“Nakai Noa mo e Fua ha Mutolu a Fakafita ke he Gahua”

¹ Ko e manatu mafanatia ha ia! Nakai noa mo e fua hau a gahua he fekafekauaga a Iehova. (1 Korinito 15:58) Kehe ai, manamanatu ke he puhala nukua leva mo e taufetului e tau tagata he gahua ke lali ke fakaholo ki mua ha lautolu a tuaga he moui po ke ha lautolu a tuaga fakatupe. Liga kua tutuli e lautolu e tau fakaakoaga tokoluga ke he loga e tau tau po ke gahua fakatupa ke mautu ke he tau koloa tino. Ka e, ha ko e “vaha mo e tau mena ke tutupu ai,” liga to nakai hokotia a lautolu ke he tuaga hane foli a lautolu ki ai, po ke liga omoi a lautolu ke fehagai mo e nakai muhu koloa loga tuga he manako a lautolu ki ai. Tuga ni “e kai ai e matagi,” kua teao ha lautolu a tau laliaga. (Fakama. 1:14; 9:11) Ko e aoga ha ia, mogoia, ke lahi ha tautolu a gahua ke he gahua ni kua nakai fakateaga ha kua uho tukulagi ai!

² Ko e Gahua kua Aoga Moli: Ko e fakamatala e tala mitaki he Kautu he Atua ko e gahua aoga lahi he lalolagi. Ko e gahua kua lata ke taute pete ni e fanogonogo po ke nakai e tau tagata. Manako a tautolu ke talahau, tuga a Paulo: “Kua mea na au he toto he tau tagata oti. Ha ko e mena kua nakai toka e au taha kupu, neke nakai fakailoa atu kia mutolu e finagalo oti he Atua.”​—Gahua 20:26, 27.

³ Ka fanogonogo mo e talia e tau tagata ke he fekau he Kautu, ko e olioli ha ia! Ne galo he fifine fuata hana aniti ke he mate. Ne manamanatu a ia kua fano ki fe e aniti hana​—ke he lagi po ko helo? Ne liogi a ia ke he Atua ma e lagomatai, he fakaaoga e higoa Iehova, tuga he fakaako he tehina hana ke taute. Nakai leva ne fakaako Tohi Tapu a ia ti fakalataha atu ke he tau feleveiaaga Kerisiano. Ne moua e ia e onoonoaga fou katoa ke he moui mo e fakamamutu hana tau matutakiaga mo e tau kege puhalatu. Ne oti e ula, fakaaoga tulaki, mo e kaiha, he fifine fuata. Ne talahau e ia: “Ko e fakaalofa ni ki a Iehova ne taute au ke toka e puhala kelea pihia he moui. Ko Iehova ni he hana a fakaalofa hofihofi noa kua lahi ka foaki mai ki a au e amaamanakiaga he moui tukulagi.” Nakai tuai fakaaoga e ia hana moui ke he tau tutuliaga fakateaga.

⁴ Pete ni e fakaheu e tau tagata ke fanogonogo, kua fakakatoatoa agaia e koe taha mena aoga lahi. Ne iloa e lautolu na ahiahi atu e Tau Fakamoli a Iehova ki a lautolu. Ko e ha mutolu ni a mahani fakamoli, tua fakamoli, mo e fakaalofa kua fakamau ai. Ti, kua noa mo e fua kia hau a fakafita ke he gahua he Iki? Nakai!