Hane Tata Mai e Laveakiaga he Kautu he Atua!
“Kia hoko mai hau a kautu. Kia eke hau a finagalo ke he lalolagi, tuga ne eke ke he lagi.”—MATA. 6:10.
1. Ko e heigoa e matapatu he fakaakoaga ha Iesu?
HE FOAKI e Iesu Keriso haana a Lauga he Mouga, ne putoia foki e ia e liogi fakatai ne fakakite katoatoa e matapatu he fakaakoaga haana. Ne fakaako e ia e tau tutaki ke liogi ke he Atua: “Kia hoko mai hau a kautu. Kia eke hau a finagalo ke he lalolagi, tuga ne eke ke he lagi.” (Mata. 6:9-13) “Ti haele takai ai a [Iesu] ke he tau māga, mo e tau magamotu, kua ogoogo mo e fakamatala e vagahau mitaki he kautu he Atua.” (Luka 8:1) Ne fakamalolō e Keriso ke he tau tutaki haana: “Kia kumikumi fakamua a mutolu ke he kautu he Atua mo e hana tututonu.” (Mata. 6:33) He fakaako e koe e vala tala nei, kia kumi e tau puhala ke fakaaoga e vala tala ke he fekafekauaga haau. Ke tuga anei, kia manamanatu ke he puhala ka tali e koe e tau hūhū nei: Aoga fefe e ogo he Kautu? Kua lata ke laveaki mai e tagata he heigoa? Mo e to tamai fēfē he Kautu he Atua e laveakiaga?
2. Aoga fēfē e ogo he Kautu?
2 Ne talahau tuai e Iesu: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.” (Mata. 24:14) Kua mua ue atu e aoga he tala mitaki hagaao ke he Kautu he Atua. Ko e ogo mooli ni a ia kua aoga lahi mahaki he lalolagi! Ke he tau fakapotopotoaga ne molea e 100,000 he Tau Fakamoli a Iehova he lalolagi katoa, kavi ke fitu e miliona he tau fekafekau he Atua hane putoia ke he gahua fakamatala ne mua atu, he tala age ke he falu nukua fitā e Kautu he fakatū. Ko e fakatokatokaaga he Kautu ko e tala mitaki ha kua fakatū he Atua e fakatufono i luga he lagi ke pule katoatoa ke he tau mena he lalolagi. I lalo mogoia he pule he Kautu, to taute e finagalo a Iehova he lalolagi ke tuga i luga he lagi.
3, 4. Ko e heigoa e fua he magaaho ka taute e finagalo he Atua ke he lalolagi?
3 Ko e heigoa ka tupu ke he tau tagata he magaaho ka taute e finagalo he Atua ke he lalolagi? “To holoholo kehe [e Iehova] e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea.” (Fakakite. 21:4) To nakai gagao po ke mamate e tau tagata ha ko e agahala mo e nakai mitaki katoatoa ha lautolu. Ko e tau tagata mamate he manamanatuaga he Atua to moua e magaaho ke moui tukulagi, ha kua mavehe e Tohi Tapu: “[To] liu foki tutu mai a lautolu kua mamate, ko lautolu ne tututonu katoa mo lautolu ne hepehepe.” (Gahua 24:15) To nakai fai felakutaki, tatalu, po ke hoge, mo e to fakafaliu e lalolagi ke he parataiso. Pihia foki e tau manu ne favale mogonei to nonofo mafola mo e tau tagata mo e falu manu foki.—Sala. 46:9; 72:16; Isaia 11:6-9; 33:24; Luka 23:43.
4 Ha ko e tau monuina homo ue atu loga ne fua mai he pule he Kautu, ati tutala e perofetaaga he Tohi Tapu hagaao ke he moui he magaaho ia ke he tau kupu mafanatia nei: “Ko e tau tagata mahani molu, to eke ma lautolu e motu; ti fakafiafia foki e lautolu a lautolu ha ko e monuina kua lahi.” Ka e kua a lautolu ne fakatupu lekua? Ne talahau tuai he tau Tohiaga Tapu: “Toe tote, ti nakai ha i ai e tagata mahani kelea; ka manamanatu foki a koe ke he mena hana ne nofo ai, nakai ha i ai a ia.” Pete ia, “ko lautolu kua talifaki kia Iehova, to eke ma lautolu e motu.”—Sala. 37:9-11.
5. Ko e heigoa ka tupu ke he fakatokaaga nei?
5 Ke fakamooli e tau mena oti nei, kua lata e fakatokaaga nei mo e tau fakatufono totoko, tau lotu, mo e tau fakatokaaga fakafua koloa ke utakehe. Ti ko e mena ia ni ka fakamooli he fakatufono he lagi. Ne omoomoi e perofeta ko Tanielu ke talahau tuai: “Ko e vaha he tau patuiki ia [mogonei] to fakatu ai he Atua he lagi e kautu nakai fakaoti tukulagi; ko e kautu foki ia nakai tuku atu ai ke he taha motu, to tuki malipilipi mo e fakaotioti e tau kautu oti ia [mogonei], ka ko ia to tumau tukulagi a ia.” (Tani. 2:44) Ko e Kautu he Atua—ko e fakatufono foou he lagi—to pule ke he fakatokaaga foou he lalolagi. To ha ha ai e ‘lagi foou mo e lalolagi foou ke nofo ai e tututonu.’—2 Pete. 3:13.
Manako Lahi Mahaki ma e Laveakiaga he Mogonei
6. Fakamahino fēfē he Tohi Tapu e mahani kelea muitui he lalolagi nei?
6 He magaaho ne totoko a Satani, Atamu, mo Eva ke he Atua, he manako ke fifili ne lautolu e hako mo e hepe, ne kamata agataha ai e magafaoa tagata he puhala ke he matematekelea. Ato Fakapuke e lalolagi katoa he molea e 1,600 e tau he mole, “kua lahi ni e mahani kelea he tau tagata ke he lalolagi; ko e tau fatuakiloto oti foki he tau manatu he tau loto ha lautolu, ko e kelea hokoia ni ke he tau aho oti kana.” (Kene. 6:5) Kavi ke he 1,300 e tau he mole, ne kelea muitui e tau tutūaga ki a Solomona ati tohia e ia: “Ti fakaheke ai e au kia lautolu kua mamate, ko lautolu ne mamate tuai, kua mua a lautolu kia lautolu kua momoui, ko lautolu kua momoui agaia. Ka e mua he monuina kia laua na, a ia kua nakaila fanau mai, ko ia kua nakai kitia e gahua kelea kua eke i lalo he lā.” (Fakama. 4:2, 3) Ti kavi ke 3,000 e tau ke hoko mai ke he vahā ha tautolu, ko e magaaho ne matutaki e mahani kelea ke tupu lahi.
7. Ko e ha kua manako lahi mahaki ma e laveakiaga he Atua he mogonei?
7 Pete kua leva tigahau e mahani kelea, kua mua atu ai e manako lahi mahaki ma e laveakiaga he Kautu he Atua he magaaho tonu nei. Ko e tau tutūaga he 100 tau ne mole kua kelea lahi, ti holo atu agaia ke kelea muitui. Ke fakatai ki ai, ne hokotaki he Worldwatch Institute: “Kua fakalahi tolu e numera he tau tagata tokologa ne mamate he felakutaki he senetenari [ke 20 aki] ke tuga e tau felakutaki oti ne mai he senetenari fakamua he Aho he Iki [TI] ke he 1899.” Tali mai he 1914 ne molea e 100 miliona he tau momoui ne galo he tau felakutaki! Ne fuafua he taha enesaikolopetia ne holo hake ke 60 e miliona tagata ne mamate he Felakutaki II he Lalolagi. Ha kua ha ha mogonei he falu motu e tau kanavaakau niukilia, kua maeke ai e tau tagata ke tatafi kehe e vala lahi he puke tagata he lalolagi. Pihia foki mo e holo ki mua he fakasaiene mo e fakaekekafo, nukua mamate agaia e tau tama he tau tau takitaha ke kavi ke he lima e miliona ha ko e hoge.—Kikite e veveheaga 9 he tohi Ko e Heigoa ne Fakaako Moli he Tohi Tapu?
8. Ko e heigoa kua fakakite mooli ke he tau afe tau ne pule ai e tagata?
8 Kua kaumahala e tau laliaga he tagata ke fakaotioti e holoaga he mahani kelea. Ko e fakapolitika, fakafua koloa, mo e tau fakatokatokaaga fakalotu he lalolagi nei kua nakai fakaai ke fakamakona e matapatu manako he tagata ma e mafola, monuina, mo e malolō tino. Ti mamao mai he fakamafola e tau lekua lalahi hane fehagai mo e tau tagata, ko e tau fakatokatokaaga nei kua fakaauatu ai ki mua. Nukua fakakite he tau afe tau ne pule ai e tagata e mooli he tau kupu nei: “Kua nakai ha i ai ke he tagata hana puhala, nakai ha ha he tagata kua fano ke fakatonu e mena ke fano a ia ki ai.” (Iere. 10:23) E, “kua pule ai e taha tagata ke he taha, ke kelea ai e ia ni.” (Fakama. 8:9) Mua atu, “kua oi fakalataha mo e mamahi fanau fakalataha e tau mena oti ne eke kua hoko ni ke he vaha nai.”—Roma 8:22.
9. Ko e heigoa e tau tutūaga ne iloa he tau Kerisiano mooli he “tau aho fakamui” nei?
9 Hagaao ke he vahā ha tautolu, ne talahau tuai he Tohi Tapu: “Ko e tau aho fakamui to hohoko mai ai e tau aho uka.” He mole e fakamaama e tau tutūaga he tau aho fakamui i lalo he pule he tagata, ne pehē e perofetaaga: “Ko e tau tagata mahani kelea mo e tau tagata kua fakavai, to tolomaki atu a lautolu ke au atu he kelea.” (Totou 2 Timoteo 3:1-5, 13.) Ko e mena ia ni ne iloa he tau Kerisiano, ma e “lalolagi oti ha he pule hana kua mahani kelea,” ko Satani. (1 Ioa. 5:19) Pete ia, ko e tala mitaki ainei to nakai leva ti laveaki he Atua a lautolu ne fakaalofa ki a ia. To laveaki mai a lautolu he lalolagi nei ne holo mafiti ki mua e kelea.
Ko e Punaaga Hokoia he Laveakiaga
10. Ko e ha ko Iehova hokoia e Punaaga moolioli he laveakiaga?
10 He fakamatala e koe e tala mitaki, kia fakamaama ko Iehova hokoia e Punaaga moolioli he laveakiaga. Ko ia tokotaha ne ha ha ai e malolō mo e finagalo ke laveaki e tau fekafekau haana mai he tau tutūaga kelea. (Gahua 4:24, 31; Fakakite. 4:11) Kua lata mogoia ia tautolu ke mauokafua to laveaki e Iehova e tau tagata haana mo e fakamooli haana a finagalo, ha kua omonuo a ia: “Ko e moli tuga ne manatu e au kua hoko ni pihia.” Ko e kupu haana to ‘nakai liu noa mai kia ia.’—Totou Isaia 14:24, 25; 55:10, 11.
11, 12. Ko e heigoa e fakamooliaga ne foaki he Atua ke he tau fekafekau haana?
11 Nukua fakamooli mai a Iehova to laveaki e ia e tau fekafekau haana he magaaho ka fakahoko e ia e fakafiliaga ke he tau tagata mahani kelea. He magaaho ne fakafano e perofeta ko Ieremia ke fakamatala fakamalolō ke he tau tagata agahala kelea muitui, ne pehē e Atua: “Aua neke matakutaku a koe.” Ko e ha? “Ha ko e mena laveaki e au a koe.” (Iere. 1:8) Tatai foki, he magaaho ne amanaki a Iehova ke fakaotioti a Sotoma mo Komora, ne fakafano e ia ua e agelu ke laveaki a Lota mo e magafaoa haana he tataki kehe mai he matakavi. “Ti fakato hifo poke uha e Iehova ki Sotoma mo Komora e taio mo e afi.”—Kene. 19:15, 24, 25.
12 Pihia foki ke he lalolagi katoa, kua maeke ia Iehova ke laveaki a lautolu ne taute e finagalo haana. He magaaho ne moumou e ia e lalolagi mahani kelea i tuai ke he Fakapuke, “ka e laveaki a Noa kua tokovalu aki, ko e ogo he tututonu.” (2 Pete. 2:5) To liu laveaki foki e Iehova a lautolu ne tututonu he magaaho ka moumou e ia e lalolagi mahani kelea he magaaho nei. Ati pehē e Kupu haana: “Kia kumi e mutolu a Iehova ko mutolu oti ne mahani molu ke he motu . . . kia kumi e mutolu e mahani tututonu, kia kumi e mutolu e mahani molu, po ke galo nakai a mutolu ke he aho ita a Iehova.” (Sefa. 2:3) Ti ko e fua he moumouaga he lalolagi katoa, ‘ko lautolu ne mahani hakohako to nonofo a lautolu ke he motu, ka to vevehe kehe mai a lautolu ne mahani kelea.’—Fakatai 2:21, 22.
13. To laveaki fēfē mogoia e tau fekafekau ha Iehova ne mamate?
13 Pete ia, kua tokologa e tau fekafekau he Atua ne fitā e mamate ha ko e gagao, favaleaga, mo e falu kakano foki. (Mata. 24:9) Ka e, to laveaki fēfē mogoia a lautolu oti nei? Tuga ne kitia fakamua, ‘to liu tutu mai a lautolu ne tututonu.’ (Gahua 24:15) Ko e mauokafua ha ia he iloa kua nakai fai mena foki ka taofi a Iehova mai he laveaki e tau fekafekau haana!
Ko e Fakatufono Tututonu
14. Ko e ha kua mauokafua a tautolu ko e fakatufono tututonu e Kautu he Atua?
14 Ke he fekafekauaga haau, lata ia koe ke fakamaama ko e fakatufono tututonu e Kautu ha Iehova he lagi. Kua pihia e mena nei ha kua fakaata mai he Kautu e tau mahani mitaki ue atu he Atua, tuga e fakafili tonu, tututonu, mo e fakaalofa. (Teu. 32:4; 1 Ioa. 4:8) Ne tuku he Atua e Kautu ke he tau lima ha Iesu Keriso, ko ia ne kua latatonu lahi ke pule ke he lalolagi. Ne finagalo foki a Iehova ke tamai he lalolagi 144,000 he tau Kerisiano fakauku ti liu fakatū ke moui he lagi mo tau hakeaga fakalataha mo e Keriso he pule ke he tau mena he lalolagi.—Fakakite. 14:1-5.
15. Fakakite e kehe he pule he Kautu he Atua mo e pule he tagata.
15 Ko e kehe lahi ha ia mogoia he pule ha Iesu mo e 144,000 ke he pule he tau tagata nakai mitaki katoatoa! Ko e tau tagata pule he fakatokaaga nei ne fa mahani ke ekefakakelea mo e takitaki e tau tagata i lalo ha lautolu ke he tau felakutaki, ati fua mai e kelipopo he tau miliona. Kakano haia ne fakatonu mai e tau Tohiaga Tapu ki a tautolu ke nakai tua po ke falanaki ke he tagata, ne “nakai ha i ai ha fakamouiaga”! (Sala. 146:3) Ka ko e agaaga mitaki ha ia ka mailoga e pule he Keriso! “Kia o mai a mutolu kia au, ko mutolu oti ne matematekelea mo e pehia he tau kavega,” he talahau e Iesu, “ko au foki ke okioki ai a mutolu. Kia hahamo e mutolu e lakau hahamo haku, mo e fifitaki mai a mutolu kia au; ha ko au ni ko e totonu mo e loto holoilalo; ti moua ai e mutolu e okiokiaga mo e tau agaga ha mutolu. Ha ko e mena maeke vave haku a lakau hahamo he uta, ko e haku a kavega foki, ko e mena mama a ia.”—Mata. 11:28-30.
Nakai Leva to Fakaotioti e Tau Aho Fakamui!
16. To fakahiku fēfē e tau aho fakamui nei?
16 Ko e lalolagi nei kua ha ha ai ke he tau aho fakamui, po ke matahiku he “fakaotiaga he lalolagi,” tali mai he 1914. (Mata. 24:3) Nakai leva mogonei, to tupu e mena ne talahau e Iesu ‘ko e matematekelea lahi.’ (Totou Mataio 24:21.) Ko e matematekelea lahi ue atu ia ka fakaotioti e lalolagi katoa ha Satani. Ka e kamata fēfē e matematekelea lahi? Mo e to fakaotioti fēfē ai?
17. Ko e heigoa ne fakakite he Tohi Tapu ke he kamataaga he matematekelea lahi?
17 To kamata fakalutukia e matematekelea lahi. E, to hoko fakalutukia mai e ‘aho a Iehova’ he magaaho “ka pehe a lautolu, Kua mafola, kua nakai haofia.” (Totou 1 Tesalonia 5:2, 3.) To kamata e matematekelea ne talahau tuai he magaaho ka manatu e tau motu kua teitei tuai a lautolu ke moua e tali ke he falu lekua lalahi ha lautolu. Ko e moumouaga mogoia ha ‘Papelonia Lahi,’ ko e kautu he tau lotu fakavai he lalolagi, to fakaofo ke he lalolagi. To ofoofogia e tau patuiki mo e falu he magaaho ka fakahoko e fakafiliaga ki a Papelonia Lahi.—Fakakite. 17:1-6, 18; 18:9, 10, 15, 16, 19.
18. Fēfē e onoonoaga a Iehova he favale a Satani ke he tau tagata Haana?
18 Ke he magaaho uho lahi, to ha ha ai e “tau fakamailoga ke he la, mo e mahina, mo e tau fetu,” mo e “kitia ai ke he lagi e fakamailoga he Tama he tagata.” Lata ia tautolu mogoia ke ‘kitekite hake mo e haga hake a tautolu ha kua tata tuai ha tautolu a laveakiaga.’ (Luka 21:25-28; Mata. 24:29, 30) Ko Satani, po ko Koku, to fakamafoki atu e tau kau haana ke totoko ke he tau tagata he Atua. Ka e hagaao ki a lautolu ne favale ke he tau fekafekau tua fakamooli haana, ne pehē a Iehova: “Ko ia kua piki atu kia mutolu, kua piki atu ai a ia ke he alito mata he hana fofoga.” (Saka. 2:8) Kakano ia, ko e laliaga ha Satani ke moumou a lautolu to nakai kautu. Ko e ha? Ha ko e mena to fakalago fakamafiti mai e Iki Pule Katoatoa ko Iehova ke laveaki e tau fekafekau haana.—Eseki. 38:9, 18.
19. Ko e ha kua lata ia tautolu ke mauokafua to fakahoko he tau matakau moumou he Atua e fakatokaaga ha Satani?
19 He magaaho ka tau atu e Atua ke he tau motu, ‘to iloa ai e lautolu ko ia ni ko Iehova.’ (Eseki. 36:23) To fakafano mai e ia e kau haana—ko e tau mena momoui fakaagaaga ne totou hogofulu afe ka takitaki e Keriso Iesu—ke fakahoko e moumouaga he fakatokaaga ha Satani ne toe he lalolagi. (Fakakite. 19:11-19) He liu manatu e tautolu e taha magaaho ne kelipopo he agelu tokotaha he taha ni e po “e tau tagata ne taha e teau e afe ti valugofulu e afe ti lima e afe” he tau fī he Atua, kua lata ia tautolu ke mauokafua ke he matakau he lagi ka moumou agataha e tau vala oti ne toe he fakatokaaga a Satani he lalolagi he matahiku he matematekelea lahi i Amaketo. (2 Patu. 19:35; Fakakite. 16:14, 16) To līlī a Satani mo e tau temoni haana he pahua ke he afe he tau tau. Fakahiku ai, to moumou a lautolu.—Fakakite. 20:1-3.
20. Ko e heigoa ka fakamooli e Iehova puhala he Kautu?
20 To fakameā mogoia e lalolagi mai he mahani kelea, ti nonofo tukulagi ai e tau tagata tututonu he fua lalolagi nei. To eke mooli a Iehova mo Laveaki ne Mua. (Sala. 145:20) He puhala he haana a Kautu, to fakatokoluga e ia e pule katoatoa haana, fakatapu haana a higoa, mo e fakamooli e finagalo mitaki lahi haana ma e lalolagi. Kia moua ai e koe e fiafia lahi ke he fekafekauaga haau he fakapuloa e koe e tala mitaki nei mo e lagomatai a lautolu “ne kotofa ke he moui tukulagi” ke mataala nukua tata mai e laveakiaga he Kautu he Atua!—Gahua 13:48.
Manatu Nakai e Koe?
• Fakamaama fēfē e Iesu e aoga he Kautu?
• Ko e ha kua lahi mahaki e manako ma e laveakiaga he mogonei ke he vahā fakamua?
• Ko e heigoa e tau mena tutupu kua amanaki a tautolu ki ai he magahala he matematekelea lahi?
• Fakamooli fēfē a Iehova ke eke mo Laveaki ne Mua?
[Tau Fakatino he lau 12, 13]
Ne talahau tuai he Kupu he Atua e gahua fakamatala ne mua he lalolagi katoa ma e vahā ha tautolu
[Fakatino he lau 15]
Tuga ne laveaki e Iehova a Noa mo e magafaoa haana, kua maeke a Ia ke laveaki a tautolu
[Fakatino he lau 16]
“To holoholo kehe [e Iehova] e tau hihina mata oti . . . ti nakai tuai fai mate.”—Fakakite. 21:4