Malolō Pete ne Tau Lolelole

MAEKE he tau lolelole haau ke fakatupetupe a koe. Kua pili tuga e tau moko aluka (leech). Ne liga manatu a koe to nakai fakaai ke kautū ki ai, po kua logona hifo e nakai hokotia ke fehagai ki ai, ti fakatatai e koe a koe ke he falu ti pehē kua mahomo hake e falu. Ke he taha faahi, liga kua fehagai a koe mo e gagao matematekelea lahi ti kua nakai fahia mo e nakai fiafia a koe. Ko e heigoa ni e lekua, kua tuga e apitia a koe. Maeke ia koe ke maama e logonaaga ha Iopu ne tala age ke he Atua: “Ane fufu e koe au i Seoli, mo e fakagalo ai e koe au ato mole atu hau a ita po kua mitaki; kia kotofa mai e koe e tau aho maku, mo e manatu mai e koe au.”—Iopu 14:13.

Maeke fēfē ia koe ke kautū mai he fakaagitau pihia? Pete he liga uka, kua lata ia koe he taha magaaho ke nakai manamanatu ke he lekua haau. Ma e fakatai, liga manamanatu a koe ke he tau hūhū ha Iehova ne omoomoi he agaaga ke he fekafekau tua fakamooli haana ko Iopu: “Ko fe kia a koe he fakavē ai e au e lalolagi? Kia talahau mai la, kaeke kua iloa e koe ke manamanatu. Ko hai kia ne fafati ai, po ke iloa nakai e koe? Ko hai foki ne toho ai e afo ke fafati aki ki luga hana?” (Iopu 38:4, 5) He manamanatu a tautolu ke he tau hūhū aoga ia, kua liga omoi a tautolu ke talia e pulotu mo e malolō tokoluga ue atu ha Iehova. Kua fai kakano mitaki ati fakaatā e ia e tuaga he lalolagi nei ke matutaki.

“Mena Mahukihuki ke he Tino”

Ne ole foki taha fekafekau tua fakamooli ki a Iehova ke utakehe e “mena mahukihuki ke he tino,” ko e lekua fakatauhele tumau. Ne lagatolu e ole e aposetolo ko Paulo ke he Atua ke utakehe e kamatamata nei. Ko e heigoa ni e lekua, he tuga e fakatauhele he mahukihuki, liga maeke foki ke fofō e olioli ha Paulo he fekafekauaga a Iehova. Ne fakatatai ai e Paulo ke he tatuki tumau. Ko e tali ha Iehova: “Ko e haku a fakaalofa noa kua lata ia mo koe; ha kua fakakatoatoa haku a malolo ke he lolelole.” Ne nakai utakehe e Iehova e mena mahukihuki ia he tino. Ne taufetului ni a Paulo mo e mena ia, ka e lafi e ia: “Ha ko e mena ka lolelole au, ti malolo ai au.” (2 Kori. 12:7-10) Ko e heigoa e kakano haana?

Ne nakai galo fakamana e lekua ha Paulo. Ka e nakai taofi he mena ia a ia mai he taute e tau mena kua mua atu e mitaki he gahua a Iehova. Ne falanaki a Paulo ki a Iehova ma e lalagoaga mo e ole tumau ke he takitakiaga Haana. (Filipi 4:6, 7) He matahiku he moui haana he lalolagi, ne maeke ia Paulo ke pehē: “Kua tau tuai au ke he tau mitaki, kua fakahiku e au e poitufi, kua taofi au ke he tua.”—2 Timo. 4:7.

Ne fakaaoga e Iehova e tau tagata nakai mitaki katoatoa ke taute e finagalo haana pete he tau kūkū mo e tau lekua ha lautolu, ti kua tonu ni ke fakaheke a ia. Maeke ia ia ke foaki ki a lautolu e takitakiaga mo e lotomatala ke fehagai mo e tau mena uka ha lautolu mo e ke fakatumau e olioli ha lautolu he fekafekauaga haana. E, maeke ia ia ke fakaaoga e tau tagata nakai mitaki katoatoa ke taute e tau gahua lalahi pete he tau lolelole ha lautolu.

Ne talahau e Paulo e kakano ne nakai utakehe he Atua e mena mahukihuki haana he tino: “Neke fakatokoluga au.” (2 Kori. 12:7) Ko e “mena mahukihuki” ha Paulo ne fakamanatu ki a ia e fakakaupāaga haana mo e lagomatai a ia ke fakatumau ke onoono fakatokolalo ki a ia ni. Ti kua felauaki e mena ia mo e fakaakoaga ha Iesu: “Ko ia ne fakatokoluga e ia a ia, to fakatokolalo a ia; ka ko ia ne fakatokolalo e ia a ia, to fakamatalahi a ia.” (Mata. 23:12) Maeke e tau kamatamata ke fakaako e tau fekafekau he Atua ke fakatokolalo mo e lagomatai a lautolu ke mailoga ka manako a lautolu ke fakauka tua fakamooli kua lata ni ke falanaki ki a Iehova. Ko e mena ia, ke tuga e aposetolo, kua maeke ia lautolu ke “hula [ki a Iehova].”—1 Kori. 1:31.

Tau Lolelole Nakai Kitia

Kua liga ha ha ke he falu e lolelole ne nakai mailoga e lautolu ia lautolu po kua fakauaua a lautolu ke talia. Ma e fakatai, liga kua molea e mauokafua he tagata, he falanaki ke he tau koloa haana. (1 Kori. 10:12) Ko e taha lolelole ne mailoga tumau ke he tau tagata nakai mitaki katoatoa ko e manako ke he tuaga tokoluga.

Ko Ioapo, ne eke a ia mo pule ke he kau he Patuiki ko Tavita, ne malolō, mauokafua, mo e lotomatala. Ka kua agahala a Ioapo he mahani kelea lahi ne fakakite e fakatokoluga mo e manako lahi haana ke he tuaga tokoluga. Ne kelipopo e ia tokoua e takitaki kau. Fakamua ne taui e ia he tamate a Apineru. Fakamui, he fakatupua ke ui fakaalofa atu ke he kasini haana ko Amasa, ne totō e Ioapo e hafe ha Amasa ke he lima matau he tuga ke figita a ia ka kua hoka e ia ke he pelu he lima hema haana. (2 Samu. 17:25; 20:8-10) Ha kua hukui e Amasa a Ioapo he magaaho fakamua ko e pule he kau mo e fakaaoga e Ioapo e magaaho nei ke utakehe e fī haana, liga he amanaki to liu a ia ke eke mo iki he kau. Kua maeke ia koe ke kitia ne nakai taofi e Ioapo e agaaga haana, he putoia haana manako lotokai. Ne favale a ia mo e nakai fakakite ha tokihala. He teitei mate e Patuiki ko Tavita, ne fekau e ia e tama taane haana ko Solomona ke fakahala a Ioapo ha ko e kelea ne taute e ia.—1 Patu. 2:5, 6, 29-35.

Kua nakai lata ia tautolu ke kaumahala ke he tau manako hepe ha tautolu; kua maeke ia tautolu ke kautū ke he tau lolelole ha tautolu. Fakamua kua lata ia tautolu ke mailoga mo e talia kua fai lekua. Ti maeke mogoia ia tautolu ke lali ke kautū ki ai. Maeke ia tautolu ke liogi tumau ki a Iehova, he ole ma e logomatai haana ke kautū ke he tau lolelole ia, mo e fakaako fakamakutu e Kupu haana, he kumi puhala ke totoko e tau hihiga ia. (Hepe. 4:12) Liga to lali tumau a tautolu ke kautū ke he tau kaumahala ha tautolu mo e kia nakai fakalolelole. To liga taufetului tumau ni a tautolu ha kua nakai mitaki katoatoa ai. Ne talahau e Paulo e mena nei he lekua ni haana, he tohia: “Ha ko e tau mena kua eke e au kua nakai loto au ki ai; ka ko e mena kua vihiatia e au ko e mena haia kua eke e au.” He mailoga e koe, ne nakai mahala a Paulo he mena nei, ke pehē kua nakai maeke ia ia ke taofi katoatoa e tau gahua haana. Nakai pihia, ne tumau a ia ke taufetului ke he tau lolelole haana, he falanaki ke he lagomatai he Atua ne puhala mai ia Iesu Keriso. (Roma 7:15-25) Ke he falu mena foki, ne pehē a Paulo: “Kua tatuki e au hoku tino mo e fakatupa a ia, neke iloa a au kua tiaki, ko au kua fakamatala atu ke he falu a tagata.”—1 Kori. 9:27.

Ne fa lali e tau tagata ke kumi maluaga ma e tau hepehepe ha lautolu. Maeke ia tautolu ke totoko e mena ia he feaki e onoonoaga ha Iehova, he taute tuga ne tomatoma e Paulo ke he tau Kerisiano: “Kia fakavihia e tau mena kelea, kia pipiki ke he tau mena mitaki.” (Roma 12:9) He taufetului ke kautū ke he tau lolelole ha tautolu, kua lata ke mahani fakamooli, fakauka, mo e akonaki fakatagata. Ne ole a Tavita ki a Iehova: “Kia fakamea hoku manatu mo e hoku loto.” (Sala. 26:2) Ne iloa e ia na maeke he Atua ke kumikumi e tau fatuakiloto hokulo ha tautolu mo e foaki ki a tautolu e lagomatai he magaaho kua lata. Kaeke ke omaoma a tautolu ke he takitakiaga ne foaki mai e Iehova puhala he Kupu mo e agaaga tapu haana, kua maeke ia tautolu ke holo ki mua ke kautū ke he tau lolelole ha tautolu.

Liga kua tupetupe falu he tau lekua ne logona hifo e lautolu kua nakai maeke ia lautolu ke fehagai ki ai. Kua maeke mooli he tau motua he fakapotopotoaga ke foaki e lagomataiaga mo e fakamalolōaga fakaalofa. (Isaia 32:1, 2) Ka kua pulotu ke mooli e tau amaamanakiaga. Ha ko e falu lekua, kua nakai fai tuluiaga katoatoa he fakatokaaga nei he lalolagi. Pete ia, kua tokologa ne ako ke fehagai ki ai, ti kua fakaatā he mena ia a lautolu ke momoui fiafia.

Mafanatia ke he Lalagoaga ha Iehova

Ko e heigoa ni e tau lekua ne fehagai mo tautolu he tau vahā uka nei, kua iloa mooli e tautolu to takitaki mo e leveki mai e Iehova a tautolu. Kua fakamalolō he Tohi Tapu a tautolu: “Ko e mena ia kia fakatokolalo ai a mutolu ki lalo he lima malolo he Atua, kia fakamatalahi ai e ia a mutolu ke he vaha ke lata ai. Kia tuku atu kia ia e tau mena oti kua fakaatukehe ai a mutolu, ha ko e mena kua manatu e ia a mutolu.”—1 Pete. 5:6, 7.

He magaaho ne mailoga e Kathy ne fekafekau he Peteli ke he loga e tau tau kua moua e taane haana he gagao nimoia e manamanatuaga (Alzheimer), ne logona hifo e ia kua nakai fahia a ia ke lata mo e paleko i mua. Ne eke e ole ki a Iehova ma e pulotu mo e loto malolō mo vala aoga lahi he tau aho oti. He kelea fakahaga e taane haana, ne eketaha e tau matakainaga ke ako hagaao ke he gagao ke maeke ke fehagai ki ai ti maeke he tau matakainaga fifine fakaalofa ke fakamalolō e loto haana. Ko e tau Kerisiano nei ne moua e lalagoaga malolō ne foaki e Iehova, ti maeke ia Kathy ke leveki e taane haana ato mate he kavi 11 e tau he magaaho fakamui. Ne pehē a ia: “Ne tagi mo e fakaaue loto katoatoa au ki a Iehova ma e tau lagomatai oti haana; ati tumau ai au. Ne nakai iloa e au na maeke agaia ke gahuahua pete kua lolelole lahi he mategugu!”

Lagomatai ke Kautū Mai he Tau Lolelole Nakai Kitia

Ka logona hifo he tau tagata takitokotaha kua fakateaga a lautolu, to liga manatu kua nakai fanogonogo a Iehova ke he tau ole lagomatai he magaaho ka tupetupe a lautolu. Kua mua atu e mitaki mogoia ke manamanatu ke he talahauaga ha Tavita he tokihala a ia he agahala kelea lahi haana mo Patesepa: “Ko e Atua na e, nakai vihiatia e koe e loto malipilipi mo e pehia.” (Sala. 51:17) Ne tokihala mooli a Tavita, ti iloa e ia kua lata ni ke ole ke he Atua mo e falanaki mooli ke he haana fakaalofa noa. Ne fakaata e Iesu e aga leveki ha Iehova. Ne hagaao e tohi he Evagelia ko Mataio ke he tau kupu ha Isaia ki a Iesu: “Nakai papaki e ia e kaho kua maihiihi, nakai tamate foki e ia e vavae ne puho tote.” (Mata. 12:20; Isaia 42:3) He nofo he lalolagi, ne fakakite e Iesu e fakaalofa hofihofi noa ma lautolu ne nonofogati mo e ekefakakelea. Ne nakai tamate e ia e vala moui fakahiku he tagata ke tuga e uiti he molī kua teitei mate. Ka kua feaki fakaalofa e ia a lautolu ne matematekelea ke liuaki ki a lautolu e gahuahua he moui. Ne pihia a ia he nofo mo e tau tagata. Talitonu nakai a koe kua pihia agaia a Iesu ti maeke a ia ke fakaalofa mai ha ko e tau lolelole haau? Mailoga kua fakakite mai he Heperu 4:15 ko Ia kua maeke ke “mamahi fakaalofa fakalataha mo tautolu ke he tau mena kua lolelole ai a tautolu.”

He magaaho ne tohia e Paulo hagaao ke he “mena mahukihuki ke he tino” haana, ne mailoga e ia ko e malolō ha Keriso ne lagomatai a ia. (2 Kori. 12:7-9) Ne logona hifo e ia e puipuiaga he Atua puhala he Keriso, tuga ne tagata i loto he fale ie kua puipui mai he matagi. Ke tuga a Paulo, kia nakai kaumahala ke he tau lolelole mo e tau lekua ha tautolu. Ke tumau e malolō fakaagaaga, kua maeke ia tautolu ke fakaaoga e tau foakiaga oti kua tuku mai e Iehova puhala he fakapotopotoaga haana he lalolagi. Kua maeke ia tautolu ke taute e tau mena oti kua fahia ki ai ti onoono mogoia ki a Iehova mo e mauokafua katoatoa to takitaki e ia e tau gahua ha tautolu. He logona e malolō he Atua he lagomatai mai ke he tau lolelole ha tautolu, to maeke ia tautolu ke talahau tuga a Paulo: “Ha ko e mena ka lolelole au, ti malolo ai au.”—2 Kori. 12:10.

[Fakatino he lau 3]

Ne liogi tumau a Paulo ki a Iehova ke takitaki a ia ke taute e fekafekauaga haana

[Fakatino he lau 5]

Ne kotofa he Patuiki ko Tavita a Ioapo ke takitaki e kau haana

[Fakatino he lau 5]

Ne taute a Ioapo ke tamate e fī haana ko Amasa

[Fakatino he lau 6]

Foaki fakaalofa he tau motua e tau takitakiaga faka-Tohi Tapu ke lagomatai ke fahia ke he tau lekua ha tautolu