Foaki Fakamakai Ni e Tautolu a Tautolu ma e Tau Gahua Mitaki Oti

¹ Ko e tohi he lalolagi ne fakahagaao ke he Tau Fakamoli a Iehova, he talahau: “Kua uka ke moua e tau tagata he falu matakau kua gahua malolo ke he lotu ha lautolu tuga he taute he Tau Fakamoli.” Ko e ha kua gahua malolo e Tau Fakamoli a Iehova fakalataha mo e aga fakamakai pihia?

² Ko e taha kakano kua fakaohooho aki a lautolu mo e manatu fakamafiti. Ne mailoga e Iesu na fakakaupa ni e magaaho hana ke fakakatoatoa e gahua hana he lalolagi. (Ioane 9:4) He kautu e Tama matalahi he Atua ke he vahaloto he tau fi hana he vaha nei, ne mailoga he tau tagata a Iehova na fakakaupa ni e magaaho ke taute e gahua ha lautolu. Mena ia, kua fakatumau a lautolu ke foaki fakamakai a lautolu ni ma e gahua tapu. (Sala. 110:1-3) Ha kua manako tagata gahua foki ke taute e heleheleaga, kua nakai fakalolelole ha lautolu a tau laliaga. (Mata. 9:37, 38) Ti, lali a lautolu ke fifitaki a Iesu, kua fakatoka e fakafifitakiaga mitaki katoatoa he fakamakai mo e fakamakutu ke he hana gahua.​—Ioane 5:17.

³ Taha kakano foki ne gahua solu katoa e Tau Fakamoli a Iehova ki a Iehova ha kua kehe e fakatokatokaaga he lalolagi katoa ha lautolu mai he tau matakau oti. Kua manako ni e tau fakatokatokaaga fakalotu he lalolagi ma e magaaho mo e laliaga tote mai he tau tagata ne fakalataha auloa. Ko e mena kua talitonu a lautolu ki ai kua tote po ke nakai fai lauiaaga ke he tau momoui ha lautolu he tau aho takitaha, tau fakafehagai ha lautolu mo e falu, po ke tau mouaaga ha lautolu he moui. He tote e malolo fakaohooho he tua moli, kua peehi e lautolu ko e tau leveki ha lautolu kua ‘vagahau mai ke he tau kupu molemole,’ he fakamoli ki a lautolu ko e fakakiteaga he laliaga ha lautolu kua lata ni. (Isa 30:10) Ko e vahega akoako ha lautolu kua fakafiafia ha “kua magiho e tau teliga ha lautolu,” he fofoa e aga nakai manamanatu mo e teva fakaagaga.​—2 Timo. 4:3.

⁴ Kehe mamao mai he tau tagata a Iehova! Ko e tau mena oti hagaao ke he tapuakiaga ha tautolu kua putoia e laliaga, ukufakina, mo e gahua. He tau aho oti mo e tau mena oti kua taute e tautolu, kua taute e tautolu e mena kua talitonu a tautolu ki ai. Ha kua ta mai he kupu moli ki a tautolu e olioli lahi, kua putoia e “tau lahi” ma tautolu ke fakamoli e mena kua lata. (Fakatatai 1 Tesa. 2:2.) He leveki ma e tau matagahua he moui he tau aho takitaha kua lahi ke fakatumau aki e tau tagata tokologa ke lavelave ki ai. Pete ia, kua nakai fakaata e tautolu e tau tupetupe nei ke puipui a tautolu mai he tuku fakamua e tau mena he Kautu.​—Mata. 6:33.

⁵ Ko e mena kua foaki mai ki a tautolu ke taute he gahua a Iehova kua aoga lahi mo e mafiti ti omoomoi a tautolu ke “fakatau” e tau magaaho mai he falu tutuliaga mo e fakaaoga fakamitaki ai ke he tau mena fakaagaga. (Efe 5:16, NW) He iloa ko e fakamoli faka-Atua ha tautolu mo e aga fakamakai kua fakafiafia a Iehova, he moua e tautolu e fakalagalaga mua ue atu ke fakatumau a tautolu ke he gahua malolo ha tautolu. Mo e tau fakamonuinaaga loga kua moua e tautolu mogonei mo e tau amaamanakiaga he moui i mua, ko e fifiliaga ni ha tautolu ke fakatumau he “gahua ai a tautolu” ke lata mo e tau mena he Kautu.​—1 Timo. 4:10.

⁶ Ko e Fakamoli mo e Aga Foaki Ni ha Tautolu: Tokologa e tau tagata he vaha nei kua tuku fakamua e tau koloa mo e tau manako fakatino i mua he tau mena oti. Ne logona e lautolu e tonu katoatoa he hagaaki atu ke he mena ke kai, inu po ke tui e lautolu. (Mata. 6:31) He nakai makona mo e tau mena moua, ne fakalagalaga a lautolu he foliaga ke fiafia katoatoa e moui mitaki he magaaho nei mo e ‘ha ha e tau mena mitaki loga kua toka mo e tau tau loga; kia nofo fakatekiteki ai a lautolu, ti kai a, mo e inu, mo e fiafia ai a lautolu.’ (Luka 12:19) Ko e tagata fano tapu tumau kua logona ko e ha laliaga fakatagata kua lata mo e hana lotu kua molea atu he tau tonuhia hana. Ko e manatu he toka po ke fakatote falu koloa fakatino po ke fakaoti e manako fiafia kua fakateteki. Kua takatakai ni hana manamanatuaga ia ia, he feaki e aga he foaki ni e ia a ia kua fakavai mo e goagoa.

⁷ Kehe ha tautolu a onoonoaga ke he mena nei. Kua ta mai he Kupu he Atua e tau manamanatuaga ha tautolu ke maeke ia tautolu ke manatu e tau puhala he Atua nakai he tau tagata. (Isa 55:8, 9) Ha ha ia tautolu e tau foliaga he moui kua uta kehe a tautolu mai he tau tutuliaga fakatino. Ko e fakatokolugaaga he pule katoatoa ha Iehova mo e fakatapuaga he hana higoa ko e tau matakupu aoga ke he lalolagi mo e lagi katoatoa. Ko e laulahi he tau matakupu nei kua lahi mahaki, he fakatatai, ke he tau motu “kua tuga e mena noa makai ki mua hana.” (Isa 40:17) He laliaga ha tautolu ke momoui ke he tau puhala ne fakaheu e finagalo he Atua ka lata ke onoono ki ai kua goagoa.​—1 Kori. 3:19.

⁸ Ti ko e falu koloa fakatino kua lata moli mo e falu kua aoga lahi ke he tau gahua he Kautu ha tautolu, kua kitia e tautolu ko e tau mena nei kua nakai “mailoga” moli. (Filipi 1:10) Kua pipiki a tautolu ke he aga ia 1 Timoteo 6:8 ke fakakaupa e tau mouaaga ha tautolu he tau mena fakatino mo e fakapulotu he ukufakina ke fakatumau e tau loto ha tautolu ke hagaaki ke he “tau mena nakai kitia kua tukulagi ia.”​—2 Kori. 4:18.

⁹ Ko e lahi e manamanatu ha tautolu ke he tau puhala he Atua, to tote e kapeletu ha tautolu ke he tau koloa fakatino. Ka manamanatu a tautolu ke he mena kua fita he taute e Iehova ma tautolu mo e tau monuina homo ue atu kua mavehe mai e ia ma e vaha anoiha, kua makai a tautolu ke taute ha mena kua ole mai a ia ki a tautolu ke taute. (Mare. 10:29, 30) Kua foaki katoatoa e tautolu a tautolu ki a ia. Ane mai nakai ko e fakaalofa hofihofi noa mo e fakaalofa hana, to nakai fai fiafia a tautolu he moui mogonei mo e nakai fai vaha anoiha. Kua logona e tautolu e peehiaga ke foaki e tautolu a tautolu ni, ha ko e tau mena oti kua taute e tautolu he gahua hana ‘ko e tau mena kua lata ke eke e tautolu.’ (Luka 17:10) Ko e ha mena kua ole mai ki a tautolu ke liuaki ki a Iehova, kua taute e tautolu mo e fakamakai, he iloa e tautolu to ‘fakalahi foki e helehele mai.’​—2 Kori. 9:6, 7.

¹⁰ Manako ke he Tau Ekegahua Fakamakai he Magaaho Nei: Tali mai he kamataaga ne hokotia e fakapotopotoaga Kerisiano ke he magahala gahua malolo. Ko e fakamatala kikili lahi kua lata ke foaki ato moumou a Ierusalema he 70 V.N. Kamata mai he magaaho ia ko e tau tutaki a Iesu ne ‘fakaatukehe tuai ke he kupu.’ (Gahua 18:5) Ko e tupu mafiti ne kua taute ai ke lata ke fakamahani atu foki falu tagata fakamatala mo e tau leveki iloilo mo e fakalataha ke he lagomatai ha lautolu. Ko e tau tagata tane iloa lahi he fehagai mo e tau tui fakatufono pihia mo e tau patu kua maeke ke takitaki e putuputuaga mo e tufatufaaga he tau mena fakatino kua lata. (Gahua 6:1-6; Efe 4:11) He tokogahoa ne fekafekau ke he tau tuaga lalahi, tokologa agaia ne fakalataha auloa. Ka ko lautolu oti kua ‘eke taha a lautolu,’ he gahua loto katoa auloa ke taute e gahua.​—Luka 13:24.

¹¹ Pete ne tote e manako ma e gahua eke taha he tuaga he lalolagi katoa he tau senetenari loga fakamua atu, ko e liu tupu lahi he gahua he Kautu kua kamata he magaaho ne moua e Iesu hana malolo he Kautu he 1914. Fakamua, na tokogahoa ni ne mailoga e manako lahi mahaki ma e tau tagata gahua ke lata mo e tau mena he Kautu, ti kua manako lagomatai mai ia lautolu ko e tau miliona tagata fakamakai he tau motu kua viko takai he lalolagi katoa.

¹² He vaha nei kua hokulo e lauiaaga he fakatokatokaaga ke he tau matagahua lalahi kehekehe, ti kua aoga e tau koloa ha tautolu ke he fakaaogaaga ia. Hane holo mafiti ki mua e gahua he Kautu. Ko e mafiti he tau magaaho ha tautolu kua omoi a tautolu ke eketaha a tautolu mo e ke fakaaoga e tau mouaaga oti ha tautolu ke fakakatoatoa e gahua ha tautolu mogonei. Ha kua tata lahi mahaki mai e fakaotiaga ke he fakatokaaga mahani kelea nei, kua fakalahi atu foki e tautolu e tau gahua malolo ha tautolu ke he tau aho i mua. Ko e tau fekafekau tukulele oti ha Iehova ne ole ki ai ke foaki fakamakai ni e lautolu a lautolu ke he gahua fakapotopoto mafiti nei.

¹³ Ko e Heigoa kua Lata ke Taute? Maeke ia tautolu ke talahau fakamoli kua “fakamakai nakai noa ke he gahua he Iki.” (1 Kori. 15:58) He tau matakavi loga kua momoho e heleheleaga, ka e tokogahoa e tagata gahua. Kua uiina a tautolu ke taute e vala ha tautolu he nakai ni fakamatala kikili lahi ke he matakavi ni ha tautolu ka e feleveia foki mo e paleko he fekafekau ke he matakavi kua manako tagata gahua.

¹⁴ Kua nava ke kitia e Tau Fakamoli he tau kalakala oti he lalolagi kua foaki fakamakai ni e lautolu a lautolu ma e falu gahua. Fakatoka mai ni e tau mena nei he foaki ke gahua ke he talagaaga he tau fale he tapuakiaga, gahua he tau fonoaga, mo e lagomatai ke he tau gahua foaki lagomatai he tau magaaho matematekelea ke fakamea tumau e Fale he Kautu he matakavi. He matutaki mo e gahua fou nei, ha ha i ai e manatu ke kitia tonu tumau kua mea mo e maopoopo e Fale he Kautu ka hili e tau feleveiaaga takitaha. He oti e tau gahua ne tuga ko e mena noa kua fakatata e maamaaga tonu he tau kupu a Iesu ia Luka 16:10: “Ko ia ne fakamoli ke he mena tote, to fakamoli foki a ia ke he tau mena loga; ka ko ia ne hepehepe ke he mena tote, to hepehepe foki a ia ke he tau mena loga.”

■ Foaki Lagomatai ke he Tau Gahua he Fakapotopotoaga: Pete ni kua gahuahua e tau fakapotopotoaga takitaha ko e vala he fakatokatokaaga katoa mo e moua e takitakiaga mai he “fekafekau fakamoli mo e loto matala,” kua feaki hake ni he tau tagata fakailoa takitaha he Kautu. (Mata. 24:45) Kua falanaki lahi mahaki ni e tau mouaaga ke he lahi he fakamakai mo e maeke he Tau Fakamoli takitaha ke taute. Kua hagaaki e fakapotopotoaga ke fakamatala e tala mitaki ke he matakavi ia, he taute tutaki fou, mo e fakamalolo ai a lautolu fakaagaga. Igatia a tautolu mo e fai vala ke he gahua nei. Maeke foki ia tautolu ke fakatoka e tau foliaga ma tautolu ni he fakaako fakatagata, fai vala kakano ke he tau feleveiaaga, mo e lagomatai ke he falu kua lata he fakapotopotoaga. Kua foaki he tau gahua nei e loga he tau magaaho mitaki ma tautolu ke fakatata e fakamakai ha tautolu.

■ Takitaki he Tau Tuaga Leveki: Kua foaki e Iehova e takitakiaga he tau fakapotopotoaga takitaha ke he tau motua kua kotofa. (Gahua 20:28) Ko e tau tagata tane nei ne foli atu ke maeke ke lata ma e matagahua nei. (1 Timo. 3:1) Teitei oti ne tau matakainaga tane he fakapotopotoaga ne kua latatonu ma e tau matagahua lalahi ia. Tokologa e tau matakainaga kua tupu fakaagaga mo e lata ke tupu tumau i lalo he takitakiaga mo e lagomataiaga fakaalofa he tau motua he fakapotopotoaga. Kua lata e tau tagata tane nei mo tau tagata fakaako makutu he Tohi Tapu mo e tau tohi ha tautolu. Fakatata e lautolu e fakamakai ha lautolu he omaoma ke he tau motua kotofa he agaga, he fifitaki e tua ha lautolu, mo e feaki e tau fua ne moua mai he tau leveki.​—Hepe. 13:7, 17.

■ Taute e Gahua Mau: Kua matapatu e gahuahua he fakapotopotoaga ke he fakamatala e tala mitaki. (Mata. 24:14) Ko e fakamonuinaaga ha ia ka fakamatila e lautolu kua fakamalolo e tau laliaga ha lautolu he hu ko e tau paionia! Kua putoia tumau e mena nei he taute e tau hikihikiaga he tau momoui fakatagata ha lautolu. Ko e tau hikihikiaga lafi ki luga kua liga lata ma lautolu ke fakatumau he fahi pauaki nei he fekafekauaga. Ka ko lautolu kua taofi mau ke he matagahua nei he nakai oti ka mole e taha e tau po ke ha fakaloleloleaga fakaku kua moli ai ke moua e tau monuina loga ha Iehova. Ko e tau motua mo e tau patu fakahele ka fai vala ke he kautuaga he tau paionia, he fakamalolo a lautolu ke he tau kupu mo e tau gahua. Ko e aga mitaki ha ia ne fakatata he tau tagata fuata ne kua o fakahako ke he gahua paionia he oti mai he aoga! Kua tatai foki ni ke he tau tagata lalahi kua hu ko e tau paionia tumau he okioki hifo he tau gahua tupe ha lautolu. Ko e fakamalolo ha ia kua ta mai ke he Kerisiano tukulele ka kaufakalataha a ia mo e mafiti a Iehova ke he gahua fakapotopoto!​—Isa 60:22.

■ Lagomatai ke he Talagaaga mo e Levekiaga he Tau Fale he Feleveiaaga: Kua totou teau e Tau Fale he Kautu fou nei ti pihia mo e loga he tau Fale he Toloaga kua fita e talaga. Ofo ai, kua teitei oti e tau gahua he taute he tau matakainaga ne kua foaki noa fakamakai ha lautolu a tau magaaho mo e tau lotomatala. (1 Nofo. 28:21) Totou afe e tau tagata gahua makai kua leveki e tau fale nei ke he tuaga mitaki he taute e tau gahua kua liga lata ai. (2 Nofo. 34:8) Ha ko e gahua nei ko e taha vala he gahua tapu ha tautolu, ko lautolu kua lagomatai he foaki noa fakamakai e lautolu a lautolu, kua nakai ole tupe ke lata mo e gahua ha lautolu ke he mena nei, tuga ni e nakai ole a lautolu ke totogi he fakamatala he taha fale ke he taha fale, taute e tau lauga ke he fakapotopotoaga, po ke lagomatai e gahua he toloaga po ke fonoaga. Ko e tau tagata foaki noa nei kua foaki ha lautolu a gahua he pulega mo e talaga e tau fale he tapuakiaga ke fakaheke a Iehova. Kua lagomatai fakamakai a lautolu ke he tau tohi fakamatafakatufono, fakamau e tau hokotakiaga, kumikumi ke he tau totogiaga, mo e lafilafi e katoatoa he tau koloa kua lata. Ko e tau fekafekau fakamoli nei a Iehova kua nakai lafi falu kaitalofa po ke kumi puhala ke fai muka ke moua e lautolu he fehagai mo e tau gahua ne taute e lautolu, ha ko e ha lautolu a tau taleni mo e tau koloa oti ne tukulele ki a Iehova. (Kikite Our Kingdom Ministry, Fepuari 1992, lau 3, paratafa 10.) Ko e gahua nei kua lata mo e tau tagata gahua fakamakutu kua taute e tau gahua ha lautolu mo e “loto, tuga ne eke ke he Iki.”​—Kolo. 3:23.

¹⁵ Ti ko e heigoa, mogoia, kua taute e fakamakai he tau tagata a Iehova ke kehe lahi? Ko e aga he foaki atu. Ko e foaki fakamokoi ha lautolu kua putoia molea atu he tau tupe po ke tau koloa fakatino​—kua ‘poa mo e loto a lautolu.’ (Sala. 110:3) Ko e matapatu anei he tukuleleaga ha tautolu ki a Iehova. Kua palepale a tautolu ke he puhala pauaki. Kua moua e tautolu e “monuina” mo e kua “to fakalahi foki [ha tautolu a] helehele mai” ha kua loto fakaaue falu ke he tau mena kua taute e tautolu, to liu mai ni ki a tautolu a mui. (Gahua 20:35, 2 Kori. 9:6, Luka 6:38) Ko e Foaki Mena Aoga ue atu ha tautolu ko e Matua ha tautolu he lagi ko Iehova, kua “fakaalofa . . . ki a ia kua foaki mo e fakamakai.” (2 Kori. 9:7) To foaki mai e ia ki a tautolu fakalahi teau, mo e tau monuina ka tumau tukulagi. (Mala. 3:10; Roma 6:23) Ti ka fakatoka mai e tau matagahua he fekafekauaga ha Iehova ki a koe, to foaki noa fakamakai nakai e koe a koe mo e tali tuga ha Isaia: “Ko au hanai, kia fakafano atu e koe au”?​—Isa 6:8.