Kaeke ke Gagao e Tagata he Magafaoa

1, 2. Fakaaoga fefe e Satani e matematekelea mo e gagao he lali ke moumou he mahani hakohako a Iopu?

KO E tagata tane ko Iopu kua totou fakalataha mo lautolu ne olioli e moui fiafia he magafaoa. Kua ui he Tohi Tapu a ia ko e “mua atu foki e tagata na he tau tagata oti.” Ne toko fitu la e tama tane hana, mo e toko tolu e tama fifine, toko hogofulu e tama he katoa. Kua loga foki hana tau koloa ne foaki fakamitaki ma e hana magafaoa. Na e mua atu he aoga, ne takitaki ni e ia e tau matagahua fakaagaga mo e onoono lahi a ia ke he tuaga he tau fanau ki mua a Iehova. Ko e tau mena oti nei kua fua mai e pipiaga tata he magafaoa fiafia.​—Iopu 1:1-5.

² Ko e tuaga a Iopu ne nakai fakahao a ia he kitekiteaga a Satani, ko e fi ne mua he Atua ko Iehova. Ko Satani, ko ia ne kumi puhala tumau ke moumou aki e mahani hakohako he tau fekafekau he Atua, ne tau a ia ki a Iopu ha ko e moumouaga he hana magafaoa fiafia. Ka mole ia, ti “fakahoko atu ki a Iopu e gagao fufula kelea, ke kamata mai he tau aloalohui hana, ti hoko atu ke he hana tumuaki ulu.” Ko e mena ia ne amaamanaki a Satani ke fakaaoga e matematekelea mo e gagao ke moumou aki e mahani hakohako ha Iopu.​—Iopu 2:6, 7.

3. Ko e heigoa e tau fakamailoga he gagao a Iopu?

³ Kua nakai moua mai he Tohi Tapu ha fakamaamaaga fakaekekafo ke he mamahi a Iopu. Ka e talahau mai moli, ki a tautolu e tau fakamailoga. Ko e hana kakano kua puni he tau uaga, mo e hana kili kua tupu ai e tau mataka mo e otioti he popo. Ko e fafagu a Iopu kua fakalialia, mo e hana tino kua namupaku. Ne lauia a ia he kafokia. (Iopu 7:5; 19:17; 30:17, 30) Ha ko e mamahi lahi, ne nofo a Iopu he efuefu mo e voku e ia a ia aki e tau lapa kapiniu matila. (Iopu 2:8) Moli e fakaalofa he onoono!

4. Ko e heigoa e tau mena ne logona he tau magafaoa oti mai he taha magaaho ke he taha magaaho?

⁴ Ko e heigoa hau ka taute kaeke kua kafo a koe he gagao hagahaga kelea pihia? Ko e vaha nei, kua nakai ta e Satani e tau fekafekau he Atua ke he gagao tuga ne taute e ia ki a Iopu. Ka e pete ni he pihia, ha ko e kitiaaga ke he nakai mitaki katoatoa he tagata, ko e tau mena fakatupetupe he moui he tau aho takitaha, mo e takatakaiaga kelea mafiti nei ne nonofo ai a tautolu, ko e mena na ia ke amanaki ki ai mai he taha magaaho ke he taha, to gagao e tau tagata he magafaoa. Ha kua kitia e tau fuafuaaga he puipuiaga ne liga moua e tautolu, ko tautolu oti kua fa pikitia he tau gagao, pete ni he gahoa ka mamahi ke hoko ke he mena ne moua e Iopu. Kaeke ke moua oti he gagao ha tautolu a magafaoa, ko e paleko moli e mena nei. Ko e mena ia, o mai a tautolu ke kitia ko e lagomatai fefe he Tohi Tapu a tautolu ke fakafehagai mo e fi nei he tagata ne ha ha agaia hinei.​—Fakamatalaaga 9:11; 2 Timoteo 3:16.

FEFE HAU A LOGONA KE HE MENA IA?

5. Kua fa mahani ke gahuahua fefe e tau tagata he magafaoa ke he tau lekua he gagao fakaku?

⁵ Ko e fakatauhele he fakaholoaga tatai he moui, pete ni ko e heigoa e tupuaga, kua uka tumau, mo e moli pauaki e mena nei kaeke ke fakatauhele he leva e gagao. Ti pihia ni ke he gagao fakaku kua lauia ke he tau hikihikiaga, tau fakaataaga, mo e tau mena foaki. Ko e tau tagata malolo he magafaoa kua lata ke nonofo fakatekiteki ka e toka a ia ne gagao ke moua taha okioki. Kua liga taute a lautolu ke toka foki falu matafekau. Ka e pete ni he pihia, ke he laulahi he tau magafaoa ke hoko foki ke he tau fanau ikiiki kua logona e lautolu e hofihofi he fakaalofa ma e lafu po ke matua ne gagao, pete ni kua fakamanatu ki a lautolu he falu a magaaho ke manamanatu lahi. (Kolose 3:12) Kaeke ko e gagao ku, kua fa mahani e magafaoa ke mautali ke taute e tau mena kua lata. Ko e taha mena, kua lata ke igatia e tagata he magafaoa ke amaamanaki ke he manamanatuaga taha ia ni kaeke ko ia tane po ke fifine kua moua he gagao.​—Mataio 7:12.

6. Ko e heigoa e gahuahuaga ne kitia ai he falu a magaaho kaeke ke moua e tagata he magafaoa he gagao kelea lahi, mo e leva lahi?

⁶ Ko e heigoa, mogoia, kaeke kua kelea lahi e tatalu ti lahi e tau fakatauhele mo e loa? Ke fakatai, ka e kua kaeke ke fai tagata he magafaoa ka mate fahi taha he moua he gagao fakalutukia, mo e fakakulikuli he gagao Alzheimer, po ke fakalolelole he falu gagao foki. Ka e kua kaeke ke lauia e tagata he magafaoa he tatalu ulu heketia, tuga e schizophrenia? Ko e mena fakamua ne fa tupu ko e fakaalofa​—momoko ha kua matematekelea lahi e fakahele. Ka e taha e mena, ko e fakaalofa liga kua mui ki ai e falu he tau gahuahuaaga. Kaeke ke kitia he tau tagata he magafaoa kua lauia lahi a lautolu mo e fakakaupa ha lautolu a ataina ha ko e gagao he taha tagata, liga to logona e lautolu e loto fakavihia. To liga manatu a lautolu: “Ko e ha la ne tupu ai e mena nei ki a au?”

7. Vagahau fefe e hoana ha Iopu ke he hana gagao, mo e ko e heigoa kua nimo moli e ia?

⁷ Ko e taha mena pihia fakalata ne hoko ke he loto he hoana ha Iopu. Manatu, kua fita he logona e ia he mamate hana fanau. Ha kua vevete e tau mena fakamomoko ia, to nakai fai mahalohalo kua logona fakahaga ni e ia e kelea lahi he loto. Fakahiku, ha kua kitia e ia hana tane makaukau mo e hakahakau kua kafo he mamahi, he gagao fakalialia, kua tuga kua galo ia ia e mena aoga ne fakapouli aki e tau matematekelea oti​—ko e fakafetuiaga ne mahani ai a ia mo e hana tane ke he Atua. Kua pehe e Tohi Tapu: “Ti pehe age hana [Iopu] hoana kia ia; Kua taofi agaia kia e koe hau a mahani hakohako? Kia vagahau kelea a a koe ke he Atua, mo e mate ai a koe.”​—Iopu 2:9.

8. Kaeke ke gagao lahi e taha tagata he magafaoa, ko e heigoa e kupu tohi ka lagomatai e falu tagata he magafaoa ke manamanatu fakamitaki?

⁸ Kua tokologa ne ita, mo e vale foki, he mafiti e hiki he tau momoui ha lautolu ha ko e gagao he taha tagata. Ka e pete ni he pihia, ko e Kerisiano kua manamanatu ke he tuaga nei kua lata ke mailoga agataha kua maeke he mena nei ke moua e ia e magaaho ke fakakite e fakamakai he hana fakaalofa. Ko e fakaalofa moli ko e “fakauka, . . . to totonu . . . nakai kumi e ia hana tau mena . . . Kua fakauka ke he tau mena oti, kua talia e tau mena oti, kua amaamanaki ke he tau mena oti, kua fakamanavalahi ke he tau mena oti.” (1 Korinito 13:4-7) He nakai fakaata e tau logonaaga kelea ke pule lahi, ko e mena ia, kua lata ia tautolu ke eketaha ke puipui a lautolu.​—Tau Fakatai 3:21.

9. Ko e heigoa e tau fakamoliaga kua maeke ke lagomatai aki fakaagaga mo e ke he tau loto manamanatuaga he magafaoa kaeke ke gagao kelea lahi taha?

⁹ Ko e heigoa kua lata ke taute ke laulautaki mai e malolo fakaagaga mo e manamanatuaga he magafaoa kaeke ke gagao lahi taha tagata i ai? Moli lahi, kua igatia e gagao mo e hana ni a levekiaga pauaki mo e tuluiaga, mo e nakai mitaki he tohi nei ke tokutoku ha fakaholoaga fakaekekafo po ke ha fakaholoaga leveki fakaekekafo i kaina. Pete ni ia, ke he manamanatuaga fakaagaga, ko Iehova ne “fakatu hako a lautolu oti kua fakatolotolo.” (Salamo 145:14) Ne tohi he Patuiki ko Tavita: “Uhoaki e tagata kua manatu ke he tagata nofogati, to fakahao e Iehova a ia ke he aho kelea. To leveki e Iehova a ia mo e fakamoui . . . To faihoani a Iehova kia ia ka takoto a ia he hana gagao.” (Salamo 41:1-3) Kua fakahao e Iehova hana tau fekafekau ke fakamoui fakaagaga, pete ni kua kamatamata a lautolu ke molea he ha lautolu a tau mena ne fahia ki ai. (2 Korinito 4:7) Kua tokologa e tau tagata he magafaoa ne feleveia mo e tau gagao hagahaga kelea he ha lautolu a magafaoa ne taogo e tau kupu he salamo: “Kua matematekelea lahi na au; Iehova na e, kia fakamalolo e koe au ke lata mo e hau a kupu.”​—Salamo 119:107.

KO E AGAGA FAKAMAULU

10, 11. (a) Ko e heigoa e mena aoga kaeke ke fahia e magafaoa ke kautu ke he gagao? (e) Fahia fefe e taha fifine mo e gagao he hana tane?

¹⁰ “Ko e loto he tagata kua fakauka ai a ia ke he hana gagao,” talahau he fakatai he Tohi Tapu, “ka ko e loto malipilipi, ko hai kia ke toto hake a ia?” (Tau Fakatai 18:14) Ko e loto mafatifati kua maeke ke fakakafo aki e agaga he magafaoa ti pihia ni mo e “agaga he tagata.” Pete ia, “ko e loto mitaki, ko e moui he tino haia.” (Tau Fakatai 14:30) Ko e fahia he magafaoa ke kautu ke he tau gagao kelea po ke nakai, kua falanaki fakalahi ni ke he tau aga, po ke agaga, he hana tau tagata.​—Fakatatai Tau Fakatai 17:22.

¹¹ Taha e fifine Kerisiano ne fakauka he kitia e lolelole he tane hana ha ko e gagao tupu fakalutukia he ono laia e mahina he mole e mau ha laua. “Ne lauia kelea e vagahau he tane haku, ti teitei ke nakai maeke ke tutala mo ia,” he manatu e ia. “Ko e mamahi he loto he lali ke maama ko e heigoa hana ne taufetului ke talahau kua lahi mahaki.” Manamanatu la foki, ke he mamahi lahi mo e ita ne liga logona he tane. Ko e heigoa ne taute e tokoua? Pete ni he nonofo mamao ligo a laua mai he fakapotopotoaga Kerisiano, ne fakamalolo ni e matakainaga fifine ke nofo malolo fakaagaga he lali ke moua tumau e tau fakailoaaga fou he fakatokatokaaga ti pihia foki ni mo e moua tumau e tau mena kai fakaagaga he tau mekasini ko e Kolo Toko mo e Awake! Ko e mena hanei ne moua ai e ia e malolo fakaagaga ke leveki hana tane fakahelehele ato hoko ke he mate hana, fa e tau he mole.

12. Ha kua kitia he lekua a Iopu, ko e heigoa e tau mena lafi ki luga ne fa taute he tagata ne gagao he falu a magaaho?

¹² Ko e lekua ha Iopu ko ia ni, e tagata ne kafo lahi, ne tumau e malolo. “Ke talia kia e tautolu e tau mena mitaki mai he Atua, ka e nakai kia talia ai foki e tautolu e tau mena kelea?” he ole e ia ke he hana hoana. (Iopu 2:10) Ko e mena ia ni kia ne talahau ai he tutaki ko Iakopo he magaaho fakamui a Iopu ko e fakafifitakiaga mua atu e fakauka mo e fakamanavalahi! Kua totou e tautolu he Iakopo 5:11: “Kua fanogonogo a mutolu ke he fakauka a Iopu, kua iloa foki e mutolu e fakahikuaga ha he Iki, kua fakaalofa fakalahi mai e Iki mo e hofihofi noa.” Kua tatai ni mo e vaha nei, ke he loga he tau lekua, ko e aga fakamalolo he tagata gagao he magafaoa ka lagomatai aki e falu he magafaoa ke tumau e levekiaga mitaki.

13. Ko e heigoa e fakatataiaga kua nakai lata ke taute he magafaoa ne fai gagao kelea lahi?

¹³ Ko e tokologa ia lautolu ne fehagai mo e gagao he magafaoa, ne talia, ko e magaaho fakapa kua nakai fa mahani e tau tagata he magafaoa ke moua e magaaho uka lahi ka feleveia mo e tau mena moli. Ne tuhi mai foki e lautolu ko e puhala ke maeke he tagata ke kitia aki e mena ne tupu kua aoga lahi mahaki. Ko e tau hikihikiaga he fakaholoaga he magafaoa liga uka he magaaho fakapa. Ka e, kaeke ke fakamalolo fakalahi e tagata, kua maeke ia ia ke hiki ke he tuaga fou. Kaeke ke taute pihia, kua aoga lahi ke ua fakatatai e tautolu ha tautolu a tau tutuaga mo e falu ia lautolu ne nakai fai gagao e magafaoa, mo e manatu kua mukamuka lahi ha lautolu a moui mo e ‘kua nakai ni tonu e mena ia!’ Kua moli, nakai iloa he taha ko e heigoa e tau kavega he falu ne hahamo. Ko e tau Kerisiano oti kua moua e mafanatia he tau kupu a Iesu: “Kia o mai a mutolu ki a au, ko mutolu oti ne matematekelea mo e pehia he tau kavega; ko au foki ke okioki ai a mutolu.”​—Mataio 11:28.

FAKATOKATOKA E TAU MENA FAKAMUA

14. Maeke fefe ke fakatoka fakamitaki e tau mena fakamua?

¹⁴ Ke he fehagaiaga he gagao hagahaga kelea, kua mitaki lahi ke he magafaoa ke manatu e tau kupu omoomoi he agaga: “Ka e fakamau ai ni ke he tau pule tokologa.” (Tau Fakatai 15:22) Maeke nakai he tau tagata he magafaoa ke fakatutala auloa e mena ne tupu mai ai he gagao? Kua lata tonu moli ke taute pihia ke he liogi mo e hahaga atu ke he Kupu he Atua ma e takitakiaga. (Salamo 25:4) Ko e heigoa ka manamanatu ki ai he fakatutalaaga pihia? Mitaki, kua ha ha i ai e fahi fakaekekafo, tau tupe, mo e tau fifiliaga he magafaoa ke taute. Ko hai ka foaki e levekiaga pauaki? Lagomatai fefe he kaufakalataha he magafaoa ke lagomatai e levekiaga ia? To lauia fefe e tau fakatokatokaaga ia ne taute ke he tau tagata takitokotaha he magafaoa? To leveki fefe e tau manako fakaagaga mo e falu manako hana ne foaki leveki pauaki?

15. Ko e heigoa e lagomatai ne moua mai ia Iehova ma e tau magafaoa ne fai gagao kelea lahi?

¹⁵ Ko e liogi fakamakamaka ke he takitakiaga a Iehova, manamanatu fakahokulo ke he hana Kupu, mo e mumui fakamalolo ke he puhala ne fakakite mai he Tohi Tapu kua fua tumau ke molea e tau fakamonuinaaga ne amaamanaki a tautolu ki ai. Ko e gagao he taha tagata he magafaoa kua nakai fa mahani tumau ke malolo fakaku. Ka ko e falanaki ki a Iehova kua fa takitaki tumau ke he fakahikuaga mitaki lahi he ha tuaga. (Salamo 55:22) Ne tohia he salamo: “Ti toto hake ai au he hau a fakaalofa, Iehova na e. Ko e tau manamanatu loga he haku a loto kua fiafia ai au ha ko e fakamafanaaga mai ia koe.”​—Salamo 94:18, 19; kikite foki e Salamo 63:6-8.

LAGOMATAI E TAU FANAU

16, 17. Ko e heigoa e tau matakupu ka taute he magaaho ka fakatutala ai mo e tau fanau ikiiki e gagao he taha lafu?

¹⁶ Ko e gagao hagahaga kelea kua maeke ke fakatupu e tau mena vihi ma e tau fanau he magafaoa. Ti kua aoga lahi ke lagomatai he tau matua e tau fanau ke maama e tau manako ne fa tutupu mo e ko e heigoa ha lautolu ka taute ke lagomatai. Kaeke ko e tama e tagata ne gagao, kua lata e lafu ke lagomatai ke maama ko e fakamahomo he levekiaga ne moua he tagata ne gagao kua nakai pehe kua fakatote e fakaalofa ke he falu he tau fanau. Ka e, aua fakaata e fakavihia po ke fetoko ke tupu, kua lata e tau matua ke lagomatai e falu fanau ke taute e pipiaga fetataaki ko e taha ke he taha mo e moua e hofihofi he fakaalofa moli ka kaufakalataha a lautolu ke taute e tuaga ne tupu mai ha ko e gagao.

¹⁷ To fa mahani e tau fanau ikiiki ke mukamuka lahi ni ke fanogonogo kaeke kua hokotia e tau matua ke he tau mena he ha lautolu a logonaaga ke he tau fakamaamaaga loa mo e mata kehe hagaao ke he tau tutuaga fakaekekafo. Ti kua lata ke age falu fakamaamaaga ko e heigoa ne logona he tagata he magafaoa ne gagao. Kaeke ke kitia he tau fanau ne malolo kua taofi mai he kafo e tagata ne gagao ke ua taute e tau mena loga ne uta fakateaga noa e lautolu, liga to mitaki lahi ha lautolu a “fakaalofa ke he tau matakainaga” mo e ke “hofihofi noa e fakaalofa.”​—1 Peteru 3:8.

18. Maeke fefe e tau fanau lalahi ke lagomatai ke maama e tau mena vihi ne tupu mai he gagao, mo e liga aoga fefe e mena nei ki a lautolu?

¹⁸ Kua lata ke lagomatai e tau fanau lalahi ke mailoga e tuaga uka kua gahuahua mo e kua lata ke foaki mo e tau loto katoa ko e taha vala he tau tagata oti he magafaoa. Lafi ki ai e tau tupe ke he ekekafo mo e tau kaitalofa he fahi fakaekekafo ke totogi, kua nakai liga maeke he tau matua ke foaki ma e falu he tau fanau ke tuga ne manako a laua ki ai. To ita kia e tau fanau ha ko e mena nei mo e manatu kua tiaki a lautolu? Po ke to maama nakai e lautolu e tuaga ia mo e talia ke foaki mo e tau loto katoa ke he mena kua lata? Ko e laulahi he tau mena kua falanaki ni ke he puhala ne fakatutala aki e lekua mo e agaga ne fakahoko aki he magafaoa. Moli, ke he tau magafaoa loga ko e gagao he taha tagata he magafaoa kua lagomatai ke fakaako e tau fanau ke mumui ke he fakatonuaga a Paulo: “Aua neke manatu ha mena mo e fetoko mo e hula noa, ka kia igatia a mutolu mo e manatu he loto fakatokolalo kua mua e faoa oti kia ia. Aua neke takitokotaha mo e manamanatu ke he tau mena hana, ka e takitokotaha mo e manamanatu ke he tau mena he falu.”​—Filipi 2:3, 4.

KITEKITE FEFE KE HE TULUIAGA FAKAEKEKAFO

19, 20. (a) Ko e heigoa e tau kotofaaga ne lago ke he tau ulu magafaoa kaeke gagao taha tagata he magafaoa? (e) Pete ni nakai ko e tohi fakaekekafo, ko e puhala fe ne moua mai he Tohi Tapu e takitakiaga ke fehagai aki e gagao?

¹⁹ Ko e tau Kerisiano lagotatai kua nakai totoko ke he tuluiaga fakaekekafo kaeke kua nakai totoko atu ke he matafakatufono he Atua. Kaeke ke gagao taha tagata he magafaoa, kua fakamakutu a lautolu ke kumi lagomatai ke taofi aki e matematekelea he tagata ne mamahi. Ka e pete ni he pihia, kua ha ha i ai e fekehekeheaki he tau manatu fakaekekafo ne kua lata ke fuafua. Ke lafi ki ai, ko e tau tau nakai la leva, kua tupu fakaofo mai e tau gagao mo e tau gagao fiofio fou, mo e ko e loga he tau mena nei, kua nakai fai puhala tuluiaga kua talia ai. Pihia ni e tau kumikumiaga kua tonu kua uka lahi he falu a magaaho ke moua. Ko e heigoa, mogoia, he Kerisiano kua lata ke taute?

²⁰ Pete ni ko e taha he tau tagata ne tohia e Tohi Tapu ko e ekekafo mo e age he aposetolo ko Paulo e fakaakoaga aoga fakaekekafo ke he hana kapitiga ko Timoteo, ka ko e tau Tohiaga Tapu ko e takitakiaga he loto manamanatu mo e agaga, nakai ko e tohi fakaekekafo. (Kolose 4:14; 1 Timoteo 5:23) Ko e mena ia, ko e tau lekua he tuluiaga fakaekekafo, kua lata e tau ulu he magafaoa Kerisiano ke taute ha lautolu ni a tau fifiliaga lagotatai. Po ke neke logona e lautolu kua lata a lautolu ke moua e tau manatu he tau ekekafo kehekehe. (Fakatatai Tau Fakatai 18:17.) To manako moli a lautolu ke moua e lagomataiaga kua mua he mitaki ma e tagata gagao he magafaoa, mo e tokologa ne kumi e mena nei ke he tau ekekafo ne o tumau ki ai. Ko e falu ne logona e mafanatia ke he falu tuluiaga malolo tino kehe. Ko e mena nei kua uta foki ni ke he fifiliaga fakatagata. Ka e pete ni he pihia, kaeke ke taute e tau mena vihi he malolo tino, kua nakai tiaki he tau Kerisiano e ‘kupu he Atua ke eke mo hulu he ha lautolu a tau hui mo e maama ke he ha lautolu a puhala.’ (Salamo 119:105) Ko e mumui tumau ni a lautolu ke he tau puhala ne fakatoka he Tohi Tapu. (Isaia 55:8, 9) Ko e mena haia, ne tiaki ai e lautolu e kumi e tau lagatau mo e tau puhala he tau matutakiaga fakataulatua, mo e tiaki e lautolu e tau tuluiaga ne ekefakakelea e tau matapatu fakaakoaga he Tohi Tapu.​—Salamo 36:9; Gahua 15:28, 29; Fakakiteaga 21:8.

21, 22. Manamanatu fefe e taha fifine Asia ke he matapatu fakaakoaga he Tohi Tapu, mo e maeke fefe e fifiliaga ne taute e ia ke hako ke he mena ne tupu ki a ia?

²¹ Manamanatu la ke he mena ne tupu ke he fifine fuata i Asia. Nakai leva e mole he kamata a ia ke iloa e Tohi Tapu ha ko e fua mai he fakaako mo e taha he tau Fakamoli a Iehova, ti fanau maua e ia e tama fifine mo e hana mamafa ko e tolu mo e kuata ni e matapauna. Ne malipilipi e loto he fifine he magaaho ne tala age ai e ekekafo ki a ia to uka lahi e tama ke tupuaki e tino mo e to nakai maeke e tama ke fano. Ne tala age a ia ke he fifine ke age e tama ke he fahi fale gagao. Ko e tane hana kua nakai fai talahauaga tonu ke he mena ne tupu. Ko hai hana ka fuluhi ki ai?

²² Ne pehe a ia: “Kua manatu e au he fakaako mai he Tohi Tapu ‘ko e fanau ko e mena moua ia mai ia Iehova, ko lautolu ne fanau mai ko e taui ia mai ia ia.’” (Salamo 127:3) Ne fifili a ia ke uta e “mena moua ia” ki kaina mo e leveki ai ki a ia. Kua uka lahi e tau mena he magaaho fakamua, ka e ha ko e lagomatai mai he tau kapitiga Kerisiano he fakapotopotoaga he tau Fakamoli a Iehova he matakavi ia, kua maeke he fifine ke leveki mo e taute e tama aki e tau levekiaga pauaki ne kua lata. Hogofulu ma ua e tau tau fakamui, ne fano e tama he tau feleveiaaga he Fale he Kautu mo e olioli he fakalataha mo e falu he fanau i ai. Kua talahau he matua fifine: “Kua fakaaue lahi au ha kua omoi he tau matapatu fakaakoaga he Tohi Tapu au ke taute e mena kua hako. Ne lagomatai he Tohi Tapu au ke taofi e manamanatuaga maama ki mua he Atua ko Iehova mo e nakai momoko ke nofo e mena ia mo au ke he tau aho oti he haku a moui.”

23. Ko e heigoa e fakamafanaaga ne mai he Tohi Tapu ma e tagata gagao mo lautolu ne leveki a ia?

²³ Ko e gagao to nakai nofo tukulagi mo tautolu. Ne tuhi atu e perofeta ko Isaia ke he magaaho ka “nakai pehe mai foki taha kua nofo ai, Kua gagao au.” (Isaia 33:24) Ko e maveheaga ia to fakamoli ai he lalolagi fou ka hoko mafiti mai. Ka e taha e mena, ato hoko atu ke he magaaho ia, kua nonofo ni a tautolu mo e gagao mo e mate. Kua fiafia ai, ha kua mai he Kupu he Atua ki a tautolu e takitakiaga mo e lagomataiaga. Ko e tau matapatu fakatufono ke he puhala moui ne moua mai he Tohi Tapu kua tumau, mo e tokoluga hake ke he tau manatu ne fa hikihiki tumau he tau tagata nakai mitaki katoatoa. Ko e mena haia, ne talitonu e tagata pulotu mo e salamo ne tohia: “Kua hakohako e fakatufono a Iehova, kua liuaki mai e agaga; kua fakamoli e talahau a Iehova, kua fakailoilo a lautolu kua goagoa. . . . Ko e tau fakafiliaga foki a Iehova kua moli ia, mo e tonu fakaoti. . . . Kua lahi foki e totogi ka taofi ki ai.”​—Salamo 19:7, 9, 11.