Mautali Tumau ke Foaki e Fakaako Tohi Tapu
1. Ko e heigoa ne putoia he fakamooli e poaki ha Iesu ia Mataio 28:19, 20?
1 Ne poaki a Iesu ki a tautolu ke ‘taute tutaki, ti fakaako atu kia lautolu.’ (Mata. 28:19, 20) Manako mogoia a tautolu ke mautali ke foaki e fakaako Tohi Tapu he tau magaaho oti, nakai ni he taha e aho he matahiku faahi tapu ne fakatoka pauaki ke foaki e tau fakaako Tohi Tapu. Ko e tau manatu nā ka liga lagomatai.
2. Ko hai ka foaki e tautolu e fakaako Tohi Tapu ki ai?
2 Foaki Ai: Ka lahi e foaki e tautolu e fakaako Tohi Tapu, to lahi e magaaho ke moua e tautolu e taha. (Fakama. 11:6) Kua fakaaoga nakai e koe e tala age fakahako? Taha e fakapotopotoaga he Tau Faahi Kaufakalataha ne lali pauaki ke taute e mena nei he mahina katoa. Lahi mooli e fiafia ha lautolu he 42 e fakaako Tohi Tapu foou ne kamata! Ua tali manatu ko e tau tagata fiafia ne liu a koe ki ai kua iloa kua makai a koe ke fakaako Tohi Tapu mo lautolu. Ka liu a koe he taha magaaho, ko e ha he foaki e fakaako? Ai fai lekua ka nakai manako a lautolu. Maeke ia koe ke fakatumau ke feaki e fiafia. Kua hūhū nakai a koe ke he haau a tau tuutakaina, tau magafaoa, tau kapitiga gahua, mo e tau kapitiga aoga kaeke kua manako a lautolu ke fakaako e Tohi Tapu mo koe? Maeke foki ia koe ke hūhū ke he haau a tau tagata fakaako Tohi Tapu kaeke kua fai kapitiga po ke tau magafaoa a lautolu ka manako ke fakaako e Tohi Tapu.
3. Ko e heigoa e lagomataiaga aoga ha tautolu ke kamata aki e tau fakaako, ti magaaho fe ka fakaaoga ai e tautolu?
3 Lagomataiaga Aoga: Ko e lagomataiaga aoga ke kamata e tau fakaako Tohi Tapu ko e tuleke Manako Nakai a Koe ke Iloa e Kupu Mooli? Maeke a koe ke age ke he tau tagata he kaina he talia po ke nakai talia e lautolu falu tohi. Maeke foki ke fakaaoga ka gahua he matakavi pisinisi, puhalatū, tohitohi, mo e tau liu aahi atu. Maeke foki ke toka he tau kaina ne nakai moua ha tagata. He ha he uta mo koe ka heke a koe he tau puhala ō fenoga he tau tagata, haia he fale koloa, mo e he gahuaaga? Ko e lau i tua ka fakamaama fakakū e fakaholoaga fakaako Tohi Tapu ha tautolu mo e fakakite e tohi Fakaako he Tohi Tapu.
4. Fakaaoga fēfē e tautolu e tuleke Iloa e Kupu Mooli ke kamata e fakaako?
4 Ka mole e age he tuleke ke he tagata, maeke ia koe ke tuhi ke he hūhū he lau fakamua mo e tala age ki a ia, “Ha fe e taha he tau hūhū nai kua fiafia lahi a koe ki ai?” Ti kitekite tokoua ke he tali mai he tuleke, ti totou po ke fakatōtō mai he lau i tua, ne fakamaama ha tautolu a fakaholoaga fakaako Tohi Tapu. Maeke ia koe mogoia ke fakakite age foki ki a ia e falu vala tala ke he matakupu ne moua he tohi Fakaako he Tohi Tapu, age e tohi, ti taute e tau fakaholoaga ke liu atu mo e matutaki e fakatutala.
5. Ko e ha kua lata ia tautolu ke mautali ke foaki e fakaako Tohi Tapu?
5 Fai tagata agaia he fonua ha tautolu kua manako lahi ke iloa e tau mena ne fakaako mooli he Tohi Tapu. He mautali ke foaki e fakaako Tohi Tapu, to lahi e magaaho ha tautolu ke moua e olioli he lagomatai e falu ke he puhala he moui.—Mata. 7:13, 14.