Hūhū he Tau Tagata Totou ha Tautolu . . .

Ko Iesu Kia ko Mekaeli, ko e Agelu Ne Mua?

▪ He tali mukamuka, ē. Ko e aga mau ke loga e higoa he tagata ke he tau aga fakamotu loga. Ko e tuaga pihia ne tupu ke he tau higoa he Tohi Tapu. Ma e fakatai, ko e tupuna ko Iakopo ne higoa foki ko Isaraela. (Kenese 35:10) Ne fā e puhala ne fakahigoa a Peteru—kua iloa a ia ko Simona he faka-Heperu mo e faka-Heleni, mo Peteru ke he faka-Semite (Semitic), ko Kefa. Ne iloa foki e aposetolo, ko Simona Peteru, he lafi ua e higoa. (Mataio 10:2; Ioane 1:42; Gahua 15:14) Maeke fēfē ia tautolu ke iloa mooli ko Mekaeli e taha higoa ha Iesu? Manamanatu ke he fakamooliaga faka-Tohi Tapu ne mui mai.

Ne ha ha he Tohi Tapu lima e talahauaga ne hagaao ke he mena moui fakaagaaga malolō lahi ko Mekaeli. Tolu he tohi ha Tanielu. Ia Tanielu 10:13, 21, ne totou e tautolu ko e agelu ne fakafano ke taute e matafekau ne fakahao e Mekaeli, ne ui “ko e taha he tau iki ne mua” mo e “ha mutolu a iki.” Matutaki atu, ia Tanielu 12:1, ne iloa e tautolu he vahā he fakaotiaga “to tu ki luga a Mekaeli, ko e iki ne mua, ko ia ne tu ha ko e tau tagata he hau a motu.”

Fai talahauaga foki hagaao ki a Mekaeli ia Fakakiteaga 12:7, ne fakamaama ko “Mekaeli mo e hana tau agelu” ne tau ke he tauaga uho lahi ne fakahiku ke liti hifo a Satani ko e Tiapolo mo e tau agelu mahani kelea haana mai he lagi.

Mailoga he tau tala takitaha ne totoku i luga, ne fakatino a Mekaeli ko e agelu-toa ne tau mo e puipui e tau tagata he Atua mo e fakafeao foki mo Satani, ko e fī mua ue atu ha Iehova.

Ne totoku ia Iuta kupu 9 ko Mekaeli “ko e agelu ne mua.” Ko e talahauaga “ne mua” kua kakano ko e “takitaki” po ke “iki,” ti ko e tau kupu “agelu ne mua” kua nakai fakaaoga ke hagaao ke he tokologa he Tohi Tapu. Ko e 1 Tesalonia 4:16 e taha kupu foki ne totoku e agelu ne mua, ne fakamaama e Paulo a Iesu ne liu tu mai, he pehē: “Ko e mena haele hifo e Iki [Iesu] ni mai he lagi, mo e kalaga, mo e leo he agelu ne mua, mo e pu he Atua.” Ti ko Iesu Keriso ne fakakite he mena nei ko e agelu ne mua, po ke iki agelu.

Mai he tau tala i luga, ko e heigoa ka fakahiku aki e tautolu? Ko Iesu Keriso a Mekaeli ko e agelu ne mua. Ko e tau higoa ne ua—ko Mekaeli (kakano “Ko Hai ne Tatai mo e Atua?”) mo Iesu (kakano “Iehova ko e Fakamouiaga”)—kua hagaaki e onoonoaga ke he matagahua haana ka takitaki ke lalago e pule katoatoa he Atua. Talahau he Filipi 2:9: “Kua fakamatalahi ai he Atua a ia [ko Iesu ne lilifu], mo e foaki atu ai kia ia e higoa kua mua ke he tau higoa oti kana.”

Kua aoga ai ke iloa ko e magaaho ne fanau a Iesu ko e tagata, ne nakai ko e kamataaga a ia he moui haana. Ato fanau a Iesu, ne fina atu e agelu ki a Maria ti tala age ki a ia to fatu ai a ia ke he tama he puhala he agaaga tapu ti kua lata ia ia ke fakahigoa e tama ko Iesu. (Luka 1:31) He fekafekauaga ha Iesu, ne fa tutala a Iesu hagaao ke he moui fakamua haana ato eke mo tagata.—Ioane 3:13; 8:23, 58.

Ti ko Mekaeli ko e agelu ne mua, ko Iesu ke he moui fakamua haana ato eke mo tagata. He mole e liu tu mai ha Iesu ti liu ke he lagi, ne matutaki atu a ia ke he gahua haana ko Mekaeli, ko e agelu ne mua, “[ke] fakaheke ke he Atua e Matua.”—Filipi 2:11.