Ko e Heigoa e Agaaga Tapu?
Ko e tali he Tohi Tapu
Ko e agaaga tapu ko e malolō ne fakaaoga he Atua, ko e malolō ni haana a ia. (Mika 3:8; Luka 1:35) Fakafano he Atua e haana agaaga tapu ko e malolō, ke taute e haana finagalo.—Salamo 104:30; 139:7.
I loto he Tohi Tapu, ko e kupu “agaga” ne kua moua mai he kupu Heperu ko e ruʹach mo e kupu Heleni ko e pneuʹma. Ko e tau kupu nei kua hagaao ia ke he malolō he Atua po ke agaaga tapu. (Kenese 1:2) Fakaaoga foki he Tohi Tapu e tau kupu ia ke he falu maamaaga tuga anei:
Fafagu.—Hapakuka 2:19; Fakakiteaga 13:15.
Matagi.—Kenese 8:1; Ioane 3:8.
Ko e agaaga malolō i loto he tau mena momoui.—Iopu 34:14, 15.
Ko e loto po ke mahani he tagata.—Numera 14:24.
Ko e tau tagata fakaagaaga, putoia foki e Atua mo e tau agelu.—1 Tau Patuiki 22:21; Ioane 4:24.
Kua tatai e kakano he tau mena nei he nakai kitia he tagata, ka e kitia ke he tau gahua ha lautolu. Pihia e agaaga he Atua kua “tuga e matagi ne nakai kitia, ka e fai aoga mo e malolō lahi.”—An Expository Dictionary of New Testament Words, mai ia W. E. Vine.
Kua hagaao foki e Tohi Tapu ke he agaaga tapu he Atua ko e haana “tau lima” po ke “tau matalima.” (Salamo 8:3; 19:1; Luka 11:20; fakatatai Mataio 12:28.) Tuga e tagata gahua ne fakaaoga e ia e haana tau lima mo e tau matalima ke taute e gahua haana. Ti pihia e agaaga tapu he Atua, kua fakaaoga e ia ke taute e tau mena nei:
Ko e lagi mo e lalolagi.—Salamo 33:6; Isaia 66:1, 2.
Ko e Tohi Tapu.—2 Peteru 1:20, 21.
Ko e tau mana ne taute he tau fekafekau he vahā tuai mo e ha lautolu a malolō ke fakamatala.—Luka 4:18; Gahua 1:8; 1 Korinito 12:4-11.
Ko e tau aga mitaki ne fakakite he tau tagata ne omaoma ki a ia.—Kalatia 5:22, 23.
Nakai ko e tagata e agaaga tapu
He fakatatai e agaaga tapu he Atua ke he haana “tau lima,” “tau mata lima” po ke “fafagu,” kua fakakite he Tohi Tapu nakai ko e tagata e agaaga tapu. (Esoto 15:8, 10) Ko e tau lima to nakai gahua ka nakai fai matutakiaga mo e tino. Ti pihia foki e agaaga tapu he Atua, na maeke ni ke gahuahua ka takitaki e ia. (Luka 11:13) Kua fakatatai foki he Tohi Tapu e agaaga he Atua ke he vai, ne tuga e tua mo e iloilo. Ko e tau fakatataiaga nei ne kua fakakite kua nakai fai mahani e agaaga tapu ke tuga e tagata.—Isaia 44:3; Gahua 6:5; 2 Korinito 6:6.
Talahau he Tohi Tapu e higoa he Atua ko Iehova mo e haana tama ko Iesu Keriso; ka e nakai fai talahauaga ke he higoa he agaaga tapu. (Isaia 42:8; Luka 1:31) Ko e magaaho ne fakakite e lilifu mai he lagi ke he Kerisiano ne kua mate fakamatulo ko Setefano, ne kitia ni e ia ua e tagata nakai tolu. Pehē e Tohi Tapu: “Ka kua puke a ia ke he Agaga Tapu, kua mataono ke he lagi, kua kitia atu e lilifu he Atua, mo Iesu ha ne tu ke he fahi matau he Atua.” (Gahua 7:55) Ko e agaaga tapu ko e malolō ne fakaaoga he Atua ati kitia e Setefano e fakakiteaga.
Tau tala nakai mooli hagaao ke he agaaga tapu
Tala nakai mooli: Ko e “Agaga,” po ke agaaga tapu ko e tagata a ia mo e taha vala he Atua Tolu Taha Tapu, tuga ne talahau ia 1 Ioane 5:7, 8 he King James version.
Tala mooli: Ko e talahauaga he King James version ia 1 Ioane 5:7, 8 ne pehē, “he lagi, ko e Matua, ko e Loko mo e Agaaga Tapu: kua taha a lautolu kua tolu nei. Mo e kua tolu ne talahau mai he lalolagi katoa.” Ka e moua he tau tagata kumikumi ko e tau kupu nei kua nakai tohi he aposetolo ko Ioane, ti nakai lata ke tuku i loto he Tohi Tapu. Ne tohia he porofesa ko Bruce M. Metzger: “Ko e tau talahauaga pikopiko anei ti nakai lata ke tohi i loto he Maveheaga Foou.”—A Textual Commentary on the Greek New Testament.
Tala nakai mooli: Talahau he Tohi Tapu fai mahani e agaaga tapu, ti fakamooli he naia ko e tagata a ia.
Tala mooli: Falu magaaho talahau he Tohi Tapu e mahani he agaaga tapu. Ka e nakai fakakite he mena nei ko e tagata e agaaga tapu. Talahau foki he Tohi Tapu e mahani he pulotu, mate mo e agahala. (Tau Fakatai 1:20; Roma 5:17, 21) Ma e fakatai, kua talahau ko e pulotu na fai “fanau,” ko e agahala kua fakavai, kelipopo mo e manako lahi.—Mataio 11:19; Luka 7:35; Roma 7:8, 11.
Tuga ne fakatai e Iesu ko e agaaga tapu ko e “lagomatai” (paraclete) ne kua maeke ke fakamooli, takitaki, vagahau, logona, fakamatala, fakaheke mo e moua. (Ioane 16:7-15)
Tala nakai mooli: Ko e papatisoaga ke he higoa he agaaga tapu ne fakamooli ko e tagata a ia.
Tala mooli: He falu a magaaho kua fakaaoga he Tohi Tapu e “higoa” hagaao ke he malolō po ke pule. (Teutaronome 18:5, 19-22; Eseta 8:10) Tatai mo e talahauaga faka-Peritania ke he “higoa he fakatufono,” ne nakai kakano ko e tagata e fakatufono. Ko e tagata ne papatiso “ke he higoa” he agaaga tapu, kua mailoga e malolō mo e gahua he agaaga tapu ke taute e finagalo he Atua.—Mataio 28:19.
Tala nakai mooli: Ko e tau aposetolo mo e tau tutaki ha Iesu he vahā fakamua ne talitonu a lautolu ko e tagata e agaaga tapu.
Tala mooli: Nakai fai talahauaga pihia e Tohi Tapu po ke tau tala tuai. Kua talahau he Encyclopædia Britannica: “Ko e Agaaga Tapu kua hagaao ke he Tagata tapu . . . ne fakatū he Council ha Constantinople he 381 V.N.” Kua fakatū he molea e 250 e tau he mate e aposetolo fakahiku.