HŪHŪ HE TAU FUATA
Ko e Ha ne Lata a Au ke Liogi?
Ko e taha kumikumiaga ke he tau fuata mui i Amerika, ko e 80 e pasene ha lautolu ne liogi ka e hafa ni kua liogi he tau aho oti. Ko e falu ne manamanatu: ‘Ko e liogi kia ke fakafiafia au ni po ke fai mena foki?’
Ko e heigoa e liogi?
Ko e liogi e puhala ke tutala mo e Tufuga ke he tau mena oti. Manamanatu la ke he kakano he mena ia! Tokoluga atu a Iehova ke he tau tagata, “ka e nakai ni mamao a ia mo tautolu takitokotaha.” (Gahua 17:27) Haia he Tohi Tapu e uiina ofoofogia: “Kia fakatata atu a mutolu ke he Atua, ti fakatata mai ai a ia kia mutolu.”—Iakopo 4:8.
Maeke fēfē ia koe ke fakatata ke he Atua?
Taha puhala ko e liogi—ko e tutalaaga a ia haau mo e Atua.
Taha puhala foki ke fakaako e Tohi Tapu—ko e puhala ia ne “tutala” e Atua ki a koe.
Ko e matutaki ia—he liogi mo e fakaako e Tohi Tapu—ka lagomatai a koe ke atihake e kapitiga malolō mo e Atua.
“Tutala ki a Iehova—ko e Mua ue Atu—ko e taha monuina lahi mahaki ma e tau tagata.”—Jeremy.
“Tutala mo Iehova ke he tau logonaaga hokulo haaku he liogi, ne maeke au ke fakatata atu ki a ia.”—Miranda.
Kua fanogonogo nakai e Atua?
Pete ni kua talitonu a koe ke he Atua—mo e liogi foki a koe ki a ia—liga uka ke talia na fanogonogo mooli a ia. Talahau he Tohi Tapu ko Iehova “Ko e fanogonogo liogi.” (Salamo 65:2) Uiina mai foki ki a koe ke “tuku atu kia ia e tau mena oti kua fakaatukehe ai a mutolu.” Ko e ha? “Ha ko e mena kua manatu e ia a mutolu.”—1 Peteru 5:7.
Manamanatu ki ai: Fai magaaho pauaki kia a koe ke tutala tumau mo e tau kapitiga tata haau? Maeke a koe ke taute pihia mo e Atua. Tutala tumau ki a ia he liogi, mo e fakaaoga e higoa haana ko Iehova. (Salamo 86:5-7; 88:9) Pehē e Tohi Tapu ki a koe ke “liogi nakai noa.”—1 Tesalonia 5:17.
“Ko e liogi ko e puhala ke tutala au mo e haaku Matua he lagi, mo e tala age ki a ia e tau mena oti he loto haaku.”—Moises.
“Tutala au mo Iehova ke he tau mena hokulo, tuga ka tutala au mo e matua fifine po ke kapitiga tata.”—Karen.
Ko e heigoa haaku ka liogi ki ai?
Pehē e Tohi Tapu: “Fakailoa atu ke he Atua e tau manako ha mutolu ke he tau mena oti kana ke he liogi, mo e ole, katoa mo e fakaaue.”—Filipi 4:6.
Kakano kia kua lata ke liogi hagaao ke he tau lekua haau? E! Pehē e Tohi Tapu: “Kia tuku atu kia Iehova e tau mena ne fakaatukehe ai a koe; ko ia ni ke fakamalolo a koe.”—Salamo 55:22.
Ko e tau liogi haau ke he Atua kua lata ke tutala ke he tau mena oti ka e nakai ko e tau lekua ni hokoia. “Liga to nakai kapitiga mitaki ka ole tumau ni au ke lagomatai mai e Iehova,” ne talahau he tama fifine fuata ko Chantelle. “Haaku manatu, kua lata ke fakaaue mua ki a Iehova mo e ke he tau mena loga ne foaki mai e ia.”
Manamanatu ki ai: Ko e heigoa e tau mena he moui ne fakaaue a koe ki ai? Manatu nakai e koe he fakaaue ki a Iehova ke he tolu e mena he aho nei?
“Ka kitia e taha mena tuga e fiti lakau fuluola, ti mafiti a tautolu ke liogi mo e fakaaue ki a Iehova.”—Anita.
“Manamanatu fakahokulo ke he taha mena kua tufugatia ne fiafia a koe ki ai, po ke taha kupu Tohi Tapu ne loto lahi a koe ki ai, ti fakaaue a koe ki a Iehova ke he mena ia.”—Brian.