Nofo Kia e Atua he Tau Mena Oti?
Ko e tali he Tohi Tapu
Kitia he Atua e tau mena oti mo e taute e tau mena ne manako a ia ki ai. (Tau Fakatai 15:3; Heperu 4:13) Nakai fakaako he Tohi Tapu kua nofo viko e Atua ke he tau mena oti. Ka e talahau, kua fai nofoaga pauaki a Ia.
Tuaga he Atua: Ko e Atua ko e agaaga a ia. (Ioane 4:24) Nakai kitia he tau tagata a ia. (Ioane 1:18) Ko e tau fakakiteaga ne talahau he Tohi Tapu kua nofo e Atua ke he matakavi pauaki. Nakai talahau kua nofo viko a ia ke he tau mena oti.—Isaia 6:1, 2; Fakakiteaga 4:2, 3, 8.
Nofo i fe e Atua?: Pehē e Tohi Tapu, ko e lagi “ko e mena kua haele ai” e Atua. (1 Tau Patuiki 8:30) Kakano he mena nei kua nakai nofo e Atua he pulagi po ke lalolagi ka e nofo he lagi. Talahau he Tohi Tapu e magaaho ne o mai e tau agelu mo e “tutu ai a lautolu ki mua a Iehova,”a fakakite he naia ko e Atua kua fai nofoaga pauaki a ia.—Iopu 1:6.
Ka eke kua nakai nofo e Atua he tau mena oti, to maeke nakai a ia ke leveki mai au?
E, ofania he Atua e tau tagata oti. Pete kua nofo a ia he lagi, ka e kitia he Atua e tau tagata he lalolagi ne manako ke fakafiafia a ia, ti lagomatai e ia a lautolu. (1 Tau Patuiki 8:39; 2 Nofoaga he Tau Patuiki 16:9) Manamanatu la ke he puhala ne fakakite e Iehova e leveki haana ki a lautolu ne tapuaki mooli kia ia:
Ka liogi a koe: To logona e Iehova he magaaho ia ni.—2 Nofoaga he Tau Patuiki 18:31.
Ka fakaatukehe a koe: “Kua tata mai a Iehova kia lautolu kua loto malipilipi; kua fakamoui foki e ia a lautolu kua loto pehia.”—Salamo 34:18.
Ka kumi lagomatai: Pehē a Iehova “to fakaako e au a koe, mo e fakakite kia koe” mai he haana Kupu ko e Tohi Tapu.—Salamo 32:8.
Tau tala nakai mooli hagaao ke he nofo he tau mena oti
Tala nakai mooli: Kua nofo e Atua he tau mena oti ne tufugatia.
Tala mooli: Nakai nofo e Atua he lalolagi po ke ha mena he pulagi. (1 Tau Patuiki 8:27) “Kua talahau he lagi e lilifu he Atua,” tuga e tau fetū mo e falu tufugatia foki. (Salamo 19:1) Ti nakai nofo e Atua he tau tufugatia haana, tuga e tagata tā fakatino ne nakai nofo a ia i loto he fakatino haana. Ka e fai talahauaga e fakatino hagaao kia ia ne tā e fakatino ia. Tatai mo e tau mena kua kitia he lalolagi hagaao ke he Tufuga mo e haana tau mena “nakai kitia,” tuga e malolō, pulotu mo e fakaalofa.—Roma 1:20.
Tala nakai mooli: Kua nofo e Atua he tau mena oti ke iloa e tau mena oti mo e malolō lahi a ia.
Tala mooli: Ko e agaaga tapu he Atua ko e malolō ne fakaaoga he Atua. Ko e agaaga tapu haana, ne maeke e Atua ke kitia mo e taute e mena kua loto, matakavi, magaaho ka e nakai ko ia i ai.—Salamo 139:7.
Tala nakai mooli: Kua fakaako mai ia Salamo 139:8 ko e Atua he tau mena oti ne pehē: “Kaeke ke hake au ke he lagi, ko koe haia; kaeke ke faliki haku mohega i seoli, kitiala, ko koe haia.”
Tala mooli: Ko e kupu Tohi Tapu nei kua nakai tala ke he matakavi ne nofo e Atua. Ko e tala fakatai anei ne talahau kua nakai fai matakavi ne mamao ligo ke he Atua ke lagomatai a tautolu.
a Ko Iehova ko e higoa he Atua ne talahau mai he Tohi Tapu.