Fakamoli ha Tautolu a Tukuleleaga ke he “Tau Aho Oti”
“Ka fia mui mai taha kia au, ua omaoma a ia kia ia, ka e nikiti e ia hana [“akau fakakikiveka,” NW] ke he tau aho oti, ti mui mai kia au.”—LUKA 9:23.
1. Ko e heigoa e taha puhala kua maeke ia tautolu ke fuafua e kautuaga faka-Kerisiano ha tautolu?
“KO E tau tagata tukulele moli nakai a tautolu?” Ko e tali ke he huhu nei, hagaao ki a John F. Kennedy, ko e Pelesiteni ke 35 aki he Tau Fahi Kaufakalataha, ko e mena haia ka fuafua aki e kautuaga ha lautolu ne gahua ekepule. Kua maeke e huhu ia ke aoga lahi mahaki e kakano ka kamatamata aki ha tautolu a kautuaga ko e tau fekafekau Kerisiano.
2. Fakamaama fefe he tohi fakamaama kupu e kupu “tukuleleaga”?
2 Ko e heigoa mogoia, e tukuleleaga? Kua fakamaama ai pehe he Webster’s Ninth New Collegiate Dictionary “ko e gahua po ke mena taute mau he tukuleleaga ke he peresona faka-Atua po ke fakaaogaaga tapu,” “kua tuku atu moli lahi po ke tuku kehe ma e taha gahua pauaki,” “ko e ofaofa moli lahi kua poa ne ia ni a ia.” Kua tuga ko e fakaaoga e John F. Kennedy e kupu ke hagaao ke he “ofaofa moli lahi kua poa ne ia ni a ia.” Ma e Kerisiano, kua lahi mahaki e kakano he tukuleleaga.
3. Ko e heigoa e tukuleleaga faka-Kerisiano?
3 Ne tala age e Iesu Keriso ke he tau tutaki hana: “Ko e tagata ka fia mui mai kia au, aua neke omaoma a ia kia ia, ka e nikiti a hana [“akau fakakikiveka,” NW], mo e mui mai ai kia au.” (Mataio 16:24) Ha ko e tuku kehe ma e fakaaogaaga faka-Atua, ko e mena nakai ni putoia ke he gahua tapuaki he aho Tapu po ke ka ahi atu ke he taha fale tapuaki. Kua putoia katoa e puhala moui he tagata. Ke eke mo Kerisiano kua kakano ni ke fakatikai he tagata a ia ni po ke tiaki e tau manako fakatagata hana he fekafekau ke he Atua ne fekafekau a Iesu Keriso ki ai, ko Iehova. Ke lafi ki ai, kua nikiti he Kerisiano hana “akau fakakikiveka,” he fakamalolo ka ha i lalo he ha mena matematekelea kakano ha ko e tutaki a Keriso.
Ko e Fakafifitakiaga Mitaki Katoatoa
4. Ko e heigoa e kakano he papatiso a Iesu?
4 He magaaho ne nofo he lalolagi, ne fakakite e Iesu ko e putoia e heigoa ka tukulele e tagata ki a Iehova. Ko e manamanatuaga hana hanai: “Ko e tau poa tamate mo e tau poa, kua nakai finagalo a koe ki ai, ka kua taute e koe e tino māku.” Ti lafi mogoia a ia ki ai: “Ko e Atua na e, kitiala, kua fina atu au ke eke hau a finagalo, (kua tohia kia au ke he tohivakai.)” (Heperu 10:5-7) Ha ko e tagata he motu tukulele, kua tukulele ai a ia ki a Iehova he magaaho ne fanau mai. Ka e eke agaia, he kamataaga he hana fekafekauaga he lalolagi, ke foaki ne ia a ia ni ke papatiso, ko e fakataiaga ke he hana tuku atu a ia ke taute e finagalo a Iehova, ko e mena kua fakalataha ki ai e foakiaga he hana moui ma e poa lukutoto. Ti kua fakatoka tuai e ia e fakafifitakiaga ma e tau Kerisiano ke taute e ha mena ne finagalo e Iehova.
5. Ne fakakite fefe e Iesu e onoonoaga mitaki lahi ke he tau koloa tino?
5 He mole hana papatiso ne muitua a Iesu ke he puhala moui ne fakahiku ni ke hoko ke he poa he mate. Nakai fiafia a ia ke tuli tupe lahi po ke taute ke tokotoko mitaki lahi e puhala he moui. Kua kehe, he matapatu ni hana moui ke he hana fekafekauaga. Ne fakatonu e ia hana tau tutaki ke “kumikumi fakamua . . . ke he kautu he Atua mo e hana tututonu,” mo e eke a ia ni ke fakamoli e tau kupu ia. (Mataio 6:33) Ha ko e mena pehe foki a ia he taha magaaho: “Na fai ofaga e tau alope, ne fai mena foki ke momohe ai e tau manu lele, ka ko e Tama he tagata, nakai fai mena a ia ke mohe ai.” (Mataio 8:20) Ko e mena maeke ia ia ke fakaaoga hana tau fakaakoaga ke fofo e tau tupe he hana tau tutaki. Ha ko e kamuta kua maeke a ia ke toka hifo e fekafekauaga he taha magaaho, ke fano ke talaga taha mena fulufuluola ke fakafua, ke laukauka e tau tupe ario ka moua. Ka e nakai fakaaoga e ia hana makaka ke kumi koloa tino. Ha ko e tau fekafekau tukulele he Atua, kua fifitaki nakai a tautolu ki a Iesu he hako e onoonoaga ke he tau koloa tino?—Mataio 6:24-34.
6. Maeke fefe ia tautolu ke fifitaki ki a Iesu he eke mo tau fekafekau he Atua ne poa ne tautolu ni a tautolu?
6 He tuku fakamua hana fekafekau ke he Atua, ne nakai kumi e Iesu e tau mena hana ni. Ko e hana moui he vaha ne tolu mo e hafa e tau tau he hana fekafekauaga ke he tau tagata ne kua poa ne ia ni a ia. He taha magaaho he mole e aho lavelave, mo e nakai mole taha magaaho foki ke kai mena kai, ka e manako na Iesu ke fakaako e tau tagata ha kua “fakafita a lautolu, mo e tiaki atu ai, tuga e tau mamoe nakai fai leveki a lautolu.” (Mataio 9:36; Mareko 6:31-34) Pete ni he ‘nakai fahia mai he hana fenoga,’ ne kamata e ia e tutalaaga mo e fifine Samaria ne fano ke he vaipuna a Iakopo i Sikara. (Ioane 4:6, 7, 13-15) Ne fa tuku mua tumau e ia e tau mena he falu mai he hana. (Ioane 11:5-15) Maeke ia tautolu ke fifitaki ki a Iesu he fakamakai lahi ke poa ne tautolu ni ha lautolu a tau mena ne loto ki ai ke fekafekau ke he Atua mo e falu. (Ioane 6:38) He manamanatu ko e maeke fefe ia tautolu ke fakafiafia moli e Atua ka e nakai manamanatu ke taute ni e mena tote kua lata, to eke tuai a tautolu ke fakamoli ha tautolu a tukuleleaga.
7. Maeke fefe ia tautolu ke fifitaki ki a Iesu he tuku atu tumau e fakalilifuaga ki a Iehova?
7 Kua nakai lali a Iesu ke toho e tau tagata ke onoono atu ki a ia he lagomatai e tau tagata. Kua tukulele a ia ke he Atua ke taute e finagalo Hana. Ti taute tumau moli e ia, ko Iehova, ko e hana Matua, ka moua oti kana e fakahekeaga ma e tau mena oti ne kua fakakatoatoa. He magaaho ne ui he taha iki a ia ko e “akoako mitaki,” he fakaaoga ai e kupu “mitaki” ko e matahigoa, ne fakahako e Iesu a ia he pehe: “Nakai mitaki taha, ka ko e tokotaha hokoia, ko e Atua haia.” (Luka 18:18, 19; Ioane 5:19, 30) Kua tuga nakai a Iesu a tautolu, he mafiti ke takitaki kehe ia tautolu e fakalilifuaga he tuku atu ki a Iehova?
8. (a) Ha ko e tagata tane tukulele, ne tuku kehe fefe e Iesu a ia ni mai he lalolagi? (e) Lata fefe a tautolu ke fifitaki ki a ia?
8 He hana puhala moui tukulele katoa he lalolagi, ne fakakite e Iesu kua tuku kehe e ia a ia ni ma e fekafekauaga he Atua. Ne taute a ia ke tumau e mea hana ke maeke ia ia ke foaki a ia ni ko e “punua mamoe kua nakai fai ila, ti nakai fai kelea” mo poa lukutoto. (1 Peteru 1:19; Heperu 7:26) Ne omaoma a ia ke he tau poakiaga he Matafakatufono a Mose, ti kua fakamoli ai e Matafakatufono. (Mataio 5:17; 2 Korinito 1:20) Fakamoli he hana moui e tau fakaakoaga hana ke he tau mahani mitaki. (Mataio 5:27, 28) Kua nakai fai tagata kua maeke ke moli e tukumale ko e kelea e omoiaga he loto hana. Kua moli, ko ia ne “vihiatia e mahani hepehepe.” (Heperu 1:9) Ha ko e tau tupa he Atua, kia fifitaki a a tautolu ki a Iesu he taofi mau ha tautolu a tau momoui mo e ha tautolu foki a tau omoiaga he loto kua mea ke he tau mata a Iehova.
Tau Fakafifitakiaga Hataki
9. Ko e heigoa e fakafifitakiaga hataki ne tala mai e Paulo, mo e kua lata he ha a tautolu ke manamanatu ke he fakafifitakiaga nei?
9 Kua fekeheaki mo e fakafifitakiaga a Iesu, ha ha ia tautolu e tau fakafifitakiaga he tau Isaraela. Kua eke foki a lautolu he mole e tukuogo ko e to taute e lautolu e tau mena oti ne tala age e Iehova ki a lautolu ke taute, ka e kaumahala na lautolu ke taute hana finagalo. (Tanielu 9:11) Ne fakamalolo atu e aposetolo ko Paulo ke he tau Kerisiano ke ako mai he tau mena ne hohoko ke he tau Isaraela. Kia kumikumi la a tautolu ke he falu mena tutupu ne talahau e Paulo i loto he tohi fakamua hana ke he tau Korinito mo e kitia ko e heigoa e tau mena fakatupetupe kua lata ke kalo kehe mai e tau fekafekau tukulele he Atua he vaha ha tautolu.—1 Korinito 10:1-6, 11.
10. (a) ‘Foli ke he tau mena kelea’ fefe e tau Isaraela? (e) Kua lago lahi he ha ke he tau Isaraela e mahani loma ha lautolu ke he tau mena kai he magaaho ke lagaua aki, mo e heigoa kua maeke ia tautolu ke ako mai he fakafifitakiaga hataki nai?
10 Fakamua, ne hataki mai a Paulo ke nakai ‘foli ke he tau mena kelea.’ (1 Korinito 10:6) Kua liga fakamanatu atu he mena ia ki a koe e magaaho ne gugu e tau Isaraela ha ko e manai ni hokoia e mena kai. Ne fakafano hake e Iehova e tau salu ki a lautolu. Kua fai mena pihia foki ne tupu he tutakale i Sina he magahala ke taha e tau ne mole, ko e mena nakai leva to tukuogo he tau Isaraela ha lautolu a tukuleleaga ki a Iehova. (Esoto 16:1-3, 12, 13) Ka e nakai tatai tonu e tau tutuaga. He magaaho fakamua ne foaki e Iehova e tau salu, ne nakai ui a ia ke lago ke he tau Isaraela ha lautolu a mahani gugu. Ka e he magaaho nei, kua kehe ni e tuaga. “Ha ne kakati e lautolu e tau manu ka e nakaila kai, ti tupu ai e ita a Iehova ke he motu, ti ta ai e Iehova e motu ke he mauku lahi mahaki ni.” (Numera 11:4-6, 31-34) Ko e heigoa ne hiki? Ha ko e motu tukulele, kua lago ai he magaaho ki a lautolu ha lautolu a tau mahani. Ko e tau loto nakai fakaaue ha lautolu ke he tau mena ne foaki e Iehova, kua takitaki ai a lautolu ke gugu ki a Iehova, pete ni kua fita he mavehe a lautolu ke taute oti e tau mena ne talahau e Iehova! Kua tatai pihia foki ka gugu ke he laulau a Iehova he vaha nei. Kua kaumahala e falu ke fakaaue ke he tau foakiaga mena fakaagaga a Iehova ne puhala mai he “fekafekau fakamoli mo e loto matala.” (Mataio 24:45-47) Kia manatu, mogoia, ko e tukuleleaga ha tautolu ne kua lata ai a tautolu ke fakaaue lahi he toka loto e tau mena ne taute e Iehova ma tautolu mo e talia e tau mena kai fakaagaga ne foaki mai e Iehova.
11. (a) Fakakiva fefe he tau Isaraela ha lautolu a tapuakiaga ki a Iehova he hufeilo ke he tupua ta? (e) Maeke fefe ia tautolu ke lauia he taha faga hufeilo ke he tupua ta?
11 He mui mai, ne hataki a Paulo: “Aua foki neke hufeilo ke he tau tupua, tuga e falu ia lautolu.” (1 Korinito 10:7) Kua kitia moli ai mai he mena nei ko e hagaao e vagahau he aposetolo ke he tapuaki ke he punua povi ne taute he nakai leva e mole he talia he tau Isaraela e maveheaga mo Iehova he Mouga Sinai. Liga to pehe a koe, ‘Ha ko e fekafekau tukulele ki a Iehova, to nakai putoia a au he hufeilo ke he tupua ta.’ Ka e mailoga la, ke he manamanatuaga he tau Isaraela, nakai tiaki e lautolu e tapuaki ki a Iehova; ka e, fakatu hake e lautolu e gahua tapuaki ke he punua povi—ko e mena vihiatia ke he Atua. Ko e heigoa ne putoia he vahega tapuaki nei? Ne taute he tau tagata e tau poa ki mua he punua povi, mo e “nonofo hifo ai e motu ke kai mena mo e inu, ti tutu ai a lautolu ke koli.” (Esoto 32:4-6) He vaha nei, liga pehe falu ko e tapuaki a lautolu ki a Iehova. Ka ko e ha lautolu a tau momoui liga matapatu, nakai ke he tapuaki a Iehova, ka e ke he olioliaga he tau mena he lalolagi nei mo e lali a lautolu ke fakahaohao ha lautolu a fekafekau ki a Iehova i ai. Kua moli, nakai to muatua lahi e mena nei tuga e hufeiloaga ke he punua povi auro, ka e nakai kehe lahi e tau matapatu mahani. Ke taute mo atua e mena ne loto e tagata ki ai kua mamao ligo mai ni he fakamoli e tukuleleaga he tagata ki a Iehova.—Filipi 3:19.
12. Mai he matutakiaga he tau Isaraela mo Paala-peoro, ako e tautolu e heigoa ke fakatikai ne tautolu a tautolu?
12 Kua putoia ai foki e faga fakafiafiaaga tino he fakafifitakiaga hataki ne mui mai ne talahau e Paulo. “Aua foki neke feuaki a tautolu, tuga ne falu ia lautolu ne feuaki, mo e mahaikava ke he aho taha ne uafulu e afe, ti tolu e afe.” (1 Korinito 10:8) Ko e tau Isaraela, ne fakataki he mahani kelea fakafiafia ne foaki he tau tama fifine ha Moapi, ti kua tataki ai ke tapuaki ki a Paala-peoro i Sitima. (Numera 25:1-3, 9) Ka fakatikai ne tautolu ni a tautolu ke taute e finagalo a Iehova kua fakalataha ke he mena ia ke talia hana tau puhala ma e mahani mitaki kua mea. (Mataio 5:27-30) He vaha nei ne tukumuli e tau mahani, kua fakamanatu mai ki a tautolu kua lata ke taofimau e tautolu e mea ha tautolu mai he tau faga mahani kelea oti kana, he toka ke he pule a Iehova ke fifili e mena kua mitaki mo e mena kua kelea.—1 Korinito 6:9-11.
13. Lagomatai fefe he fakafifitakiaga a Fineaso a tautolu ke maama ko e heigoa ne fakalataha ke he tukuleleaga ki a Iehova?
13 Pete ni tokologa ne veveli ke he matahele he mahani feuaki i Sitima, ne fakamoli e falu ke he tukuleleaga fakamotu ki a Iehova. Ia lautolu ia, ko Fineaso ne mua atu e makutu. He magaaho ne kitia e ia e iki Isaraela ne tamai e fifine Mitiana ke he hana fale la, ne toto agataha e Fineaso e tao he lima hana ti fano mo e hoka ai a laua tokoua ti ati ai ke he taha fahi. Ne tala age e Iehova ki a Mose: “Ko Fineaso . . . kua liu kehe ai e ia haku a ita ke he fanau a Isaraela, ke he haku a ita tafuā kia lautolu ti nakai fakaotioti ai e au e fanau a Isaraela ke he haku a ita tafuā.” (Numera 25:11) Kua nakai fakauka ke he ha totokoaga ki a Iehova—ko e kakano haia he tukuleleaga. Nakai maeke ia tautolu ke fakaata ha mena ke fofo e tuaga tonu he tukuleleaga ki a Iehova ne kua lata ke ha ha he tau loto ha tautolu. Ko e makutu ha tautolu ki a Iehova ka omoi foki a tautolu ke taofimau e mea he fakapotopotoaga he hokotaki e tau mahani kelea muikau ke he tau motua, ka e nakai fakauka ki ai.
14. (a) Kamatamata fefe he tau Isaraela a Iehova? (e) Maeke fefe he tukuleleaga katoatoa ki a Iehova ke lagomatai a tautolu ke nakai “fakalolelole”?
14 Talahau foki e Paulo e taha fakafifitakiaga hataki: “Aua foki neke fakahogohogo e tautolu a [“Iehova,” NW], tuga ne fakahogohogo he falu ia lautolu, ti mamate ai he tau gata.” (1 Korinito 10:9) Kua vagahau a Paulo i nai hagaao ke he magaaho ne loma he tau Isaraela e Atua ki a Mose he magaaho ne “mamahi ai e tau loto he motu ha ko e fenoga.” (Numera 21:4) Kua taute nakai e koe e mena hehe ia? He magaaho ne tukulele e koe ni a koe ki a Iehova, manamanatu nakai a koe kua tata lahi a Amaketo? Kua loa atu kia e fakauka a Iehova mai he mena ne amaamanaki a koe ki ai? Manatu, ne nakai tukulele e tautolu ni a tautolu ki a Iehova ke he taha magaaho pauaki po ke ato hoko ni ki Amaketo. Ko e tukuleleaga ha tautolu kua tumau tukumalagi. Ha kua pihia mogoia, “aua neke fakalolelole a tautolu ke he mahani mitaki; ha ko e mena to helehele mai e tautolu ke he vaha ke lata ai, kaeke kua nakai fakalolelole a tautolu.”—Kalatia 6:9.
15. (a) Ko hai ne loma he tau Isaraela? (e) Maeke fefe ha tautolu a tukuleleaga ki a Iehova ke omoi a tautolu ke fakalilifu ke he pule malolo teokaratiki?
15 Ke fakahiku aki, ne hataki a Paulo ke aua “loma” e tau fekafekau kotofa ha Iehova. (1 Korinito 10:10) Ne loma lahi mahaki he tau Isaraela a Mose mo Arona he magaaho ne tamai he 10 mai he 12 e toko ne fakafano ke takahao ke he motu a Kanana e tau hokotaki kelea. Ne tala foki a lautolu ke hukui ha lautolu a takitaki ko Mose mo e liliu ki Aikupito. (Numera 14:1-4) He vaha nei, talia nakai e tautolu e takitakiaga ne kua foaki mai ki a tautolu he tau gahua ne puhala mai he agaga tapu a Iehova? He kitia e laulau ne muhu mena kai lahi fakaagaga ne foaki mai he vahega fekafekau fakamoli mo e lotomatala, kua maaliali tuai ko hai ne fakaaoga e Iesu ke tufatufa “e tau mena kai ke he tau magaaho.” (Mataio 24:45) Ko e tukuleleaga he solu katoa ki a Iehova ne kua lata ai a tautolu ke fakakite e mahani fakalilifu ke he hana tau fekafekau ne kotofa. Kia nakai eke a tautolu ke tuga e falu ne loma he vaha fou nei, ti kua fuluhi ke he ulu fou, ka vagahau fakatai, ke takitaki a lautolu ke liliu ke he lalolagi.
Eketaha mo e Haku Malolo Katoa Kia?
16. Ko e heigoa e tau huhu kua liga manako e tau fekafekau tukulele he Atua ke huhu hifo ki a lautolu ni?
16 Ko e mena to nakai veveli e tau Isaraela ke he tau hepehepe kelea lahi ia, kaeke kua manatu e lautolu ha lautolu a tukuleleaga ki a Iehova, ko e mena nakai fai hikiaga. Kua nakai tuga e tau Isaraela nakai mahani fakamoli ia, ne fakamoli a Iesu Keriso ke he hana tukuleleaga ti hoko ke he fakaotiaga. Ha ko e tau tutaki a Keriso, kua fifitaki a tautolu ke he hana fakafifitakiaga kua ofaofa moli lahi mai he solu katoa, he fakatauo fakamoli ha tautolu a tau momoui ‘nakai tuai omaoma ke he tau manako lahi ha he tau tagata, ka kia omaoma ke he finagalo he Atua.’ (1 Peteru 4:2; fakatatai 2 Korinito 5:15.) Ko e finagalo a Iehova he vaha nei ke maeke “ke fakamomoui e tau tagata oti kana, mo e hokotia a lautolu he maama ke he kupu moli.” (1 Timoteo 2:4) Ha ko e folia ia, kua lata ia tautolu ke fakamatala fakamua “e tala mitaki nai he kautu” ato hoko mai e fakaotiaga. (Mataio 24:14) Kua lahi fefe e tau laliaga ne tuku atu e tautolu ke he fekafekauaga nei? Liga to manako a tautolu ke huhu hifo a tautolu ki a tautolu ni, ‘Eketaha mo e haku malolo katoa kia?’ (2 Timoteo 2:15, NW) Mena kehekehe e tau tutuaga. Fiafia a Iehova ka fekafekau ki a ia ‘fakalata ke he tau mena ha ha he tagata, ka e nakai fakalata ke he tau mena nakai ha ha he tagata.’ (2 Korinito 8:12, fakatatai NW; Luka 21:1-4) Kua nakai lata ia taha ke fakafili e hokulo mo e loto fakamoli he tukuleleaga he taha. Kua takitaha ke lata ke fuafua fakatagata ne ia ni e laulahi he hana ofaofa moli lahi ki a Iehova. (Kalatia 6:4) Ko e fakaalofa ha tautolu ki a Iehova kua lata ke omoi a tautolu ke huhu, ‘Maeke fefe ia au ke fakafiafia a Iehova?’
17. Ko e heigoa e fakafetuiaga he vahaloto he ofaofa moli lahi mo e fakaaueaga? Fakatai.
17 Kua hokulo lahi ha tautolu a ofaofa moli lahi ki a Iehova he tupu ha tautolu a fakaaueaga ki a ia. Ko e tama tane 14 e tau he moui i Sapani ne tukulele a ia ni ki a Iehova mo e taute ai e fakakiteaga he tukuleleaga nei he papatiso ke he vai. He magaaho fakamui, ne manako a ia ke tutuli e tau fakaakoaga tokoluga atu mo e eke mo saienetisi. Ne nakai manamanatu a ia ke he fekafekauaga gahua mau, ka e ha ko e fekafekau tukulele, ne nakai loto a ia ke tiaki a Iehova mo e hana fakatokatokaaga ne maeke ke kitia. Ke moua moli hana feua ne foli ki ai, ne fano a ia ke he univesiti. Kua kitia e ia i ai kua eke ni e tau faoa o univesiti ke tukulele ha lautolu a moui katoa ke he ha lautolu a tau fakatuaga gahua po ke ke he ha lautolu a tau kumikumiaga. Ne manamanatu a ia, ‘Ko e heigoa haku ne taute i hinai? Maeke moli kia a au ke tutuli ha lautolu a puhala moui mo e tukulele au ke he gahua tupe? Nakai kia kua fita he tukulele au ki a Iehova?’ Fakalataha mo e fakaaueaga fou, kua eke a ia mo paionia mau. Kua eke tuai e maamaaga hana ke he hana tukuleleaga ke hokulo lahi mo e omoi a ia ke taute e fifiliaga ke he loto ke fano ke he ha mena kua lata lahi mo ia. Ne fano a ia ke he Aoga Fakamahani he Fekafekau Lagomatai mo e moua ai e kotofaaga ke fekafekau misionare ke he motu kehe.
18. (a) Lahi fefe e mena ne putoia he ha tautolu a tukuleleaga ki a Iehova? (e) Ko e heigoa e palepale kua maeke ia tautolu ke helehele mai he ha tautolu a tukuleleaga ki a Iehova?
18 Kua putoia e moui katoa ha tautolu he tukuleleaga. Kua lata ia tautolu ke fakatikai ne tautolu a tautolu mo e “ke he tau aho oti” muitua ke he fakafifitakiaga mitaki a Iesu. (Luka 9:23) He fakatikai ne tautolu a tautolu, kua nakai ole a tautolu ki a Iehova ke fai magaaho ata noa, ke fai tohi fakaata magaaho okioki. Kua hiki e tau momoui ha tautolu ke fakatauo mo e tau matapatu fakaakoaga ne fakatoka e Iehova ma e hana tau fekafekau. Kua pihia foki ke he tau mena kua maeke ia tautolu ke fifili fakatagata, kua aoga lahi ki a tautolu ke kikite po kua lali fakalahi nakai a tautolu ke eke ke moui tukulele ki a Iehova. He fekafekau a tautolu ki a ia mai he taha aho ke he taha aho, he eketaha ke he malolo katoa ha tautolu ke fakafiafia a ia, to eke ai a tautolu ko e tau Kerisiano kautu mo e to monuina ai he moua e mamali he taliaaga a Iehova, ko Ia ni kua lata lahi mo e ha tautolu a ofaofa moli lahi mai he solu katoa.
Maeke Nakai Ia Koe ke Fakamaama?
◻ Putoia e heigoa he tukuleleaga a Iesu Keriso?
◻ Kua lata he ha a tautolu ke kalo kehe ke nakai loma a Iehova?
◻ Ko e heigoa e puhala kua maeke ia tautolu ke kalo kehe ke nakai toka e hufeilo ke he tupua ta ke tafia mai ke he tau momoui ha tautolu?
◻ He manatu e heigoa ka lagomatai aki a tautolu ke nakai “fakalolelole” ke taute e finagalo he Atua?
[Fakatino he lau 31]
Ko e tau Kerisiano tukulele ‘aua neke fakalolelole ke he mahani mitaki’