Ko e Tohi Tapu—Takitakiaga he Atua ma e Tau Tagata Oti
1 Ne fuafua ko e fa e piliona Tohi Tapu ne lomi ke he 2,100 he tau vagahau mo e tau vagahau fahimotu, ti moua ai e Kupu he Atua ke molea e 90 pasene he puke tagata he lalolagi. Ka e, kua hoge e lalolagi ke he “tau kupu a Iehova ke fanogonogo ki ai.” (Amosa 8:11) Tokologa e tau tagata kua ha ha ai e lagaki he Tohi Tapu kua nakai totou ai po ke nakai maama ai e tau mataulu. Maeke fefe ia tautolu ke omoomoi a lautolu ke fakaaoga e Tohi Tapu ko e takitakiaga aoga ke he ha lautolu a tau momoui?
2 Ia Tesemo to foaki e tautolu e tohi The Bible—God’s Word or Man’s? Ka moua e fiafia, kia foaki foki e tautolu e liliuaga he Tohi Tapu ne kua aoga ki a tautolu ke he 47 e tau tau kua mole—ko e New World Translation. Kua taute e mena nei he fakatata ai e vagahau fou mo e maama. (Kikite e tohi “All Scripture,” lau 328, paratafa 6.) To fakatata e tautolu e fakaaue fakamakai ha tautolu ma e mena fakaalofa nei mai ia Iehova he lagomatai fakamakamaka e falu ke talia e Tohi Tapu ko e takitakiaga he Atua ma e tau tagata oti.
3 Kua liga talahau e koe e fakataitaiaga he fakaaoga e tuleke “Ko e ha Ne kua Lata ai ia Koe ke Falanaki ke he Tohi Tapu.” Liga pehe a koe:
◼ “Pete ni kua moua e Tohi Tapu ke he 90 pasene he puke tagata he lalolagi, tokofihamaka e tagata ne totou tumau ai. Ko e heigoa e kakano he manatu e koe?” Totou e tau paratafa ua fakamua he tuleke, fakalataha mo e 2 Timoteo 3:16. Foaki e tohi God’s Word. Ka talia e tohi, talahau e fakatokaaga he tupe. Ka nakai talia, tala age ke he tagata he kaina ke totou e vala ne toe he tuleke. Talahau e mataulu tala fakahiku, “Talahau Tuai e Vaha i Mua.”
4 Ka liu atu ke he tau tagata ne toka e koe e tuleke “Ko e ha Ne kua Lata ai ia Koe ke Falanaki ke he Tohi Tapu,” liga talahau pehe a koe:
◼ He oti e liu fakafeleveia e koe a koe, totou age e tau paratafa ua fakahiku he tuleke. Huhu ke he tagata he kaina kua manamanatu nakai a ia ke moui tukulagi ke he lalolagi. Ka oti e tali hana, ti pehe: “Kua iloa moli he Tau Fakamoli a Iehova to fakamoli oti e tau perofetaaga i loto he Tohi Tapu, putoia ai foki e falu kua talahau tuai e vaha homo ue atu anoiha ma e tau tagata oti kua hokotia ke he tau tutuaga he Atua.” Fakakite e fakataitaiaga he lau 13 he porosua Manako, fufuke ki tua he fakaakoaga 5, mo e tala age ke fakatutala e tau tali ke he tau huhu, ti kamata e fakaakoaga.
5 He matakavi ne ha ha ai e tau tagata o lotu, liga pehe a koe he feleveia fakamua hau:
◼ “Kua fakamalolo e mautolu e fakalilifu lahi ma e Tohi Tapu. Tokologa e tau magafaoa ne fai Tohi Tapu, ka e kua gahoa ni ne fakaaoga ai ka hokotia a lautolu ke he tau mena vihi lalahi. Mailoga nakai e koe e mena nei? [Fakaata ma e tali.] Liga ke talitonu a lautolu kua tuai e Tohi Tapu. Ko e tohi nei, The Bible—God’s Word or Man’s?, kua foaki mai e fakamoliaga fakaohooho kua tonu fakasaiene e Tohi Tapu mo e kua foaki mai e tau vailakau aoga ma e tau mena vihi pehia he vaha nei.” Talahau falu manatu he veveheaga 8 po ke veveheaga 12 he tohi, ti foaki ai.
6 Ka liu fakakia e tohi “God’s Word” ne toka, liga pehe a koe:
◼ “He liu fakahiku mai haku, ne fakatutala a taua ke he puhala kua lagomatai he Tohi Tapu e tau mena vihi uka he vaha nei. Ko lautolu ne talia ai ko e Kupu he Atua ne kua lagomatai foki ke momoui fiafia lahi mo e hagahaga mitaki e tau momoui. Manako au ke fakakite atu taha he tau matapatu fakaakoaga Tohi Tapu ne kua fakamaama mai he tohi ne toka e au mo koe.” Fakatutala ke he taha he tau matapatu fakaakoaga Tohiaga Tapu ne moua mai he veveheaga 12, paratafa 3-6, mo e fakaoti he totou e paratafa 7. Ka fakakite e fiafia, foaki e fakaakoaga ke he tohi Iloilo po ke porosua Manako.
7 Liga fiafia e tau fuakau ke he fakataitaiaga nai:
◼ “Taha e vaha ne laulahi ke he tau kaina ne totou e Tohi Tapu mo e momoui ai e tau magafaoa ke he tau matapatu fakaakoaga i ai. Pihia nakai e magafaoa hau? [Fakaata ma e tali.] Kua tuga kua kitia ai he vaha nei e tokologa kua lavelave lahi ke fakaaoga e tau magaaho ke totou e Tohi Tapu po ke kua logona e lautolu kua tuai lahi e tau matapatu fakaakoaga ke he mahani. He veveheaga 13 he tohi nei, The Bible—God’s Word or Man’s?, kua talahau ai tolu e tau mena tutupu moli he moui he tau tagata takitokotaha ne hiki e tau momoui ke he mitaki he mole e fakaako Tohi Tapu. Ka fia manako a koe ke totou e puhala he malolo he Kupu he Atua ne lagomatai a lautolu, to fiafia au ke toka e tohi nai ma hau.”
8 He liu ahi atu, liga pehe a koe:
◼ “He tutala fakahiku a taua, ne talia a taua kua fakaheu tuai e tau matapatu fakaakoaga ke he mahani he Tohi Tapu he kaufakalatahaaga he vaha nei. Kua lauia foki kia e fakaheuaga ia ki a taua? [Fakaata ma e tali.] Ne uho lahi mahaki e tuaga a Iesu Keriso he fakaako e iloilo he Tohi Tapu.” Totou Ioane 17:3. Ti fakatutala e paratafa 5 he veveheaga 1 he tohi Iloilo. Fakamaama e fakaholoaga fakaako Tohi Tapu nakai fai totogi ha tautolu, mo e foaki ke fakakite age.
9 Liogi ke fakamonuina e Iehova e tau laliaga oti hau ke onoono atu ke he Tohi Tapu—ko e takitakiaga he Atua ma e tau tagata oti.