Hiki Agaia Kia he Tohi Tapu e Moui Haau?
“Kia faliu a mutolu ke he liu foki fakafou he tau loto ha mutolu.”—ROMA 12:2.
1-3. (a) Ko e heigoa e tau hikiaga ne liga uka ma tautolu ke taute he mole e papatiso? (e) Ka uka lahi e holo ki mua nakai tuga he amanaki a tautolu ki ai, ko e heigoa e tau hūhū ka hūhū e tautolu? (Kikite tau fakatino he kamataaga.)
KE HE loga e tau tau ne pelē tupe, ula, lahi e inu kava, mo e fakaaoga tulaki a Kevin.[1] (Kikite tala he matahiku.) Fakaako a ia hagaao ki a Iehova ti manako ke eke mo kapitiga haana. Ka e he taute pihia, kua lata a ia ke taute e tau hikiaga lalahi he moui haana. Maeke a ia ke hiki he puhala he lagomatai ha Iehova mo e malolō he Kupu Haana ko e Tohi Tapu.—Heperu 4:12.
2 He mole e papatiso ha Kevin, ne taute agaia e ia e tau hikiaga ke he aga haana ke eke a ia mo Kerisiano mitaki. (Efeso 4:31, 32) Ma e fakatai, ne fa mahani a ia ke ita noa. Ofo a ia he iloa kua uka ai ke tautaofi e ita haana. Ti pehē a Kevin ko e fakaako ke tautaofi e ita haana kua uka atu ke he nakai liu haana ke taute e tau mena kelea ato papatiso a ia! Ka kua maeke a ia ke taute e tau hikiaga he olelalo ki a Iehova ke lagomatai a ia mo e fakaako fakamakutu e Tohi Tapu.
3 Ato papatiso a tautolu, tokologa a tautolu ne taute e tau hikiaga lalahi he tau momoui ha tautolu ke maeke a tautolu ke momoui he puhala ne talahau he Tohi Tapu kua lata ia tautolu. Ka e pihia foki mogonei, kua mailoga e tautolu ha ha i ai e tau hikiaga ikiiki atu kua lata a tautolu ke taute ke tuga e Atua mo e Keriso. (Efeso 5:1, 2; 1 Peteru 2:21) Ma e fakatai, liga mailoga e tautolu kua gugū lahi a tautolu po ke fa loma mo e talahau e tautolu e tau mena kelea hagaao ke he falu. Po ke falu mogo kua fa matakutaku a tautolu ke he tau mena ka manamanatu po ke talahau he falu kua nakai taute e tautolu e mena hako. Liga kua leva e lali ha tautolu ke hiki ka e taute agaia e tautolu e tau hehē taha ia. Ti liga manamanatu a koe: ‘Ko e ha kua uka lahi ma haaku ke taute e tau hikiaga ikiiki nei? Ko e heigoa haaku kua lata ke taute ke fakagahua e mena ne talahau he Tohi Tapu ka matutaki au ke fakaholo ki mua e aga fakatagata haaku?’
MAEKE A KOE KE FAKAFIAFIA A IEHOVA
4. Ko e ha kua nakai maeke a tautolu ke fakafiafia a Iehova ke he tau mena oti ne taute e tautolu?
4 Kua fakaalofa a tautolu ki a Iehova, ti manako a tautolu ke fakafiafia a ia mo e tau loto katoa ha tautolu. Ka e momoko ai, nakai maeke a tautolu ke fakafiafia a ia he tau magaaho oti, ha kua nakai mitaki katoatoa a tautolu. Fa logona hifo a tautolu tuga e aposetolo ko Paulo ne pehē: “Ha ha ia au e loto atu, ka e nakai iloa e au ke eke e mena mitaki.”—Roma 7:18; Iakopo 3:2.
5. Ko e heigoa e tau hikiaga kua taute e tautolu ato papatiso, ka ko e heigoa e tau lolelole ne liga taufetului agaia a tautolu?
5 Ato fakalataha a tautolu ke he fakapotopotoaga, ne lata a tautolu ke nakai liu taute e tau mena ne vihiatia e Iehova. (1 Korinito 6:9, 10) Ka e nakai mitaki katoatoa agaia a tautolu. (Kolose 3:9, 10) Ti matutaki a tautolu ke taute e tau hehē pete kua papatiso a tautolu ke he loga e tau tau. He falu magaaho, liga fai manako mo e tau logonaaga kelea a tautolu, po ke liga uka ia tautolu ke tautaofi e lolelole he tau aga ha tautolu. Ti lata ia tautolu mogoia ke totoko e lolelole pihia ke he loga e tau tau.
6, 7. (a) Ko e heigoa ati maeke a tautolu ke eke mo tau kapitiga a Iehova pete ne nakai mitaki katoatoa ha tautolu? (e) Ko e ha kua lata ia tautolu ke nakai tautaofi he ole ki a Iehova ma e fakamagaloaga?
6 Pete he nakai mitaki katoatoa a tautolu, maeke agaia a tautolu ke fakafetui mo Iehova ti fekafekau ki a ia. Manatu tumau e magaaho ne eke fakamua a koe mo kapitiga ha Iehova. Ko ia ne kitia e mitaki haau ti manako ki a koe ke iloa a ia. (Ioane 6:44) Iloa foki e ia e tau hepehepe mo e tau lolelole haau ti to taute e koe e tau hehē. Ka e manako agaia a Iehova ki a koe ke eke mo kapitiga Haana.
7 Fakaalofa lahi mahaki a Iehova ki a tautolu ti foaki mai e ia ki a tautolu e mena fakaalofa uho. Ne fakafano hifo e ia a Iesu ko e Tama Haana ke he lalolagi ke foaki e moui ke eke mo lukutoto he tau agahala ha tautolu. (Ioane 3:16) Ka taute e tautolu e hehē, maeke a tautolu ke ole ki a Iehova ke fakamagalo. Ha ko e lukutoto, maeke a tautolu ke iloa to fakamagalo e ia a tautolu ti to eke agaia a tautolu mo tau kapitiga Haana. (Roma 7:24, 25; 1 Ioane 2:1, 2) Manatu na mate a Iesu ke lata mo e tau tagata agahala ne tokihala. Ti pete he logona hifo e tautolu kua kelea lahi e mena ne taute e tautolu, kia nakai oti e liogi ha tautolu ki a Iehova ke fakamagalo. Ka nakai ole a tautolu ki a ia ke fakamagalo a tautolu, to tuga e nakai manako a tautolu ke holoholo e tau lima ka kiva. Fakaaue mooli a tautolu ki a Iehova ha kua taute e ia ke maeke a tautolu ke eke mo tau kapitiga haana pete kua nakai mitaki katoatoa a tautolu!—Totou 1 Timoteo 1:15.
Ka manako a tautolu ke fakatata lahi ki a Iehova, lata ia tautolu ke eketaha tumau ke fifitaki a ia mo e Tama Haana
8. Ko e ha kua nakai lata ia tautolu ke fakaheu e tau lolelole ha tautolu?
8 Mooli, nakai fakaheu e tautolu e tau lolelole ha tautolu po ke piu tumau ki ai. Talahau e Iehova ki a tautolu e puhala ke eke a tautolu mo tau tagata kua manako a ia mo tau kapitiga Haana. (Salamo 15:1-5) Ti ka manako a tautolu ke fakatata lahi ki a ia, kua lata ia tautolu ke eketaha tumau ke fifitaki a ia mo e Tama Haana. Lata foki a tautolu ke lali ke tautaofi e tau manako hepe ha tautolu, ti maeke mogoia a tautolu ke utakehe falu mena pihia. Pete he leva e papatiso ha tautolu, kua lata a tautolu ke holo ki mua tumau e aga fakatagata ha tautolu.—2 Korinito 13:11.
9. Iloa fēfē e tautolu na maeke a tautolu ke tapulu tumau ke he tagata foou?
9 Tala age e aposetolo ko Paulo ke he tau Kerisiano: “Kia tuku kehe e mutolu e tagata tuai ke he tau mena ne mahani ai a mutolu i tuai, ko ia ha ne kelea, ke lata mo e tau manako lahi ke fakahehe ai. Ka kia fakafou a mutolu ke he manako he tau loto ha mutolu. Mo e tapulu a mutolu ke he tagata fou kua eke ke lata mo e Atua, ke he tututonu mo e mahani mitaki ke fakamoli ai.” (Efeso 4:22-24) Kakano e mena nei kua lata a tautolu ke tumau e eketaha ke hiki mo e ‘tapulu ke he tagata fou.’ Ti pete ne leva e fekafekau ha tautolu ki a Iehova, maeke tumau a tautolu ke fakaako fakalahi ke he tau mahani Haana. To lagomatai he Tohi Tapu a tautolu ke tumau e taute he tau hikihikiaga ke he aga fakatagata ha tautolu ke eke mo tagata kua tuga a ia.
KO E HA NE UKA LAHI AI?
10. Ko e heigoa kua lata ke taute e tautolu ke tumau e taute he tau hikiaga ha ko e lagomatai mai he Tohi Tapu, ti ko e heigoa e tau hūhū kua liga hūhū e tautolu?
10 Manako oti a tautolu ke muitua e mena ne talahau he Tohi Tapu. Ka e lata a tautolu ke eketaha fakamalolō ka manako a tautolu ke matutaki ke hiki. Ko e ha kua lata a tautolu ke taute e laliaga pihia? Nakai kia na taute fakamukamuka e Iehova ma tautolu ke taute e mena hako?
11-13. Ko e ha kua amanaki a Iehova ki a tautolu ke eketaha a tautolu ke kautū mai he tau lolelole ha tautolu?
11 Ka manamanatu a tautolu ke he lagi mo e lalolagi katoatoa mo e tau mena oti kana i ai, nakai fakauaua a tautolu kua ha ha ia Iehova e malolō ke taute ha mena. Ma e fakatai, taute e ia e laā, ne malolō lahi mahaki. He tau sekone takitaha, ne fakatoka mai he laā e maama mo e vevela lahi mahaki, ka ko e vala tote ni he malolō nei kua lata mo e moui he lalolagi. (Salamo 74:16; Isaia 40:26) Foaki mai foki e Iehova e malolō ke he tau fekafekau haana he lalolagi ka lata ai mo lautolu. (Isaia 40:29) Maaliali ai, ka manako a Iehova, to taute fakamukamuka lahi e ia ma tautolu ke totoko e tau lolelole ha tautolu mo e fakaoti e tau manako hepe. Ka ko e ha ne nakai taute pihia e ia?
12 Foaki mai e Iehova ki a tautolu e atāina ke fifili. Fakaatā e ia a tautolu ke fifili e tautolu ke omaoma po ke nakai omaoma ki a ia. Ka fifili a tautolu ke omaoma ki a ia mo e eketaha fakamalolō ke taute e finagalo haana, fakakite e tautolu kua fakaalofa a tautolu ki a ia ti manako ke fakafiafia a ia. Pehē a Satani kua nakai tonuhia a Iehova ke pule. Ka omaoma a tautolu ki a Iehova, fakakite e tautolu kua manako a tautolu ke eke a ia mo Pule ha tautolu. Ti maeke a tautolu ke iloa kua tokiofa he ha tautolu a Matua fakaalofa e tau laliaga oti kua taute e tautolu ke omaoma ki a ia. (Iopu 2:3-5; Tau Fakatai 27:11) Ka eketaha fakamalolō a tautolu ke tautaofi e tau lolelole ha tautolu pete he nakai mukamuka ke taute pihia, kua fakamooli a tautolu ki a Iehova mo e fakakite e tautolu kua manako ke eke a ia mo Pule ha tautolu.
13 Tala mai a Iehova ki a tautolu kua lata a tautolu ke eketaha fakamalolō ke fifitaki e tau mahani Haana. (Kolose 3:12; totou 2 Peteru 1:5-7.) Amanaki foki a ia ki a tautolu ke eketaha fakamalolō ke tautaofi e tau mena ne manamanatu a tautolu ki ai mo e tau mena ne logona hifo e tautolu. (Roma 8:5; 12:9) Ha magaaho ni kua eketaha fakamalolō a tautolu ke taute e hikiaga mo e kautū a tautolu, to logona hifo e tautolu e fiafia mooli.
FAKAAOGA TUMAU E KUPU HE ATUA KE HIKI A KOE
14, 15. Ko e heigoa ka taute e tautolu ke feaki e tau mahani kua fiafia a Iehova ki ai? (Kikite puha “Hiki he Tohi Tapu mo e Liogi e Tau Momoui ha Lautolu.”)
14 Ko e heigoa kua lata a tautolu ke taute ke fakatupu e tau mahani kua fiafia a Iehova ki ai? He nakai fifili noa ni e tautolu e mena kua lata ke hiki, lata a tautolu ke fakaatā e Atua ke takitaki a tautolu. Pehē e Roma 12:2: “Aua neke mahani foki a mutolu fakalataha mo e lalolagi nai, ka kia faliu a mutolu ke he liu foki fakafou he tau loto ha mutolu, kia kumikumi e mutolu po ke heigoa e finagalo he Atua, ko e mena mitaki, kia talia foki mo e fiafia, ti kua katoatoa.” Ke iloa e mena ne manako a Iehova, lata ia tautolu ke falanaki ke he lagomatai kua foaki mai e ia. Lata a tautolu ke totou e Tohi Tapu he tau aho takitaha, manamanatu fakahokulo ke he mena ne totou e tautolu, ti liogi ki a Iehova ke foaki ki a tautolu e agaaga tapu haana. (Luka 11:13; Kalatia 5:22, 23) He tau puhala nei, maeke a Iehova ke lagomatai a tautolu ke maama e mena kua fiafia a ia ki ai, ti maeke a tautolu ke fakaako ke manamanatu ke he puhala ne taute e ia. Ti ko e fua, ko e mena kua manamanatu, vagahau, mo e taute e tautolu to mua atu e mitaki ki a Iehova, mo e to fakaako e tautolu ke tautaofi e tau lolelole ha tautolu. Ka e lata agaia foki ke tumau e totoko ha tautolu ke he tau mena ia.—Tau Fakatai 4:23.
Fakaputu e tau vala tala mai he tau tohi ha tautolu po ke tau kupu tohi he Tohi Tapu kua lagomatai a koe ke totoko e tau lolelole haau ti liu foki totou (Kikite paratafa 15)
15 Lafi ke he totou e Tohi Tapu he tau aho takitaha, lata ia tautolu ke fakaako ai mo e lagomatai he tau tohi ha tautolu tuga The Watchtower mo e Awake! Loga e vala tala he tau mekasini nei ne fakaako a tautolu ke fifitaki e tau mahani ha Iehova mo e ke totoko e tau lolelole ha tautolu. Liga moua e tautolu e falu vala tala po ke tau kupu tohi kua lagomatai pauaki ki a tautolu. Maeke a tautolu ke fakaputu e tau kupu tohi mo e tau vala tala nei ke maeke a tautolu ke liu totou ai he falu magaaho.
16. Ko e ha kua nakai lata a tautolu ke fakalolelole ka nakai mafiti e hiki ha tautolu?
16 Lata ke lahi e magaaho ke fakaako ke fifitaki e tau mahani ha Iehova. Ti ka logona hifo e koe kua nakai loga lahi e tau hikiaga kua taute e koe tuga he manako haau, kia fakamanavalahi. Fakamua, maeke a koe ke peehi a koe ke taute e mena ne talahau he Tohi Tapu. Ka ko e lahi haau a manamanatu mo e mahani he puhala ne manako a Iehova ki a koe, to mukamuka lahi ma haau ke manamanatu he puhala Haana mo e taute e mena hako.—Salamo 37:31; Tau Fakatai 23:12; Kalatia 5:16, 17.
MANAMANATU KE HE HA TAUTOLU A VAHĀ HOMO UE ATU ANOIHA
17. Ka mahani fakamooli a tautolu ki a Iehova, ko e heigoa e vahā fulufuluola anoiha ka amanaki a tautolu ki ai?
17 Onoono atu a tautolu ke he magahala ka mitaki katoatoa a tautolu mo e fekafekau tukulagi ki a Iehova. He magahala ia, to nakai lata a tautolu ke totoko e tau lolelole, mo e to mukamuka lahi ai ma tautolu ke fifitaki ki a Iehova. Ka e pihia foki mogonei kua maeke a tautolu ke tapuaki ki a Iehova ha kua foaki mai e ia ki a tautolu e mena fakaalofa he lukutoto. Pete he nakai mitaki katoatoa a tautolu, maeke a tautolu ke fakafiafia a ia ka matutaki a tautolu ke eketaha fakamalolō ke taute e tau hikiaga mo e muitua e tau mena ne fakaako e ia ki a tautolu he Tohi Tapu.
18, 19. Iloa fēfē e tautolu kua ha ha he Tohi Tapu e malolō ke matutaki ke hiki e tau momoui ha tautolu?
18 Ne taute e Kevin e tau mena oti kua maeke a ia ke iloa ke tautaofi e ita haana. Manamanatu fakahokulo a ia ke he mena ne totou e ia he Tohi Tapu ti eketaha fakamalolō ke taute e tau hikiaga he moui haana. Muitua foki a ia ke he fakatonuaga kua tala age he tau Kerisiano ki a ia. Pete he fai tau gahoa a Kevin ke holo ki mua, nakai leva ti maeke a ia ke eke mo fekafekau lagomatai. He 20 tau kua mole, ne fekafekau a ia ko e motua. Ka e pihia foki mogonei kua iloa e ia kua lata a ia ke matutaki ke totoko e tau lolelole haana.
19 Tuga a Kevin, maeke a tautolu ke tumau e holo ki mua he tau aga fakatagata ha tautolu. Ka taute pihia e tautolu, to matutaki a tautolu ke fakatata lahi atu ki a Iehova. (Salamo 25:14) Ti ka taute oti e tautolu e tau mena kua maeke ia tautolu ke hikihiki ke fakafiafia a ia, to lagomatai e ia a tautolu ke kautū. Maeke a tautolu ke iloa ko e lagomatai he Tohi Tapu, maeke ia tautolu ke taute e tau hikiaga he tau momoui ha tautolu.—Salamo 34:8.
^ [1] (paratafa 1) Hiki e higoa.