Ha ia Tautolu e Kanavaakau Fou ke Kamata e Tau Fakaakoaga!

¹ Ko e fifine Amerika mahani fakamoli lahi ke he lotu Katolika Roma. Ne lago mo e tua fakamoli a ia ke he tau fakaakoaga he lotu. Ne fenoga pauaki atu a ia ke he Vatikana. Ka e pete ia, he mogo ne aahi atu e taha he Tau Fakamoli a Iehova ke he gutuhala hana, ne talia e ia e fakaako Tohi Tapu he kaina. Ko e ha? Ha kua manako lahi a ia ke ako e talahauaga he Tohi Tapu mo e nakai foaki he lotu hana e akoaga Tohi Tapu he kaina. Heigoa ne ako e tautolu mai he mena nei? Na nakai iloa e tautolu ato hai ka talia e fakaakoaga Tohi Tapu he kaina.​—Fakama. 11:6.

² Fakauaua nakai a koe ke tala age ke he tau tagata na fiafia lahi a tautolu ke fakaako e Tohi Tapu mo e ha tagata ni kua manako? Iloa nakai he tau tagata oti he maaga hau na foaki noa e tautolu e matagahua nei? Maeke fefe ia tautolu ke iloa tonu kua iloa tuai e lautolu? Kaeke fakaaoga e kanavaakau fou! Hanai ko e tuleke matafuluola mo e ono e lau, ko e mataulu Manako Nakai a Koe ke Iloa Lahi e Tohi Tapu? O mai la ke totou e tuleke, he mataulu ke he mataulu.

³ “Ko e Ha ne Totou Ai e Tohi Tapu?” Foaki mai he tuleke e tau kakano ne manako lahi ki ai. Kua fakakakano mai ne ha i ai he Tohi Tapu e tau “fakaakoaga fakaalofa mai he Atua,” ne fakakite e puhala ke liogi ki a Iehova ma e lagomatai mo e puhala ke talia e mena fakaalofa hana ko e moui tukulagi. (1 Tesa. 2:13) Hagaao e tuleke ke he tau puhala kehekehe he “tau kupu moli ke moua mai e maamaaga” he Tohi Tapu, tuga e tau mena ne tutupu ka mate a tautolu mo e ha ai ne loga e tau matematekelea ke he lalolagi. Ne talahau ke he “tau poakiaga faka-Atua he Tohi Tapu” ka eke fakagahuahua to aoga lahi ke he tino mo e omoomoi e fiafia, amaamanakiaga, mo e falu mahani mitaki foki. Taha kakano foki ne hagaaki e tuleke ke totou e Tohi Tapu​—ha ko e tau perofetaaga anoiha ne fakakite e tau mena ki mua ha tautolu​—Fakakite. 21:3, 4.

⁴ “Lagomatai ke Maama e Tohi Tapu”: Ne talahau e tuleke: “Kua manako lagomatai oti a tautolu ke maama e Kupu he Atua.” Kua fakakite e puhala ma tautolu ke ako e Tohi Tapu: “Kua fa mahani ke mitaki lahi ka fakaako fakapapahi e Tohi Tapu, kamata mai he tau matapatu fakaakoaga.” Pete kua fakalapalapa e tau mena oti “ko e Tohi Tapu ko e punaaga katoa,” ne haga tonu e tuleke ke he porosua Manako he taha mena ma e tagata ako tohi “ke maama e tau talahauaga Tohiaga Tapu hagaao ke he tau fakaakoaga kehekehe.” Kua ati hake he huhu he mataulu ne tutaki ki ai e huhu mitaki.

⁵ “Talia Nakai e Koe ke Fai Magaaho he Tau Faahi Tapu Takitaha ke Maama e Tohi Tapu?” Fakamaama he tuleke ne mitaki ke fakatokatoka e fakaakoaga Tohi Tapu ke he magaaho mo e nofoaga kua hagahaga mitaki ke he tagata ako tohi, he kaina hana po ke puhala he telefoni. Ko hai kua lata ke fakalataha ke he tutalaaga? Tali e tuleke: “Ko e hau a magafaoa katoa. Ko e ha kapitiga ni ne fifili e koe ke uiina ka fakalataha mai foki. Po ke, ka manako a koe, ko e fakatutalaaga to taute ni mo koe.” Ke loa fefe e matutakiaga? Kua talahau: “Tokologa ne fakatoka kehe taha e tula he faahi tapu ke fakaako e Tohi Tapu. Kaeke ke maeke ia koe ke fakalahi e magaaho ka fakaaoga po ke fakakaupa ni he tau faahi tapu takitaha, to maeke he Tau Fakamoli ke fakaata a lautolu ke lagomatai a koe.” Ko e puhala aoga a ia! Talia e mautolu ke hikihiki ke he tau magaaho kua lata ma e tau tagata ako tohi takitaha.

⁶ “Ko e Uiina ke Fakaako”: Kua foaki e kupono ke he tagata ne moua e tuleke ke ole atu ma e porosua Manako po ke he taha ke aahi atu ke fakakite e fakaholoaga ha tautolu ke ako e Tohi Tapu he kaina. Kua fakakite atu e kili fulufuluola he porosua Manako. Kitia nakai e koe e puhala kua maeke e tuleke nei ke fakamafana ai a lautolu mo e tau loto fakamoli ke talia ha mautolu a lagomatai? Ati, maeke fefe ia tautolu ke fakaaoga fakamitaki e kanavaakau fou nei?

⁷ Foaki e Koe ki a Hai e Tuleke? Age e tuleke fakatagata ke he tau tagata po ke tokai he kaina kaeke nakai nofo i ai. Kia tufatufa he taha fale ke he taha fale, he puhalatu, mo e tau fale pisinisi. Age ke he tau tagata pete kua talia e tau tohi ha tautolu po ke nakai talia. Fakahu i loto he tau mekasini po ke falu tohi ne fa foaki atu. Tuku he fagatohi ka tohitohi a koe. Kia fakamakai ke meli ki a lautolu ne matutaki mo koe he telefoni. Uta tumau e tau lagaki ke tufa kaeke finatu a koe ke he tau fale koloa, po ke fenoga he tau peleoafi papiliki, mo e fakaaoga noa he ha tutalaaga. Age ke he tau tagata ka o atu ke he gutuhala hau. Tufa ke he tau matakainaga hau, tau tuuta kaina, he gahuaaga, tau kapitiga he aoga, mo e falu fa mahani mo koe. Lali ke foaki e tuleke nei ke he tau tagata oti ne feleveia mo koe! Ati heigoa foki?

⁸ Kaeke Talia Agataha: Falu tagata to talia agataha e fakaakoaga he Tohi Tapu. Ko e mena ia, kaeke finatu ke he fonua, kia uta tumau ua e lagaki he tau porosua Manako​—taha ke age ke he tagata ako tohi mo e taha ma hau. Kaeke talia he tagata, ti kamata e fakaakoaga he magaaho tonu ia. Veveu ke he lau 2, ti totou “Fakaaoga Fefe e Porosua Nei.” Ati fakaholo atu ke he fakaakoaga 1, ti fakataitai e fakaakoaga. Ti heigoa e mena ne uka?

⁹ Kaeke Manako a Ia ne Fanogonogo ke Fokifoki e Manatu Hana: Neke leva e magaaho ne galo, kia lali ke liu atu ke matutaki mo ia. Ka liu atu, aua nimo ke uta e porosua Manako. Fakakite age e tau veveheaga tala he lau 2. Tokai ke fifili ni e ia e matakupu ne fiafia ki ai. Veveu ki ai, ti matutaki ke he fakaakoaga ne fifili e ia.

¹⁰ Liliu Ahiahi e Tau Foakiaga Oti: Kaeke age e koe e tuleke mo e tau mekasini, liu aahi atu mo e pehe: “Magaaho fakamua ne feleveia a taua, kua fiafia au he tokai e koe e lagaki he mekasini Kolo Toko. Liga kitia e koe e mataulu tala hana Ko e Kolo Toko Fakapuloaaga he Kautu a Iehova. Manako haku anei ke fakakite atu e kakano he Kautu nei mo e puhala kua lauia ai a koe mo e magafaoa hau.” Ati veveu e porosua Manako ke he fakaakoaga 6. Kamata ai he paratafa fakamua, totou mo e fakatutala e mena kua fiafia ke he tagata he fale he mogoia. Ati pulega ke liliu atu he taha aho mo e taha magaaho kehe ke fakahiku e fakaakoaga.

¹¹ Toka Mau e Tau Tuleke: Kua lata e leveki fekafekau mo e tau matakainaga tane ne leveki e tau koloa tohi he fakamau kua puke tumau he tau tuleke Iloa e Tohi Tapu i loto he fakapotopotoaga. Tokai e falu he kato tapulu hau po ke pesi, he motoka hau, he gahuaaga hau, he aoga, he paka tata ke he gutuhala he fale hau​—he ha mena tatatata ke moua mai. Ka e aua nimo, kia humaki tumau e falu he kato fakamatala hau ma e tau magaaho ia, kaeke feleveia a koe mo e ha tagata kua maeke ia koe ke matutaki ke he Tohi Tapu.

¹² Kia Fakamonuina e Iehova e Tau Laliaga ha Tautolu: Ko e foliaga he tau Kerisiano oti ko e fakaakoaga he kupu moli ke he taha tagata foki. (Mata. 28:19, 20) Taute nakai e koe e fakaakoaga Tohi Tapu he kaina he magaaho nei? Kaeke pihia, maeke nakai ia koe ke taute taha foki? Kaeke nakai taute ha fakaakoaga he magaaho nei, moli ni kua manako a koe ke takitaki taha. Liogi ki a Iehova ke fakamonuina e tau laliaga hau ke kumi e tagata ke fakaako atu. Ati gahuahua hagaao ke he tau liogi ia.​—1 Ioane 5:14, 15.

¹³ Ha ha ia tautolu e kanavaakau fou ke kamata aki e tau fakaakoaga! Kia fakamahani ke fakaaoga noa. Tufatufa fakamakai atu. Fakamakaukau ke ‘mahani mitaki atu, kia maukoloa ke he tau gahua mitaki, kia fakamokoi, mo e ta atu noa a tau mena’ ne ako e koe hagaao ke he Kupu he Atua.​—1 Timo. 6:18.

[Puha he lau 4]

TAU MAGAAHO KE TUFATUFA E TULEKE

◼ Matutakiaga he aho ke he aho

◼ Kaeke talia he tagata e tau tohi ha tautolu

◼ Kaeke nakai nofo e tagata i kaina

◼ Kaeke liliu aahi atu a tautolu

◼ Kaeke feleveia a tautolu mo e tagata ke he fekafekauaga he puhalatu

◼ Kaeke fakamatala ha i ai he tau fale pisinisi

◼ Kaeke he fekafekauaga fakamatala noa

◼ Kaeke tohitohi atu

◼ Kaeke fakaaoga e tau peleoafi papiliki

◼ Kaeke aahi mai e tagata ke he gutuhala ha tautolu

◼ Kaeke vagahau mo e tau magafaoa, tau tuuta kaina, tau kapitiga he gahuaaga, tau kapitiga he aoga, mo e falu atu fa mahani