Kua Fakatauhele Kia e Fakamatalaaga?
1 Tokologa e tau tagata ne lavelave e tau momoui. Ko e Tau Fakamoli a Iehova ne mua atu e lavelave—he ako e Kupu he Atua, feoaki ke he tau feleveiaaga, mo e fakalataha ke he fekafekauaga. Lafi ki ai, lavelave a tautolu he leveki ke he gahua tupe, gahua fakakaina po ke he aoga, mo e loga atu foki falu a matagahua, ne lauia oti mo e tau magaaho. Ka e au atu e uka he mena nei ke he tau ulu magafaoa.
2 Nakai hagahaga mitaki e tau tuaga tupe he falu a matakavi, ti kua gahua loa mo e taufetului e tau ulu he magafaoa ke kumi e mouiaga mitaki. Ha kua lauia lahi e tau magaaho mo e malolo ha lautolu ne fakaaoga he gahua, ati nakai lahi e magaaho ne toe ke he gahua fakamatala. Ha ko e matagahua tuai ha lautolu ke leveki e tau magafaoa ha lautolu, manatu e falu kua fakakaupa lahi e magaaho ha lautolu ne fakaaoga ke he fekafekauaga. (1 Timo. 5:8) Moli lahi, ha i ai e tau pehiaaga he vaha nei ne lauia lahi e tau puhala moua he tau mena aoga ma e moui. Ka e nakai lata e gahua tupe he tagata ke kanau e fakamatalaaga he tala mitaki. (Mareko 13:10) Haia, ne mitaki lahi ma tautolu ke kikite e tuaga moli ha tautolu.
3 Ha kua hikihiki tumau e tuaga he lalolagi, liga kua fakahihiga atu e ulu magafaoa ke fakaaoga fakalahi e magaaho ke he gahua, mo e manatu ke tanaki hake tau tupe hana ma e tau magaaho fakalutukia. (1 Kori. 7:31) Ka e pete kua loga e tau koloa ne moua ha kua lahi e gahua tupe po ke lafi mo e tau magaaho ne mahafagi ke he fakafiafiaaga tino mo e fakaolioli, na to mua atu kia e fiafia mo e makona he magafaoa kaeke hukui aki e magaaho ne lata ma e tau tutuliaga fakaagaga mo e fakalatahaaga tumau he tau feleveiaaga? Lata ia tautolu he kalo mai he ha mena ni ka fakahagahaga kelea e tuaga fakaagaga ha tautolu. He omaoma ke he tomatoma a Iesu ‘kia tanaki e tau koloa ke he lagi’ mo e ‘maukoloa ke he Atua’ ko e puhala pulotu.—Mata. 6:19-21; Luka 12:15-21.
4 Kumi Fakamua e Kautu: Ne fakaako e Iesu hana tau tutaki ke tuku e tau mena fakaagaga ki mua he tau mena oti kana. Kua fakamakamaka age e ia: “Aua neke fakaatukehe a mutolu, mo e pehe age, To kai e tautolu ha ha, po ke inu e tautolu ha ha, po ke tapulu a tautolu ha ha?” Kua ha ne pihia age a ia? Ne fakamaama age: “Ha ko e mena fioia he Matua ha mutolu ha ha he lagi kua aoga e tau mena oti ia kia mutolu.” Kaeke kua maama moli e tautolu e tau mena ia, to nakai fai fakatauhele ka auhia ai a tautolu he taute e tau mena ne matutaki mai e Iesu: “Ka kia kumikumi fakamua a mutolu ke he kautu he Atua mo e hana tututonu, ati lafi atu ai e tau mena oti ia [tau koloa kua aoga] kia mutolu.” To fakamoli oti he Atua e tau mena ia! (Mata. 6:31-33) Nakai ko e magaaho anei ke fakatauhele he tau fakaatukehe noa ke he tau tauteuteaga he moui po ke manako lahi ke tutuli e tuaga hagahaga mitaki he fakatokatokaaga ne nakai leva to mole atu.—1 Pete. 5:7; 1 Ioane 2:15-17.
5 Ko e kakano fakamua he gahua tupe ke leveki e tau manako fakatino he tagata. Ka e lahi fefe e tau manako ha tautolu? Ne tohia e aposetolo ko Paulo: “Kaeke kua moua e tautolu e tau mena kai, mo e tau mena ke fakatapulu ai, to lata ia kia tautolu.” Lali kia tautolu he mua atu foki ke he tau mena ia? Kaeke pihia, liga to helehele ni e tautolu e tau ola ne hataki ai e Paulo: “Ko lautolu kua manako ke maukoloa, kua moua a lautolu he kamatamata, mo e hele, mo e tau manako lahi ne loga kua goagoa ai mo e kelea ai, ko e tau mena ia kua fakatomo ai e tau tagata ke he mahaikava mo e malaia.” (1 Timo. 6:8, 9; Mata. 6:24; Luka 14:33) Mailoga fefe e tautolu kua fakatauhele ai a tautolu he tau manako lahi?
6 Kaeke ko e tau tutuliaga fakalalolagi ati fakalataha fakatote a tautolu ke he fonua po kua nakai kitia kua lata ke foafoa falu mena ma e tala mitaki, ati lata lahi ke hiki e tau mena kua mua atu ki a tautolu. (Hepe. 13:15, 16) Ha i ai e puhala moui fakalatalata ke taute ti maeke ke utakehe e fakalavelave ke he fakamatalaaga ha tautolu. Ko e tau gahua he Kautu kua lata tuai he tuku fakamua tumau ke he ha magaaho mo e malolo ka fakaaoga e tautolu.
7 Nakai Noa mo e Fua e Gahua: Fakamalolo mai e tau kupu a Paulo ki a tautolu “kia fakamakai nakai noa ke he gahua he Iki, he iloa [e tautolu] nakai noa mo e fua ha mutolu a fakafita ke he gahua he Iki.” (1 Kori. 15:58) Ko e “gahua [pauaki] he Iki” ko e fakamatala he Kautu mo e tauteaga tutaki. (Mata. 24:14; 28:19, 20) Ke fakalataha fakalahi atu, lata ia tautolu ke setulu e magaaho ma e fekafekauaga he tau fahitapu takitaha ti lali fakalahi ke aua fakaaoga e magaaho ia ma e taha tutuliaga foki. (Efeso 5:15-17) Ati, to nakai fakatauhele ai he ha gahua tupe po ke ha mena foki e fekafekauaga ha tautolu.
8 Kaeke foaki atu e tautolu hoko tautolu ni e kupu moli he Tohi Tapu ke he falu, to logona e tautolu e fiafia mua atu ne mai he aga fakamakai. (Gahua 20:35) He tutuli e gahua fakamatala he Kautu, ato onoono atu a tautolu ki anoiha mo e loto malolo, “ha ko e mena nakai hepehepe e Atua ke fakanimonimo ai e ia ha [tautolu] a tau gahua, mo e gahua fakamalolo he fakaalofa kua fakakite mai ai e [tautolu] ke he hana higoa.”—Hepe. 6:10.