Haia Kia Ia Koe e “Mena Mahukihuki ke he Tino”?
1 Kua loto lahi a tautolu ke fakamoli e matagahua ha tautolu ke fakamatala e tala mitaki ke he mena ne fahia ai a tautolu. Ka e tokologa e tau matakainaga fakahelehele ha tautolu ne uka lahi ke fakalataha katoa mai kakano ko e alaia he tau gagao kelea po ke tau kafokia he tino, ati nakai lahi e gahua ne taute tuga ne manako ai e lautolu. Kia lautolu, liga ko e paleko ke fahia ke he tau logonaaga fakalolelole, mua atu ka kitia e lautolu e falu ne viko takai ia lautolu hane fakamakutu ke he fekafekauaga.—1 Kori. 9:16.
2 Ko e Fakafifitakiaga ke Mumuitua: Kua fetului e aposetolo ko Paulo mo e “mena mahukihuki ke he tino.” Ne ole lagatolu a ia ki a Iehova ke uta kehe e mena tauhele ia, ne fakamaama ai e ia ko e “agelu a Satani” ne ta poki tumau a ia. Ka e, pete ni ia, ne fakauka a Paulo mo e fakatumau he hana fekafekauaga. Ne nakai mua e fakaalofa hana ki a ia ni po ke tumau ke gugu. Ne foaki e ia e mena ne fahia ia ia. Ko e kei ke he hana tomafola he fahia ko e fakamoliaga mai he Atua: “Ko e haku a fakaalofa noa kua lata ia mo koe; ha kua fakakatoatoa haku a malolo ke he lolelole.” Ne eke ai e lolelole a Paulo mo fakamaloloaga he magaaho ne mailoga e ia ke talia hana tuaga mo e ke tua ki a Iehova mo e agaga tapu ke maeke ke fakauka.—2 Kori. 12:7-10.
3 Puhala ke Fakauka ai a Koe: Fakakaupa kia he tau mahukihuki fakatagata e fekafekauaga hau ke he Atua? Ka pihia, kia fifitaki atu ke he kitiaaga a Paulo. Pete ni ka nakai fai vai tului mau ma e hau a gagao po ke mahukihuki he fakatokaaga he tau mena nei, kia falanaki lahi atu a koe ki a Iehova, ko ia ne maama e tau manako hau mo e to foaki e “lahi ue atu he malolo.” (2 Kori. 4:7) Kia fakaaoga e lagomatai ne foaki ki a koe i loto he fakapotopotoaga, nakai kia vevehe kehe a koe. (Fakatai 18:1) Ka uka ia koe ke fakalataha ke he gahua he taha fale mo e taha fale, kia kumi e tau puhala ke taute e fakamatalaaga nakai pauaki po ke he telefoni.
4 Pete kua fakakaupa he mahukihuki ke he tino e mena ne fahia a koe ki ai he fekafekauaga, kia nakai fakaatukehe a koe. Ke tuga a Paulo, maeke foki ia koe ke ‘talahau fakatonu atu e tala mitaki he fakaalofa noa he Atua,’ he taute e mena kua fahia ai a koe. (Gahua 20:24) He fakamakamaka a koe ke fakakatoatoa hau a fekafekauaga, kia iloa kua fiafia lahi a Iehova.—Hepe. 6:10.