Ko e Heigoa ka Utakehe he Hoko Mai e Kautu he Atua?

1, 2. (a) Eke fēfē e lalolagi kelea nei ke tatai mo e tagata kolokolovao ne amanaki ke tamate? (Kikite fakatino he kamataaga.) (e) Fēfē e logonaaga ha lautolu oti kana he lagi mo e lalolagi ka moumou e fakatokaaga kelea nei?

MANAMANATU ke he mena ne tupu. Ko e tagata kolokolovao hagahaga kelea ne fano he avaloa he fale puipui ka e tauhea e tau leoleo leveki ki a ia, “Fano moui e tagata mate!” Ko e ha ne talahau pihia a lautolu? Pete kua moui e tagata kolokolovao ti tino malolō, kua fakahala a ia ke mate ti kua teitei tuai ke tamate. Tuga kua fitā a ia he mate.a​—Kikite matahui tala.

² Ko e lalolagi kelea ne nonofo ai a tautolu kua tatai ke he tagata kolokolovao ne amanaki ke tamate. Talahau he Tohi Tapu: “Ha ne mole atu foki e lalolagi katoa.” (1 Ioane 2:17) Fifili e Iehova to fakaotioti mafiti e fakatokaaga nei, mo e to moumou mooli ai. Ka e taha e kehekehe aoga lahi he fakaotiaga he lalolagi nei mo e tamate he tagata kolokolovao. Falu ne liga logona hifo ko e fakafiliaga ke he tagata kolokolovao kua nakai tonu ti totoko ai, mo e amanaki to nakai tamate a ia. Ka ko e Ikifakafili mitaki katoatoa a Iehova ti ko e fifiliaga haana ke moumou katoatoa e fakatokaaga nei kua tonuhia. (Teutaronome 32:4) To nakai mule mai e moumouaga. He mole e moumou e fakatokaaga nei, to talia e lautolu oti he lagi mo e lalolagi kua tonu e fakafiliaga ha Iehova. To ha ha ai e fakatotokaaga makimaki!

3. Ko e heigoa e tau lekua ne fā ka mole atu he magaaho ka hoko mai e Kautu he Atua?

³ Ko e heigoa ne putoia he “lalolagi katoa” hane “mole atu”? Putoia ai e tau mena kelea ne lauia e tau momoui mogonei. To nakai leva ti galo e tau mena oti ia. Ko e vala anei he “tala mitaki nai he kautu.” (Mataio 24:14) He vala tala nei, to fakatutala a tautolu ke he fā e lekua ka mole he magaaho ka hoko mai e Kautu he Atua: ko e tau tagata mahani kelea, tau fakatokatokaaga kolokolovao, tau matagahua hepehepe, mo e tau tuaga kelea. Igatia e tau mena nei mo e fakaako ki a tautolu e (1) puhala ne lauia ai a tautolu mogonei, (2) mena ka taute e Iehova ki ai, mo e (3) mena ke hukui aki e ia.

TAU TAGATA MAHANI KELEA

4. Lauia fēfē a tautolu mogonei he tau tagata mahani kelea?

⁴ Lauia fēfē a tautolu mogonei ha ko e tau tagata mahani kelea? Talahau he aposetolo ko Paulo he tau aho fakamui “to hohoko mai ai e tau aho uka.” Ti lafi e ia: “Ko e tau tagata mahani kelea mo e tau tagata kua fakavai, to tolomaki atu a lautolu ke au atu he kelea.” (2 Timoteo 3:1-5, 13) Kua tupu nakai e mena nei ki a koe? Tokologa ia tautolu ne matematekelea teao he tau tagata mahani kelea tuga e tau tagata favale, tau tagata fili tagata ne vihiatia, mo e tau tagata vale ne kolokolovao. Falu ia lautolu ne nakai lali ke ufiufi e tau mena kelea ne taute e lautolu. Falu ne fakatupua ke lagomatai e tau tagata, ka e mahani kelea a lautolu. Pete he nakai matematekelea teao foki a tautolu he mahani matahavala, kua lauia agaia a tautolu he tau tagata mahani kelea. Gagao e tau loto ha tautolu ka logona e puhala favale ne taute ke he tau fanau, tau fuakau, mo e falu ne nakai maeke ke lalago e lautolu a lautolu. Ko e tau tagata mahani kelea nei ne taute a lautolu ke tuga e tau manu vale po ke tau temoni. (Iakopo 3:15) Fiafia ai, kua foaki mai he Kupu he Atua ki a tautolu e amaamanakiaga.

5. (a) Ko e heigoa e magaaho kua moua agaia he tau tagata mahani kelea? (e) Ko e heigoa ka tupu ki a lautolu ne nakai talia ke hiki?

⁵ Ko e heigoa ka taute e Iehova? Magaaho tonu nei kua foaki e Iehova ke he tau tagata mahani kelea e tuaga ke hiki. (Isaia 55:7) Pete he nakai leva ti moumou e fakatokaaga nei, kua nakaila hokotia a lautolu ke he fakafiliaga. Ko e heigoa ka tupu ki a lautolu ne nakai talia ke hiki mo lautolu ne lalago e fakatokaaga nei he magaaho he matematekelea lahi? Mavehe e Iehova to utakehe e tau tagata mahani kelea oti kana mai he lalolagi. (Totou Salamo 37:10.) Tokologa e tagata mogonei kua fakaako ke fakamumuli ha ko e tau mena kelea ne taute e lautolu, ti falu mogo ne nakai fakahala a lautolu. (Iopu 21:7, 9) Ka e fakamanatu he Tohi Tapu ki a tautolu: “Ha kua fofoga mai a ia ke he tau puhala he tau tagata takitokotaha, kua fioia foki e ia hana tau lakaaga oti. Nakai fai pouli ti nakai ha ha i ai foki e ata he mate ke fakamumuli ai a lautolu kua eke e tau mahani kelea.” (Iopu 34:21, 22) Ti nakai maeke ai ke fakamumuli mai ia Iehova. Maeke a ia ke kitia e tau mena oti kana ne taute he tau tagata mahani kelea. He mole a Amaketo, to kumi e tautolu e mena ne ha ha i ai a lautolu ka e to nakai kitia e tautolu a lautolu. To galo tukulagi a lautolu!​—Salamo 37:12-15.

6. Ko hai ka mau hifo ka mole atu e tau tagata mahani kelea, ti ko e ha ko e tala mitaki a ia?

⁶ Ko hai ka mau hifo he magaaho ka mole atu e tau tagata mahani kelea? Mavehe e Iehova: “Ko e tau tagata mahani molu, to eke ma lautolu e motu; ti fakafiafia foki e lautolu a lautolu ha ko e monuina kua lahi.” He salamo taha ia, totou e tautolu: “To eke ni e motu ma e tau tagata tututonu, to nonofo muatua ai a lautolu.” (Salamo 37:11, 29) Ko hai a lautolu ne “mahani molu” mo e “tututonu”? Ko lautolu ne mahani molū kua fakatokolalo he fakaako mo e omaoma ki a Iehova. Ko e tau tagata tututonu ko lautolu ne fiafia ke taute e mena ne talahau he Atua kua hako. He lalolagi mogonei, loga atu e tagata mahani kelea ke he tau tagata tututonu. Ka e he lalolagi foou, ko lautolu hokoia ne mahani molū mo e tututonu i ai, mo e to taute e lautolu e lalolagi mo parataiso!

TAU FAKATOKATOKAAGA KOLOKOLOVAO

7. Lauia fēfē a tautolu mogonei he tau fakatokatokaaga kolokolovao?

⁷ Lauia fēfē a tautolu mogonei he tau fakatokatokaaga kolokolovao? Laulahi he mahani kelea he lalolagi mogonei ne nakai fakatupu he tagata tokotaha ka e he tau fakatokatokaaga. Ko e fakatokatokaaga fakalotu ne fakahehē e tau tagata tokologa. Ma e fakatai, ne pikopiko a lautolu hagaao ke he Atua mooli, pehē a lautolu kua nakai lata ke falanaki ke he Tohi Tapu, ti fakahehē e falu ke he vahā anoiha he lalolagi mo e tau tagata. Fakatupu ki mua he tau fakatufono kolokolovao e felakutaki mo e favale he kehekehe e tau lanu mo e fakapehia a lautolu ne nonofogati mo e lolelole. Ko e tau fakatufono ia ne lahi e monuina mo e malolō he fili tagata po ke talia e tau fakavaivai. Ko e tau matakau lotokai ne takiva e matagi, moumou e tau tufugatiaaga, mo e fakaaoga fakateaga e tau tagata ke nakai tokologa ka monuina. Maaliali ai, ko e tau fakatokatokaaga kolokolovao kua fakalago ki ai e matematekelea lahi mahaki he lalolagi mogonei.

8. Ko e heigoa ne talahau he Tohi Tapu ka tupu ke he tau fakatokatokaaga ne tuga kua pule malolō ke he onoonoaga he tau tagata tokologa mogonei?

⁸ Ko e heigoa ka taute e Iehova? To kamata e matematekelea lahi ka tau atu e tau pule fakapolitika ke he tau fakatokatokaaga he tau lotu fakavai oti kana, ne kua fakamaama he Tohi Tapu ko e fifine fakataka ne higoa ko Papelonia Lahi. (Fakakiteaga 17:1, 2, 16; 18:1-4) Ko e tau fakatokatokaaga fakalotu to moumou katoatoa ai. Ka ko e heigoa ka tupu ke he falu fakatokatokaaga kolokolovao foki? Fakatatai ai he Tohi Tapu ke he tau mouga mo e tau motu ha kua tuga na maō mo e malolō a lautolu. (Totou Fakakiteaga 6:14.) Ka e lafi ki ai ko e tau fakatufono mo e falu fakatokatokaaga ne nakai lalago e Kautu he Atua to moumou ai. Ko e vala fakahiku anei he matematekelea lahi. (Ieremia 25:31-33) Mole ia, to nakai liu ke fai fakatokatokaaga kolokolovao!

9. Ko e ha kua iloa tonu e tautolu to fakatokatoka fakamitaki e lalolagi foou?

⁹ Ko e heigoa ka hukui aki e tau fakatokatokaaga kolokolovao? He mole a Amaketo, to fai fakatokatokaaga nakai e lalolagi? Pehē e Tohi Tapu: “Ka e fakatalitali a tautolu ke he lagi fou mo e lalolagi fou, tuga ne hana talahaua mai, ke nofo ai e tututonu.” (2 Peteru 3:13) Ko e lagi mo e lalolagi tuai ko e tau fakatufono kolokolovao mo e tau tagata ne pule ki ai. Ka mole atu a lautolu, ko e heigoa ka hukui aki a lautolu? Ko e “lagi fou mo e lalolagi fou.” Ko e lagi foou kua hagaao ke he fakatufono foou, ko e Kautu ne ha ha i ai a Iesu Keriso mo lautolu ne pule mo ia ne 144,000. Ko e lalolagi foou ne hagaao ke he tau tagata ne kua pule he Kautu he Atua. Ko Iesu mo lautolu ka pule mo ia to fifitaki katoatoa ki a Iehova, ko e Atua nakai fakaagitau. (1 Korinito 14:33) To fakatokatoka fakamitaki e “lalolagi fou.” To ha ha i ai e tau tagata taane mitaki ke leveki e tau mena oti. (Salamo 45:16) Ko e tau tagata taane ia to takitaki e Keriso mo e 144,000. Manamanatu ke he magaaho ka hukui he taha ni e fakatokatokaaga kaufakalataha mitaki katoatoa e tau fakatokatokaaga kolokolovao oti kana!

TAU MATAGAHUA HEPEHEPE

10. Ko e heigoa e tau matagahua hepehepe ne kua tupu lahi he matakavi ne nofo a koe, ti lauia fēfē a koe mo e magafaoa haau?

¹⁰ Lauia fēfē a tautolu mogonei he tau matagahua hepehepe? Nonofo a tautolu he lalolagi ne tupu lahi e mahani feuaki, nakai fakamooli, mo e mahani favale velagia. Ko e tau fakafiafiaaga he lalolagi kua taute e tau mena nei ke futiaki lahi mo e he magaaho taha kua vaiga e tau tutūaga ha Iehova ke he tau mena hako mo e hepe. (Isaia 5:20) Kua lata pauaki e tau matua ke eketaha ke puipui e tau fanau ha lautolu mai he fakaohoohoaga kelea. Ko e tau Kerisiano mooli oti kua lata ke eketaha ke puipui e fakafetuiaga ha lautolu mo Iehova he lalolagi ne nakai fakalilifu e tau tutūaga he Atua.

11. Ko e heigoa kua fakaako e tautolu mai he fakafiliaga ha Iehova ki Sotoma mo Komora?

¹¹ Ko e heigoa ka taute e Iehova ke he tau matagahua kelea? Manamanatu ke he tau mena ne taute e Iehova ke he tau mena kelea ne tutupu he maaga ha Sotoma mo Komora. (Totou 2 Peteru 2:6-8.) Ko Lota ko e tagata tututonu ti matematekelea lahi a ia mo e magafaoa haana ha ko e tau mena kelea oti kana ne taute he tau tagata ne takatakai ia lautolu. Moumou e Iehova e matakavi katoa ke fakaotioti e tau mahani kelea ne tutupu i ai. Ka kua fakatoka foki e ia e “fakamailoga” ma e tau tagata kelea mogonei. Tuga ni he fakaotioti e Iehova e tau mahani feuaki he magahala ia, to fakaotioti foki e ia e tau mena oti mogonei ka moumou e ia e fakatokaaga nei.

12. Ko e heigoa falu matagahua ka amaamanaki atu a koe ki ai ka mole e fakatokaaga nei?

¹² Ko e heigoa ka hukui aki e tau gahua kelea? He lalolagi foou, to lavelave a tautolu ke he tau matagahua fiafia. Ma e fakatai, to liliu e tautolu e lalolagi ke he parataiso ti talaga e tau kaina ma tautolu mo e tau fakahele ha tautolu. To fakafeleveia foki e tautolu e tokologa ka fakaliu tu mai mo e fakaako a lautolu hagaao ki a Iehova mo e tau mena oti kua taute e ia ma e tau tagata. (Isaia 65:21, 22; Gahua 24:15) He magahala ia, to lavelave a tautolu ke he tau matagahua ka taute a tautolu ke fiafia mo e fakaheke a Iehova!

TAU TUAGA KELEA

13. Ko e heigoa e fua he totokoaga i Etena?

¹³ Lauia fēfē a tautolu mogonei he tau tuaga kelea? Ko e lalolagi kua puke he tau tagata mahani kelea, tau fakatokatokaaga kelea, mo e tau matagahua kelea ne takitaki ke he tau puhala momoui kelea. Lauia oti a tautolu ha ko e tau mena tuga e felakutaki, nofogati, fili tagata, gagao, mo e mate. Ko e tau tuaga kelea nei ne kamata ha kua totoko a Satani, Atamu, mo Eva ki a Iehova. Ti lauia oti a tautolu he totokoaga ia ha lautolu.

14. Ko e heigoa ka taute e Iehova ke he tau tuaga kelea?

¹⁴ Ko e heigoa ka taute e Iehova ke he tau tuaga kelea? Fakatutala ke he falu fakataiaga. Mavehe e Iehova to fakaotioti e tau felakutaki oti kana. (Totou Salamo 46:8, 9.) To utakehe e ia e gagao. (Isaia 33:24) To fakaoti tukulagi e ia e mate. (Isaia 25:8) To fakaoti e ia e nofogati. (Salamo 72:12-16) To utakehe e Iehova e tau tuaga kelea oti foki ne fakamatematekelea aki e moui mogonei. To utakehe foki e ia e fakaohoohoaga kelea ha Satani mo e tau temoni haana!​—Efeso 2:2.

15. Ko e heigoa falu mena ka mole atu tukulagi ka oti a Amaketo?

¹⁵ Manamanatu la ke he tuaga ka momoui a tautolu he lalolagi ka nakai fai felakutaki, gagao, po ke mate! To nakai fai kautau, tau kanavaakau, po ke tau makatumau fakamanatu he felakutaki. To nakai lata a tautolu ke fai fale gagao, tau ekekafo, tau nosi, tau fale toka tagata mate, po ke tau tuagamau. To nakai fai matahavala, ti nakai lata a tautolu ke fai leoleo, tau matini fakatagi ke puipui, po ke pihia mo e tau loka po ke tau kī! Ko e tau tuaga kelea oti kana nei ne fakatupu e fakaatukehe lahi mahaki ki a tautolu to mole atu tukulagi.

16, 17. (a) To logona hifo fēfē a lautolu ka hao mai i Amaketo? Talahau e fakatai. (e) Iloa tonu fēfē e tautolu to momoui a tautolu ka mole atu e lalolagi tuai nei?

¹⁶ To fēfē e moui he magaaho ka mole atu e tau tuaga kelea? Nakai mukamuka ke manamanatu ki ai. Kua leva tuai e nonofo ha tautolu he tau tutūaga kelea ti liga nakai mailoga e tautolu e pehiaaga lahi ne fakatupu he tau mena ia ki a tautolu. Ke fakatai, ko e tau tagata ne nonofo tata ke he tuaga leluē apiapi ne liga nakai mailoga e gō lahi. Mo e tau tagata ne nonofo tata ke he toloaga veve ne liga nakai mailoga e namu. Ka e he magaaho ka utakehe e Iehova e tau tuaga kelea oti kana, to ha ha i ai e fakatotokaaga makimaki!

¹⁷ Ko e heigoa ka hukui aki e tau peehiaga oti ne logona hifo e tautolu mogonei? Ia Salamo 37:11 ne pehē: “Ti fakafiafia foki e lautolu a lautolu ha ko e monuina kua lahi.” Kua mafanatia mooli ke iloa ko e mena anei ne manako a Iehova ma tautolu! He magaaho tupetupe lahi nei, taute e tau mena oti kana kua maeke a koe ke nofo fakatata ki a Iehova mo e haana fakatokatokaaga. Ko e amaamanakiaga haau ma e anoiha kua uho lahi, ti manamanatu fakahokulo ki ai, iloa tonu kua mooli ai ki a koe ti tala age ai ke he falu. (1 Timoteo 4:15, 16; 1 Peteru 3:15) He puhala ia, kua iloa tonu e koe ka moumou e fakatokaaga nei to fakatumau a koe ke moui mo e fiafia tukulagi!