Hagaaki Tumau ke Taute Tutaki
1. Ko e heigoa kua lata ke maeke he tau tagata ke hao?
1 Ko e hokotaki he fekafekauaga he tau he 2014 ne fakakite e fakamakutu he tau tagata he Atua mo e ha lautolu a eketaha ke fakamatala e tala mitaki he Kautu. (Mata. 24:14) Puhala he gahua he taha fale ke he taha fale, ko e tau matagahua ke tufatufa e tau tuleke mo e tau uiina, mo e fakailoilo he ha tautolu a gahua fakamatala ke he toloaga, kua hokotia a tautolu mo e fekau he Tohi Tapu ke he tau tagata tokologa foki ne nakaila pihia fakamua. Ka e, ka fakahao e tau tagata takitaha, kua lata ia tautolu ke lagomatai a lautolu ke eke mo tau tutaki ha Iesu he fakaako e Tohi Tapu mo lautolu.—1 Timo. 2:4.
2. Ko e heigoa e tau hūhū ka hūhū e tautolu ke lagomatai a tautolu ke mautali tumau ke foaki e fakaako Tohi Tapu?
2 Mautali Tumau ke Foaki e Fakaako Tohi Tapu: Ka fiafia e tagata, kua lali nakai a koe ke moua e vala tala matutaki haana ti liu atu mafiti mo e foliaga ke kamata e fakaako Tohi Tapu? Magaaho fakahiku fe ne lali a koe ke fakatātā e fakaako Tohi Tapu he ahiahi atu fakamua? Magaaho fakahiku fe ne foaki e koe e fakaako Tohi Tapu ki a lautolu he hala mekasini haau? Kua fakakite nakai e koe e tau vitiō Ko e Ha ne Fakaako e Tohi Tapu? mo e Ko e Heigoa ne Tupu he Fakaako Tohi Tapu? ke he tau kapitiga gahua, tau kapitiga aoga, tau katofia, tau magafaoa, mo e falu tagata mahani? Ka fakaaoga e tau tokaaga fakatātā he tau tohi, eketaha nakai a koe ke tala age ki a lautolu ne uta e tau tohi fakaako na maeke foki ke fakaako Tohi Tapu nakai totogi?
3. Ke maeke ke fakaako fakamitaki e kupu mooli, ko e heigoa kua latatonu ai?
3 Lagomatai Mai ia Iehova mo Iesu: He kamata e poakiaga haana ke “eke e tau motu oti kana mo tutaki” aki e tau kupu “o atu,” ne fakakite e Iesu kua lata a tautolu ke eketaha fakamalolō mo e fakakite e fakailoilo. Ka e, nakai tiaki e ia a tautolu ka e mavehe ke fakalataha mo tautolu. (Mata. 28:19, 20) Lafi ki ai, ne foaki mai e Iehova ki a tautolu e agaaga tapu haana pihia mo e tau koloa fakaaoga mo e fakamahaniaga kua lata mo tautolu ke fakaako e tau tagata aki e kupu mooli. (Saka. 4:6; 2 Kori. 4:7) Maeke a tautolu ke liogi ma e loto mo e malolō ke taute aki e gahua aoga nei.—Filipi 2:13.
4. Kua lata he ha a tautolu ke fakatumau ke hagaaki ke taute tutaki?
4 Ko e fakamatala he tala mitaki kua foaki ki a tautolu e fiafia lahi. Ka e, holo ki mua e fiafia ha tautolu ka fakaako e tautolu e tagata ke he kupu mooli ti lagomatai a ia ke fakalataha mo tautolu he “hala ke pu atu ke he moui.” (Mata. 7:14; 1 Tesa. 2:19, 20) Mua atu, he fakatumau ha tautolu a hagaaki ke taute tutaki, kua fakafiafia e tautolu a Iehova he “nakai finagalo . . . ke malaia taha, ka kia hohoko oti kana ke he tokihala.”—2 Pete. 3:9.