Ko e Ha Falu Tagata he Tohi Tapu ne Nakai Fai Higoa?

He tohi a Ruta i loto he Tohi Tapu, ko e tagata taane ne nakai manako ke taute haana matagahua ne talahau he Fakatufono faka-Mose, ne totoku ni ko e tagata. (Ruta 4:1-12) Lata nakai ia tautolu ke talahau ko e tau tagata oti i loto he Tohi Tapu ne nakai fai higoa kua liga mahani kelea po ke fakateaga lahi a lautolu ke tohi e higoa?

Nakai. Manamanatu la ke he taha fakataiaga foki. Ke tauteute ma e kaiaga fakahiku ha Iesu he Paseka, ne pehē a ia ke he tau tutaki haana, “kia o atu a ke he māga ke he taha tagata,” mo e taute e kaina haana ke mautauteute. (Mataio 26:18) Lata nakai a tautolu ke pehē ko e “taha tagata” he kupu nei ko e tagata kelea po ke fakateaga lahi a ia ke tohi e higoa? Nakai ai pihia; ko e “taha tagata” ne totoku he vala nei ko ia mooli ko e tutaki ha Iesu. Ha kua nakai aoga lahi ke he tala ke totoku e higoa haana ati nakai talahau ai.

Lafi ai, ha ha i loto he Tohi Tapu e tau higoa ha lautolu ne mahani kelea; haia foki e tau fakafifitakiaga he tau tagata fakamooli ne nakai fai higoa. Ma e fakatai, ne talahaua e higoa he fifine fakamua ko Eva. Ka ko e lotokai mo e nakai omaoma haana ne lafi ke he agahala ha Atamu, ti matematekelea lahi ai a tautolu oti. (Roma 5:12) Kehe ai, ne nakai tohi e higoa he hoana ha Noa i loto he Tohi Tapu, ka kua aoga lahi a tautolu he aga foaki noa mo e omaoma haana he lalago e taane haana ke he gahua uho lahi. Maaliali ai, ko e nakai tohi e higoa haana ne nakai kakano kua fakateaga a ia po ke nakai fakamonuina he Atua.

Fai tagata foki i loto he Tohi Tapu ne nakai tohi e tau higoa ka kua aoga e tau gahua ha lautolu​—loto malolō foki—​ke he fakamooliaga he finagalo ha Iehova. Manamanatu ke he tama fifine tote ha Isaraela ne fekafekau he fale ha Naamanu, ko e takitaki he kautau Suria. Ne loto malolō a ia ke tutala ke he iki fifine haana ko e hoana ha Naamanu, hagaao ke he perofeta ha Iehova i Isaraela. Ne tupu mai he mena nei e mana lahi. (2 Tau Patuiki 5:1-14) Ko e tama fifine he fakafili Isaraela ko Iefeta ne fakatoka e ia e fakafifitakiaga mitaki lahi he tua. Ne makai a ia ke nakai fai taane mo e fanafanau ke maeke ke fakamooli e omonuo ne taute he matua taane haana. (Tau Fakafili 11:30-40) Pihia foki, haia e tau tagata ne tohia molea e 40 he tau salamo ne nakai tohi e tau higoa ha lautolu, fai perofeta foki ne nakai tohia e tau higoa ka kua fakamooli he taute e tau gahua aoga lahi.​—1 Tau Patuiki 20:37-43.

Liga ko e fakafifitakiaga ne mua e mitaki ko e tau agelu fakamooli. Kua totou teau e tau miliona agelu, ka e tokoua ni ne totoku e tau higoa i loto he Tohi Tapu​—ko Kaperielu mo Mekaeli. (Tanielu 7:10; Luka 1:19; Iuta 9) Ko e falu agelu foki ne nakai fai higoa i loto he tau tala Tohi Tapu. Ma e fakatai, ne pehē a Manoa ko e matua taane ha Samisoni ke he agelu: “Ko hai kia e higoa hau, kia fakalilifu atu ai a maua kia koe ka hoko ai hau a vagahau?” Ko e tali? “Ko e ha ne huhu mai a koe ke he higoa haku?” He fakatokolalo, ne nakai talia he agelu e fakalilifuaga ne kua latatonu ni ma e Atua.​—Tau Fakafili 13:17, 18.

Nakai fakamaama he Tohi Tapu e tau tuaga takitaha ke he kakano ne tohi e higoa he falu tagata ka e nakai tohi he falu. Ka e maeke ia tautolu ke lahi e mena kua fakaako mai ia lautolu oti ne fekafekau fakamooli ke he Atua mo e nakai amanaki ke talahaua po ke matalahi.