Veveheaga 11

Ko e Tau Aho Fakahiku a Nei!

1. Ko e ha kua fakaatukehe ai e falu ka manamanatu atu ke he tuaga he lalolagi, ka e maeke ke moua mai i fe e fakamaamaaga mauokafua ke he tau mena tutupu?

KUA hoko fefe e lalolagi matematekelea ha tautolu ke he tuaga nei? Kua hagaao atu a tautolu ki fe? Kua fa huhu nakai e koe e tau huhu pihia? Tokologa kua fakagogoa he magaaho ka onoono atu a lautolu ke he tuaga he lalolagi. Ko e tau mena tutupu moli tuga e felatauaki, gagao, mo e holifono kua toka e tau tagata ke manamanatu noa ko e heigoa ka tamai a anoiha. Kua tote e amaamanakiaga ne foaki he tau takitaki he fakatufono. Ka e, ko e moua ni e fakamaamaaga mauokafua ke he tau vaha fakaatukehe nei mai he Atua i loto he hana a Kupu. Kua lagomatai he mauokafua he Tohi Tapu a tautolu ke kitia e tuaga ha tautolu he vaha nei. Kua fakakite mai ki a tautolu kua ha ha a tautolu ke he “tau aho fakahiku” he fakatokaaga he tau mena nei.​—2 Timoteo 3:1.

2. Ko e heigoa e huhu ne kua huhu he tau tutaki ha Iesu ki a ia, mo e kua tali atu fefe e ia?

² Kia manamanatu la, ke fakatai ki ai, ke he tali ne foaki age e Iesu ke he falu he tau huhu ne kua huhu he tau tutaki hana. Tolu e aho ato mate a Iesu, ne huhu atu a lautolu ki a ia: “Ko e heigoa e fakamailoga he hau a ha ha hinei mo e fakaotiaga he fakatokaaga he tau mena nei?”a (Mataio 24:3, NW) He tali atu ki ai, ne tala age e Iesu hagaao e tau mena tutupu pauaki he lalolagi mo e tau tutuaga ka fakakite fakamaaliali mai kua hoko tuai e fakatokaaga nakai mahani Atua nei ke he tau aho fakahiku hana.

3. Ko e ha kua kelea lahi ai e tau tutuaga he lalolagi he magaaho ne kamata e pule ha Iesu?

³ Tuga kua fakakite mai he veveheaga kua mole, ko e fakatokatokaaga he Tohi Tapu kua hokotia ai ke he fakaotiaga ko e Kautu he Atua kua fita he kamata ke pule. Ka e maeke fefe e mena ia? Kua eke e tau mena ke muitui lahi, nakai mitaki. Kua moli, ko e fakamoliaga malolo lahi a nei kua kamata tuai e Kautu he Atua ke pule. Ko e ha ne pihia ai? Moli, ha kua tala mai ia Salamo 110:2 ki a tautolu ko e to fai magaaho ka pule a Iesu ‘ki mua ha lautolu kua fai fi kia ia.’ Kua moli, ko e hana a gahua fakamua ko e Patuiki he lagi ke tolo hifo a Satani mo e hana tau agelu temoni ke he lalolagi. (Fakakiteaga 12:9) Ti ko e heigoa ne tupu? Kua pihia ni tuga kua talahau tuai mai ia Fakakiteaga 12:12: “Oi fakaalofa kia mutolu kua nonofo ke he fonua mo e tahi, ha kua hifo kia mutolu e tiapolo kua ita lahi, ha kua iloa e ia kua tote hana vaha.” Kua nonofo ai a tautolu ke he ‘vaha tote’ ia.

4. Ko e heigoa e falu he tau vala he tau aho fakahiku, mo e ko e heigoa kua fakakite e lautolu? (Kikite e puha.)

⁴ Nakai ko e mena ke ofo ai, ha ko e, he magaaho ne huhu atu ki a Iesu ko e heigoa e fakamailoga he hana a ha ha hinei mo e he fakaotiaga he fakatokaaga he tau mena, ko e tali hana kua fai manamanatuaga. Ko e tau vala kehekehe he fakamailoga kua moua ke he puha he lau tohi 102. Tuga kua kitia ai e koe, kua foaki mai he tau aposetolo Kerisiano ko Paulo, Peteru, mo Ioane ki a tautolu e falu matafeiga foki hagaao ke he tau aho fakahiku. Kua moli, kua loga e tau vala he fakamailoga mo e he tau aho fakahiku kua fakalataha ke he tau tutuaga fakatupetupe. Ka e, ko e tau fakamoliaga he tau perofetaaga nei kua lata ke taute a tautolu ke tali tonu kua tata mai tuai e fakaotiotiaga ke he fakatokaaga kelea nei. Kia o mai a tautolu ke onoono fakatata atu ke he falu vala he fakamailoga ne mua atu he tau aho fakamui.

TAU VALA HE TAU AHO FAKAMUI

5, 6. Kua fakamoli fefe e tau perofetaaga hagaao ke he felatauaki mo e hoge?

⁵ “To laga e taha motu ke he taha motu, ko e taha kautu ke he taha kautu.” (Mataio 24:7; Fakakiteaga 6:4) Kua ui he tagata tohia tohi ko Ernest Hemingway e Felakutaki I he Lalolagi ko e “kelipopoaga lahi mahaki, kua muatua e hehe he tamateaga ne kua nakai la taute pihia ai ke he lalolagi.” Hagaao atu ke he tohi The World in the Crucible​—1914-1919, ko e mena nei “ko e fahi fou a nei he felakutaki, ko e felakutaki katoatoa fakamua laia ne iloa he tau tagata. Ko e hanaleva, muatua e malolo, mo e laulahi kua mua atu ke he ha mena kua iloa fakamua po ke kua fa amaamanaki ki ai.” Ati hoko mai e Felakutaki II he Lalolagi, kua fakamoli ai ke mua atu e moumouaga mai he Felakutaki I he Lalolagi. “Ko e senetenari ke uafulu aki,” he talahau he porofesa he fakamauaga tala tuai ko Hugh Thomas, “kua pule ki ai e fana masini, ko e tulatau, ko e B-52 (vakalele pomu), ko e pomu niukilia mo e, ke fakamuiaki, ko e misala. Kua fakamailoga ai he tau felakutaki ne kua mua atu e fakamaligi toto mo e moumouaga ki a lautolu he ha vaha foki.” Moli, kua loga e tau mena kua talahau hagaao ke he tiakiaga he tau kanavaakau he mole atu e fakaotiaga he Felakutaki Taufetului. Ka e pete ni a ia, kua fuafua mai he taha hokotakiaga he mole e ole atu ke tukuhifo, ko e 10,000 ke he 20,000 he tau kanavaakau niukilia ka to e agaia​—kua molea e laga 900 he malolo lahi mai ia lautolu ne fakaaoga he magahala he Felakutaki II he Lalolagi.

⁶ “To ha ha i ai e tau hoge.” (Mataio 24:7; Fakakiteaga 6:​5, 6, 8) Tali mai he 1914 kua ha ha i ai ke he 20 e tau hoge lalahi. Ko e tau matakavi kua hukia ai ko Aitiope, Initia, Heleni, Kamepotia, Nigeria, Pagalatese, Puruniti, Ruanata, Rusia, Saina, Somalia, mo Sutana. Ka e kua nakai tupu tumau e hoge ha ko e tote e tau kai. “Ko e foakiaga he tau mena kai kua mua atu e tupu he lalolagi ke he tau hogofulu tau fou nei ke he puke tagata i ai,” he fakahiku mai he matakau saienetisi gahua fonua mo e tau ekonomisi. “Ka e ha kua liga ke he 800 e miliona he tau tagata kua tumau ke mativa lahi, . . . kua nakai maeke a lautolu ke fakatau e tau mena loga ne kua lata ke laveaki mai a lautolu he matematekelea he tote lahi e kai kakano mitaki.” Kua putoia atu e matahavala fakapolitika ke he falu a mena foki. Kua fakakite e Dr. Abdelgalil Elmekki he Univesiti ha Toronto, ua e fakataiaga ne kua ha ha i ai e tau afe kua hoge ka e kua fakafua ai he tau motu ha lautolu e tau mano he tau mena kai. Kua mua atu ni e manamanatu he tau fakatufono ke tutuli e tupe he tau motu kehe ke fakatupe aki ha lautolu a tau felakutaki ka e nakai ke fagai e tau tagata ha lautolu. Kua fakahiku mai fefe a Dr. Elmekki? Ko e hoge ko e “lekua he puhala tufatufa mo e fakaholoaga he fakatufono.”

7. Ko e heigoa ne kua moli hagaao ke he tau tatalu he vaha nei?

⁷ “Tau tatalu.” (Luka 21:11; Fakakiteaga 6:8) Ko e fulu Sepania he 1918-19 ne uta kehe ke he liga 21 e miliona he tau momoui. “Ko e lalolagi mai he vaha i tuai kua nakai la mafiti pihia e moumouaga he mena kelipopo ne kua tamate e tokologa he tau tagata,” he tohia e A. A. Hoehling i loto he The Great Epidemic. Ke he vaha nei, kua tupu ki mua e tau tatalu. Ke he tau tau takitaha, kua tamate he kanesa lima e miliona he tau tagata, kua uta kehe he gagao hihi e tau momoui ke mua atu ke he tolu e miliona he tau tama ikiiki mo e fanau, mo e kua fakatupu he gagao mama pala e mate ke he tolu e miliona. Ko e tau pikitiaaga he hala fafagu, mua atu ke he nimonia, kua tamate ke 3.5 e miliona e fanau ikiiki ne ha ha i lalo he lima tau he tau tau oti. Mo e ko e 2.5 e piliona​—ko e hafa e puke tagata he lalolagi​—kua matematekelea ha ko e tau gagao ne kua hoko mai he nakai lahi po ke hufia kelea e vai mo e kaumahala ke he fahi fakamea. Ko e tupu ki mua he AIDS kua fakamanatu mai ko e tagata, pete ni kua lahi e tau mena ne kautu ki ai he fahi fakaekekafo, kua nakai maeke ke uta kehe e tau tatalu.

8. Kua fakamoli fefe e tau tagata ke eke mo ‘velevele koloa’?

⁸ ‘Ko e tau tagata to velevele koloa.’ (2 Timoteo 3:2) Ke he tau motu he lalolagi, kua tuga kua to e hoge ke he tau tagata ke muhu koloa lahi. Ko e “kautu” kua fa mahani ke fuafua ke he lahi he totogi he taha, ko e “katoatoaaga” kua fuafua ke he lahi he mena ne ha ha he tagata. “Ko e manako koloa to fakatumau ke eke mo taha malolo fakaohooho ke he kaufakalatahaaga a Amerika . . . mo e ko e malolo tolomaki kua aoga lahi ke he falu a matakavi lalahi foki,” he fakapuloa he hukui pelesiteni he matagahua fakatata koloa. Kua tupu nakai e mena nei ke he mena ne nofo ai a koe?

9. Ko e heigoa ka talahau hagaao ke he talahauaga tuai he liuliu ke he tau mamatua?

⁹ “Faliuliu ke he tau matua.” (2 Timoteo 3:2) Ko e tau mamatua he vaha fou nei, tau faiaoga, mo e falu foki kua kitia fakamua e fakamoliaga ke he tokologa he fanau kua nakai fakalilifu mo e faliuliu. Ko e falu he tau fuata ikiiki nei kua mahani ai po ke fifitaki atu ke he tau mahani kelea he tau mamatua ha lautolu. Kua tolomaki e tau numela he fanau ne kua nakai tua​—mo e totoko atu​—ke he aoga, ke he matafakatufono, lotu, mo e ha lautolu a tau mamatua. “Kua tuga e taha puhala ia,” he talahau he taha ne kua leva e faiaoga, “kua tuga ko e tote lahi e fakalilifu ha lautolu ma e ha mena ni.” Ka e kua fiafia lahi ai, ha kua tokologa e fanau matakutaku Atua kua fakafifitaki e mahani mitaki.

10, 11. Ko e heigoa e fakamoliaga ne kua ha ha i ai kua favale e tau tagata mo e nakai fai fakaalofa?

¹⁰ “Mahani favale.” (2 Timoteo 3:3) Ko e kupu Heleni ne kua liliu ko e “mahani favale” kua kakano ko e ‘hehegi, vale, kaumahala ke fakakite e fakaalofa fakatagata mo e logonaaga.’ Kua lata tonu ha e mena nei mo lautolu ne taute e tau mahani vale he vaha nei! “Ko e moui kua loto mafatifati, puke mo e fakamaligi toto matakutakuina, ti kua lata ni mo e manava lapatoa ke totou e tau nusipepa ke he tau aho takitaha,” he talahau he taha etitoa. Kua mailoga he satini leoleo leveki fale e tokologa he fanau fuata ne kua tuga kua fakamatapouli a lautolu ke he tau fua he ha lautolu a tau gahua. Ne pehe a ia: “Kua ha ha i ai e logonaaga ko e, ‘Ailoa e au a pogi. To uta e au e mena ne manako au ki ai he aho nei.’”

¹¹ “Nakai fai fakaalofa.” (2 Timoteo 3:3) Ko e tau kupu nei kua fakaliliu mai he kupu Heleni ne kakano ko e “nakai fai logonaaga, nakai mahani tagata” mo e kua eke foki ke “kaumahala ke he fakaalofa hohofi moli fakamagafaoa.” (The New International Dictionary of New Testament Theology) E, ko e fakaalofa hohofi kua fa mahani ke nakai ha ha ke he mena ne kua lata ke tupu i ai​—ko e kaina. Ko e tau hokotaki hagaao ke he ekefakakeleaaga he tau hoa he fakamauaga, fanau, mo e ke he tau mamatua fuakau foki kua eke mo mena fakatupetupe lahi ne kua fa mahani ki ai. Kua talahau mai he taha matakau kumikumi: “Ko e vale he tagata​—pete ko e pati po ke popoka, ko e hoka titipi po ke tau fana​—kua fa mahani ke tupu lahi mai he tau magafaoa ke he ha mena foki he ha tautolu a kaufakalatahaaga.”

12. Ko e ha kua pehe ai kua ha ha ai ni hokoia e gati he mahani Atua ke he tau tagata?

¹² “Ha i ai ia lautolu e gati he mahani Atua, ka kua tiaki e lautolu e malolo ne toka ai.” (2 Timoteo 3:5) Kua ha ha he Tohi Tapu e malolo ke hiki e tau momoui ke he mitaki. (Efeso 4:22-24) Ka e, kua tokologa he vaha nei kua fakaaoga ha lautolu a lotu ke eke mo pa aki e tau gahua hepehepe ha lautolu ne kua fakaita ke he Atua. Ko e pikopiko, kaiha, mo e mahani feuaki fakatane mo e fifine kua fa fakamagalo he tau takitaki lotu. Kua loga e tau lotu ne fakamatala e fakaalofa ka e kua lago ke he latau. “Ke he higoa he Tufuga Mua Ue Atu,” he talahau he etitoa he mekasini India Today, “kua taute he tau tagata e tau kelea fakalialia ke he ha lautolu ni a tau tagata.” Kua moli ai, ko e tau taulatau ua ne mua atu e fakamaligi toto ne nakai la leva ia​—ko e Felakutaki I mo e II he Lalolagi​—kua tupu mai he lotouho ha Kerisitenitome.

13. Kua fakamoli he heigoa kua moumou tuai e lalolagi?

¹³ “Kua moumou e lalolagi.” (Fakakiteaga 11:18) Kua molea atu ke he 1,600 he tau saienetisi, fakalataha mo e 104 ne moua e kotofaaga Nobel, ne o mai he lalolagi katoa kua foaki e hatakiaga, ne tuku mai he Union of Concerned Scientists (UCS), kua talahau: “Ko e tau tagata mo e tuaga he lalolagi kua o he puhala ke feoka ai . . . Ke he tau hogofulu tau ne toe i mua ko e magaaho ke kalo kehe mai ai he tau fakamatakutakuaga to nakai maeke.” Kua tala mai he hokotaki ko e tau gahua fakamatakutaku ke he moui he tagata “ka liga hiki e lalolagi ti to nakai ke maeke ke lago e moui ke he puhala ne kua iloa e tautolu.” Ko e malolo hifo he osone, kiva he vai, uta kehe he vaouhi, talue e kelekele to akau, mo e galo fakaeneene he loga he tau manu mo e tau akau kehekehe kua tohia ko e tau lekua kua lata ke fakafehagai mafiti ki ai. “Ko e ha tautolu a matahavala atu ke he lotouho he talagaaga he moui,” he talahau he UCS, “kua maeke ke hufia ai e lalolagi katoa, fakalataha mo e malolo hifo he tau fakatokaaga he tau mena moui ne kua nakai maama katoatoa e tautolu e tau fakatokatokaaga.”

14. Maeke fefe ia koe ke fakamoli kua fakakatoatoa e Mataio 24:14 he vaha nei ha tautolu?

¹⁴ “To fakamatala atu foki e tala mitaki nai he kautu ke he lalolagi oti.” (Mataio 24:14) Kua talahau mai e Iesu to fakamatala e tala mitaki he Kautu ke he lalolagi katoa, ma e fakamoliaga ke he tau motu oti. Fakalataha mo e lagomatai mo e fakamonuina faka-Atua, kua miliona e Tau Fakamoli a Iehova kua tuku atu e tau piliona he tau matahola ke he gahua fakamatala mo e taute tutaki nei. (Mataio 28:19, 20) E, kua mailoga he Tau Fakamoli to agahala a lautolu kaeke ke nakai fakapuloa e lautolu e tala mitaki. (Esekielu 3:18, 19) Ka e kua fiafia lahi a lautolu ha ko e tau tau takitaha kua talia he tau afe e fekau he Kautu mo e kua taute ai e tuaga ha lautolu mo tau Kerisiano moli, ko e Tau Fakamoli a Iehova. Ko e monuina kua mua ue atu ke fekafekau ki a Iehova mo e ke fakalaulahi atu e iloilo ke he Atua. Mo e ka mole e fakamatala he tala mitaki nei ke he lalolagi oti, to hoko mai e fakaotiaga ke he fakatokaaga kelea nei.

TALIAGA KE HE FAKAMOLIAGA

15. To fakaoti fefe e fakatokaaga kelea nei?

¹⁵ To fakaoti fefe e fakatokaaga nei? Kua talahau mai he Tohi Tapu e ‘matematekelea lahi’ ka kamata ai ka totoko atu e tau mena fakapolitika he lalolagi nei ki a ‘Papelonia Lahi,’ ko e kautu he lotu fakavai he lalolagi. (Mataio 24:21; Fakakiteaga 17:​5, 16) Kua tala mai e Iesu hagaao ke he magahala he vaha nei “ati fakapouli ai agataha e la, nakai huhulu mai foki e mahina, to mokulu foki e tau fetu mai he lagi, to lulululu foki e tau kau he lagi.” (Mataio 24:29) Liga fakakite mai he mena nei e tau mena lalahi moli he lagi. Ke he ha mena ni, ko e tau maama kikila he tau lotu he lalolagi to fakakite mo e to uta kehe. Ti ko Satani, he mogoia ne fakahigoa ko “Koku he motu a Makoku,” ka fakaaoga e tau tagata mahani kelea ke fakahoko atu e favaleaga ke he tau tagata ha Iehova. Ka e to nakai kautu a Satani, ha ko e to laveaki he Atua a lautolu. (Esekielu 38:​1, 2, 14-23) To hoko hake e “matematekelea lahi” ke he hana tapunu i Amaketo, ko e “tau ke he aho lahi he Atua mana.” To fakamea ai e tau ilaila loga he fakatokatokaaga ha Satani he lalolagi, mo e hafagi ai e puhala ma e tau fakamonuina tukumuitea ke tafe atu ke he tau tagata ne hao mai.​—Fakakiteaga 7:​9, 14; 11:15; 16:​14, 16; 21:​3, 4.

16. Iloa fefe e tautolu ko e tau vala ne kua perofeta mai ma e tau aho fakahiku kua lata ai mo e ha tautolu a vaha?

¹⁶ Ha ko e tau mena ia ni, ko e falu he tau vala he tau perofetaaga ne kua fakamaama e tau aho fakahiku kua liga ke lata mo e falu vaha i tuai. Ka e ka lafi ai, ko e tau fakamoliaga he tau perofetaaga kua tuhi tonu mai e vaha ha tautolu. Ke fakatai: Ko e tau laini he tau pite matalima he tagata kua tauteute ai e petene ne kua nakai ha ha ai he ha tagata. Kua tuga ni, e tau aho fakahiku kua ha ha i ai ni e tau fakamailoga kehekehe, po ke tau mena tutupu. Kua taute he tau mena nei e “pite matalima” ne nakai maeke ke ha ha i ai he ha vaha kehe foki. Ka manamanatu fakalataha ki ai mo e tau fakakiteaga he Tohi Tapu kua pule e Kautu he Atua he lagi he mogonei, kua foaki he fakamoliaga e fakaveaga malolo ke fakaoti aki ko e tau aho fakahiku moli a nei. Ka e mua atu, kua ha ha i ai e fakamoliaga maali faka-Tohiaga Tapu ko e nakai leva to fakaotioti ai e fakatokaaga kelea nei.

17. Kua lata he iloilo ko e tau aho fakahiku a nei ke omoi a tautolu ke taute e heigoa?

¹⁷ To tali fefe a koe ke he tau fakamoliaga ko e tau aho fakahiku a nei? Kia manamanatu ke he mena nei: Kaeke kua teitei hoko mai e afa vale moumou mena, to taute e tautolu e tau fuafuaaga ke puipui tuai mai i ai mo e nakai fakatuai. Moli, ko e mena ne talahau tuai mai he Tohi Tapu ma e fakatokaaga nei kua lata ke omoi aki a tautolu ke taute taha mena. (Mataio 16:​1-3) Kua kitia maaliali e tautolu kua nonofo a tautolu he tau aho fakahiku he fakatokaaga he lalolagi nei. Kua lata he mena nei ke omoi a tautolu ke taute ha hikihikiaga ne kua lata ke moua e talia he Atua. (2 Peteru 3:​3, 10-12) He hagaao atu ki a ia ni ko e hukui he fakamouiaga, ne talahau e Iesu e ogo mafiti lahi: “A mutolu neke pehia ha mutolu a tau loto, he fakaniniko, mo e konahia, mo e fakaatukehe he tau mena he mouiaga nai; neke fakaofo mai e aho ia kia mutolu. Ha ko e mena tuga ne matahele, ke hoko mai ai kia lautolu oti kana kua nonofo ke he lalolagi oti. Hanai, kia mataala a mutolu, mo e liogi nakai noa, kia talahaua a mutolu kua aoga ke hao mai ke he tau mena oti ia ka hohoko mai, ke tutu foki ki mua he Tama he tagata.”​—Luka 21:​34-36.

[Matahui Tala]

KAMATAMATA E ILOILO HAU

Ko e heigoa ne talahau tuai he Tohi Tapu hagaao ke he tuaga he lalolagi he kamata e pule ha Iesu?

Ko e heigoa e falu he tau vala he tau aho fakahiku?

Ko e heigoa kua tali tonu ai a koe ko e tau aho fakahiku a nei?

[Puha he lau 102]

FALU HE TAU VALA HE TAU AHO FAKAHIKU

• Tau felatauaki ne kua mua atu.​—Mataio 24:7; Fakakiteaga 6:4.

• Hoge.​—Mataio 24:7; Fakakiteaga 6:​5, 6, 8.

• Tau tatalu.​—Luka 21:11; Fakakiteaga 6:8.

• Tupu lahi e mahani hepehepe.​—Mataio 24:12.

• Moumou e lalolagi.​—Fakakiteaga 11:18.

• Tau mafuike.​—Mataio 24:7.

• Ko e tau aho fakahiku to hohoko mai ai e tau aho uka. —2 Timoteo 3:1.

• Ko e velevele koloa lahi.​—2 Timoteo 3:2.

• Faliuliu ke he tau matua.​—2 Timoteo 3:2.

• Nakai fai fakaalofa.​—2 Timoteo 3:3.

• To manako lahi ke he tau mena fakafiafia, ka e manako tote ke he Atua.​—2 Timoteo 3:4.

• Nakai taofi e tau manako he tino.​—2 Timoteo 3:3.

• Nakai loto ke he mitaki.​—2 Timoteo 3:3.

• Nakai fia iloa e hagahagakelea ka hoko mai.​—Mataio 24:39.

• Kua tiaki he tau tagata va e fakamailoga he tau aho fakahiku.​—2 Peteru 3:​3, 4.

• Ko e fakamatalaaga he Kautu he Atua ke he lalolagi katoa.​—Mataio 24:14.

[Lau Katoa he fakatino he lau 101]