“Tau Kupu kua Vagahau mo e Lata Ai”
1 Ko e paleko kia e tufatufa he fekau he moui ke he falu ki a koe? Logona kia e koe kua lata ia koe ke talahau taha mena hokulo ke hokotia ke he tau tagata fanogonogo hau? He magaaho ne fakafano e Iesu hana tau tutaki, ne tala age a ia ki a lautolu: “Ka e o a a mutolu mo e fakamatala atu, kia pehe atu, Kua tata mai tuai e kautu he lagi.” (Mata. 10:7) Nakai uka e fekau ke talahau. Nakai kehe foki he vaha nei.
2 Fa mahani ko e tau kupu gahoa kua lata ke kamata aki e fakatutalaaga. He feleveia a Filipo mo e eunuka Aitiope, ne huhu a ia: “Kua maama nakai kia koe e tau mena kua totou ai e koe?” (Gahua 8:30) Ko e fakatutalaaga palepale mitaki ha ia ne fua mai he “tau kupu kua vagahau mo e lata ai”!—Fakatai 25:11.
3 Maeke ia koe ke fakaaoga e fakafeleveia pihia he fekafekauaga hau. Fefe? He matakite mo e fifili e tau kupu kua lata ke he tau tutuaga. Huhu atu, ti fanogonogo ke he tali.
4 Falu Huhu Mukamuka: Ke kamata e fakatutalaaga, kia fakaaoga e koe falu he tau huhu nei:
◼ “Fakaaoga nakai e koe e Liogi he Iki (po ke, Ha Mautolu a Matua) he tapuakiaga hau?” (Mata. 6:9, 10) Fatiaki taha vala, ti talahau: “Huhu falu tagata, ‘Ko hai e higoa he Atua ne pehe a Iesu ke fakatokoluga (po ke, fakatapu)?’ Huhu falu, ‘Ko e heigoa e Kautu ne talahau e Iesu kua lata ia tautolu ke liogi?’ Kua makona nakai e tau tali ne moua e koe ke he tau huhu nei?”
◼ “Kua fa manamanatu nakai a koe: ‘Ko e heigoa e kakano he moui?’” Fakakite kua fakatatau ai ke he iloilo he Atua.—Fakama. 12:13; Ioane 17:3.
◼ “Manamanatu nakai a koe to galo fakaoti e mate?” Fakaaoga e Isaia 25:8 mo e Fakakiteaga 21:4 ke foaki e tali mauokafua.
◼ “Kitia nakai e koe e vailakau mukamuka ke he matematekelea he lalolagi?” Fakakite kua fakaako he Atua ke “fakaalofa atu a koe kia ia ne katofia a mua.”—Mata. 22:39.
◼ “To moumou kia he matematekelea lahi e lalolagi ha tautolu a taha aho?” Talahau atu e maveheaga he Tohi Tapu to tumau tukulagi e lalolagi.—Sala. 104:5.
5 Talahau e tala mitaki he puhala mukamuka mo e hako mo e leo totonu. To fakamonuina e Iehova hau a tau laliaga he talahau e “tau kupu” moli ke he falu.