Nofo he “Maga kua Eke mo Huaga” mo e Moui!
“Ko e mena lata ke nofo a ia ke he maga kua eke mo huaga hana, ato mate e ekepoa ne mua.”—NUMERA 35:28.
1. Ko hai e Tagata kua eke ke lukutoto, mo e ko e heigoa kua tata lahi ke taute e ia?
KO E Tagata kua eke ke lukutoto a Iehova, ko Iesu Keriso, kua amanaki ke tau mai. Fakalataha mo e hana a tau matakau agelu, ko e Tagata kua eke ke lukutoto nei to nakai leva to tau atu ki a lautolu ne fakamaligi toto ka e nakai tokihala. E, to taute a Iesu ke eke mo Fakafiliaga he Atua he magahala he ‘matematekelea lahi’ ne fa e vave he hau. (Mataio 24:21, 22; Isaia 26:21) He mogoia to fakafehagai ai e tau tagata mo e ha lautolu a fakamaligi toto.
2. Ko e heigoa e matakavi moli he huaga, mo e ko e heigoa e tau huhu ne kua lata mo e tau tali?
2 Ko e puhala ke he haohao mitaki ko e finaatu he hala ke he maga kua eke mo huaga fakatai mo e poi ma e hana a moui! Kaeke kua fakaata ai ke he maga, kua lata he tagata hola ke nofo i ai, ha ko e nofoaga moli ni a ia ke hu ai. Ka e liga to manamanatu a koe, ‘Ha kua nakaila keli e tautolu ha tagata, kua fakamaligi toto moli ka tautolu? Ko e ha ko e Tagata kua eke ke lukutoto a Iesu? Ko e heigoa e maga kua eke mo huaga he vaha fou nei? Kua maeke nakai ha tagata ke moua e haohao mitaki ka toka e nofoaga ia?’
Kua Agahala Moli ka Tautolu?
3. Ko e heigoa ne fakakite mai he Matafakatufono faka-Mose ka lagomatai a tautolu ke kitia ko e kau auloa e tau piliona he lalolagi ke he fakamaligi toto?
3 Ko e kikite atu ke he Matafakatufono faka-Mose ka lagomatai a tautolu ke kitia e tau piliona he lalolagi ne fakalataha ke fakamaligi toto. Ne tuku he Atua ke he tau Isaraela e matagahua auloa he fakamaligi toto. Kaeke kua moua ai e taha tagata ne mate ka e nakai iloa ko hai ne kelipopo a ia, kua taute he tau ikifakafili ke fafati e mamao he tau maga ne agagai mai ke kumi e maga ne tata lahi ki ai. Ke uta kehe e hala, kua lata he tau motua he maga fakamaligi toto ia ke papaki e ua he povi tote, nakaila fakagahua ia he pahua tafe vai nakai gahua. Kua taute e mena nei i mua he tau ekepoa Levi ‘nukua fifili e Iehova a lautolu ke uta kehe e taufetoko he tau tā oti.’ Kua holoholo he tau motua he tau maga ha lautolu a tau lima ki luga he povi mo e talahau: “Nakai fakamaligi ai he tau lima ha mautolu e toto nai, ti nakai kitia ai foki ha mautolu a tau mata. Iehova na e, kia fakamagalo mai e koe hau a motu ko Isaraela, ne laveaki mai ai e koe; ti aua neke tuku mai ai e toto he tagata nakai hala ke he hau a motu ko Isaraela.” (Teutaronome 21:1-9) Kua nakai manako a Iehova ke takiva aki e toto e motu a Isaraela po ke tau tagata i ai ke fua e fakamaligi toto kauauloa.
4. Ko e heigoa e talahauaga he mahani fakamaligi toto ne ha ha ia Papelonia Lahi?
4 E, kua ha ha i ai e fakamaligi toto kauauloa, po ke kaufakalataha. Manamanatu la ke he fakamaligi toto ne mua atu ne ha ha i luga a Papelonia Lahi, ko e kautu he tau lotu fakavai he lalolagi. Ka e ha, kua konahia a ia ke he toto he tau fekafekau ha Iehova! (Fakakiteaga 17:5, 6; 18:24) Kua talahau e tau lotu a Kerisitenitome ke mumuitua ke he Iki he Mafola, ka e ko e tau felakutaki, tau fakafiliaga he tau lotu, mo e tau matakautau lotu kelipopo tagata kua taute e fakamaligi toto hana ki mua he Atua. (Isaia 9:6; Ieremia 2:34) Ke he moliaga, kua lata ia ia ke fua e hala lahi ma e tau miliona ne mamate he tau felakutaki ne ua he lalolagi he senetenari nei. Ti ko e mena ia, ko e tau tutaki he tau lotu fakavai mo lautolu foki ne lago ki ai mo lautolu ne fakalataha ke he felatauaga he tagata kua fakamaligi toto ai ki mua he Atua.
5. Kua fakatatai fefe e falu tagata ki a ia ne keli totamaki e ha tagata i Isaraela?
5 Kua fakatupu pauaki he falu tagata e mate, po ke he mahani fakahanoa. Kua fai vala e falu ke he tau kelipopoaga fakamatakau, liga kua fakaohooho he tau takitaki lotu ko e finagalo he Atua anei. Ka e kua favale mo e tamate agaia he falu tagata e tau fekafekau he Atua. Pete ni, kaeke kua nakai taute e tautolu e tau mena pihia, kua fakaauloa a tautolu ke he matagahua he fakalatahaaga he galo e moui he tagata ha kua nakai iloa e tautolu e matafakatufono mo e finagalo he Atua. Kua tatai a tautolu mo ia ne keli totamaki e ha tagata ‘ne keli e tagata he katofia mo e nakai kitia, ti nakai fi tuai kia ia.’ (Teutaronome 19:4) Kua lata he tau tagata pihia ke kumi e fakaalofa hofihofi noa he Atua mo e kua lata ke hola ke he maga kua eke mo huaga fakatai. Neke teke feleveia a lautolu mo e Tagata kua eke ke lukutoto.
Tau Gahua Aoga ha Iesu
6. Ko e ha kua pehe ai ko Iesu ko e faoa tata lahi he tau tagata?
6 I Isaraela ko e tagata kua eke ke lukutoto ko e tagata tane faoa tata. Ke lukutoto a lautolu ne mamate he lalolagi mo e mua atu ke he tau fekafekau ne kelipopo ha Iehova, to taute e Tagata kua eke ke lukutoto he vaha fou nei mo tagata faoa tata he tau tagata oti. Ko e gahua ia kua taute e Iesu Keriso. Ko e tagata mitaki katoatoa a ia he fanau mai. Ne tuku mai e Iesu hana moui ne noa mo e hala ke eke mo poa lukutoto, mo e he mole e liu tu mai hana ke he lagi, ne foaki e ia e uho he hana moui ke he Atua ma e tau fanau hala ne fa e mamate ha Atamu. Ati eke ai a Keriso mo Laveaki he tau tagata, ha tautolu a faoa tata lahi—ko ia ko e Tagata kua eke ke lukutoto ne tonu. (Roma 5:12; 6:23; Heperu 10:12) Kua kitia ai a Iesu ke eke mo matakainaga ke he hana a tau tutaki fakauku ne mumuitua ki a ia. (Mataio 25:40, 45; Heperu 2:11-17) Ko e Patuiki he lagi kua eke a ia mo “Matua Tukulagi” ki a lautolu ne lagomatai he hana a poa ke eke mo tau tagata omaoma hana he lalolagi. Ko lautolu nei ka moui tukulagi. (Isaia 9:6, 7) Ti kua kotofa e Iehova e Tagata Faoa Tata nei he tau tagata ke eke mo Tagata kua eke ke lukutoto.
7. Ha ko e Ekepoa ne Mua e lahi, ko e heigoa ha Iesu ne taute ma e tau tagata?
7 Ko Iesu foki ko e tagata noa mo e hala, kua kamatamata, Ekepoa ne Mua mo e fai logonaaga hofihofi noa. (Heperu 4:15) He tuaga ia ne fakagahuahua e ia e aoga he hana poa lukutoto-hala ke he tau tagata. Ko e tau maga kua eke mo huaga kua fakatutu ai “ma e fanau a Isaraela, ma e tagata kehe foki katoa mo ia kua nofo ia lautolu.” (Numera 35:15) Ti kua fakagahua fakamua he Ekepoa ne Mua e lahi e aoga he hana a poa ke he hana tau tutaki ne fakauku, ko e “fanau a Isaraela.” He mogonei kua lauia ai e ‘tau tagata motu kehe’ mo ‘lautolu ne nonofo i ai’ he maga kua eke mo huaga fakatai. Ko e tau “mamoe kehe” nei he Iki ko Iesu Keriso kua amaamanaki ke moui tukulagi he lalolagi.—Ioane 10:16; Salamo 37:29, 34.
Maga kua Eke mo Huaga he Vaha Nei
8. Ko e heigoa e maga kua eke mo huaga fakatai?
8 Ko e heigoa e maga kua eke mo huaga fakatai? Nakai ko e ha fahi motu ke tuga a Heperona, ko e taha he tau maga kua eke mo huaga ne ono ha Levi mo e kaina he ekepoa ne mua a Isaraela. Ko e maga kua eke mo huaga he vaha nei ko e foakiaga he Atua ma e ha tautolu a puipuiaga mai he mate he holia hana tau poakiaga hagaao ke he fakatapuaga he toto. (Kenese 9:6) Pete ni ko e taute pauaki po ke totamaki, ko e tau tagata ne holia e poakiaga ia kua lata ke kumi e fakamagalo he Atua mo e ke uta kehe hana a hala ha ko e tua ke he toto he Ekepoa ne Mua, ko Iesu Keriso. Ko e tau Kerisiano fakauku mo e amaamanakiaga ke he lagi mo e “moto tagata tokologa” mo e amaamanakiaga ke he lalolagi kua fakaata e lautolu a lautolu ke moua e tau aoga he poa lukutoto-hala ha Iesu mo e kua haia he maga kua eke mo huaga fakatai.—Fakakiteaga 7:9, 14; 1 Ioane 1:7; 2:1, 2.
9. Kua holia fefe e Saulo ko e Taso e poakiaga he Atua hagaao ke he toto, ka e fakakite fefe e ia e hiki he mahani?
9 Ato eke a ia mo Kerisiano, kua holia e Paulo e poakiaga ke he toto. Ko Saulo ko e Taso, ne favale ke he tau tutaki ha Iesu mo e talia foki e kelipopoaga ha lautolu. “Ka kua ofania au, ha kua eke pihia e au ke he haku a nakai iloa, mo e nakai talia fakatonu,” he talahau e Paulo. (1 Timoteo 1:13; Gahua 9:1-19) Kua ha ha ia Paulo e mahani tokihala, kua kitia moli ai he tau gahua loga he tua. Ka e kua fai mena foki mai he tua ke he lukutoto kua lata ke moua ke hu atu ke he maga kua eke mo huaga fakatai.
10. Kua maeke fefe ke moua e logonaaga hifo mitaki, mo e ko e heigoa kua lata ke taute ke fakatumau ai?
10 Ko ia ne keli totamaki e ha tagata kua nofo ni he taha he tau maga kua eke mo huaga i Isaraela ka fakakite moli e ia e logonaaga hifo mitaki hana ke he Atua mo e hagaao ke he fakamaligi toto. Ke moua e logonaaga hifo mitaki, kua lata ia tautolu ke fakagahuahua e tua ke he poa a Iesu, tokihala ke he ha tautolu a tau hala, mo e hiki e tau puhala ha tautolu. Kua lata ia tautolu ke ole ma e logonaaga hifo mitaki he liogi fakamoli ke he Atua he puhala mai ia Keriso, ti fakakite e mena nei he papatiso ke he vai. (1 Peteru 3:20, 21) Kua fakaata ai he logonaaga hifo mitaki nei a tautolu ke moua e fakafetuiaga mea mo Iehova. Ko e puhala ni ke taofi mau e logonaaga hifo mitaki ko e omaoma ke he tau poakiaga he Atua mo e taute e gahua ne kotofa ki a tautolu i loto he maga kua eke mo huaga, ke tuga he omaoma ai a lautolu ne fehola, i loto he tau maga kua eke mo huaga i tuai ke he Matafakatufono mo e fakakatoatoa e tau gahua kotofa ha lautolu. Ko e gahua ne mua ma e tau tagata ha Iehova he vaha nei ko e fakamatala he fekau he Kautu. (Mataio 24:14; 28:19, 20) Ko e taute he gahua ia ka lagomatai a tautolu ke eke mo tau tagata aoga he maga kua eke mo huaga he vaha fou nei.
11. Ko e heigoa kua lata ke kalo mai kaeke ke nonofo haohao mitaki a tautolu i loto he maga kua eke mo huaga he vaha nei?
11 Ke toka e maga kua eke mo huaga he vaha nei kua fakafehagai ni e tautolu a tautolu ke he fakaotiotiaga, ha ko e mena nakai leva to tau atu e Tagata kua eke ke lukutoto ki a lautolu oti ne fakamaligi toto. Nakai ko e magaaho anei ke moua i fafo he maga puipui nei po ke ke he kavi hagahaga kelea ne tata ki fafo he maga kelekele ia. To eke a tautolu ke ha ha i fafo he maga kua eke mo huaga fakatai ia kaeke ke galo ia tautolu e tua ke he poa lukutoto-hala he Ekepoa ne Mua. (Heperu 2:1; 6:4-6) To nakai haohao mitaki foki a tautolu kaeke ke hiki e tautolu e tau puhala fakalalolagi, nakai lahi e fakalataha ke he fakatokatokaaga ha Iehova, po ke o kehe mai he tau fakatufono tututonu he ha tautolu a Matua he lagi.—1 Korinito 4:4.
Tokanoa Mai he Maga kua Eke mo Huaga
12. Ke he fiha e leva ka nonofo a lautolu ne fakamaligi toto fakamua i loto he maga kua eke mo huaga fakatai?
12 Ko ia ne keli totamaki ha tagata i Isaraela kua nofo mau he maga kua eke mo huaga “ato mate e ekepoa ne mua.” (Numera 35:28) Ti fiha e leva ha lautolu ne fakamaligi toto fakamua ka nonofo he maga he huaga fakatai? Ato nakai falanaki a lautolu ke he tau gahua he Ekepoa ne Mua, ko Iesu Keriso. “Kua maeke ai ia ia ke fakamomoui fakaoti a lautolu kua fakatata atu ke he Atua ha ko ia,” he talahau e Paulo. (Heperu 7:25) Ka tumau ni ha ilaila he hala mo e fakamaligi toto ne taute tuai ke ha ha i ai, kua lata ai mo e tau gahua he Ekepoa ne Mua ke maeke he tau tagata nakai mitaki katoatoa ke moua e tuaga hako mo e Atua.
13. Ko hai e “fanau a Isaraela” he vaha fou nei, mo e ke he fiha e leva kua lata ia lautolu ke nonofo i loto he “maga kua eke mo huaga”?
13 Kia manatu ko e tau maga kua eke mo huaga i tuai kua fakatutu ai “ma e fanau a Isaraela,” ma e tau tagata kehe, katoa mo lautolu kua nonofo ai. Ko e “fanau a Isaraela” ko e tau Isaraela fakaagaga. (Kalatia 6:16) Kua lata ia lautolu ke nonofo he maga kua eke mo huaga ke he leva e momoui ha lautolu he lalolagi. Ko e ha? Kakano ha kua ha ha agaia a lautolu he tino nakai mitaki katoatoa ti kua falanaki ai ke he lukutoto uho lahi he ha lautolu a Ekepoa ne Mua he lagi. Ka e he magaaho ka mamate e tau Kerisiano fakauku nei mo e liu fakatutu mai ke moui fakaagaga he lagi, kua nakai falanaki a lautolu ke he tau gahua lukutoto he Ekepoa ne Mua; to momoui tukulagi a lautolu mo e kua toka hifo e tino mo e fakamaligi toto ne fakapiki ki ai. Hagaao ki a lautolu kua fakauku ia ne liu fakatutu mai, to mate ai e Ekepoa ne Mua ke he tuaga lukutoto mo e puipuiaga.
14. Ko e heigoa foki kua lata ai a lautolu he mogonei mo e tau amaamanakiaga ke he lagi ke nonofo he maga he huaga he vaha nei?
14 Ha ko lautolu ka eke mo “tau hakeaga mo Keriso” he lagi kua mahani fakatagata kua lata ia lautolu ke nonofo he maga he huaga fakatai ato fakaoti mo e fakamoli e gahua fakalalolagi ha lautolu he mamate. He magaaho ka mamate a lautolu, to poa tukumalagi e lautolu e aga fakatagata. (Roma 8:17; Fakakiteaga 2:10) Kua lauia ni e poa ha Iesu ki a lautolu ko e tau tagata. Ati mate ai e Ekepoa ne Mua ki a lautolu he Isaraela fakaagaga he magaaho ka liu fakatutu mai a lautolu mo tau mena moui fakaagaga ka nonofo tukumalagi he lagi ke eke ke ‘igatia fakalataha ke he mahani he Atua.’—2 Peteru 1:4.
15. Ko hai e ‘tau tagata motu kehe’ mo ‘lautolu ne nonofo i ai’ he vaha nei, mo e ko e heigoa he Ekepoa ne Mua e lahi ka taute ma lautolu?
15 To “mate” a fe e Ekepoa ne Mua he hagaao atu ke he ‘tau tagata motu kehe’ mo ‘lautolu ne nonofo i ai,’ ke fakaata a lautolu ke toka e maga kua eke mo huaga fakatai? Ko lautolu he moto tagata tokologa kua nakai lata ke o mai tuai ki fafo he maga he huaga he mole e matematekelea lahi. Ko e ha a ia? Ha ko e mena to ha ha agaia a lautolu ke he ha lautolu a tino nakai mitaki katoatoa, hala, mo e lata ke nonofo mau i lalo he puipuiaga he Ekepoa ne Mua. He fakaaoga ai e lautolu hana a tau gahua lukutoto he tuaga pule mo e ekepoa hana he magahala he afe tau, to moua e lautolu e mitaki katoatoa he tagata. To foaki e Iesu a lautolu he mogoia ke he Atua ma e kamatamata fakahiku, tukumalagi, he ha lautolu a mahani fakamoli he fakatoka mai a Satani mo e hana tau temoni ke he magaaho ku. Ha kua kautu a lautolu mai he kamatamata nei mo e taliaaga fakaatua, to talahau e Iehova a lautolu ke tututonu. Ti to hokotia a lautolu ke he katoatoaaga he mitaki katoatoa he tagata.—1 Korinito 15:28; Fakakiteaga 20:7-10.a
16. He magaaho fe ka nakai falanaki a lautolu ne hao mai he matematekelea lahi ke he tau gahua lukutoto he Ekepoa ne Mua?
16 Ti, he mogoia, ko lautolu ne hao mai he matematekelea lahi kua lata ke taofi mau e logonaaga hifo mitaki he nonofo hifo he maga he huaga fakatai ato hoko e fakaotiaga he Pule Afe Tau ha Keriso. Ha ko e tau tagata kua mitaki katoatoa, nakai to falanaki foki a lautolu ke he tau gahua lukutoto he Ekepoa ne Mua mo e to o kehe mai a lautolu he hana a puipuiaga. Ko e mogoia ka mate ai a Iesu ki a lautolu ko e Ekepoa ne Mua, ha kua oti tuai hana a gahua ma lautolu kakano he toto fakamea he hana a poa. He magaaho ia to toka e lautolu e maga kua eke mo huaga fakatai.
17. Ko e ha kua nakai lata ia lautolu ne liu fakatutu mai he magahala he Pule Afe Tau ha Keriso ke huhu atu ke he maga kua eke mo huaga fakatai mo e nonofo i ai?
17 Kua lata kia a lautolu ne liu fakatutu mai he magahala he Pule Afe Tau ha Iesu ke huhu atu ke he maga kua eke mo huaga fakatai mo e nonofo i ai ato hoko e mate he ekepoa ne mua? Nakai, kakano kua totogi tuai e palepale he ha lautolu a mahani hala he mamate a lautolu. (Roma 6:7; Heperu 9:27) Pete ni ia, to lagomatai he Ekepoa ne Mua a lautolu ke moua e mitaki katoatoa. Kaeke ke kautu a lautolu ke he kamatamata fakamui he mole e Afe Tau, to talahau foki he Atua a lautolu ke tututonu mo e fakamoliaga ke moui tukumalagi he lalolagi. E moli, ko e kaumahala ke fakatatai mo e tau poakiaga he Atua ka fakahoko ai e fakafiliaga fakahala mo e fakaotiaga ke he tau tagata ne nakai kautu ke he kamatamata fakamui ko e tau tagata ne taofimau e mahani hakohako.
18. Hagaao atu ke he ha Iesu a tuaga patuiki mo e ekepoa, ko e heigoa ka mau tukulagi mo e tau tagata?
18 Kua fakahiku ni e tau ekepoa ne mua i Isaraela ke mamate. Ka e kua “eke a [Iesu] mo ekepoa ne mua tukulagi he kainaga fakalataha mo Mekisateko.” (Heperu 6:19, 20; 7:3) Ti ko e fakaoti he gahua ha Iesu ko e Ekepoa ne Mua ne hulalo ma e tau tagata ko e nakai ko e fakaotiaga he moui hana. Ko e tau hufiaaga mitaki he hana a gahua ko e Patuiki mo e Ekepoa ne Mua to haia tukulagi mo e tau tagata, mo e to loto fakaaue tukumalagi e tau tagata ki a ia ha ko e hana a gahua ke he tau tutuaga nei. Ke lafi atu, ke he vaha tukumalagi ko Iesu ka takitaki e tapuakiaga mea ha Iehova.—Filipi 2:5-11.
Tau Fakaakoaga Uho ma Tautolu
19. Ko e heigoa e fakaakoaga ne hagaao ke he vihiatia mo e fakaalofa ne kua maeke ke ako mai he foakiaga he tau maga kua eke mo huaga?
19 Kua maeke ia tautolu ke ako e tau fakaakoaga kehekehe mai he foakiaga he tau maga kua eke mo huaga. Ke fakatai, nakai fai tagata keli tagata ne vihiatia ke kelipopo e taha tagata ka fakaata ke nofo he maga he huaga. (Numera 35:20, 21) Ti maeke fefe he taha tagata i loto he maga kua eke mo huaga fakatai ke fakaata e vihiatia ma e hana a matakainaga ke tupu tolomaki he hana loto? “Ko lautolu oti kua vihiatia e tau matakainaga ha lautolu, ko e tau tagata kelipopo tagata a lautolu,” he tohia he aposetolo ko Ioane, “kua iloa foki e mutolu, ko lautolu oti kua kelipopo tagata kua nakai toka mau ia lautolu e moui tukulagi.” Ti o mai a ke “feofanaki a tautolu, ha ko e mena mai he Atua e fakaalofa.”—1 Ioane 3:15; 4:7.
20. Ke puipui mai he Tagata kua eke ke lukutoto, ko e heigoa ha lautolu i loto he maga kua eke mo huaga fakatai kua lata ke taute?
20 Ke puipui mai he tagata kua eke ke lukutoto, kua lata ia ia ne keli totamaki e ha tagata ke nofo he maga kua eke mo huaga mo e nakai ke hahaka ki fafo he tau maga kelekele ia. Ka e kua a lautolu i loto he maga kua eke mo huaga? Ke hao mai he Tagata kua eke ke lukutoto ne mua, kua nakai lata ia lautolu ke toka e maga. E moli, kua lata ia lautolu ke puipui mai he tau tauhele ke o atu ke he kapikapi he maga kelekele ia, ke talahau ai pihia. Kua lata ia lautolu ke fakaeneene neke tupu e fakaalofa ma e lalolagi ha Satani ke he ha lautolu a tau loto. Kua ui mai e mena nei ma e liogi mo e laliaga, ka e kua falanaki e tau momoui ha lautolu ki ai.—1 Ioane 2:15-17; 5:19.
21. Ko e heigoa e gahua mitaki lahi ne kua taute e lautolu i loto he maga kua eke mo huaga he vaha nei?
21 Ko lautolu ne keli totamaki e ha tagata he tau maga kua eke mo huaga i tuai kua lata ke eke mo tau tagata gahua mitaki. Ke tuga ia, ko e “fanau a Isaraela” ne fakauku kua fakatoka e fakafifitakiaga mitaki ko e tau tagata gahua helehele saito mo e tau tagata fakapuloa he Kautu. (Mataio 9:37, 38; Mareko 13:10) Ha ko e ‘tau tagata motu kehe’ mo ‘lautolu ne nonofo i ai’ he maga he huaga he vaha nei, ko e tau Kerisiano mo e amaamanakiaga ke he lalolagi kua kotofa ke taute e gahua fakamoui nei fakalataha mo lautolu ne fakauku ne toe agaia he lalolagi. Mo e ko e gahua mitaki lahi ha anei! Ko lautolu ne gahua mo e mahani fakamoli i loto he maga kua eke mo huaga fakatai to hao mai he mate tukumalagi he tau lima he Tagata kua eke ke lukutoto. Ka e kehe mai, to moua e lautolu e tau mena aoga tukulagi mai he hana a gahua ko e Ekepoa ne Mua e lahi he Atua. To nofo nakai a koe he maga kua eke mo huaga mo e moui tukulagi?
[Matahui Tala]
To Tali Fefe e Koe?
◻ Ko e ha ne pehe ai ko e tau piliona he lalolagi kua fakamaligi toto?
◻ Ko e heigoa e tau gahua ne taute e Iesu ne hagaao atu ke he tau tagata?
◻ Ko e heigoa e maga kua eke mo huaga fakatai, mo e maeke fefe e taha ke hu atu ki ai?
◻ He magaaho fe ka tokanoa mai e tau tagata he maga he huaga fakatai?
◻ Ko e heigoa e tau fakaakoaga kua ako e tautolu mai he foakiaga he tau maga kua eke mo huaga?
[Fakatino he lau 16]
Iloa nakai e koe ko e heigoa e tau gahua aoga ne taute e Iesu Keriso?