To Moua Mai Fe e Fiafia Moli?
TOKOLOGA e tau tagata ne manatu to moua e fiafia ha ko e tau koloa tino. Ka e kua a koe? Pete ni kua fakalataha moli e tau mena he tino ke he ha tautolu a fiafia, kua nakai fakamoli ai; kua nakai ati hake foki he tau mauokafua he tino e tua po ke fakapuke e tau manako ke he tau mena fakaagaga.
I loto he hana Lauga he Mouga, ne talahau a Iesu Keriso: “Uhoaki a lautolu ne [“manako ke he tau mena fakaagaga,” NW]; ha ko e mena eke ma lautolu e kautu e lagi.” (Mataio 5:3) Ne talahau foki a Iesu: “Kia leveki e mutolu a mutolu neke velevelemena; ha ko e mena nakai moui taha he loga hana tau mena ha i ai.”—Luka 12:15.
Tokologa ne kumi e fiafia he fakalataha atu ke he mahani fakatane mo e fifine ne fakatapu mo e falu he “tau gahua he tino.” (Kalatia 5:19-21) Ka e ke he ha mena ni, ko e hula ke he tau manako kelea to nakai ta mai e fiafia moli mo e tukulagi. Kua moli, ko lautolu ne taute e tau mena pihia to nakai moua e Kautu he Atua.—1 Korinito 6:9, 10.
Ko e falu kua kumi hifo ki a lautolu ni ke he ha lautolu a kumiaga ma e fiafia he lali ke ati hake hoko lautolu ni a lilifu fakatagata. Ko e tau laperi mo e tau fale koloa toka tohi kua pukeina he tau tohi lagomatai fakatagata, ka kua nakai ta mai he tau tohi ia ke he tau tagata e fiafia tukulagi. Ti, to moua e tautolu, mogoia, i fe e fiafia moli?
Ke fiafia moli ai, kua lata ia tautolu ke mailoga ha tautolu a manako ke he tau mena fakaagaga pauaki. Ne talahau a Iesu: “Uhoaki a lautolu ne manako ke he tau mena fakaagaga.” Kua moli, ko e mena aoga tote ki a tautolu ke maama e manako nei ka e nakai taute ha mena hagaao ki ai. Ke fakatai: Ko e heigoa ka tupu ke he tagata poitufi loa ne kaumahala he magaaho fakamui ke fakanogonogo ke he hana manako he tino ma e magavai? Nakai kia to nakai leva ti fehagai a ia mo e magomago e tino mo e falu he tau hagahaga kelea ne fua mai? Ke tuga ia, kaeke ke kaumahala a tautolu ke fanogonogo ke he ha tautolu a manako ma e tau mena kai huhua fakaagaga, to fakahiku a tautolu ke fifigo fakaagaga. To takitaki atu e mena nei ke galo e olioli mo e fiafia.
Ne mailoga katoatoa e Iesu hana manako ke he tau mena fakaagaga, he fakatumau ke kumikumi mo e manamanatu fakahokulo atu ke he Kupu he Atua. Kua mukamuka ia ia ke moua mo e totou e tau vala he Tohiaga Tapu, mo e fakaako e ia e falu ke taute pihia foki. (Luka 4:16-21; fakatatai Efeso 4:20, 21.) Ne fakatatai foki e Iesu e tauteaga he finagalo he hana Matua he lagi aki e mena kai. Kua ta mai he tauteaga he finagalo he Atua ki a ia e fiafia lahi.—Ioane 4:34.
E, kua nakai moua e fiafia moli ha ko e tau koloa he tino; nakai foki fua mai e fiafia mai he fekafekau ke he tino hala. Ko e fiafia moli ko e tuaga he loto, ne fakave ke he tua moli mo e fakafetuiaga mitaki mo e Atua ko Iehova. Kua lata tonu mogoia, ne lologo e salamo ko Tavita: “Uhoaki e motu kua eke a Iehova mo Atua ha lautolu.”—Salamo 144:15e.
[Fakatino he lau 20]
Ko e tua mo e fakafetuiaga mitaki mo e Atua ka ta mai ki a koe e fiafia moli