Tau Fakamoli a Iehova—Tau Uta Fekau Moli
1 Kua tuku e Iesu Keriso e matagahua ke uta he tau tutaki oti hana e fekau, mua atu he fekau a lautolu ke fakamatala e tala mitaki he Kautu. (Mata. 24:14; Gahua 10:42) Ne fakatoka he tau tutaki fakamua hana e puhala he mena nei he tutala a lautolu hagaao ke he Kautu mo e nakai fakalolelole—nakai ni ke he tau matakavi he tapuakiaga ka ke he mena ne ha ha ai e tau tagata mo e he o atu ke he taha fale mo e taha fale. (Gahua 5:42; 20:20) Ko e Tau Fakamoli a Iehova he vaha nei, kua fakamoli e tautolu a tautolu ko e tau Kerisiano uta fekau moli, kua fakamatala e fekau he Kautu ke he 232 e motu mo e papatiso ke molea taha e miliona he tau tutaki fou ke he tolu ni e tau kua mole! Ko e ha kua kautu ai e gahua uta fekau ha tautolu?
2 Fakafiafia he Tala Mitaki a Tautolu: Ko e tau uta fekau e tau tagata fakamatala, po ke tau uta fekau, he tala mitaki. Tuga ia, ha ha ia tautolu e kotofaaga fiafia he fakapuloa e Kautu ha Iehova—ko e tala mitaki moli ni kua maeke ke foaki ke he tau tagata fakaagitau. Kua fakamakai a tautolu ke he iloilo uho ne moua e tautolu hagaao ke he lagi fou ka pule tututonu ke he lalolagi fou ne ha ha ai e tau tagata fakamoli he Parataiso ne hau. (2 Pete. 3:13, 17) Ko tautolu ni ne ofania e amaamanakiaga nei, mo e fakamakamaka a tautolu ke talahau ke he falu.
3 Omoomoi he Fakaalofa Moli a Tautolu: Ko e uta fekau ko e gahua fakamoui. (Roma 1:16) Ko e mena haia ne moua e tautolu e olioli lahi he folafola e fekau he Kautu. Ha ko e tau tagata uta fekau moli, ne fakaalofa a tautolu ke he tau tagata, ti omoi he mena ia a tautolu ke tala age e tala mitaki ki a lautolu—ko e ha tautolu a tau magafaoa, tau katofia, tau tagata mahani, ti pihia foki e tokologa he falu. Taute ai e gahua nei mo e solu katoa ko e taha he tau fakakiteaga mitaki lahi ka taute e tautolu mai he fakaalofa moli ha tautolu ma e falu.—1 Tesa. 2:8.
4 Lagomatai he Agaga he Atua a Tautolu: Talahau mai he Kupu he Atua ki a tautolu, ka taute e tautolu e gahua he to mo e fakamalu e tega he Kautu, ko Iehova ni “kua fakatutupu ai.” Ko e mena tonu ia ni kua kitia e tautolu ke he fakatokatokaaga ha tautolu he vaha nei. (1 Kori. 3:5-7) Ko e agaga he Atua ne lagomatai a tautolu ke he gahua uta fekau ha tautolu mo e foaki mai ki a tautolu e kautu lahi.—Ioelu 2:28, 29.
5 He kitia e fakamaloloaga he 2 Timoteo 4:5 ke “eke e gahua he tagata fakamatala” ti ko e fakaalofa ha tautolu ke he tau tagata oti, ka liga omoi a tautolu ke talahau e tala mitaki he Kautu fiafia ke he tau magaaho oti, mauokafua to fakatumau a Iehova ke fakamonuina e gahua ha tautolu.