Ko e Ha ne Nakai Fakamanatu he Tau Fakamoli a Iehova e Tau Aho Fanau?
Nakai fakamanatu he Tau Fakamoli a Iehova e tau aho fanau ha kua talitonu a mautolu ko e tau fakamanatuaga pihia kua nakai fakafiafia e Atua. Ka e nakai talahau fakahako he Tohi Tapu ke ua fakamanatu e tau aho fanau, kua lagomatai ai ki a tautolu ke maama e tau matapatu manatu ke he tau mena nei ne tutupu mo e iloa e onoonoaga he Atua ki ai. Manamanatu ke he fā e vala nei mo e tau matapatu fakaakoaga he Tohi Tapu.
Fai matutakiaga pouliuli e tau fakamanatuaga aho fanau. Hagaao ke he Funk & Wagnalls Standard Dictionary of Folklore, Mythology, and Legend, ko e tau fakamanatuaga ne puna mai he taofiaga he aho ne fanau e tagata, “ko e tau agaaga kelea mo e fakaohoohoaga kelea ne moua e magaaho ke fakakelea e tau tagata ne fakamanatu ai” ti ka “ha ha i ai e tau kapitiga mo e tau talahauaga mitaki ke lagomatai ke puipui e tagata ne tū e tau.” Ko e tohi The Lore of Birthdays ne pehē he vahā i tuai ko e tau fakamauaga he aho fanau kua “aoga lahi ke talahau e tau mana (horoscope)” ne fakavē ke he “tau mana fakasaiene he tau mena he aolagi.” Lafi he tohi nei ko e “tau kanela he aho fanau, he taofiaga tuai ke he fakapā paula kua lafi ki ai e mana pauaki ma e tau kupu fakamonuina.”
Ka e nakai fakaatā he Tohi Tapu ke fakaaoga e mana, talahau tuai ke he tau mena he aolagi, taulaatua, po ke “eke pihia.” (Teutaronome 18:14; Kalatia 5:19-21) Taha e kakano ne fakahala he Atua e maaga lahi i tuai ko Papelonia ha kua taute he tau tagata i ai e tau mena he onoono ke he aolagi ko e puhala he tau lagatau he tau taulaatua. (Isaia 47:11-15) Ko e Tau Fakamoli a Iehova ne nakai lavelave he tau tupumaiaga he tau aga fakamotu oti; ka e he foaki mai he Tohi Tapu e tau fakatonuaga hako pihia, nakai manako a tautolu ke fakaheu ai.
Nakai fakamanatu he tau Kerisiano fakamua atu e tau aho fanau. The World Book Encyclopedia ne pehē “kua manamanatu a lautolu ke he fakamanatu he aho fanau he tagata ke eke mo aga fakamotu pouliuli.” Fakakite he Tohi Tapu ko e tau aposetolo mo e falu ne fakaako fakatonu he puhala ha Iesu kua lata ke muitua he tau Kerisiano oti.—2 Tesalonia 3:6.
Ko e fakamanatuaga hokoia kua lata e tau Kerisiano ke fakatumau e taute, nakai ko e aho ne fanau a Iesu, ka ko e aho ne mate a ia. (Luka 22:17-20) Nakai ofo ke he mena nei ha kua talahau he Tohi Tapu ko e “aho ka mate ai kua mua he mitaki ia ke he aho ne fanau ai.” (Fakamatalaaga 7:1) He fakahikuaga he moui ha Iesu he lalolagi, kua taute e ia e higoa mitaki mo e Atua ti mua atu e uho he aho ne mate ai ke he aho ne fanau ai.—Heperu 1:4.
Nakai hagaao e Tohi Tapu ke he fekafekau he Atua ne fakamanatu e aho fanau. Nakai ko e mena kitia tuai anei ha kua fakamau ai he tau tagata tokoua ne nakai fekafekau ke he Atua ne fakamanatu e tau aho fanau. Ka e nakai fua mitaki e tau fakamanatuaga ua ia.—Kenese 40:20-22; Mareko 6:21-29.
Logona hifo kia he tau fanau ne Fakamoli e tau matua kua fakatikai he nakai fakamanatu e tau aho fanau?
Tuga ni e tau matua mitaki oti, fakakite he tau matua Fakamoli e fakaalofa ha lautolu ke he ha lautolu a tau fanau he tau katoa, he age foki ki a lautolu e tau mena fakaalofa mo e tau fakafiafiaaga atihake. Lali a lautolu ke muitua e fakafifitakiaga mitaki lahi ne fakatoka he Atua ne fakatumau ke foaki e tau mena mitaki ma e tau fanau haana. (Mataio 7:11) Ko e tau fanau he tau matua Fakamoli ne nakai logona hifo e fakatikai tuga ne fakakite he tau manatu nei:
“Ko e mena fiafia lahi ka moua e mena fakaalofa ka e nakai amaamanaki ki ai.”—Tammy, tau he moui 12.
“Pete ne nakai moua e au e tau mena fakaalofa he aho fanau haaku, ka e fakatau mai agaia he tau matua haaku he falu magaaho e tau mena fakaalofa ma haaku. Fiafia au he taute pihia ha kua fakaofo mai ki a au.”—Gregory, tau he moui 11.
“Manatu kia a koe ko e hogofulu e minuti, tau keke gahoa, mo e lologo kua taute e fiafia tūtau? Lata a koe ke hau ke he fale haaku ke kitia e fiafia mooli!”—Eric, tau he moui 6.