Ko e Heigoa Hau Ka Talahau ke he Tagata Nakai Talitonu ke he Atua?
1 “Ko au ko e tagata nakai talitonu ke he Atua,” he tala age he porofesa mai Polani ke he misionare i Aferika. Ka kua maeke he matakainaga fifine ke tutala mo e fifine ti age ki a ia e tohi Life—How Did It Get Here? By Evolution or by Creation? He liu e misionare he tapu hake, ne tala age e porofesa ki a ia: “Ai tuai ko e tagata nakai talitonu ke he Atua au mogonei!” Ne totou oti e ia e tohi Creation ti ole he mogonei ma e fakaako Tohi Tapu. Ko e heigoa ka taute e koe ke kautu he fakamatala atu ki a lautolu kua talahau na nakai talitonu a lautolu ke he Atua? Fakamua, manamanatu ke he tau kakano kehekehe ko e ha kua taute he tau tagata e talahauaga nei.
2 Tau Mena Lafi ke he Nakai Talitonu: Ko e tau tagata oti ne nakai talitonu ke he Atua kua nakai feaki hake pihia. Tokologa ne fakatapakupaku ke he falu puhala he lotu ti kua talitonu ke he Atua he taha vaha. Ka ko e kelea he malolo tino po ke tau lekua fakamagafaoa po ke falu nakai tonu ne fakafita ki ai a lautolu kua fakalolelole aki ha lautolu a tua. Ma e falu, ko e tau mena fakaako he tau aoga tokoluga kua ha ha ai e fakaohoohoaga kelea ke he manatu ha lautolu ke he Atua. Mailoga e tau fakafifitakiaga na he tau tagata nakai talitonu ke he Atua ne fakahiku ke feaki e talitonu malolo ki a Iehova ko e Atua ati fakahiku ai mo Tau Fakamoli hana.
3 Ko e fifine i Paris ne fanau mo e gagao molulu e tau polohui motua. Pete ni he papatiso ko e Katolika, ne talahau e ia a ia ko e tagata nakai talitonu ke he Atua. He huhu a ia ke he tau taupou pope ko e ha ne toka he Atua a ia ke fanau fai matafatia pihia, ne tali a lautolu: “Ha kua fakaalofa a ia ki a koe.” Ne fakaheu e ia e manatu nakai tonu pihia. Kikite atu foki ke he tagata fuata i Finilani ne moua he gagao tegatega kakano nakai fai tului ti nofomau ke he nofoa fakataveli. Ne uta he matua fifine hana a ia ke he lotu Penetekoso ne talahau ke fakamaulu e tau tagata gagao. Ka kua nakai fai fakamaulu mana. Ko e fua, ne galo e fiafia he fuata tane ke he Atua mo e nakai talitonu ki a ia.
4 Ko e tagata tane i Honotura kua feaki hake ko e Katolika ka kua kumikumi ke he pulotu he tau Kaufakalatahaaga mo e ke he fakaakoaga ne nakai talitonu ke he Atua. He talitonu ke he fakaakoaga he univesiti ko e tupumainoa he tagata, ne tiaki e ia e talitonu ke he Atua. Tatai foki ke he fifine he Tau Fahi Kaufakalataha ne feaki hake ko e Mefotisi. He aoga tokoluga, ne uta e ia e tau vahega he kumikumiaga ke he manamanatuaga. Kua lauia fefe hana talitonu? Ne talahau e ia: “He taha vaha mafana ne moumou katoa he tau mena ia e tau valavala oti he tua haku ke he lotu.”
5 Hokotia ke he Tau Loto ha Lautolu ne Manako Moli: Tokologa e tau tagata takitokotaha ne talahau ke nakai talitonu ke he Atua ka manako moli ke iloa e tau tuluiaga ke he tau lekua he malolo tino, mavehevehe magafaoa, nakai tonu, mo e falu foki. Kua fiafia moli a lautolu ke moua e tau tali ke he tau huhu pehenei: ‘Ko e ha ne ha ha ai e kelea?’ ‘Ko e ha ne tutupu e tau mena kelea ke he tau tagata mitaki?’ mo e ‘Ko e heigoa e kakano he moui?’
6 Ko e tane mo e hoana ne nonofo i Suisalani kua feaki hake tokoua ko e tau tagata nakai talitonu ke he Atua. He magaaho ne logona fakamua e laua e kupu moli, ne nakai fiafia a laua. Ka kua hokulo e tau mena vihi fakamagafaoa ha laua mo e kua manamanatu ke tau vevehe. He magaaho ne liu ahi atu e Fakamoli, ne fakakite e ia ke he tane mo e hoana mai he Tohi Tapu e puhala ke kautu ke he tau mena vihi ha laua. Ne ofo e hoa ke he fakatonuaga lauia mitaki i loto he Tohiaga Tapu, mo e manako ke fakaako e Tohi Tapu. Ne fakamalolo e fakamauaga ha laua, tupu tolomaki fakaagaga, ti papatiso a laua.
7 Mena Hau ka Talahau ke he Tagata Nakai Talitonu ke he Atua: Ka talahau he tagata ki a koe, nakai talitonu a ia ke he Atua, lali ke iloa e kakano ko e ha ne vagahau pihia a ia. Pihia kia ha ko e fakaakoaga ne moua e ia, ko e tau mena vihi ne hohoko ki a ia, po ke fakatupua mo e tau fakaakoaga fakavai he lotu ne kitia e ia? Liga huhu a koe ki a ia: “Pihia tumau kia e logonaaga hau?” po ke “Ko e heigoa e kakano ne talahau pihia a koe?” Ko e tali hana ka lagomatai a koe ke iloa e mena ka vagahau. Ke he tau fakatutalaaga hokulo, liga kua lata tonu ni mo e tohi Is There a Creator Who Cares About You?
8 Liga moua e koe e fakatutalaaga mo e tagata nakai talitonu ke he Atua he huhu:
◼ “Fa manamanatu nakai a koe: ‘Kaeke ke fai Atua, ko e ha ne lahi ai pihia e matematekelea mo e nakai tonu he lalolagi?’ [Fakaata ma e tali.] Fakakite atu nakai e au e onoonoaga he Tohi Tapu ke he mena nei?” Totou Ieremia 10:23. Ka oti he totou, huhu ko e heigoa e manatu hana ke he kupu ia. Ti fakakite ki a ia e lau 16 mo e 17 he porosua Will There Ever Be a World Without War? Po ke fakaaoga ni e koe e veveheaga 10 he tohi Creator. Uiina a ia ke uta e tohi mo e totou ai.—Ma e falu fakailoaaga foki, kikite e tohi Reasoning, lau 150-1.
9 Moli, to nakai talia oti he tau tagata nakai talitonu ke he Atua e kupu moli. Ka e tokologa kua manako ke fanogonogo ke he falu manatu. Kia fakamahino fakamitaki, fakamakai mo e, ke he tau mena oti, ko e malolo he Kupu he Atua ke lagomatai a lautolu ke kitia e kupu moli.—Gahua 28:23, 24; Hepe. 4:12.