Nakai Kia kua Leva he Logona e Mautolu e Mena Ia?
1 E fita he logona e tautolu! Ne fatiaki e Iehova e tau mena loga i loto he hana Kupu ma e aoga ni he hana tau tagata. Ne fa fatiaki e Iesu hana tau fakaakoaga hagaao ke he tau fahi kehekehe he Kautu. Ne fakamanatu tumau he tau aposetolo hana e tau mena fakaagaga mo lautolu ne fakave mauokafua ke he kupu moli.—Roma 15:15; 2 Pete. 1:12, 13; 3:1, 2.
2 He vaha ha tautolu, kua taute he fakatokatokaaga a Iehova e tau matakupu aoga ke liu fakamanatu tumau he tau feleveiaaga he fakapotopotoaga. Ha ha i ai e tau tohi ne kua fakaako taufeliuaki. E, kua aoga lahi ke liu logona e tau mena kua fita he logona e tautolu!
3 Fakapuke he Fatiaki e Manako kua Lata: Ko e tau fakamanatuaga a Iehova kua fakahokulo aki e tau maamaaga ha tautolu, fakaloloa atu e tau onoonoaga, mo e fakamalolo ha tautolu a fifiliaga ke tumau he puhala fakaagaga. (Sala. 119:129) Ke liu fakaako e tau fakatufono mo e tau matapatu fakaakoaga he Atua kua tuga e onoono ki loto he fakaata. Kua lagomatai a tautolu ke faala hifo ki a tautolu ni mo e tautaofi e manako neke eke mo ‘tagata fanogonogo fakanimonimo.’—Iako. 1:22-25.
4 Ka nakai fakamanatu tumau e tautolu a tautolu ke he kupu moli, to hufia e tau loto ha tautolu he falu mena foki. Kua fakamalolo he tau fakamanatuaga he Atua a tautolu ke totoko e tau fakaohoohoaga keukeu he lalolagi ha Satani. (Sala. 119:2, 3, 99, 133; Filipi 3:1) Ko e tau fakamanatu tumau ne moua e tautolu hagaao ke he fakamoliaga he tau finagalo he Atua ne fakalagalaga a tautolu ke “mataala.” (Mare. 13:32-37) Ko e fatiaki he tau kupu moli faka-Tohiaga Tapu ka lagomatai a tautolu ke tumau he puhala ke he moui tukulagi.—Sala. 119:144.
5 Puhala ke Aoga Fakatagata: Kua lata ia tautolu ke ‘fakahagao ha tautolu a loto ke he tau fakatufono he Atua.’ (Sala. 119:36) Ka fakatutala ke he matakupu fa mahani ki ai he feleveiaaga he fakapotopotoaga, lata ia tautolu ke tauteute tuai, fuke e tau kupu Tohi Tapu ne tohi ai, mo e manamanatu ke he puhala kua maeke ia tautolu ke fakagahuahua e tau vala tala. Aua neke fakamole noa e tautolu e liu fakamanatu he Aoga Fekafekau Fakateokarasi, he manamanatu kua nakai aoga. (Luka 8:18) Nakai lata foki a tautolu ke fakateaga ha ko e kupu moli kua fa fatiaki he tau feleveiaaga ha tautolu.—Hepe. 5:11.
6 Kia fakatatai a tautolu ke he aga he salamo: “Ne fiafia au ke he puhala he hāu a tau fakatufono, kua mua ke he tau koloa oti.” (Sala. 119:14) E, kua fita he logona e tautolu e tau mena uho nei, ti liga to liu ni logona foki. Ko e ha? Ha ko e mena iloa e Iehova kua latatonu ni ke logona e tautolu!