Kakano Lahi Kia Hau a Fakamatala Atu?
1 Ko e heigoa e kakano he tau kupu a Iesu ia Mataio 24:14 mo e 28:19, 20 ki a koe? Ha ko e tau tutaki he tama he Atua, kitia nakai e tautolu e manako mafiti he nakai ni ke fakapuloa e “tala mitaki,” ka e pihia foki he taute tutaki ki a lautolu kua talia? Ko e taute he poakiaga nei kua tuku e kakano moli ke he ha tautolu a fekafekauaga he fonua. To o a tautolu ke he tau tagata ke nakai ni foaki e tau tohi, ka e pihia foki he fakatutala ke he Tohi Tapu mo lautolu. Ko e matapatu foliaga ha tautolu ke kamata e tau fakaakoaga Tohi Tapu mo e tau tagata kua fakakite foki e fiafia tote ke he fekau he Kautu.
2 Kua aoga lahi e aga ha tautolu. Loto moli nakai a tautolu ke taute tutaki ma Keriso? Ne fakakite nakai e tautolu ki a Iehova he liogi e manako ha tautolu ke fai fakaakoaga Tohi Tapu? Kua kautu lahi e talahau fakahako ke he falu a matakainaga. Falu kua talahau ke he tagata he kaina: “Kua o mai a mautolu ke foaki e fakaakoaga Tohi Tapu nakai fai totogi ti mautali a mautolu ke foaki ki a koe e fakatataaga ke he puhala ke taute aki.”
3 Mailoga e tautolu, moli, to nakai talia oti he tau tagata ke fai fakaakoaga Tohi Tapu. Fa mahani ko lautolu kua tutala a tautolu ki ai kua nakai fakaaue ke he fekau he Kautu. Moli, ko e tokologa he matakavi ha tautolu ka fakatata e aga mateafu ke he tau mena fakaagaga. Taute kia he mena ia a tautolu ke fiu? Maeke kia a tautolu ke fakateaga po ke mateafu e fakafeleveiaaga ha tautolu? Ko e fakafeleveiaaga mitaki he manamanatuaga kua lafi fakalahi ke he fekafekauaga fiafia mo e fua loga. Kua fakamalolo e Iesu e feleveiaaga mitaki he fekau atu e ia hana tau tutaki. Ne foaki e ia e tomatomaaga nei: “Ko e fale ke huhu atu a mutolu ki ai, kia pehe atu fakamua a mutolu, Kia monuina e faoa nai.” (Luka 10:5) Ne nakai fakafili mua ko e fiafia po ke nakai fiafia e tagata he fale. Maeke fefe ia tautolu ke fakakite e aga mitaki he fekafekauaga ha tautolu he fonua?
4 Ne fita he mailoga ko lautolu kua kautu lahi he taute tutaki ko lautolu kua fiafia ke he tau tagata nakai ke he tau foakiaga he tau tohi. Kua fiafia a lautolu ke he tau tagata takitaha kua feleveia mo lautolu, he kitia kua ligaliga a ia mo tutaki ha Keriso. Kua makai a lautolu ke fakatutala mo e tagata ke maeke ke iloa tonu ha fe e vala he fekau he Kautu kua futiaki lahi. Kua haia oti he porosua Manako e tau vala tala kehekehe ka fakaaoga ke kamata aki e fakaakoaga Tohi Tapu. Moli, he tuku e laliaga ke taute tutaki ka ta mai e tau palepale mo e tau monuina loga ki a tautolu. To kakano lahi e fakamatala atu ha tautolu!