Ko e Heigoa Hau Ka Talahau ke he Tagata Hinitu?
1 Kua fita ni he iloa e koe, tokologa e tau tagata Hinitu kua nonofo ke he tau motu kehekehe, pihia foki ke he motu nei. Kakano e mena nei to fakahiku ni a koe ke feleveia mo e tagata Hinitu ke he fakatokaaga he hau a fekafekauaga. Ka pihia, to fehagai fefe a koe mo e manako nei?
2 Tokaloto e Tau Manatu Nei: Kua pehe e tau misionare ne kautu he fakamatala ke he tau Hinitu kua nakai lata ke taute e fakaakoaga hokulo faka-Hinitu ke maeke ke foaki e fakamatala kua lauia mitaki. Ko e fakafeleveia mukamuka mo e fakailoilo he kupu moli kua fa moua e tali mitaki. Ole ke tutala fakamua ke he ulu he magafaoa. Ka talia fiafia a ia, to mukamuka lahi ke fakamatala ke he falu tagata he magafaoa. Ke he kamataaga ua talahau ko e ta mai a koe he fekau kua mua atu ke he mena kua talitonu e tagata he kaina po ke manako a koe ke fakatutala ke he Atua moli tokotaha po ke tau tohi tapu kua leva tigahau. Ha kua tokologa e tau Hinitu kua talahau ko e Tohi Tapu ko e tohi he Fahi Lalo, kia fakamalolo hifo e koe e fili tagata he fakamaama kua nakai fakalugaluga ai e pule he taha motu po ke pule malolo he taha vahega tagata ke he falu.
3 Fakaaoga e Tau Kanavaakau Hako: Ua e porosua kua tauteute pauaki ke lata mo e tau Hinitu. Ko e Why Should We Worship God in Love and Truth? kua lolomi faka-Kutarati mo e Punutapi. Ko e Our Problems—Who Will Help Us Solve Them? kua lolomi ai ke he 11 foki e vagahau Initia. Moua ua ai ke he faka-Peritania. Ko e porosua “Kitiala, Kua Fakafou Tuai e Au e Tau Mena Oti” mo e Ko e Heigoa e Manako he Atua ma Tautolu? kua moli foki ke lauia mitaki ka fakamatala ki a lautolu kua ha he feakiaga Hinitu. Ko e porosua Manako mo e tohi Iloilo kua maeke ke fakaaoga fakamitaki ai ke taute e tau fakaakoaga Tohi Tapu.
4 Fakatu e Femahaniaki: Nakai uka ke moua e femahaniaki mo e tau Hinitu. Talitonu a lautolu kua nonofo a tautolu he vaha ka hokotia e mahani kelea ke he tapunu ti uta kehe he Atua e lalolagi mo e tau mena vihi ha i ai he puhala he malaia lahi ka mui mai he vaha he kupu moli. Maeke ia koe ke kitia e mukamuka he tau taofiaga nei ke fakatatai ke he tau fakaakoaga he Tohi Tapu hagaao ke he tau aho fakahiku, ko e matematekelea lahi, mo e hauaga he lalolagi fou. Ha kua tokologa e tau Hinitu kua onoono ke he moui ko e fakatoka maiaga he tau mena vihi ne kua nakai fai tului, kua fiafia a lautolu ke he tau mataulu tala he moui magafaoa, holifono, mo e haohao mitaki, mo e mena ka tupu he mate. Hanei ua e fakataiaga kua liga ke fakaaoga e koe.
5 Liga futiaki he mena nei e tagata tane fai magafaoa:
◼ “Ahiahi au ke he tau tagata kua tupetupe hagaao ke he tuaga he moui magafaoa he tau motu loga he vaha nei. Ko e heigoa ka lagomatai aki e magafaoa ke tumau e fakalataha he manatu e koe? [Fakaata ma e tali.] Iloa he falu tagata e talahauaga he tau tohiaga tapu Hinitu hagaao ke he magafaoa, ka e nakai fai magaaho ke fakatatai e mena nei mo e talahauaga he Tohi Tapu ke he vala tala. Manako au ke tutala mo koe ke he manatu he Kolose 3:12-14.” He mole atu e totou e kupu tohi, fakakite ke he tagata he kaina mai he veveheaga 15 he tohi Iloilo mo e talahau: “Fiafia lahi au ke fakaaoga e magaaho tote ke totou e veveheaga nei mo koe.”
6 Liga fanogonogo e tagata fuata ke he mena nei:
◼ “Nakai fakauaua kua talia a koe ke he Atua. Ko e heigoa e finagalo he Atua ma tautolu he manatu e koe?” Fakaata ma e tali. Ti totou e Kenese 1:28, ti talahau: “He tau matakavi loga he lalolagi kua puke he tau tagata mo e kua lofia ai he tau mena vihi. To mautali nakai e Tufuga ke lagomatai a tautolu ke fakamafola e tau mena vihi ha tautolu he manatu e koe?” He logona ai e tali, fuluhi ke he tohi kua latatonu.
7 Olioli e Tau Fua Mitaki: Ne fina atu ai e tagata tane Hinitu ne 22 e tau he moui ke he matakainaga fifine ne fakamatala ke he makete mo e ole ai ma e fakaakoaga Tohi Tapu. Ne fakamaama e ia ke he matakainaga fifine he valu e tau fakamua atu ne logona e ia e fakatutalaaga Tohi Tapu he matua fifine hana mo e matakainaga fifine. Pete ni kua nava a ia ke he tau tali aoga he Tohi Tapu ke he tau mena vihi he tagata, ne nakai fiafia hana matua fifine ti logona e ia ne tote agaia a ia ke iloa e kupu moli. Mogonei kua fuata lahi a ia, kua manako a ia ke iloa lahi atu. Ne nakai moumou magaaho e fuata tane. He 23 ni e aho, ne fakakatoatoa e ia hana fakaako he tohi Iloilo, ti fa ni e mahina he mole e feleveia a ia mo e matakainaga fifine he makete, ne ole a ia ke papatiso!
8 Ne kamata he matakainaga tane e fakaakoaga mo e tagata tane Hinitu ne feleveia mo ia he tuleni. Kua moua he tagata tane e tau mena vihi he fakamauaga hana. Inu kava goagoa foki a ia. Ne talia he tagata tane ke fina atu e Fakamoli ki a ia mo e tutala ke he tomatomaaga he Tohi Tapu hagaao ke he moui magafaoa. Kua futiaki he tau fakaakoaga he Tohi Tapu ke he tau mahani a ia, ti talia e ia e fakaakoaga Tohi Tapu. Ti kamata ai a ia mo e magafaoa hana ke o atu auloa ke he tau feleveiaaga. Fakahiku ne talahau e lautolu e kupu moli ke he tau kapitiga mo e tau magafaoa. Hoko mai ai, toko ono he tau tagata nei ne talia e kupu moli!
9 Ko e finagalo he Atua ke “fakamomoui e tau tagata oti kana, mo e hokotia a lautolu he maama ke he kupu moli.” (1 Timo. 2:4) Katoa ai mo e tau tagata tane mo e tau fifine kua talahau ko e lotu nakai Kerisiano, tuga e faka-Hinitu. Ka fai Hinitu e matakavi hau, ko e ha he nakai ahi fakamafiti a lautolu mo e fakaaoga falu lagomataiaga ne fakakite mai he vala tala nei?