Lagomatai a Lautolu kua Nakaila Mautali ia ma e Tohi Fakaako he Tohi Tapu
1. To fiafia nakai e tau tagata oti ke he tohi Fakaako he Tohi Tapu he kamataaga? Fakamaama.
1 Ke maeke e taha tagata ke tapuaki ki a Iehova, kua lata a ia ke iloa e tau fakaakoaga he Tohi Tapu. Ka ko e falu kua fakalataha a lautolu ke he lotu ne nakai faka-Kerisiano ti nakai manamanatu ko e Tohi Tapu ko e Kupu he Atua. Ko e falu kua nakai talitonu ke he Atua ti nakai fakalilifu a lautolu ke he Tohi Tapu. Ko e tau koloa fe kua lagomatai lahi ki a lautolu kua nakai hihiga he kamataaga ke talia e tohi Fakaako he Tohi Tapu? Ko e tau puhala i lalo kua fakavē ke he tau talahauaga he tau tagata fakailoa mai he kavi 20 e motu kehekehe.
2. Ka tala mai taha tagata ki a tautolu kua nakai talitonu a ia ke he Atua, ko e heigoa ha tautolu kua lata ke lali ke iloa, mo e ko e ha?
2 Lautolu kua Nakai Talitonu ke he Atua: Ka pehē taha tagata kua nakai talitonu a ia ke he Atua, kua aoga ke iloa e kakano. Pihia kia ha kua talitonu a ia ke he tupumainoa? Kua galo kia e tua haana ke he Atua ha ko e nakai fakafili tonu he lalolagi po ke fakavaia he lotu? Kua tupu mai kia a ia he motu ne pa malu ke talitonu ke he Atua? Liga nakai fakatikai katoatoa e ia e Atua, ka kua nakai logona hifo e lata ke talitonu ki a Ia. Tokologa e tagata fakailoa ne mailoga ko e hūhū, “Pihia tumau kia e logonaaga haau?” kua omoi e tagata ke fakamaama e manatu haana. Fanogonogo mo e nakai fakatauhele. Ka maama e tautolu ko e ha ne nakai talitonu e tagata ke he Atua, to iloa e tautolu e puhala ke tali atu ai mo e tohi fe ka foaki.—Fakatai 18:13.
3. Fakakite fēfē e tautolu e fakalilifu ke he tagata mo e tau taofiaga haana?
3 Ka tali atu ai, fakaeneene ke ua taute e tagata ke logona hifo kua totoko e tautolu e manatu haana. Ko e puhala nei kua moua mai he Tau Faahi Kaufakalataha: “Kua aoga lahi ke fakalilifu e atāina he tagata ke fifili e mena haana ke talitonu ki ai. He nakai lali ke mua he taufetoko, kua mitaki lahi ke talahau e hūhū ke manamanatu e tau tagata ki ai ti moua ni e lautolu e tau tali.” He mole e fanogonogo ke he talahauaga he tagata he fale, taha e leveki fai fano ne tali fakakū he hūhū age, “Kua manamanatu nakai a koe neke liga maeke ke pihia?”
4. Lagomatai fēfē e tautolu a lautolu ko e tau Puta?
4 Kua matakehe lahi e matakupu hagaao ke he Atua ke he tokologa ne talitonu ki a Puta. Ne fiafia falu tagata fakailoa i Peritania ke fakaaoga e porosua Lasting Peace and Happiness—How to Find Them ka fakamatala ki a lautolu nei. He mole e fakafeleveia atu, kua fakatutala a lautolu ke he vala “Fai Tufuga Nakai ne Tokoluga Mua Ue Atu?” mo e vala “Ko e Tohi ke Monuina e Tau Tagata Oti.” Fai magaaho he mole, liga maeke ia lautolu ke fakakite age e tohi Tohi Fakaako he Tohi Tapu mo e tala age ke he tagata he fale, “Pete ka nakai talitonu a koe ke he Atua, kua aoga ke fakaako ke he Tohi Tapu ha kua loga lahi e tau puhala aoga i loto.” Taha e paionia he Tau Faahi Kaufakalataha ne gahua he fonua he tau Saina ne pehē: “Tokologa e tagata he fonua ha mautolu ne fiafia ke totou. Ti fa oti e tau tohi ha lautolu he totou ato liliu atu a mautolu. Ka e liga nakai maama ia lautolu e manatu ke fakaako e Tohi Tapu. Ti fiafia au ke foaki e porosua Tala Mitaki he aahi atu fakamua haaku ha kua tohi ai he puhala ke fakalagalaga ke tutala.” Ko e leveki takaiaga ne ahiahi atu ke he takaiaga vagahau Saina he Tau Faahi Kaufakalataha ne talahau kua mitaki ke fakakite e tohi Fakaako he Tohi Tapu he aahi atu fakamua. Ka e liga mitaki ke kamata fakaako he veveheaga 2, ha kua tutala ai ke he Tohi Tapu ka e nakai kamata he veveheaga 1, ne tutala ke he Atua.
5. Ko e ha kua aoga ke fakauka?
5 Kua fai magaaho ato feaki he tagata e tua ke he Atua, ti aoga ke fakauka. Ko e tau fakatutalaaga ha tautolu he mogo fakamua kua liga nakai omoomoi e tagata ke talia na fai Tufuga. Ka e liga fai magaaho he mole to talia e ia na liga maeke ke pihia, po ke liga pehē a ia kua maama ia ia e kakano ati pihia e talahauaga he falu.
6. Ko e ha falu tagata ne liga nakai fiafia ke he Tohi Tapu?
6 Tau Tagata ne Nakai Fiafia po ke Nakai Falanaki ke he Tohi Tapu: Ka e fa mahani, ko e tagata ne talia na liga fai Atua kua nakai fiafia ke he tau fakaakoaga he Tohi Tapu ha kua nakai talitonu a ia ko e Kupu he Atua. Liga nofo a ia he motu nakai Kerisiano mo e kua fakamatutaki e ia e Tohi Tapu mo Kerisitenitome. Po ke liga nofo a ia he motu Kerisiano ne hihiga lahi ke he gahua tupe ti nakai manatu to aoga e Tohi Tapu ki a ia. Lagomatai fēfē e tautolu e tau tagata pihia ke feaki e fiafia ke he Tohi Tapu mo e fakahiku ke talia ke fakaako e tohi Fakaako he Tohi Tapu?
7. Ko e heigoa e puhala mitaki ke fakaohooho e fiafia ke he Tohi Tapu?
7 Ko e la ofisa i Heleni ne tohi: “Ko e puhala mitaki lahi ke lagomatai e tau tagata ne nakai fiafia ke he Tohi Tapu ko e veveu e Tohi Tapu ti fakakite age e talahauaga i loto. Tokologa e tagata fakailoa ne mailoga kua mua atu e malolō he fakaohoohoaga he fekau he Tohi Tapu ke he loto he tagata ke he tau mena ka talahau e lautolu. (Hepe. 4:12) He kitia e higoa he Atua i loto he Tohi Tapu ne lagomatai e tokologa ke feaki e manako ke kikite ki loto he Tohi Tapu.” Ko e la ofisa i Initia ne tohi: “Ko e tala mooli ke he moui mo e mate kua fiafia lahi e tau Hinitū ki ai—ti pihia foki ke he maveheaga he Tohi Tapu ka nakai mavehevehe ha ko e onoono hifo ke he matahigoa he tagata.” He talahau e tau lekua he matakavi, kua fa moua he tau tagata fakailoa e magaaho ke fakakite age e talahauaga he Tohi Tapu ke he puhala ka fakahako he Kautu he Atua e tau lekua.
8. Ko e heigoa ha tautolu ka talahau ke he tau tagata ne nakai fiafia ke he Tohi Tapu ha ko Kerisitenitome?
8 Ka nakai fiafia e tagata ke he Tohi Tapu ha ko Kerisitenitome, fakailoa ki a ia ko Kerisitenitome ne fakahehē e Tohi Tapu mo e tau fakaakoaga i loto. Ne tohi he la ofisa i Initia: “He falu magaaho kua lata ia tautolu ke lagomatai e tau tagata ke kitia kua nakai pule e tau lotu ke he Tohi Tapu.” Talahau e lautolu kua fa fiafia e tau Hinitū ke he vala 4 he porosua What Is the Purpose of Life? How Can You Find It?, ne fakamaama e puhala kua lali e tau lotu ke takiva mo e moumou e Kupu he Atua. Ne tala age e paionia i Parasili ke he tau tagata: “Ko e ha ne nakai kumikumi atu foki hagaao ke he tau matakupu i loto he Tohi Tapu? Tokologa e tagata kua taute e mena nei mo e loto fiafia, mo e nakai fai fakavēaga fakalotu. Liga ofo a koe he tau mena ka iloa e koe.”
9. Ko e ha kua nakai lata ia tautolu ke fakaoti he naia ka nakai fiafia e tagata ke he tau fakaakoaga he Tohi Tapu he mogo fakamua?
9 Kua kitekite a Iehova ke he tau loto oti. (1 Samu. 16:7; Fakatai 21:2) Kua futia mai e ia a lautolu kua loto hako ke he tapuakiaga mooli. (Ioane 6:44) Tokologa ia lautolu ne pihia ne nakaila fakaako ia hagaao ke he Atua po ke tote lahi e onoonoaga ke he Tohi Tapu. Ko e gahua fakamatala ha tautolu ati fakaatā e magaaho ke “fakamomoui e tau tagata oti kana, mo e hokotia a lautolu he maama ke he kupu moli.” (1 Timo. 2:4) Ko e mena ia, ka nakai fiafia e tagata ke he tau fakaakoaga he Tohi Tapu he aahi atu fakamua, kia nakai fakaoti he naia! Fakaaoga taha tohi ne moua ke he vagahau haau ke fakalagalaga e fiafia ha lautolu. Fakahiku ai, to liga maeke ia koe ke hiki atu e fakatutalaaga ke he tohi fakaako Tohi Tapu ha tautolu, ko e tohi Ko e Heigoa ne Fakaako Moli he Tohi Tapu?
[Puha he lau 4]
Ka pehē e tagata he kaina kua nakai talitonu a ia ke he Atua, lali pehē:
• Hūhū, “Pihia tumau kia e logonaaga haau?” ke iloa e kakano.
• Kaeke ko e Puta a ia, fakaaoga e porosua Lasting Peace and Happiness—How to Find Them, lau 9-12.
• Ka talitonu a ia ke he tupumainoa, liga to lagomatai e tau mena nei:
Tau fufuta he Awake! “Tufuga Kia?”
Ko e vitiō The Wonders of Creation Reveal God’s Glory
Tau porosua A Satisfying Life—How to Attain It, vala 4; Was Life Created?; mo e The Origin of Life—Five Questions Worth Asking
• Kaeke kua galo e tua haana ke he Atua ha ko e nakai fakafili tonu mo e matematekelea, to liga lagomatai e tau mena nei:
Ko e tohi Is There a Creator Who Cares About You?, veveheaga 10
Tau porosua Kua Leveki Moli Kia he Atua a Tautolu?, vala 6, mo e Ko e Heigoa e Kakano he Moui?, vala 6
• Hiki atu ke he tohi Fakaako he Tohi Tapu he magaaho ka talia he tagata he kaina na liga fai Atua. To liga mitaki ke kamata he veveheaga 2 po ke taha matakupu kua felauaki mitaki mo ia.
[Puha he lau 5]
Lali pehē kaeke kua nakai talitonu e tagata he kaina ke he Tohi Tapu:
• Fakatutala ke he veveheaga 17 mo e 18 he tohi Life—How Did It Get Here? By Evolution or by Creation?
• Ma e tau Hinitū, fakaaoga e porosua Why Should We Worship God in Love and Truth?
• Ma e tau Iutaia, fakaaoga e porosua Will There Ever Be a World Without War?, lau 3-11.
• Fakatutala ke he tau mena aoga he muitua ke he tau matapatu fakaakoaga he Tohi Tapu. Ko e tau koloa ka fakaaoga e koe ke fakakite ke he taha tagata e tau mena aoga he Tohi Tapu hanei:
Tau fufuta he Awake! “Lagomatai ma e Magafaoa”
Ko e vitiō The Bible—Its Power in Your Life
Tau porosua Tala Mitaki Mai he Atua!, fakaakoaga 9 mo e 11; A Book for All People, lau 22-26; mo e A Satisfying Life—How to Attain It, vala 2
Ma e tau Puta, fakaaoga e porosua The Pathway to Peace and Happiness, lau 3-7.
Ma e tau Musilimi, fakaaoga e porosua Real Faith—Your Key to a Happy Life, vala 3.
Ka fakamatala a koe he matakavi ne onoono hifo ke he Tohi Tapu, liga mitaki ke nakai fakakite age tuai e punaaga he tau talahauaga pulotu haau kua fakatutala mo ia ato lagaloga e ahiahi atu haau.
• Fakamaama e puhala kua fakamooli e tau perofetaaga he Tohi Tapu. Ko e tau koloa ka fakaaoga e koe:
Ko e vitiō The Bible—Accurate History, Reliable Prophecy
Ko e porosua A Book for All People, lau 27-29
• Hiki atu ke he tohi Fakaako he Tohi Tapu he mogoia ni ka hūhū e tagata ke he tau fakaakoaga he Tohi Tapu he tau matakupu kehekehe.
[Puha he lau 6]
Ka pehē e tagata he kaina: “Nakai talitonu au ke he Atua,” liga pehē a koe:
• “Maeke nakai ke fakamaama fakakū atu e au e mena ati talitonu au na fai Tufuga?” Ti tutala ke he falu manatu mai he tohi Reasoning, lau 84-86, po ke taute e fakatokaaga ke liu atu ke ta atu e tohi ne fiafia a koe ke totou.
• “Ka e kaeke ke fai Atua, to manako a koe ke fēfē a ia?” Tokologa e tagata he tau kaina ne tali to futia a lautolu ke he Atua he fakaalofa, fakafili tonu, mo e fakaalofa hofihofi noa, mo e nakai fakamailoga tagata. Fakakite age ki a ia mai he Tohi Tapu kua ha ha he Atua e tau aga ia. (Liga maeke foki ke fakaaoga e veveheaga 1 he tohi Fakaako he Tohi Tapu, kamata he paratafa 6.)
Ka pehē e tagata he kaina: “Nakai talitonu au ke he Tohi Tapu,” liga pehē a koe:
• “Tokologa e tagata ne pihia foki e logonaaga. Falu ne manatu kua nakai ko e tohi fakasaiene e Tohi Tapu po ke kua nakai aoga e tau puhala he Tohi Tapu. Ka kua totou nakai e koe e Tohi Tapu? [Fakaatā ma e tali. Ti fakakite age e kamataaga he lau 3 he porosua A Book for All People, ti foaki age ki a ia.] Tokologa ne fakaheu e Tohi Tapu ha kua fakahehē he lotu e tau fakaakoaga i loto. Ka liu mai au, fiafia au ke fakatutala ke he fakatai he lau 4 mo e 5.”
• “Tokologa e tagata ne pihia foki e onoonoaga. Maeke nakai au ke fakakite atu taha mena ne fiafia lahi au ke he Tohi Tapu? [Totou Iopu 26:7 po ke Isaia 40:22, ne fakakite kua hakotika fakasaiene e Tohi Tapu.] Kua pulotu foki e tau talahauaga he Tohi Tapu ke lagomatai aki e tau magafaoa. Ka liu mai au, manako au ke fakakite atu taha fakataiaga ki a koe.”
• “Fakaaue he tala mai e manatu haau. Kaeke kua tohia mooli he Atua e tohi ma e tau tagata, ko e heigoa ka liga ha ha i loto he manatu e koe?” Ti fakakite age ke he tagata e taha mena mai he Tohi Tapu ne lautatai mo e talahauaga ia haana.