To Fakamomoui e Tau Tagata Oti Kana
1. Ko e heigoa ne falanaki ki ai e tuaga ha tautolu mo e Atua?
1 Kua hafagi he fakaalofa noa he Atua e puhala ke he fakamouiaga. Ko e finagalo ha Iehova “ke fakamomoui e tau tagata oti kana, mo e hokotia a lautolu he maama ke he kupu moli.” (1 Timo. 2:3, 4) Kua falanaki ha tautolu a tuaga mo e Atua, nakai ke he ha tautolu a lanu, tuaga mahuiga, tau lotomatala, po ke foliga he tino, ka e ke he fakagahua e tua ke he poa lukutoto ha Iesu. (Ioane 3:16, 36) Ko e tau ekegahua he Atua, kua lata ia tautolu ke utakehe ha fakamailoga tagata, neke fakaohooho e tau loto ha tautolu ke fakaheu e tau tagata ka talia fakamakai e Iehova.
2, 3. Ko e heigoa ka lagomatai a tautolu ke nakai fakafili e tau tagata ha ko e ha lautolu a foliga he tino?
2 Nakai Fakafili: Kua kitia e Iehova e loto he tau tagata, mo e kua nakai fakavihia po ke fakamailoga tagata. (1 Samu. 16:7) Kua kitia foki e ia e tau foliaga ha lautolu. Ti, mailoga e ia a lautolu ne manako ke fakafiafia a ia ke mitaki lahi. (Hakai 2:7) Kitia nakai e tautolu e falu ke tuga ne kitia he Atua?
3 Liga kua ofo a tautolu he puhala tauteute he falu ne feleveia mo tautolu he fekafekauaga. Liga tui e lautolu e tau tapulu fulufagu po ke nakai gali, veveveve e tau hafe, po ke tau tifa he ne tau he ihu po ke laugutu. Liga nakai fai kaina falu. Po kua mahani vale e falu ki a tautolu. He nakai lata ke fakafili to nakai fakaai a lautolu ne pihia ke eke mo tau tagata tapuaki ha Iehova, kua lata ia tautolu ke moua e onoonoaga mitaki, “ha ko tautolu foki, ne goagoa a tautolu i tuai, mo e faliuliu, mo e fakaheheina.” (Tito 3:3) He mailoga e mena nei, to fakamakai a tautolu ke fakamatala ke he tau tagata oti, pihia foki ki a lautolu ne tuga kua nakai aoga ha ko e ha lautolu a tau foliga he tino.
4, 5. Ko e heigoa ne ako e tautolu mai he fakafifitakiaga ha Iesu mo Paulo?
4 Tau Fakafifitakiaga he Senetenari Fakamua: Ne fai magaaho a Iesu Keriso ke lagomatai a lautolu ne fakaheu he falu ke nakai fakaai ke maliu. (Luka 8:26-39) He nakai fakaata e mahani hepe, ne iloa e ia to putoia e tau tagata ke he puhala hepe he moui. (Luka 7:37, 38, 44-48) Ati fakakite e ia e manamanatuaga, he “hohofi hana fakaalofa kia lautolu, ha ko e mena tuga ne tau mamoe nakai fai leveki a lautolu.” (Mare. 6:34) Maeke nakai ia tautolu ke fifitaki katoatoa e fakafifitakiaga hana?
5 Kua taulitimaka, keli, mo e tuku fale puipui e aposetolo ko Paulo. (Gahua 14:19; 16:22, 23) Kua taute kia he tau ekefakakelea pihia a ia ke ita lahi mo e fakahiku kua moumou e hana magaaho ke he falu motu mo e falu matakau motu kehe? Nakai pihia. Ne iloa e ia kua maeke ke moua e tau tagata takitokotaha ne mahani fakamoli he tau matakau motu kehe oti, ati fakamalolo a ia ke kumi a lautolu. Kua pihia kia e onoonoaga ha tautolu ki a lautolu he fonua ne o mai he tau feakiaga mo e tau mahani fakamotu kehekehe?
6. Ko e heigoa e lauiaaga kua maeke he aga ha tautolu ki a lautolu ne fou he tau feleveiaaga he fakapotopotoaga?
6 Fakafeleveia e Falu he Vaha Nei: Kua tokologa e tau tagata he Atua ne kua fiafia he fakafelevia mai ke he fakapotopotoaga he tau matakainaga ne nakai onoono ke he foliga he tino. Ne hau e tagata tane ne veveveve e hafe mo e loloa e ulu, tui e tau mena tui kiva ke he Fale he Kautu i Sihamani. Kua talahaua a ia ke kelea e mahani. Moha ia, kua fakafeleveia fakamafanatia atu ki a ia he feleveiaaga. Ne lahi e nava hana ti liu a ia he tapu hake. He magaaho ku, ne fakamea e ia e foliga hana, oti e ula, mo e fakamatafakatufono e fakafetuiaga hana mo e hana kapitiga fifine. Nakai leva, ne fekafekau fakalataha a laua mo e fanau ha laua ko e magafaoa ki a Iehova.
7. Maeke fefe ia tautolu ke fifitaki e Atua nakai fakamailoga tagata ha tautolu?
7 He fifitaki ke he Atua nakai fakamailoga tagata ha tautolu, kia fakahoko atu e tautolu e uiina ke he tau tagata oti ka aoga mai he fakaalofa noa he Atua.
[Blurb he lau 3]
“Nakai fakamailoga tagata e Atua. Ka ko e tau tagata he tau motu oti kana ne matakutaku kia ia mo e mahani tututonu, kua talia ai e ia.”—Gahua 10:34, 35.