Ko Hai e Agelu ne Mua ko Mekaeli?

Tali he Tohi Tapu

Hagaao e falu lotu ki a Mekaeli ko “Saint Michael,” ka kua kitia maali ko e higoa ne foaki ki a Iesu he magaaho fakamua mo e he oti e moui haana he lalolagi.a Taufetoko a Mekaeli mo Satani he mole e mate ha Mose ti lagomatai foki e agelu ke fakahoko e fekau he Atua ke he perofeta ko Tanielu. (Tanielu 10:13, 21; Iuta 9) Moui fakatatau a Mekaeli ke he kakano he higoa haana​​—“Ko Hai ke Tatai mo e Atua?”​​—he lalago e pule he Atua mo e tau ke he tau fī he Atua.​​—Tanielu 12:1; Fakakiteaga 12:7.

Manamanatu ke he kakano kua hako ke talahau ko Iesu e agelu ne mua ko Mekaeli.

• Ko Mekaeli ko e “agelu ne mua.” (Iuta 9) Ko e matahigoa “agelu ne mua,” kua kakano “iki he tau agelu” ne lagaua ni e kitia he New World Translation of the Holy Scriptures. He ua e tuaga ia, ko e hagaao ni ke he taha e agelu ne moua e matahigoa ia. Taha he tau kupu tohi ia ne talahau ko Iesu Keriso ne liu tu mai ka “haele hifo e Iki ni mai he lagi, mo e kalaga, mo e leo he agelu ne mua.” (1 Tesalonia 4:16) Ha ha ia Iesu e “leo he agelu ne mua” ko Mekaeli.

• Ko Mekaeli e pule he kau he tau agelu. “Ko Mekaeli mo e hana tau agelu kua tau ke he tarako” ko Satani. (Fakakiteaga 12:7) Ha ha ia Mekaeli e pule ne mua atu he lagi ha kua fakahigoa a ia “ko e taha he tau iki ne mua” mo e “ko e iki ne mua.” (Tanielu 10:13, 21; 12:1) Ko e tau matahigoa nei ne foaki ki a Mekaeli ko e iki he takitaki kau he tau agelu tuga ne talahau he pulotu ko David E. Aune he New Testament.

  Talahau he Tohi Tapu ko e taha ni e higoa foki ne moua e pule ke he tau kau he tau agelu. Kua “fakakite mai e Iki ko Iesu mai he lagi, fakalataha mo e tau agelu . . . malolo, ke he afi puhopuho, ke taui atu kia lautolu.” (2 Tesalonia 1:7, 8; Mataio 16:27) Kua “haele tuai ke he lagi, . . . kua fakatokolalo foki kia ia [Iesu] e tau agelu, mo e tau pule mo e tau toa.” (1 Peteru 3:21, 22) Nakai hako ke he Atua ke fakatū a Iesu mo Mekaeli ko e tau takitaki kau fetoko he tau agelu tapu. Ka kua tonu ke talahau ko e tau higoa Iesu mo Mekaeli kua hagaao ke he taha e tagata.

• Ko Mekaeli “ne tu” he hohoko e “tau aho ke matematekelea.” (Tanielu 12:1) He tohi ha Tanielu ko e talahauaga “ne tu” kua fa hagaao ke he patuiki ne tu hake ke taute e matafekau pauaki. (Tanielu 11:2-4, 21) Ko Iesu Keriso “Ko e Loko he Atua,” po ke, Kupu he Atua ka taute e matagahua pauaki ko e “Patuiki he tau patuiki” ke tamate oti e tau fī he Atua mo e puipui e tau tagata he Atua. (Fakakiteaga 19:11-16) To taute pihia e ia he magahala ‘he matematekelea lahi tuga nakai pihia taha mena tali mai he kamataaga he lalolagi.’​​—Mataio 24:21, 42.