“Kua Pihia e Fakaalofa Mai e Atua kia Tautolu”
“Kaeke kua pihia e fakaalofa mai e Atua kia tautolu, lata ni ke feofanaki a tautolu.”—1 IOANE 4:11.
1. Ia Mati 23 he mole e toaga la, ko e ha e tau miliona tagata ka fakapotopoto ai ke he tau Fale he Kautu mo e falu he tau matakavi feleveiaaga he lalolagi katoa?
HE Aho Tapu, Mati 23, 1997, he mole e toaga la, kua nakai fai fakauaua ai ke molea e 13,000,000 tagata he lalolagi katoa ka fakapotopoto ai ke he tau Fale he Kautu mo e ke he falu he tau matakavi feleveiaaga ne kua fakaaoga ai he Tau Fakamoli a Iehova. Ko e ha? Ha ko e ha lautolu a tau loto kua amotia ai he fakakiteaga he fakaalofa mua ue atu he Atua ke he tau tagata. Ne fakamahino atu e onoonoaga he Keriso ke he fakamoliaga mua ue atu he fakaalofa he Atua, he pehe: “Nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.”—Ioane 3:16.
2. Ko e heigoa e tau huhu kua aoga ai ki a tautolu oti ke huhu hifo ni ki a tautolu hagaao ke he tali atu ha tautolu ke he fakaalofa he Atua?
2 He kua manamanatu a tautolu ke he fakaalofa he Atua kua fakakite, ti kua lata moli ia tautolu ke huhu hifo ki a tautolu ni, ‘Kua loto fakaaue moli kia au ke he mena ne taute he Atua? Ko e puhala kia ne fakaaoga aki e au e moui haku kua fakakite e fakamoliaga he loto fakaaue ia?’
“Ko e Atua ko e Fakaalofa”
3. (a) Ko e ha e fakatataaga he fakaalofa nakai ko e mena kehe ke he Atua? (e) Kua kitia fefe e malolo mo e pulotu ke he hana a tau gahua he tufugatiaaga?
3 Ko e fakatataaga he fakaalofa nakai ko e mena kehe lahi ke he vala he Atua kakano “ko e Atua ko e fakaalofa.” (1 Ioane 4:8) Ko e fakaalofa ko e hana a aga malolo. He magaaho ne tauteute e ia e lalolagi ma e nofoaga he tagata, ko e fakamatiketike hake e ia e tau mouga mo e fakaputuputu e tau vai ke he tau vainamo mo e tau moana ko e fakatataaga ofoofogia haia he malolo. (Kenese 1:9, 10) He magaaho ne tuku he Atua e fakagahuahuaaga ke he fakatokaaga vai mo e fakatokaaga okesitene, he magaaho ne talaga e ia e tau mena momoui ikiiki loga mo e tau fua kehekehe he fonua ke hiki e tau vai he lalolagi ke he puhala mena kai ke maeke he tau tagata ke hufia ke fakahao ha lautolu a tau momoui, ke he magaaho ne fakatoka e ia e tau taimi pauaki i loto ha tautolu ke o tatai mo e tau aho mo e tau mahina he Lalolagi palaneta, kua fakakite he mena nei e iloilo lahi mahaki. (Salamo 104:24; Ieremia 10:12) Ka e, mua atu e kehe ke he tufugatiaaga fakatino ko e fakamoliaga he fakaalofa he Atua.
4. Ke he tufugatiaaga fakatino, ko e heigoa e fakamoliaga he fakaalofa he Atua kua lata ke kitia mo e loto fakaaue a tautolu oti ki ai?
4 Ko e ha tautolu a tau alo gutu ne talahau ki a tautolu e fakaalofa he Atua he magaaho ka gagau e fua akau momoho mo e huhua ne taute ai ke nakai fakamakona aki a tautolu ka e ke tamai foki ki a tautolu e fiafia. Kua kitia he tau mata ha tautolu e fakamoliaga nakai fai hehe he tau toaga la ofogia, ko e lagi kua puke ai ke he tau fetu he po maamatia, ko e tau faga kehekehe mo e tau lanu kehekehe he tau fiti, ko e tau mahani fefeua he tau punua manu huifa, mo e tau mamali mafanatia he tau kapitiga. Kua taute he tau ihu ha tautolu a tautolu ke mailoga ai he magaaho ka hohogi e manogi mahofi he tau fiti he vaha tau tupu. Kua mailoga ai he tau teliga ha tautolu ka fanogonogo a tautolu ke he go he vaitafe, ko e tau lologo he tau manu, mo e tau leo he tau fakahele ha tautolu. Kua logona ai e tautolu he magaaho ka peka mafanatia e taha fakahele ki a tautolu. Kua foaki age ke he falu he tau manu e tau lotomatala ke kitia, logona, po ke hohogo e tau mena ne nakai maeke he tau tagata. Ka e ko e tau tagata, ne taute ke he fakatai he Atua, kua ha ha ai e lotomatala ke logona e fakaalofa he Atua ke he puhala ne nakai maeke he ha manu huifa.—Kenese 1:27.
5. Fakakite fefe e Iehova e fakaalofa lahi mahaki ki a Atamu mo Eva?
5 He magaaho ne tufugatia he Atua ko Iehova e tau tagata fakamua, ko Atamu mo Eva, ne takai viko e ia a laua aki e fakamoliaga he hana a fakaalofa. Ne to e ia e kaina, ko e parataiso, mo e fakatutupu e tau akau faga kehekehe i ai. Ne taute e ia e vaitafe ke fakamalu aki mo e fakapuke ai e tau manu lele mo e tau manu huifa fulufuluola. Ne foaki age oti e ia e tau mena nei ki a Atamu mo Eva ko e ha laua a kaina. (Kenese 2:8-10, 19) Kua fehagai a Iehova mo laua ko e hana a tau fanau, ko e vala he magafaoa hana he lalolagi mo e lagi katoatoa. (Luka 3:38) He taute ai a Etena ko e puhala, ko e Matua he lagi he kau tokoua fakamua nei he tagata kua fakatoka ki mua ha laua e matagahua mauokafua he fakalaulahi e Parataiso ke kaputia e lalolagi katoa. Ko e lalolagi katoa kua eke ai ke fakapuke ke he ha laua a tau fanau.—Kenese 1:28.
6. (a) Fefe hau a logonaaga hagaao ke he tuaga totoko ne taute e Atamu mo Eva? (e) Ko e heigoa ka liga ke fakakite kua ako e tautolu e mena ne tupu ke he kaina ko Etena mo e he aoga kua moua e tautolu mai he iloilo ia?
6 Nakai leva, ati fehagai ai a Atamu mo Eva mo e kamatamataaga he omaoma, ko e kamatamataaga he mahani fakamoli. Ko ia fakamua ti mui mai e taha ne kaumahala ke fakakite e loto fakaaue ke he fakaalofa ne kua liligi hifo ki a laua. Ko e mena ne taute e laua kua kelea lahi. Kua nakai fai kaloaga! Ti ko e fua, kua galo e laua e fakafetuiaga ha laua mo e Atua, kua vega kehe mai he hana a magafaoa, mo e uta kehe mai i Etena. Ko tautolu he vaha nei kua logona agaia e tau lauiaaga he ha laua a agahala. (Kenese 2:16, 17; 3:1-6, 16-19, 24; Roma 5:12) Ka e fai mena nakai a tautolu ne ako mai he mena ia ne tupu? Ti tali atu fefe a tautolu ke he fakaalofa he Atua? Kua fakakite nakai he tau fifiliaga ne taute e tautolu ke he tau aho takitaha kua loto fakaaue a tautolu ke he hana a fakaalofa?—1 Ioane 5:3.
7. Pete ni e mena ne taute e Atamu mo Eva, fakakite fefe e Iehova e fakaalofa ma e ha laua a tau fanau?
7 Ti pete ni e kelea lahi mahaki e nakai loto fakaaue ne fakakite he ha tautolu a tau mamatua fakamua ke he tau mena oti ne kua taute he Atua ma laua kua nakai fakatuua e fakaalofa ni he Atua. Mai he hana a fakaalofa hofihofi noa ma e tau tagata ne nakai la fanau he magaaho ia—fakalataha foki mo tautolu ne momoui ke he vaha nei—kua fakaata he Atua a Atamu mo Eva ke feaki e magafaoa ato mamate a laua. (Kenese 5:1-5; Mataio 5:44, 45) Kaeke ke nakai taute e ia e mena ia, to nakai fai ia tautolu ka fanau mai. Ha ko e fakakite fakahaga he hana a finagalo, ne foaki foki e Iehova e fakaveaga ma e amaamanakiaga ma lautolu oti he ohi a Atamu ka fakagahuahua ai e tua. (Kenese 3:15; 22:18; Isaia 9:6, 7) Ko e hana a fakatokatokaaga kua putoia ai e kakano ko e tau tagata he tau motu oti ka liu moua e mena ne fakagalo e Atamu, ne talahau ko e moui mitaki katoatoa ko e tau tagata ne talia he magafaoa he Atua ke he lagi mo e lalolagi katoatoa. Ne taute e ia e mena nei he foaki e lukutoto.
Ko e Ha ne Fai Lukutoto?
8. Ko e ha e mena ne nakai maeke ai e Atua ke poaki noa ko e pete ni kua lata a Atamu mo Eva ke mamate, to nakai fai he ha laua a tau fanau omaoma ka maeke ke mamate?
8 Kua lata moli kia ke totogi ai e lukutoto he puhala he moui he tagata? Nakai kia maeke ai e Atua ke poaki noa ni ko e pete ne lata a Atamu mo Eva ke mamate ha ko e ha laua a totokoaga, kua maeke he ha laua a fanau ka omaoma ke he Atua ke momoui tukulagi? Mai he tuaga kitia ku he tagata, kua liga kakano e logonaaga ia. Pete ia, ko Iehova “kua fiafia a ia ke he tututonu mo e fakafiliaga tonu.” (Salamo 33:5) He mole atu e magaaho ne eke ai a Atamu mo Eva mo tau tagata agahala ati fanafanau e laua e tau fanau; ti nakai fai he tau fanau ia ne fanafanau mai ke he mitaki katoatoa. (Salamo 51:5) Ko lautolu oti kua tutupu mai he hala, mo e ko e fakahala he agahala ko e mate. Ane mai tiaki e Iehova e mena nei, ko e heigoa e faga fakafifitakiaga ka fakatoka ai he mena ia ma e tau tagata he magafaoa hana he lagi mo e lalolagi katoatoa? Nakai tiaki noa e ia hana a tau manako tututonu. Ne fakalilifu e ia e tau manako he fakafiliaga tonu. Nakai fai tagata ka maeke ke talahau kelea ke he puhala ne fehagai e Atua mo e tau matakupu ne kua putoia ai.—Roma 3:21-23.
9. Hagaao ke he poakiaga faka-Atua he fakafiliaga tonu, ko e heigoa e faga lukutoto kua lata?
9 Ti kua lata tonu fefe, mogoia, e fakaveaga kua foaki ma e fakahaoaga ki a lautolu ko e tau fanau a Atamu ka fakatata e omaoma fakaalofa ki a Iehova? Kaeke ke poa e tagata mitaki katoatoa he mate, to fakaata he fakafiliaga tonu e uho he moui mitaki katoatoa ia, ko e utakeheaga haia ma e tau agahala ha lautolu ka talia e lukutoto he tua. Ha ko e agahala he tagata tokotaha, ko Atamu, kua lago ai he fakatupu e magafaoa katoa he tagata ko e tau tagata agahala, kua lata he fakamaligi toto he taha tagata mitaki katoatoa, ne kua tatai e uho, ke fakalagotatai e tau fua tautau he fakafiliaga tonu. (1 Timoteo 2:5, 6) Ka e moua mai i fe e tagata pihia?
Lahi Mahaki Fefe e Totogi?
10. Ko e ha ne nakai maeke ai he tau fanau a Atamu ke foaki e lukutoto ne kua lata?
10 He tau fanau he tagata agahala ko Atamu, kua nakai fai ke maeke ke foaki e mena ne kua lata ke liu totogi aki e tau amaamanakiaga he moui ne kua fakagalo ai e Atamu. “Nakai fakai ke maeke ia taha ia lautolu ke fakafua e matakainaga hana, po ke ta atu ke he Atua e palepale māna, (ha ko e mena uka lahi ni e palepale he tau agaga ha lautolu; ti nakai maeke ni tukulagi;) kia moui tukulagi a ia; kia nakai kitia e ia e tukuaga.” (Salamo 49:7-9) He nakai toka e tau tagata ke fakahakuhaku noa, ne taute fakaalofa hohofi noa e ia ko Iehova e foakiaga.
11. Ko e heigoa e puhala ne foaki e Iehova e moui mitaki katoatoa he tagata ne kua lata ai ma e lukutoto kua lata tonu?
11 Nakai fakafano mai e Iehova e agelu ke he lalolagi ke fakatupua ke mate he fakatoka hifo e tino efuefu ka e moui a ia ko e agaga. Ka e, he taute e mana ne ko e Atua ni hokoia, ko e Tufuga, ka fioia, ne hiki mai e ia e malolo moui mo e puhala he aga fakatagata he tama tane he lagi ke he nofoaga tama he fifine, ko Maria ko e tama fifine a Heli, he magafaoa ha Iuta. Ko e malolo gahuahua he Atua, ko e hana a agaga tapu, kua puipui e tupuaga he tama i loto he nofoaga tama he hana matua fifine, mo e kua fanau ai ko e tagata mitaki katoatoa. (Luka 1:35; 1 Peteru 2:22) Ti ko ia nei ke he hana malolo ko e totogi kua lata ke foaki e lukutoto ka fakamakona katoatoa aki e tau manako he fakafiliaga tonu faka-Atua.—Heperu 10:5.
12. (a) Ko e heigoa e kakano ko Iesu ko e “Tama fuataha” he Atua? (e) Kua fakakite fefe he Atua Hana fakaalofa ma tautolu he fakafano mai a ia nei ke foaki e lukutoto?
12 Ke he tau hogofulu afe fe he tau tama tane hana he lagi ne age e Iehova e kotofaaga nei ki ai? Ki a ia ne fakamaama mai he tau Tohiaga Tapu ko e hana a “Tama fuataha.” (1 Ioane 4:9) Ko e talahauaga nei kua fakaaoga ai ke fakamaama, nakai ke he magaaho ne eke a ia he fanau ko e tagata, ka e fakamua atu ke he magaaho ne ha ha ai a ia ke he lagi. Taute tokotaha ni e Iehova a ia nakai fai tagata ne lagomatai ai. Ko ia ko e Tama uluaki he tau tufugatia oti kana. Ko ia haia ne fakaaoga he Atua ke fakamomoui e falu he tau mena momoui oti. Ko e tau agelu ko e tau tama tane he Atua, tuga a Atamu ko e tama he Atua. Ka ko Iesu kua fakamaama ke ha ha i ai “e lilifu haia he Tama fuataha he Matua.” Kua talahau ai hagaao ki a ia ke nofo “he fatafata he Matua.” (Ioane 1:14, 18) Ko e hana a fakafetuiaga mo e Matua kua tata, mauokafua, mo e hofihofi. Ne fakalataha a ia ke he fakaalofa he hana a Matua ma e tau tagata. Ne fakakite he Tau Fakatai 8:30, 31 e logonaaga he hana a Matua hagaao ke he Tama nei mo e logonaaga he Tama ke he tau tagata: “Ne eke foki au mo fiafia hana [Iehova] ke he taha aho mo e taha aho; ne olioli mau au ki mua hana ke he tau aho oti ni . . . ko e haku [ko Iesu, ko e Eke Gahua ne Mua a Iehova, ko e aga fakatagata he pulotu] a fiafia foki, ha ha i ai ke he fanau he tau tagata haia.” Ko e Tama nei kua mua atu e uho kua fakafano mai he Atua ke he lalolagi ke foaki e lukutoto. Ti ko e mena ia, kua fai kakano lahi e talahauaga a Iesu: “Nukua pihia e fakaalofa mai he Atua ke he lalolagi, kua ta mai ai hana a Tama fuataha”!—Ioane 3:16.
13, 14. Ko e heigoa kua lata he fakamauaga Tohi Tapu ke he amaamanakiaga ha Aperahamo he poa a Isaako ka lagomatai a tautolu ke loto fakaaue ke he mena ne taute e Iehova? (1 Ioane 4:10)
13 Ke lagomatai a tautolu ke moua e falu maamaaga he kakanoaga ia, he vaha leva ato hau a Iesu ke he lalolagi, ne fakaako he Atua a Aperahamo ke he falu he tau tau 3,890 i tuai: “Kia uta e koe hau a tama, hau a tama fuataha, ko ia ne ofania e koe, ko Isaako, mo e fano a koe ke he motu ko Moria; ti ta atu e koe a ia mo poa huhunu ke he mena ia, ke he taha mouga ka tala atu e au kia koe.” (Kenese 22:1, 2) Ke he tua, ne omaoma a Aperahamo. Tuku a koe ke he tuaga a Aperahamo. Ka e kua kaeke ko e tama tane hau a ia, na tokotaha ni hau a tama mo e fakahele ai e koe? Ko e heigoa e tau logonaaga hau he magaaho ka tipi e koe e gaafi ma e poa huhunu, mo e taute e fenoga ke he tau aho gahoa ke he motu ko Moria, ti tuku hau a tama tane ke he fatapoa?
14 Ko e ha e matua fakaalofa hofihofi kua ha ha ai e tau logonaaga pihia? Ne pehe e Kenese 1:27 kua tufugatia he Atua e tagata ke he Hana a fakatai. Ko e ha tautolu a tau logonaaga he fakaalofa mo e fakaalofa hohofi kua fakaata e puhala tote lahi ke he fakaalofa mo e fakaalofa hohofi ni ha Iehova. Ke he mena tupu ki a Aperahamo, kua hau fakalava e Atua, ke nakai poa moli ai a Isaako. (Kenese 22:12, 13; Heperu 11:17-19) Pete ia, ke he puhala ni hana, ne nakai fakaoti e Iehova e foakiaga he lukutoto, pete ni kua totogi lahi ki a ia mo e hana a Tama. Ko e mena kua taute, nakai ha ko e ha matagahua taha ke he vala he Atua, ka e, ko e fakakiteaga haia he fakaalofa hohofi noa. Loto fakaaue katoatoa nakai a tautolu ke he mena ia?—Heperu 2:9.
Ko e Puhala ne Maeke Ai
15. Kua lauia fefe e lukutoto ke he tau momoui ti pihia foki ke he fakatokatokaaga he tau mena nei?
15 Ko e foakiaga fakaalofa ia ne taute ai he Atua kua ha ha ai e lauia mitaki lahi ke he tau momoui ha lautolu ne talia ai ke he tua. Kua o mai kehe ai a lautolu fakamua he Atua ha ko e fua he agahala. Ko lautolu ia, tuga he talahau mai he Kupu hana, ‘ne fai fi kia ia ke he tau loto ha lautolu ke he tau gahua kelea.’ (Kolose 1:21-23) Ka e kua eke a lautolu ke ‘fakafeilo ke he Atua ke he matulei he Tama hana.’ (Roma 5:8-10) Ha kua hiki ai e tuaga he tau momoui ha lautolu mo e kua talia ai e fakatokihalaaga ne kua foaki ai he Atua ki a lautolu ne fakagahuahua e tua ke he poa he Keriso, kua foaki age ki a lautolu e tau loto mea.—Heperu 9:14; 1 Peteru 3:21.
16. Ko e heigoa e tau fakamonuinaaga kua foaki age ke he fuifui mamoe gahoa kakano ko e ha lautolu a tua ke he lukutoto?
16 Kua foaki age ni e Iehova ke he numela tote ko lautolu nei, ko e fuifui mamoe gahoa, e foaki noa he fakalataha ai mo e hana a Tama ke he Kautu he lagi, mo e amanakiaga ke taute ai e finagalo fakamua he Atua ma e lalolagi. (Luka 12:32) Ko lautolu nei ne kua ta mai “he tau magafaoa oti, mo e tau vagahau kehekehe, mo e tau motu, katoa mo e tau atu motu . . . mo tau patuiki, mo tau ekepoa ke he Atua ha mautolu; kua eke foki a mautolu mo tau patuiki ke he lalolagi.” (Fakakiteaga 5:9, 10) Ki a lautolu nei, ne tohi he aposetolo ko Paulo: “Kua moua e mutolu e Agaga ke hiki tama, ko ia kua tauui atu ai a tautolu, Ava, ko e Matua na e. Kua fakamoli mai e Agaga ia ni ke he tau agaga ha tautolu, ko e fanau he Atua a tautolu. Kaeke ko e fanau a tautolu, ti ko e tau hakeaga foki, ko e tau hakeaga ni he Atua, ko e tau hakeaga fakalataha mo Keriso.” (Roma 8:15-17) Ha kua hiki ai he Atua ko e hana a tau tama, kua foaki age ki a lautolu e fakafetuiaga fakahelehele ne fakagalo e Atamu; ka e ke he tau tama nei to foaki age e tau kotofaaga lafi ki luga he fekafekauaga he lagi—ko e mena ne nakai moua e Atamu. Ati ko e mena ia ni ne talahau ai e aposetolo ko Ioane: “Kitiala e fakaalofa lahi kua foaki mai he Matua kia tautolu, kia fakahigoa ai a tautolu ko e fanau he Atua”! (1 Ioane 3:1) Ki a lautolu pihia kua nakai ni fakakite he Atua e matapatu fakaalofa (a·gaʹpe) ka e pihia foki mo e fakaalofa hohofi (phi·liʹa), ne kua kitia ai ke he pipiaga he vahaloto he tau kapitiga moli.—Ioane 16:27.
17. (a) Ki a lautolu oti ne fakagahuahua e tua ke he lukutoto, ko e heigoa e magaaho kua foaki? (e) Ko e heigoa e “tokanoaaga ha ha he monuina he fanau he Atua” ka kakano ki a lautolu?
17 Ke he falu foki—ko lautolu oti ne fakagahuahua e tua ke he foakiaga fakamokoi ma e moui he puhala ia Iesu Keriso—kua hafagi e Iehova e magaaho ke moua e fakafetuiaga uho ne fakagalo e Atamu. Kua fakamaama he aposetolo ko Paulo: “Ha kua fakaneinei e tau mena ne eke [ko e tufugatiaaga tagata ne hifo mai ia Atamu] ti fakatalitali ni ke he fakakite mai e tau tama he Atua [ko e mena ia, kua fakatali a lautolu ke he magaaho ka eke ai ke kitia maali ko e tau tama he Atua ko e tau hakega mo Keriso he Kautu he lagi kua gahua mitaki ai ke lata mo e tau tagata]. Nukua mahala e tau mena ne eke ke he mena popo vave [kua fanau a lautolu he hala mo e amaamanakiaga he mate, mo e nakai fai puhala ai ke maeke ni ia lautolu ke tokanoa mai ai], nakai loto a ia ki ai, ka e pihia ha ko ia ne mahala ai, ne fakamahala mo e amaamanaki [ne foaki he Atua], ha ko e mena to toka noa ai e tau mena ne eke mai he tupaaga ke he mena popo vave kia hoko atu ai ke he tokanoaaga ha ha he monuina he fanau he Atua.” (Roma 8:19-21) Ko e heigoa e kakano he tokanoaaga ia? Kua tokanoa mai tuai a lautolu he pipiaga ke he agahala mo e mate. To mitaki katoatoa ni ha lautolu a tau loto manamanatu mo e tau tino, ko e Parataiso ko e ha lautolu a kaina, mo e moui tukulagi ke olioli ai ha lautolu a mitaki katoatoa mo e fakakite ha lautolu a loto fakaaue ki a Iehova, ko e Atua moli tokotaha maka. Ti maeke fefe e tau mena oti nei? Puhala mai he poa lukutoto he Tama fuataha ni he Atua.
18. Ia Mati 23 he mole e toaga la, ko e heigoa ha tautolu ka taute, mo e ko e ha?
18 Ke he Nisana 14, 33 V.N., ke he poko tapa ki luga i Ierusalema, kua fakatu e Iesu e Fakamanatuaga he hana a mate. Ko e fakamanatuaga he tau tau takitaha he hana a mate kua eke mo mena aoga ke he tau momoui oti he tau Kerisiano moli. Ne poaki mai ni e ia ko Iesu: “Kia eke e mutolu e mena nai mo fakamanatuaga kia au.” (Luka 22:19) Ke he 1997 ko e Fakamanatuaga to taute ai he mole e toaga la ia Mati 23 (he magaaho ne kamata ai e Nisana 14). He aho ia, nakai fai mena ne mua atu e aoga he fakalataha ai ke he Fakamanatuaga nei.
To Tali Fefe e Koe?
◻ Ko e heigoa e tau puhala ne kua fakakite he Atua e fakaalofa lahi mahaki ma e tau tagata?
◻ Ko e ha e moui mitaki katoatoa he tagata kua lata ke lukutoto aki e tau fanau a Atamu?
◻ Ko e heigoa e totogiaga lahi ne foaki ai e Iehova e foakiaga ia?
◻ Ko e heigoa he lukutoto ne maeke ke taute?
[Fakatino he lau 24]
Ne foaki he Atua hana ni a Tama Fuataha