Fiafia he Talahau Fakatonu Atu
1 Fiafia oti a tautolu he taute e tau mena ne fiafia lahi a tautolu ki ai. Talahau mai e Mareko 7:37 kua fakapuloa he moto tagata hagaao ki a Iesu: “Uhoaki hana tau mena oti ne eke.” Ati kua fiafia ai a Iesu he taute e finagalo a Iehova! (Fakatatai Salamo 40:8.) He manamanatu ke he tau lagomataiaga na, to moua pihia foki e tautolu e olioli he omaoma a tautolu ke he poakiaga a Iesu “ke fakamatala atu ke he tau tagata, mo e talahau fakatonu atu.” (Gahua 10:42) Ia Ianuari to foaki e tautolu ha tohi lau 192 ne lomi fakamua ato hoko ke he 1985 ne liga toka he fakapotopotoaga po ke tohi Live Forever. Fakaaoga fefe e tautolu e tau tohi nei ke talahau fakatonu atu?
2 Ha kua fa manamanatu e tau tagata hagaao ke he tau matakupu malolo tino, liga kia pehe a koe:
◼ “Pete ni e tau mouaaga aoga lahi ne taute he fahi vai ekekafo, ha ha agaia e matematekelea lahi ha ko e tatalu. He manatu hau, ko e ha ne pihia ai? [Fakaata ma e tali.] Ne pehe a Iesu Keriso to kitia ai e tau tatalu he tau vaha fakahiku. (Luka 21:11) Ka kua fakamaama mai foki he Tohi Tapu e vaha ka nakai liu fai gagao. [Totou Isaia 33:24.] Mailoga e puhala ne omoomoi he tohi lagomatai nei e amaamanakiaga ke he fakaakoaga aoga ia he Tohi Tapu.” Fakamaama e tau talahauaga kua lata tonu he tohi kua fakakite e koe, mo e foaki ai. Fakamaama to talia e tautolu e mena fakaalofa kua lata ke he fekafekauaga ha tautolu.
3 Ka fakamatala nakai mautali ke tata atu ke he tau matakavi fale koloa, kia fakafeleveia atu a koe ti huhu:
◼ “Kua matamata kia ki a koe kua tau uka lahi e tau koloa he vaha nei ke lata mo e totogi ne moua? [Fakaata ma e tali.] Manatu nakai a koe to hoko mai e magaaho ke haohao moli ke he fahi tupe?” Fakaata ma e tali. Ti talahau e Tohiaga Tapu kua latatonu he fatiaki mai he tohi kua foaki e koe. Fakatumau he talahau: “Kua fakakite he tohi nei, he puhala he hana Kautu, to fakamafola he Atua e tau mena vihi ne fakauka aki e moui he vaha nei.” Foaki e tohi, mo e ka talia, age ke he tagata e magaaho ke lagomatai e gahua he Sosaiete mo e mena fakaalofa tote. Liga ke talahau e koe e fiafia lahi hau ke he fakatutalaaga, ti huhu ai: “Fai puhala nakai ke fakamatutaki e taua e fakatutalaaga nei ke he taha magaaho?” Ke he puhala nei kua maeke ia koe ke moua e numera telefoni he tagata po ke kaina.
4 Liga moua e koe e magaaho ke fakatai e puhala nei hagaao ke he mafola he lalolagi, he fakaaoga e tohi “Live Forever”:
◼ “Ko e ha, he manatu hau, ne uka ai ke moua e mafola he lalolagi? [Fakaata ma e tali, ti fakakite e fakatataaga he lau 20-1.] Ko e fakatino anei ke he mena tupu he Tohi Tapu ne fakamaama mai he Fakakiteaga. [Totou Fakakiteaga 12:7-9, 12 mai he paratafa 17. Ti totou e vala ne fano mo e fakatino.] Ko e nakai fai mafola he lalolagi ko e taha lakinaaga ha ko e liti hifo he Tiapolo ke he lalolagi. Kua tali he tohi nei e tau huhu aoga loga, ti fiafia au ke toka kaeke ke totou e koe.”—Ke kumi e tau puhala lauia mitaki he fakakite e tohi Live Forever, kikite e lau i tua he fufuta he Our Kingdom Ministry ia Sepetema 1995, Fepuari 1995, Sepetema 1994, Sepetema 1993, mo Aokuso 1992.
5 Ka liu ke kitia a lautolu ne fiafia, kia lali ke kamata e fakaakoaga Tohi Tapu he fakaaoga e puhala nei:
◼ “He tutala fakahiku ha taua, ne talahau e koe e manatu fiafia lahi. [Totoku e talahauaga he tagata.] Kua manamanatu au ki ai, ti manako au ke fakatutala tokoua e tau manatu he falu kumikumiaga haku ke he matakupu nei. [Tutala ke he kupu tohi kua lata tonu.] Kua foaki e mautolu e fakaakoaga nakai fai totogi ne kua lagomatai e tau tagata miliona ke kumikumi ke he tau fakaakoaga aoga he Tohi Tapu ke he magaaho ku. Ko e kumikumiaga pihia ke ati hake hau a mauokafua ke he fakamoliaga moli he tau maveheaga he Atua.” Fakakite falu huhu ka maeke ke moua e tali. Ka nakai manako e tagata ke he fakaakoaga Tohi Tapu, fakamaama kua ha ha ia tautolu foki e aoga pauaki ne 15 e minuti he fahi tapu ke he 16 e fahi tapu. Fakakite e porosua Manako, fufuke ke he fakaakoaga 1, ti ole ke fakatata e koe e fakaakoaga fakamua.
6 Manatu ke Fakaaoga e Tau Laupepa Fakailoa: Kua lata ke fakaaoga fakamitaki ai ke he fakafeleveiaaga hau ke omoomoi aki e fiafia he tau mena fakaagaga, po ke foaki ka nakai manako ke he tohi. Ka ha ha ai e fiafia, fakaaoga e fekau ne tohia i tua he laupepa fakailoa ke fakamalolo e tagata ke talia e fakaakoaga Tohi Tapu he kaina mo e hau he tau feleveiaaga ha tautolu.
7 Kia fakalotomatala he gahua hau, ti to olioli ai a koe. Kia fakatumau ke talahau fakatonu atu, mo e fiafia he taute fakamitaki e fekafekauaga ke he tau matakavi kehekehe.—1 Timo. 4:16.