

1, 2. (a) Fēfē e logonaaga he Tau Fakamoli a Iehova ke he Tohi Tapu? (e) Ko e heigoa e vala ne fiafia a koe ki ai he Tohi Tapu?

KO E Tau Fakamoli a Iehova, ne fiafia a tautolu ke he Tohi Tapu. Foaki ki a tautolu e mafanatia, amaamanakiaga, mo e fakaakoaga ka falanaki a tautolu ki ai. (Roma 15:4) Nakai ko e tohi he tau manatu he tagata ka ko e “kupu he Atua.”​—1 Tesalonia 2:13.

² Liga igatia a tautolu mo e tau vala ne fiafia ki ai he Tohi Tapu. Falu ne fiafia ke he tau Evagelia ha kua fakakite e tau mahani mitaki ha Iehova puhala ia Iesu. (Ioane 14:9) Falu ne fiafia ke he tau tohi fakaperofeta tuga e Fakakiteaga ne kua fakakite ki a tautolu e “tau mena kua lata ke hohoko vave mai.” (Fakakiteaga 1:1) Falu ne mafanatia ka totou e tau Salamo, mo e falu ne fiafia he totou e fakatonuaga lagomatai he tohi he Tau Fakatai. Maaliali mogoia, ko e Tohi Tapu ko e tohi ma e tau tagata oti.

3, 4. (a) Fēfē e logonaaga ha tautolu ke he tau tohi ha tautolu? (e) Ko e heigoa e tau tohi kua moua e tautolu ma e tau matakau pauaki he tau tagata?

³ Ha kua fiafia a tautolu ke he Tohi Tapu, kua fiafia foki a tautolu ke he tau tohi ha tautolu, ha kua fakavē ai ke he Kupu he Atua. Ko e tau tohi, tau porosua, tau mekasini, mo e falu tohi foki kua moua e tautolu ko e tau foakiaga mai ia Iehova. Kua lagomatai ai a tautolu ke nonofo fakatata ki a ia mo e fakamalolō tumau e tua ha tautolu.​—Tito 2:2.

⁴ Loga e tau tohi ha tautolu kua tohia ma e Tau Fakamoli a Iehova. Ka e ha ha i ai falu tohi ne tohia ma e tau matakau pauaki, tuga a lautolu ne ikiiki po ke tau matua. Laulahi he tau vala tala mo e tau vitiō he faahi kupega hila ha tautolu ne tauteute pauaki ma e tau tagata ne nakai ko e Tau Fakamoli a Iehova. Ko e loga he tau vala tala pihia kua fakakite na fakamooli e Iehova e maveheaga haana ke foaki fakaloga e tau fakaakoaga ma e tau tagata oti.​—Isaia 25:6.

5. Ko e heigoa ka iloa e tautolu kua loto fakaaue a Iehova ki ai?

⁵ Laulahi a tautolu kua fiafia ke lahi e magaaho ke totou e Tohi Tapu mo e tau tohi ha tautolu. Ti liga nakai lahi tumau e magaaho kua fakaaoga e tautolu ke fakaako e tau tohi oti ne moua e tautolu. Maeke a tautolu ke iloa kua fiafia a Iehova ka fakaaoga fakapulotu e tautolu e tau magaaho ha tautolu ke totou mo e fakaako e Tohi Tapu mo e tau tohi ha tautolu. (Efeso 5:15, 16) Ka e ha ha ai e hagahaga kelea kua lata a tautolu ke fakaeneene ke kalo kehe ai. Ko e heigoa e mena ia?

6. Ko e heigoa ka fakatupu a tautolu ke nakai moua e tau aoga he tau foakiaga ha Iehova?

⁶ Ka nakai fakaeneene a tautolu, liga manatu a tautolu kua nakai aoga e falu vala pauaki he Tohi Tapu po ke falu tohi ki a tautolu. Ma e fakatai, ka e kua kaeke ke tuga na fai vala he Tohi Tapu kua nakai aoga ke he tuaga ha tautolu? Po ke kaeke ke nakai ko tautolu e vala pauaki he tohi? Totou fakamafiti noa ni kia e tautolu e vala tala po ke kalo a tautolu he totou oti ai? Ka pihia, to nakai moua oti e tautolu e vala tala aoga ka lagomatai a tautolu. Maeke fēfē a tautolu ke kalo kehe he hagahaga kelea ia? Lata a tautolu ke manatu na moua e tautolu e tau vala tala oti mai ia Iehova. He Tohi Tapu ne totou e tautolu: “Ko au ko Iehova, ko e hau a Atua, kua fakaako atu kia koe ke he tau mena ke aoga ai.” (Isaia 48:17) He vala tala nei, to fakatutala a tautolu ke he tolu e manatu ka lagomatai a tautolu ke aoga mai he tau foakiaga oti kua mai ia Iehova.

TAU MANATU KE AOGA MAI HE TOTOUAGA HE TOHI TAPU

7. Ko e ha kua lata ia tautolu ke totou e Tohi Tapu mo e manamanatuaga kua hafagi?

⁷ Totou mo e manamanatuaga kua hafagi. Mooli kua tohi e falu vala he Tohi Tapu ke lata ma e tagata po ke matakau pauaki he tau tagata. Ka e talahau fakamaali he Tohi Tapu “ko e tau Tohi Tapu oti kana mai he Agaga he Atua ia, kua aoga ni.” (2 Timoteo 3:16) Kakano haia ne lata ia tautolu ke moua e manamanatuaga kua hafagi ka totou e Tohi Tapu. Taha e matakainaga ne lali ke manatu na maeke a ia ke iloa loga e tau fakaakoaga mai he taha ni e tala. Lagomatai ai ki a ia ke kitia e tau fakaakoaga kua nakai kitia maaliali. Ato totou e tautolu e Tohi Tapu, lata ia tautolu ke ole ki a Iehova ke foaki ki a tautolu e manamanatuaga kua hafagi mo e pulotu ke maama e tau fakaakoaga kua manako a ia ke iloa e tautolu.​—Esera 7:10; totou Iakopo 1:5.

8, 9. (a) Ka totou e Tohi Tapu, ko e heigoa e tau hūhū ka hūhū hifo e tautolu? (e) Ko e heigoa he tau tohi fakalotomatala ma e tau motua Kerisiano kua talahau ki a tautolu hagaao ki a Iehova?

⁸ Talahau e tau hūhū. Ka totou e koe e Tohi Tapu, fakamataofi ti hūhū hifo e tau hūhū nei: ‘Ko e heigoa ne talahau he mena nei ki a au hagaao ki a Iehova? Maeke fēfē au ke fakaaoga e vala tala nei he moui haaku? Maeke fēfē au ke fakaaoga ai ke lagomatai e falu?’ Ka manamanatu fakahokulo a tautolu ke he tau hūhū nei, to aoga lahi a tautolu mai he totou Tohi Tapu ha tautolu. Kia kitekite la tautolu ke he taha e fakataiaga. Fakamaama he Tohi Tapu e falu lotomatala ma e tau motua Kerisiano. (Totou 1 Timoteo 3:2-7.) Ka e laulahi ia tautolu ne nakai ko e tau motua, ti liga manamanatu a tautolu kua nakai aoga e vala tala nei ki a tautolu. Ka e fakaaoga la e tautolu e tau hūhū tolu ne talahau fakamua ke kitia e puhala ka lagomatai he tau tohi fakalotomatala a tautolu oti.

⁹ “Ko e heigoa ne talahau he mena nei ki a au hagaao ki a Iehova?” Foaki mai e Iehova ki a tautolu e tau tohi fakalotomatala ma e tau motua. Kua tokoluga e tau tuaga haana ma e tau tagata taane nukua leveki e fakapotopotoaga. Fakakite he mena nei kua uho e fakapotopotoaga ki a Iehova. Pehē e Tohi Tapu kua fakafua ai e ia “māna ke he hana [Tama] toto ni.” (Gahua 20:28) Ti amanaki a Iehova ke he tau motua ke eke mo tau fakafifitakiaga mitaki, ti fai fakalagoaga a lautolu ki mua haana ma e puhala ne fehagai a lautolu ke he tau tagata he fakapotopotoaga. Manako a ia ki a tautolu ke logona e haohao mitaki i lalo he levekiaga ha lautolu. (Isaia 32:1, 2) Ka totou e tautolu e tau tohi fakalotomatala nei, iloa e tautolu e lahi he manatu ha Iehova ki a tautolu.

10, 11. (a) Ka totou a tautolu ke he tau lotomatala ma e tau motua, maeke fēfē a tautolu ke fakagahua e vala tala ke he tau momoui ni ha tautolu? (e) Maeke fēfē a tautolu ke fakaaoga e vala tala nei ke lagomatai e falu?

¹⁰ “Maeke fēfē au ke fakaaoga e vala tala nei he moui haaku?” Kaeke ko e motua a koe, kua lata ia koe ke liu fakamanatu tumau e tohi fakalotomatala ti lali ke holo ki mua. Ka “foli [a koe] ke he feua he epikopo,” kua lata a koe ke lali ke hokotia ke he tau tuaga nei he lotomatala haau. (1 Timoteo 3:1) Ka e maeke he tau Kerisiano oti ke fakaako mai he tau tohi fakalotomatala nei. Ma e fakatai, amanaki a Iehova ki a tautolu takitokotaha ke mahani totonu mo e fakaaoga e fifiliaga mitaki. (Filipi 4:5; 1 Peteru 4:7) Ka eke e tau motua mo “tau fakafifitaki ke he fuifui mamoe,” kua maeke ia tautolu ke fakaako mai ia lautolu mo e “fifitaki . . . ha lautolu a tua.”​—1 Peteru 5:3; Heperu 13:7.

¹¹ “Maeke fēfē au ke fakaaoga e vala tala nei ke lagomatai e falu?” Maeke a tautolu ke fakaaoga e tohi fakalotomatala ma e tau motua Kerisiano ke lagomatai e tau tagata fakaako Tohi Tapu mo e falu ne fiafia ke maama kua kehe e tau motua mai he tau akoako fakalotu. Maeke he tohi nei foki ke lagomatai a tautolu ke manatu e gahua malolō ne taute he tau motua he fakapotopotoaga ha tautolu. Fakahiku ai, to lagomatai a tautolu ke fakalilifu e tau matakainaga taane nei. (1 Tesalonia 5:12) He lahi e fakalilifu ha tautolu ki a lautolu, to lahi e fiafia ha lautolu ke he ha lautolu a kotofaaga.​—Heperu 13:17.

12, 13. (a) He fakaaoga e tau koloa kua moua e tautolu, ko e heigoa e kumikumiaga kua liga taute e tautolu? (e) Talahau e fakataiaga ke he vala tala ne takatakai ai ka fakakite e tau fakaakoaga ne nakai kitia mafiti.

¹² Taute e kumikumiaga. Ka fakaako e tautolu e Tohi Tapu, maeke a tautolu ke kumi e tau tali ke he tau hūhū nā:

• Ko hai ne tohi e vala nei he Tohi Tapu?

• I fe mo e magaaho fe ne tohi ai?

• Ko e heigoa e tau mena tutupu aoga ne tutupu he mogo ne tohia e tohi nei?

Ko e tau vala tala pihia ka lagomatai a tautolu ke kitia e tau fakaakoaga kua nakai kitia mafiti e tautolu.

¹³ Ma e fakatai, pehē Esekielu 14:13, 14: “Kaeke ke hala e motu nai kia au, he holifono a lautolu, ti fakaolo atu e au haku a lima, mo e papaki ai e tokotoko he hana tau mena kai, mo e tuku atu ai e hoge, mo e fakaoti ai e tau tagata katoa mo e tau manu ha ha i ai; Ane mai ha ha i ai e tau tagata tokotolu nai ko Noa, ko Tanielu, mo Iopu, po kua laveaki e lautolu a lautolu hoko lautolu ni ke he mahani tututonu ha lautolu, kua pihia mai e Iki ko Iehova.” Ka taute e tautolu e falu kumikumiaga, iloa e tautolu na tohi e Esekielu e tau kupu ia kavi ke he 612 e tau ato fai Keriso. Totou tau tuai he mamate a Noa mo Iopu, kua manatu agaia e Iehova e mahani fakamooli ha laua. Ka e moui agaia a Tanielu. Liga kavi ke he 20 e tau he moui haana he mogo ne pehē a Iehova kua tututonu a ia ke tuga a Noa mo Iopu. Ko e heigoa ne fakaako e tautolu? Kitia mo e tokiofa e Iehova e tau fekafekau fakamooli haana ne putoia a lautolu ne ikiiki.​—Salamo 148:12-14.

AOGA MAI HE TAU TOHI KEHEKEHE

14. Taute fēfē e tau tohi ke lagomatai a lautolu ne ikiiki, ti maeke fēfē foki ke aoga ai e falu? (Kikite fakatino he kamataaga.)

¹⁴ Tau tohi ma lautolu ne ikiiki. Iloa e tautolu na maeke a tautolu ke aoga mai he tau vala oti he Tohi Tapu. He puhala pihia, maeke a tautolu ke aoga mai he tau tohi oti ha tautolu. Kia fakatutala la tautolu ke he tau fakataiaga gahoa. He tau tau kua mole ne foaki e Iehova loga e vala tala ma lautolu ne ikiiki.^[1] (Kikite tala he matahiku.) Lagomatai he vala tala nei a lautolu ke fahia mai he tau peehiaga he aoga mo e tau paleko he tupu hake. Ka e maeke fēfē a tautolu oti ke aoga mai he totou e tau vala tala mo e tau tohi nei? Ka totou e tautolu e tau vala tala nei, iloa e tautolu e tau lekua ha lautolu ne ikiiki ti mitaki ke maeke ke iloa ke lagomatai mo e fakamalolō a lautolu.

15. Ko e ha kua lata e tau Kerisiano fuata ke fiafia ke he vala tala ma lautolu ne ikiiki?

¹⁵ Ko e tau Kerisiano fuata kua nakai lata ke fakatokoluga lahi ke totou e tau vala tala ma lautolu ne ikiiki. Loga he tau lekua ne fakatutala e tau vala tala nei ma lautolu nukua lauia e tau Kerisiano oti. Ma e fakatai, igatia a tautolu mo e lata ke papale e tau taofiaga ha tautolu, tautaofi e tau logonaaga ha tautolu, fakaheu e peehiaga atu taha, ti kalo kehe he tau feoakiaga mo e tau fakafiafiaaga kelea. Ti pete ne tohia e tau tohi nei ma lautolu ne ikiiki, ko e tau vala tala i loto kua mai he Tohi Tapu, ti maeke e tau Kerisiano oti ke aoga ai.

16. Ko e heigoa foki ne lagomatai he tau tohi ha tautolu a lautolu ne ikiiki ke taute?

¹⁶ Ko e tau tohi ne tohia ma lautolu ne ikiiki ka lagomatai foki ki a lautolu ke fakamalolō e fakafetuiaga ha lautolu mo Iehova. (Totou Fakamatalaaga 12:1, 13.) Maeke foki e tau fuata ke aoga mai ai. Ma e fakatai, ko e fufuta he Awake! ia Aperila 2009 ne putoia e vala tala “Young People Ask . . . How Can I Make Bible Reading Enjoyable?” He vala tala ia ne loga e manatu lagomatai ti putoia e puha ka hehele, toka, ti fakaaoga he mogo ka fakaako. Aoga nakai e tau fuata mai he vala tala? Taha e hoana mo e ko e matua fifine ne pehē kua uka tumau e totou Tohi Tapu ki a ia. Ka e fakaaoga e ia e tau manatu he vala tala ti onoono lahi atu mogonei ke totou e Tohi Tapu. Pehē a ia kua fiafia a ia he kitia e matutakiaga he tau tohi he Tohi Tapu ti maeke ke tukutuku fakalataha e fakatino, ti lafi, “nakaila fiafia pehē au he totou e Tohi Tapu.”

17, 18. Maeke fēfē a tautolu ke aoga mai he totou e tau tohi ne tohia ma e tau tagata he fonua? Talahau e fakatai.

¹⁷ Tau tohi ma e tau tagata he fonua. Tali mai he 2008 ne moua e tautolu e fufuta fakaako he Ko e Kolo Toko. Ko e fufuta nei ne tohia pauaki ma e Tau Fakamoli a Iehova, ka e fai tohi pauaki foki a tautolu ma e tau tagata he fonua. Maeke fēfē foki a tautolu ke aoga mai he tau mena oti nei? Manamanatu la ke he fakataiaga. Ka uiina e koe e tagata ke he Fale he Kautu ti hau a ia, kua fiafia a koe. He lauga e matakainaga taane, manamanatu a koe ke he tagata ne uiina e koe. Manamanatu a koe ke he tau logonaaga he tagata nei ke he tau mena ne logona e ia ti maeke fēfē he vala tala ke hiki e moui haana. Ko e fua, kua aamotia e loto haau ti loto fakaaue lahi a koe ke he lauga ia.

¹⁸ Liga fai mena pihia ne tupu ki a tautolu ka totou e tautolu e tau tohi ne tohia ma e tau tagata he fonua. Ma e fakatai, ko e fufuta ma e tau tagata he fonua he Ko e Kolo Toko mo e tau vala tala he jw.org ne fakamaama e Tohi Tapu he fakaaoga e tau kupu mo e tau talahauaga kua mukamuka ke maama. Ka totou e tautolu e tau vala tala nei, kua fakahokulo e tautolu e maamaaga mo e fiafia ha tautolu ke he tau kupu mooli he Tohi Tapu kua fitā e iloa mitaki e tautolu. Maeke foki a tautolu ke fakaako e tau puhala foou ke fakamaama e tau taofiaga ha tautolu he gahua fakamatala. He puhala pihia foki, kua fakamalolō he mekasini Awake! e taofiaga ha tautolu ko e mena fai Tufuga. Lagomatai foki a tautolu ke fakaako ke lalago e tau taofiaga ha tautolu.​—Totou 1 Peteru 3:15.

19. Maeke fēfē a tautolu ke fakakite e fakaaue ki a Iehova ma e tau foakiaga haana?

¹⁹ Maaliali ai, kua foaki e Iehova loga e fakatonuaga mo e fakaakoaga ma e aoga ha tautolu. (Mataio 5:6) Kia matutaki a tautolu ke totou mo e fakaaoga e tau vala tala oti ne foaki mai e ia ki a tautolu. Ka taute pihia e tautolu, to aoga ki a tautolu mo e to fakakite ki a Iehova kua fakaaue a tautolu ke he tau foakiaga oti haana.​—Isaia 48:17.